སྤྱི་ཟླ་7པའི་ཚེས་17ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་རུ་ཝང་ཏའི་རྒྱལ་ས་ཁི་ཀ་ལི་ནས་འཚོགས་པའི་ཨ་ཧྥེ་རི་ཁའི་མནའ་འབྲེལ་གྱི་སྐབས་ཉེར་བདུན་པའི་མགོ་གཙོའི་གྲོས་ཚོགས་འཚོགས་པར་ཨ་ཧྥེ་རི་ཁ་རྒྱལ་ཁབ་དང་མི་དམངས་ལ་གྲོས་ཚོགས་བདེ་བླག་ངང་འཚོགས་པར་རྟེན་འབྲེལ་ཞུས། 
        ཞི་ཅིན་ཕིང་གིས་ཨ་ཧྥེ་རི་ཁའི་མནའ་འབྲེལ་ནི་ཨ་ཧྥེ་རི་ཁའི་མཉམ་འབྲེལ་རང་སྟོབས་ཀྱི་རྩ་འཛུགས་ཤིག་ཡིན་པ་དང་དེས་ཨ་ཧྥེ་རི་ཁའི་མཉམ་འབྲེལ་རང་སྟོབས་དང་གཞི་གཅིག་ཅན་གྱི་འཕེལ་རིམ་ལ་སྐུལ་འདེད་ཀྱི་ནུས་པ་ཐོན་ངེས། ཨ་ཧྥེ་རི་ཁའི་མནའ་འབྲེལ་གྱིས་ཨ་ཧྥེ་རི་ཁའི་རྒྱལ་ཁབ་ལ་མཐུན་སྒྲིལ་དང་སྣེ་ཁྲིད་བྱས་ཏེ་ཞི་བདེ་དང་འཕེལ་རྒྱས་ལས་དོན་ཁྲོད་གྲུབ་འབྲས་ཆེན་པོ་ལེན་པར་ལྷག་བསམ་རྣམ་དག་གིས་སྨོན་འདུན་ཞུས་པ་ཡིན་ཞེས་བསྟན། 
        ཞི་ཅིན་ཕིང་གིས་ན་ནིང་ཟླ་12བར། ཀྲུང་གོ་དང་ཨ་ཧྥེ་རི་ཁའི་མཉམ་ལས་བགྲོ་གླེང་ཡོའུ་ཧན་སི་པོ་མཐོ་རིམ་གྲོས་ཚོགས་ལ་གྲུབ་འབྲས་ཆེན་པོ་བླངས་པར་མ་ཟད། ཀྲུང་གོ་དང་ཨ་ཧྥེ་རི་ཁའི་མཉམ་ལས་གཉིས་ཕན་དང་མཉམ་དུ་འཕེལ་རྒྱས་སུ་འགྲོ་བའི་དུས་རབས་གསར་པ་ཞིག་གི་འགོ་ཚུགས་པ་རེད། ཀྲུང་གོ་དང་ཨ་ཧྥེ་རི་ཁའི་མགོ་ཁྲིད་ཀྱིས་མཉམ་དུ་མཉམ་ལས་ལ་ཇུས་འགོད་དང་མཉམ་དུ་ཀྲུང་གོ་དང་ཨ་ཧྥེ་རི་ཁའི་མཉམ་ལས་འཕེལ་རྒྱས་ལ་འཆར་གཞི་བཟོས་པ་རེད། ཀྲུང་གོའི་ཕྱོགས་ནས་ཀྲུང་གོ་དང་ཨ་ཧྥེ་རི་ཁའི་འབྲེལ་བའི་འཕེལ་རྒྱས་ལ་ཚད་མཐོ་བའི་མཐོང་ཆེན་བྱེད་བཞིན་ཡོད་ལ། མུ་མཐུད་དུ་ལྷག་བསམ་རྣམ་དག་གིས་ཨ་ཧྥེ་རི་ཁའི་སྲིད་ཇུས་འདུ་ཤེས་དང་ཡང་དག་པའི་དགེ་ཕན་ལྟ་བར་གདོང་གཏད་ནས་ཁྱོན་ཡོངས་ནས་ཀྲུང་གོ་དང་ཨ་ཧྥེ་རི་ཁའི་མཉམ་ལས་འཆར་གཞི་ཆེན་པོ་བཅུ་ལག་བསྟར་བྱེད་པར་སྐུལ་འདེད་གཏང་བ་དང་། ཀྲུང་གོ་དང་ཨ་ཧྥེ་རི་ཁའི་ཁྱོན་ཡོངས་འཐབ་ཇུས་མཉམ་ལས་མཛའ་མཐུན་འབྲེལ་བ་སྔར་ལས་འཕེལ་རྒྱས་སུ་འགྲོ་བར་སྐུལ་འདེད་བཏང་ནས་ཀྲུང་གོ་དང་ཨ་ཧྥེ་རི་ཁའི་མི་དམངས་ལ་བདེ་སྐྱིད་སྐྲུན་ངེས་ཞེས་བསྟན།།