དཀར་མཛེས་བོད་རིགས་རང་སྐྱོང་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱིས་གཙོ་གཉེར་བྱས་པའི་སྐབས་གསུམ་པའི་གངས་དཀར་རི་བོའི་བོད་ཡིག་རྩོམ་པ་པོའི་སྨྱུག་ཚོགས་སྤྱི་ཟླ་7པའི་ཚེས་25ཉིན་གྱི་སྔ་དྲོར་དར་མདོ་ནས་འགོ་བརྩམས།  དཀར་མཛེས་བོད་རིག་རང་སྐྱོང་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་སྐལ་བཟང་འགྱུར་མེད་དང་།  ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོ་བཀྲ་བྷ།  གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས་ཀྱི་གཙོ་སྒྲིག་པ་དཀོན་མཆོག་རྡོ་རྗེ་དང་། སི་ཁྲོན་མི་རིགས་སློབ་གླིང་གི་དགེ་རྒན་བསོད་ནམས་རྒྱལ། སི་ཁྲོན་ཞིང་ཆེན་བོད་ཡིག་སློབ་གྲྭའི་དགེ་རྒན་ཆེན་མོ་གཉགས་ཆོས་ཉིད་རྡོ་རྗེ་དང་དགེ་རྒན་ཆེན་མོ་ཡེ་ཤེས་རབ་གསལ། གངས་དཀར་རི་བོ་རྩོམ་སྒྲིག་ཁང་གི་གཙོ་སྒྲིག་པ་ནད་མེད་ཚེ་རིང་། ཁམས་ཀྱི་གྲྭ་བཙུན་རྩོམ་པ་པོ་དང་མི་སྐྱ་རྩོམ་པ་པོ་སོགས་ཁྱོན་ཚོགས་མི་30ལྷག་ཚོགས་འདུར་ཞུགས།    

       ཐེངས་འདིའི་ཚོགས་འདུ་ནི་ཚེས་25ནས27བར་ཏེ་ཁྱོན་ཉིན་གསུམ་གྱི་རིང་ལ་འཚོག་རྒྱུ་ཡིན་ལ། ཚོགས་འདུའི་རིང་ལ་བོད་ཀྱི་སྒྲུང་གཏམ་པ་གྲགས་ཅན་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པའི་གླིང་གི་འགོ་གཙོ་གཞོན་པ་དགེ་རྒན་ཆེན་མོ་བཀྲ་བྷ་མཆོག་དང་། སི་ཁྲོན་ཏང་འཛུགས་དུས་དེབ་ཁང་གི་སྤྱི་ཁྱབ་རྩོམ་སྒྲིག་པ་གཞོན་པ། ལག་བསྟར་རྩོམ་སྒྲིག་པ། གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས་ཀྱི་གཙོ་སྒྲིག་པ་དཀོན་མཆོག་རྡོ་རྗེ། སི་ཁྲོན་མི་རིགས་སློབ་གླིང་གི་དགེ་རྒན་བསོད་ནམས་རྒྱལ་སོགས་ཀྱིས་བོད་ཀྱི་རྩོམ་རིག་ལ་དེང་རབས་ཀྱི་རྣམ་པ་གྲུབ་ལུགས་དང་དེའི་དགེ་མཚན་སྐོར། བོད་ཡིག་དྲྭ་ཐོག་རྩོམ་རིག་གི་གནས་བབ་དང་འཕེལ་ཕྱོགས། དེང་རབས་བརྩམས་སྒྲུང་གི་ངོས་འཛིན་སྐོར་སོགས་ཀྱི་འཆད་ཁྲིད་གནང་རྒྱུ་རེད།    ཐེངས་འདིའི་ཚོགས་ཞུགས་པ་ཁམས་ཀྱི་རྩོམ་པ་པོ་སོ་སོས་ལྟ་ཚུལ་ལྷུག་བརྗོད་ཀྱིས་ཁམས་ཁུལ་གྱི་གསར་རྩོམ་འཕེལ་རྒྱས་ཀྱི་ལམ་བུ་སྔར་ལས་ཡངས་པར་གཏང་རྒྱུ་དང་གངས་དཀར་རི་བོའི་མ་འོངས་འཕེལ་ཕྱོགས་སོགས་ལ་བསམ་བློ་བརྗེ་རེས་ཀྱི་བགྲོ་གླེང་བྱ་རྒྱུ་ཡིན། །