མི་ཉག་ཤར་སྟོད་བཞག་བྲ་དཀར་པོ་ཞེས་ཡོངས་སུ་གྲགས་པའི་དྲི་མེད་ཁ་བའི་རྡུལ་ཕྲན་མཛེས་པར་སྤུངས་པའི་གནམ་གྱི་ཀ་བ་ལྟར་ཀྲོང་ངེར་འགྱིང་བའི་གངས་རི་འདི་ནི། སི་ཁྲོན་ཞིང་ཆེན་གྱི་ནུབ་བྱང་མཚམས་ཀྱི་དཀར་མཛེས་བོད་རིགས་རང་སྐྱོང་ཁུལ་རྟའུ་རྫོང་མགར་ཐར་ཡུལ་ཤོག་གི་ས་ཁོངས་སུ་ཡོད་ལ། མཚོ་ངོས་ལས་མཐོ་ཚད་སྨི་5820ཡོད་ཅིང་། གངས་རི་ཆེན་པོའི་རི་རྒྱུད་ཀྱི་རི་རྩེ་ཨང་གཉིས་པ་ཡིན། ཤར་སྨད་འབོ་གངས་དཀར་དང་ཕན་ཚུན་ཞལ་གཟིགས་གནང་བ་ཇི་བཞིན་གནས་ཡོད། དེ་ཡང་མགར་ཐར་དམངས་ཁྲོད་དུ་དར་ཁྱབ་ཆེ་བའི་ངག་རྒྱུན་དུ་འདི་ལྟར་མཆིས་ཏེ། བཞག་བྲ་ལྷ་རྩེའི་གནས་བདག་ནི་སྲིད་པའི་ལྷ་ཆེན་རྨ་རྒྱལ་སྦོམ་ར་ལ་སྲས་གཉིས་ཡོད་པའི་ཆེ་བ་གཉན་ཆེན་ཐང་ལྷ་དང་ཆུང་བཞག་བྲ་འདི་ཉིད་ཡིན་པར་གྲགས། ཉིན་གཅིག་རྒྱ་ནག་རི་བོ་རྩེ་ལྔར་ཤོ་འཕེན་དུ་ཕྱིན་ཏེ་ཡར་ཡོང་སྐབས་འདི་ནས་བཞུགས་པར་བསྐུལ་བ་ན། རྨ་རྒྱལ་སྦོམ་རས་ངའི་བུ་འདི་ས་འདི་རུ་བཞག་ན་བྲའམ་མི་བྲ་ཞེས་གསུངས་འབྱོན་པས་གནས་བདག་གི་མིང་ལ་བཞག་བྲ་ལྷ་རྩེ་ཞེས་ཐོགས།

གསེར་གྱི་མཆོད་རྟེན་དང་གངས་དཀར་བཞག་བྲ།
金塔与雅拉雪山

རྒྱལ་མཆོག་བསྐལ་བཟང་རྒྱ་མཚོའི་རྣམ་ཐར་དུ། རྒྱལ་ཡབ་ནས། རྨ་ཆེན་སྤོམ་རའི་སྲས་མཆོག་ལྷ་ཆེན་བཞག་བྲ་ལྷ་རྩེ་འདི་ལ་གསོལ་མཆོད་ཅིག་བརྩམས་ན་སྐུ་ཁམས་ལ་ཕན་པ་ཨེ་ཡོང་ཞུས། ཞེས་པ་ལྟར་རོ།། འདིའི་མཚན་ཐོགས་ཚུལ་དང་ལྷ་རྩིས་ཕེབས་རྒྱུ་སོགས་ཀྱང་ཡོད་པས་དེའི་སྐོར་མཁས་གྲུབ་ཆགས་མེད་རིན་པོ་ཆེས་མཛད་པའི་ངོམས་པ་གདོང་གི་ལོ་རྒྱུས་སུ་གསལ་ལོ། ། བཙན་པོའི་རྒྱལ་རབས་ཀྱི་དགུང་བློན་དམག་དཔོན་གྱི་ཁུར་བཞེས་པའི་ཁྱིམ་རྒྱུད་གྲགས་ཅན་མགར་ཚང་གི་གདུང་རྒྱུད་འདི་ལས་མཆེད་པར་འདོད། དེ་ཡང་གུ་བཀྲའི་ཆོས་འབྱུང་དུ་གསལ་བ་ལྟར་བཞག་བྲ་ལྷ་རྩེ་ལས་འོད་གསལ་ལྷ་ཡི་རིགས་ཤིག་གནམ་ནས་མར་བབས་པས་མགར་གནམ་ཚ་འབྲུག་ཅེས་བཏགས་ཤིང་། དེའི་རྒྱུད་པ་དབུས་སུ་སོང་ནས་རིམ་གྱིས་བོད་བཙན་པོའི་རྒྱལ་ཁབ་ཀྱི་སྲི་ཞུ་བར་གྱུར་པའི་ལོ་རྒྱུས་འདིར་རེ་ཞིག་བཞག་ལ་སྐབས་དོན་ལ་འཇུག་ན། གངས་རི་འདིའི་རྒྱུད་དུ། མགར་ཁོག་དང་མགར་ལུང་། མགར་བ་མཚོ་དང་། མགར་བ་ལ་བཙས། ཕྱིས་སུ་མགར་སྟོང་བཙན་རྒྱ་ཡུལ་ནས་བྲོས་ཏེ་འདིར་ཐོན་སྐབས་རྗེས་འདེད་རྣམས་འཁྲུལ་ཕྱིར་ཐོ་ཡོར་བཙུགས་པ་རྣམས་ད་ལྟའང་མ་ཉམས་མངོན་སུམ་གྱི་ཡུལ་དུ་གྱུར་ཡོད།

ལྷག་བསམ་དག་པའི་གསོལ་འདེབས། ཧུའུ་ཏེ་མིང་གིས་པར་བླངས།

深深的祈祷

གཞན་ཡང་བཞག་བྲའི་རི་རྒྱུད་ལ་སངས་རྒྱས་སྟོང་སྐུ་ཞེས་པའི་རི་བོ་ངོ་མཚར་ལྟ་ན་སྡུག་པ་ཞིག་ཡོད་ལ་རི་དེའི་རྩར་སྔ་མོ་རྒྱ་བོད་བར་ཚོང་འགྲུལ་དུ་འགྲོ་བའི་རྡལ་པ་དག་གིས་ཚ་ཕོགས་བརྒྱབ་ས་ཡིན་པ་དང་དེ་ནས་རི་དྭགས་གཏན་ནས་རྔོན་མི་སྲིད་ཅིང་གནས་རི་ཁྱད་པར་བ་ཞིག་ཏུ་ངོས་འཛིན། དར་མདོའི་གཡག་རྭ་ལུང་པར་བསྐྱོད་པའི་ལམ་མདོ་གལ་ཆེན་དེར་དགྲ་ཤིང་ཞེས་པ་ཞིག་ཡོད་ལ་ཤིང་སྡོང་དེ་ལ་ལམ་འགྲོ་བ་ཡོངས་ཀྱིས་རྡོ་རེ་བཞུས་སྲོལ་ཡོད། རྡོ་དེ་ཕོག་ན་དགྲ་ཇག་འཚེ་བའི་འཇིགས་པ་ལས་ཐར་བར་འདོད། བཞག་བྲ་ལྷ་རྩེའི་སྟོད་ན་དུས་བཞིར་རང་མདངས་མ་ཡལ་བའི་ཤེལ་དཀར་རྡུལ་གྱི་ཕུང་པོ་དང་། བར་ན་བྲག་དང་རྫ་ཡི་གླེགས་བུ་དགུང་དུ་བརྩེགས་པ། འདབས་ན་བཞག་བྲག་གཡུ་མཚོ་སོགས་མཚོ་དང་མཚེའུ་རང་བྱུང་ཚ་ཆུ་དང་ལྷུང་ལྷུང་དལ་གྱིས་འབབ་པའི་ཆུ་ཕྲན་སྣ་ཚོགས་ཀྱི་ཡོན་ཆབ་གཙང་མའི་མཆོད་པ་རྒྱུན་དུ་བསྟར་བ། ལྷག་པར་དུ་རྗེ་ཙོང་ཁ་པའི་དབུ་བརྙན་རང་བྱུང་དུ་དོད་པ་ལྟ་བུའི་དད་པའི་མིག་གི་གཟིགས་མོར་ཡོད། ཚེས་བཟང་སྐར་བཟང་ལ་ཞོགས་པར་གནམ་མཁའ་སྔོ་སིང་ངེར་ཡོད་ནའང་བཞག་བྲའི་རྩེ་ནས་སྨུག་སྤྲིན་དུ་བ་དར་དཀར་འཁྱུག་པ་ལྟར་དགུང་དུ་འགྲོ་བས་མི་རྣམས་ཀྱིས་བཞག་བྲས་བསང་ཕུད་པ་རེད་ཅེས་བཤད་སྲོལ་ཡོད། ། 

བཞག་བྲ་གཡུ་མཚོའི་མཛེས་ལྗོངས།

雅拉友措湖美景