མ་བཀོད་རང་བྱུང་གི་གནས་མཆོག། མཐོ་ཞིང་ལྷུན་ཆགས་པའི་སྤྲིན་དཀར་བང་རིམ་གྱི་གསེབ་ན་མངོན་པར་བརྗིད་ཅིང་། ཤེལ་གྱི་མཆོད་རྟེན་ཀ་བ་གནམ་ལ་ཟུག་འདྲའི་ངོ་མཚར་བའི་གནས་ཁྱད་པར་ཅན་མཐོང་བ་ཙམ་གྱིས་ཡིད་ཀྱི་བརྟན་པ་དབང་མེད་དུ་འཕྲོག་ཅིང་། དྲན་པ་ཙམ་གྱིས་དད་པའི་བ་སྤུ་ལྡང་བར་འགྱུར་བ། རི་དེའི་དབུས་ན་མཚོ་དང་མཚེའུ་ཁ་བ་དང་ཡན་ལག་བརྒྱད་ལྡན་གྱི་ཆུ་སོགས་ཉམས་དགའ་བའི་གནས་དེའི་རི་རྩེ་ན་ཕྱིན་ཚེ་ཡུལ་ལུང་རི་ཕྲན་བཅུ་ཕྲག་དུ་མ་ལག་མཐིལ་དུ་བཀྲམས་པ་བཞིན་བཀྲ་ལམ་མེར་མཐོང་བ་དང་། བར་དུ་བྲག་དཀར་དེའི་ངོས་སུ་འབུར་དུ་དོད་པའི་གཟུགས་རིས་མི་འདྲ་བ་སྣ་ཚོགས་པ་ཡ་མཚན་དང་དགེ་མཚན་གྱི་དབྱིབས་ཁྱད་པར་ཅན་ཡོད་ཅིང་། ལྷག་པར་དུ་ལྷ་སྐུའི་རང་བཞིན་ཅན་གྱི་གཟུགས་རིས་སྣ་ཚོགས་ཡོད་ལ།། མཐའ་ནས་རྩི་ཤིང་སྣ་ཚོགས་ཀྱིས་ཡོངས་སུ་བསྐོར་ཞིང་སྤང་རི་དང་ནགས་རིའི་མཚམས་དེ་ན་རི་དྭགས་འདྲ་མིན་ཆེས་མང་པོ་འཚོ་ཞིང་གནས་ཤིང་གནས་རི་དེའི་རྒྱན་ཆ་ལྟ་བུར་གྱུར་པ་ཆེས་བདེ་ཞིང་སྐྱིད་པའི་ཡུལ་དུ་གྱུར་ཡོད། ཁྱད་པར་དུ་དུས་རབས་20པའི་ལོ་རབས་80ཡི་ནང་གནས་དེར་དངོས་སུ་བྲག་ངོས་ནས་གཏེར་དུ་མ་སྤྱན་འདྲེན་པར་མཛད། སྔོན་གྲུབ་རྗེ་པདྨ་བདུད་འདུལ་གྱིས་གནས་དེ་ན་ལོ་ངོ་དུ་མའི་རིང་ལ་སྒྲུབ་པ་ཉམས་ལེན་མཛད་ནས་མཐར་འཇའ་ལུས་སུ་གྲུབ་སོང་བ་རེད། གཞན་ཡང་གནས་དེའི་འགྲམ་ན་བྲག་གི་བུ་ག་ཕྲ་ལ་རིང་བ་ཞིག་ཡོད་པ་དེར་མི་རྣམས་ནང་དུ་འཛུལ་རྒྱུ་བྱུང་ན་གཟོད་འཆི་བའི་དུས་ན་ངན་སོང་གི་སྡུག་བསྔལ་ལས་གྲོལ་བ་བཤད་སྲོལ་ཡོད། ད་དུང་གནས་དེའི་འགྲམ་ཟུར་དུ་བྲག་རི་ཞིག་ཡོད་པ་དེ་ལ་སྐོར་བ་སྟོང་ཁ་ཤས་རེ་ཐུབ་ཚེ་བུད་མེད་མངལ་མི་ཆགས་པ་དག་ཆགས་པ་དང་ད་དུང་བུ་འདོད་པ་དག་ལ་བུ་ཆགས་པ་སོགས་ངོ་མཚར་བའི་གནས་ཁྱད་པར་ཅན་འདི་རིགས་ཧ་ཅང་མང་ངོ་།། མདོར་ན་གནས་རི་འདི་ལ་ཕྱི་ལྟར་ན་མ་བཀོད་རང་བྱུང་མཛེས་སྡུག་ལྡན་ཞིང་ཁྱད་པར་དུ་འཕགས་ལ། ནང་ལྟར་ལྷ་ཀླུ་གཉན་གསུམ་སོགས་ཕྱོགས་བཅུའི་གནས་ཆེན་ཁག་གི་གཞི་བདག་ཀུན་འདུས་པའི་ཀུན་འདུས་ལྷང་ལྷང་ནོར་བུ་ཡང་རྩེ། གསང་བ་ལྟར་ན་རྔ་ཡབ་ཟང་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་རྟེན་བརྟེན་པ་དང་བཅས་པ་མ་ལུས་པ་འདུས་པའི་གནས་མཆོག་འདི་བྱིན་རླབས་ཀྱི་ཚན་ཁ་མ་ཉམས་པར། གནའ་ནས་ད་བར་གནས་གསོལ་བསང་མཆོད་དང་ཕྱག་སྐོར་སོགས་རྒྱུན་ཆད་མེད་པར་ཆོས་དད་མང་ཚོགས་ཀྱི་སྲོལ་རྒྱུན་མི་ནུབ་ཞིང་ད་ལྟའི་བར་གནས་ཡོད། །