མཐའ་ནས་གངས་རི་ར་བས་ཡོངས་སུ་བསྐོར་གྱུར་པ། །
བར་དུ་མུ་མེད་རྩྭ་ཐང་ཡངས་པོ་རབ་མཛེས་ཤིང་། །
གངས་ལྗོངས་བདུད་རྩིའི་ལྷ་ཆུའི་འབྱུང་ཡུལ་ཞེས་གྲགས་པའི། །
ང་ཡི་མཛེས་སྡུག་ལྡན་པའི་ཕ་ཡུལ་གམ་པ་སྐྱིད། །
དྲིན་ཆེན་སློབ་དཔོན་པད་མའི་མཛད་རྗེས་ཁྱད་པར་ལས། །
ནད་རིགས་བཞི་བརྒྱ་རྩ་བཞི་ཡོངས་སུ་བཅོས་གྱུར་པའི། །
བདུད་རྩིའི་སྨན་མཆོག་བོད་ལྗོངས་ལྷ་ཆུ་རྟགས་ཅན་དེ། །
སྙན་གྲགས་བ་དན་ཕྱོགས་བཅུར་ཁྱབ་པ་ང་ཚོའི་རྒྱན། །
ལྷོ་ཡི་གནས་རི་གཞི་བདག་གངས་ཅན་རྒྱ་བོ་གཅིག །
བྱང་གི་གནས་བཟང་གུར་མེའི་ལྷ་ཆེན་ཟངས་ར་དང་། །
བཙན་པོའི་སྐབས་ཀྱི་རང་བྱུང་གནས་བརྒྱའི་སྒྲུབ་ཁང་སོགས། །
རང་ཅག་ཁ་བའི་རྒྱན་དུ་གྱུར་པར་ངོ་མཚར་ཆེ། །
སྐྱེས་ཆེན་དམ་པ་ནམ་མཁའི་སྐར་ཚོགས་བཞིན་གྱི་ཁྲོད། །
གཙང་གི་གདན་ས་བཀྲིས་ལྷུན་དགོན་ཆེན་ཕྱག་འདེབས་མཁན། །
རྒྱལ་བ་སྐུ་ཕྲེང་དང་པོ་དགེ་འདུན་གྲུབ་པ་མཆོག །
གམ་པའི་གུར་མེའི་ཡུལ་དུ་འཁྲུངས་པ་ངོ་མཚར་ཆེ། །
བོད་རྒྱུད་ནང་བསྟན་རྙིང་མའི་ཆོས་ཀྱི་དགོན་ལག་གཙོ། །
རིན་ཐང་གཞལ་དུ་མེད་པའི་རྟ་མགྲིན་རང་བྱོན་སྐུ། །
དད་ལྡན་བུང་བ་སྤྲིན་ཚོགས་འཁོར་བའི་གནས་བྱིན་ཆེན། །
གནས་མཆོག་རྡོ་རྗེ་ཉི་མའི་མཆོད་རྟེན་ང་ཚོའི་རྒྱན། །
ངོ་མཚར་ཅན་གྱི་མཚོ་མོ་གཡུ་མཚོ་དུང་མཚོ་ལས། །
འགྲོ་བའི་སེམས་ཅན་རྣམས་ཀྱི་ལས་སྒྲིབ་ལྕི་ཡང་དང་། །
རང་གི་འབྱུང་འགྱུར་ལས་དབང་མེ་ལོང་ལྟར་གསལ་བ། །
རྡོ་རྗེ་མཆོད་རྟེན་ཉི་མའི་གནམ་མཚོ་ང་ཚོའི་རྒྱན། །
རིན་ཆེན་ས་འོག་གཏེར་རྫས་དུ་མས་གྲུབ་གྱུར་པ། །
ནད་རིགས་དུ་མ་བཅོས་པའི་ངོ་མཚར་ཅན་གྱི་གནས། །
ལུང་གྲོང་དར་རྒྱས་གུར་མེའི་རང་བྱུང་ཆུ་ཚན་དག །
ང་ཚོ་གམ་པའི་རྒྱན་དུ་གྱུར་པར་ངོ་མཚར་ཆེ། །
མདོར་ན་ང་ཡི་སྐྱིད་པའི་ཕ་ཡུལ་གམ་པའི་ཕྱོགས། །
ངོ་མཚར་ཅན་གྱི་གནའ་ཤུལ་གྲགས་ཅན་དེ་དག་ལ། །
ས་ཕྱོགས་ཁག་གི་སྐྱེ་བོ་ཕོ་མོ་རྒན་གཞོན་ཚོས། །
ལན་ཅིག་གཟིགས་པར་ཕེབས་རྒྱུར་བསུ་མ་ཡང་ཡང་ཞུ། །
