སྤྱི་ཟླ་11པའི་ཚེས་1ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་པེ་ཅིང་དུ་ཀྲུའུ་ཞི་ཧུང་ཤིའུ་ཀྲུའུ་ཡིས་སྣེ་ཁྲིད་གནང་བའི་ཀྲུང་གོ་གོ་མིན་ཏང་གི་སྐམ་ས་ཆེན་པོར་འཚམས་འདྲི་ཚོགས་པར་མཇལ་འཕྲད་གནང་བ་རེད། 
         ཞི་ཅིན་ཕིང་གིས་ཧུང་ཤིའུ་ཀྲུའུ་ཡིས་ཚོགས་པའི་སྣེ་ཁྲིད་དེ་འཚམས་འདྲི་གནང་བར་ཕེབས་པར་དགའ་བསུ་ཞུས་གནང་ཞིང་། ཞི་ཅིན་ཕིང་གིས་ལོ་རྒྱུས་ཀྱི་དུས་གནས་འགྱུར་ལྡོག་ཆེན་པོའི་དུས་སྐབས་སུ་གོ་གུང་ཏང་གཉིས་ཀྱི་བར་དགའ་སྐྱོ་མང་པོ་ཡོད་མྱོང་བ་རེད། དུས་མཚུངས་སུ་ཀྲུང་ཧྭ་མི་རིགས་གོང་དུ་འཕེལ་བའི་གནད་འགག་གི་དུས་སྐབས་སུ་ཏང་གཉིས་ཀྱིས་མི་རིགས་ཀྱི་དྲང་བདེན་གྱི་དོན་དུ་མཉམ་ལས་ཀྱང་ཐེངས་ཁ་ཤས་བྱས་མྱོང་བ་རེད། དེས་མི་རིགས་དང་རྒྱལ་ཁབ་འཕེལ་རྒྱས་སུ་འགྲོ་བར་ནུས་པ་གལ་ཆེན་འདོན་པ་རེད། 2005ལོར་། ཏང་གཉིས་ཀྱིས་ལོ་རྒྱུས་ཀྱི་བཙན་འགག་གཏོར་ནས་འབྲེལ་གཏུག་གསར་པ་བྱེད་འགོ་བརྩམས་པ་དང་། ཏང་གཉིས་ཀྱི་དབུ་ཁྲིད་ཀྱིས་མཉམ་དུ་“མཚོ་འགག་གཉིས་ཞི་བདེའི་ངང་འཕེལ་རྒྱས་གཏང་རྒྱུའི་ཐུན་མོང་གི་འདུན་ལྗོངས།”ཁྱབ་སྤེལ་བཏང་ནས་མཚོ་འགག་ངོགས་གཉིས་བར་གྱི་འབྲེལ་བ་ཞི་བདེའི་ངང་འཕེལ་རྒྱས་གཏང་རྒྱུའི་ཁ་ཕྱོགས་གསར་པ་གསལ་སྟོན་གནང་བ་རེད། 2008ལོ་ནས་བཟུང་གོ་གུང་ཏང་གཉིས་ཀྱིས་མཚོ་འགག་ངོགས་གཉིས་ཀྱི་སྤུན་ཟླ་རྣམས་དང་མཉམ་དུ་མཚོ་འགག་ངོགས་གཉིས་བར་གྱི་འབྲེལ་བ་ཞི་བདེའི་ངང་འཕེལ་རྒྱས་བགྲོད་ལམ་ཕྱེས་ཏེ་མཚོ་འགག་ངོགས་གཉིས་ཀྱི་སྤུན་ཟླ་རྣམས་ལ་མིག་མཐོང་ལག་ཟིན་གྱི་ཁེ་ཕན་བསྐྲུན་པ་རེད། བདེན་པ་ཡོད་མེད་གཟུར་གནས་ཀུན་གྱིས་རྟོགས། གོ་གུང་ཏང་གཉིས་ཀྱིས་མཚོ་འགག་ངོགས་གཉིས་བར་གྱི་འབྲེལ་བ་ཞི་བདེའི་ངང་འཕེལ་རྒྱས་གཏོང་བར་བཞག་པའི་མཛད་རྗེས་རྣམས་ལོ་རྒྱུས་དེབ་ཐེར་ལ་འཁོད་ཡོད་ཅེས་བསྟན།  
         ཧུང་ཤིའུ་ཀྲུའུ་ཡིས་གོ་གུང་ཏང་གཉིས་ཀྱིས་མུ་མཐུད་དེ་“དགུ་གཉིས་ཐུན་མོང་ལྟ་བ་”མཐའ་འཁྱོངས་དང་“ཐའེ་ཝན་རང་བཙན་”ལ་ངོ་རྒོལ་བྱས་པའི་རྨང་གཞིའི་ཐོག་མཐུན་སྦྱོར་རྐྱེན་སྲོལ་ལག་བསྟར་བྱས་ཏེ། མཚོ་འགག་ངོགས་གཉིས་བར་གྱི་དཔལ་འབྱོར་ཉོ་ཚོང་དང་དམངས་ཁྲོད་བརྗེ་རེས་འགྲོ་འོང་ཇེ་ཆེར་གཏོང་བར་སྐུལ་འདེད་དང་། མཚོ་འགག་ངོགས་གཉིས་ཀྱི་གཞོན་ནུའི་བར་གྱི་སྤེལ་རེས་ལ་སྐུལ་སྤེལ་བཏང་ནས་འོད་སྟོང་འབར་བའི་ཀྲུང་ཧྭའི་རིག་གནས་དར་སྤེལ། སྐམ་ས་ཆེན་པོར་ཐའེ་ཝན་གྱི་ཚོང་དོན་གོང་དུ་འཕེལ་བར་རྒྱབ་སྐྱོར་དང་མཚོ་འགག་ངོགས་གཉིས་བར་གྱི་ཞི་བདེ་ལམ་ལུགས་ཅན་དུ་འགྱུར་བར་ཞིབ་དཔྱད་ཧུར་ཐག་བྱས་ནས་མཚོ་འགག་ངོགས་གཉིས་བར་གྱི་འབྲེལ་བ་ཞི་བདེའི་ངང་འཕེལ་རྒྱས་འགྲོ་བར་ཐུན་མོང་གིས་སྲུང་སྐྱོང་བྱས་ཏེ་སྤུན་ཟླ་རྣམས་སྔར་ལས་བདེ་ཞིང་སྐྱིད་པོ་ཡོང་བ་བཅས་བྱས་ཐོག་ཀྲུང་ཧྭ་མི་རིགས་བསྐྱར་དར་ཡོང་བའི་མདུན་ལམ་འོད་སྟོང་འབར་བ་གསར་སྐྲུན་བྱ་དགོས་ཞེས་བསྟན།།