གླང་མདུན་བདེ་སྒྲོན་ནི་ལོ་རབས་བདུན་ཅུ་པར་གནས་མཆོག་ལྷ་ས་ནས་སྐྱེས་ཞིང་། རང་ལོ་དགུའི་ཐོག་ནས་བཟུང་རི་མོ་འབྲི་བའི་ལམ་ལ་གོམ་ཁ་བསྒྱུར། རྗེས་སུ་ཁོ་མོའི་ཨ་ཕའི་སྐུལ་འདེད་འོག་ཕུལ་བྱུང་གི་རྒྱུགས་འབྲས་ལ་བརྟེན་ནས་བོད་ལྗོངས་སློབ་ཆེན་མཛེས་རྩལ་སྡེ་ཁག་ཏུ་རྒྱུགས་འཕྲོད། དུས་དེ་ནས་བཟུང་མཛེས་རྩལ་གྱི་ཆེད་ལས་སློབ་གཉེར་བྱེད་འགོ་བརྩམས། ཁོ་མོར་མཚོན་ན་བོད་རིགས་ཀྱི་སྲོལ་རྒྱུན་ལྷ་རིས་སྒྱུ་རྩལ་ལས་བརྒལ་དེ་དེང་རབས་མཛེས་རྩལ་གྱི་ཕྱོགས་སུ་ཁ་ལོ་བསྒྱུར་བའི་བོད་པ་སྔ་ཤོས་ཡིན་ལ། ལྷག་པར་མཛེས་རྩལ་གྱི་ལམ་ནས་གྲུབ་འབྲས་གཡུར་ཟ་ལོན་པའི་བོད་པའི་མཛངས་མ་ཉག་གཅིག་ཡིན་ཞེས་བཤད་ཀྱང་ཆོག སྔ་གཞུག་ཏུ་ཁོ་མོའི་བརྩམས་ཆོས་དུ་མ་ཉིའུ་ཡོག་ལོ་པེན་དངོས་མང་བཤམས་སྟོན་ཁང་དང་། ཀྲུང་གོའི་མཛེས་རྩལ་གླིང་། དེ་རིང་མཛེས་རྩལ་གླིང་། དབྱིན་ཅིའི་རོ་ཟི་པར་ཁྱམས། སིང་ག་ཕོར་ཡུས་ཞོན་མཛེས་རྩལ་གླིང་སོགས་ནས་འགྲེམས་སྟོན་ཐེངས་མང་བྱས་ཤིང་། དེ་མིན་ཤེས་རིག་གི་རྒྱལ་ཁམས་དབྱི་ཐ་ལི་དང་འཇར་མན། ཧྥ་རན་སི་སོགས་ནས་འགྲེམ་སྟོན་གང་མང་བྱས། དེ་བས་ཀྱང་རྒྱལ་ཁབ་ཕྱི་ནང་གི་མིང་དུ་གྲགས་པའི་བཤམས་སྟོན་ཁང་དང་མི་སྒེར་གྱིས་ཁོ་མོའི་རི་མོའི་བརྩམས་ཆོས་གང་མང་ཉར་ཚགས་བྱས་ཡོད། མིང་དུ་གྲགས་པའི་རི་མོ་བ་དང་དཔྱད་བརྗོད་པ་གྲགས་ཅན་ཡུས་ཡོ་ཞིན་གྱིས་ཁོ་མོའི་པར་རིས་ལ་འདི་ལྟར་གདེང་འཇོག་བྱས་ཡོད་དེ། བདེ་སྒྲོན་གྱི་པར་རིས་ལ་བྱིས་སྒྲུང་ལྟ་བུའི་དག་གཙང་གི་བསམ་བློའི་མཁའ་དབྱིངས་ཞིག་ཡོད་ལ། ཁོ་མོའི་པར་རིས་ལ་དེང་རབས་བརྟགས་རིས་ཀྱི་རྣམ་པ་དང་བོད་ཀྱི་སྲོལ་རྒྱུན་རྣམ་པ་གཉིས་སུ་འདུས་ཡོད། ཁོ་མོའི་པར་རིས་ལས་སྒོར་ཞིང་ཆེ་བའི་མིག་ཟུང་གིས་འཇིག་རྟེན་རྒྱན་པར་བྱས་ཡོད་ལ། མཛེས་སྡུག་གི་སེམས་ཁམས་ག་ས་གང་ལའང་ཁྱབ་ཡོད་ཅེས་གདེང་འཇོག་ཆེན་པོ་བྱས་ཡོད།

      

       འཕྲིན་སྦྱོར་དང་དེང་རབས་བརྡ་འཕྲིན་གྱི་དུས་འདིར་མཛངས་མ་བདེ་སྒྲོན་གྱི་པར་རིས་དག་བཤམས་སྟོན་ཁང་དང་པར་ཁྱམས་ཀྱི་བཀག་རྒྱ་ལས་གྲོལ་ཏེ། འཕྲིན་སྦྱོར་གྱི་ལམ་ནས་བོད་པ་དང་འཛམ་གླིང་ཡུལ་གྲུ་སོ་སོར་འདི་ལྟ་བུའི་ཁྱད་འཕགས་རང་བཞིན་ལྡན་པའི་སྒྱུ་རྩལ་པ་ཞིག་ཡོད་པ་མཁྱེན་དུ་བཅུག་ཅིང་། ལྷག་པར་ན་ནིང་ད་ལོར་བོད་ཀྱི་རིག་གནས་རྒྱུ་ཆ་བྱས་པའི་རྒྱན་གོས་དཔེ་གསར་ཅན་དར་ཆེ་བའི་དུས་འདིར་ཁོ་མོའི་བརྩམས་ཆོས་འགའ་རེ་ཡང་རྒྱན་གོས་ཀྱི་ངོས་ནས་མཐོང་རྒྱུ་འདུག

        ཁོ་མོར་མཚོན་ན་བོད་ཀྱི་སྲོལ་རྒྱུན་ལྷ་རིས་སྒྱུ་རྩལ་གྱི་སྒྲོག་གི་མ་བཅིངས་ཤིང་། དེང་རབས་སྣ་མང་ཁྲ་ཁྲའི་སྣང་ཚུལ་གྱི་མ་གོས་པའི་བོད་ཀྱི་རི་མོ་བ་ཞིག་ཡིན་ལ། ད་ལྟའི་དུས་འདིར་གཞོན་སྐྱེས་དག་གིས་ཁོ་མོའི་《མེ་འཁོར་》དང་《གཅེན་གཅུང་》སོགས་ཚབ་མཚོན་གྱི་པར་རིས་ལ་སྤྲོ་བ་ཆེ་ཤིང་། ལྷག་པར་པར་རིས་དེ་དག་ལས་བོད་མི་དག་མ་ཞིག་གི་ནང་སེམས་ཀྱི་འགྱུར་བ་དང་འཇིག་རྟེན་ལྟ་བ་དང་རིན་ཐང་ལྟ་བ་ལྷད་མེད་མངོན་ཡོད། ཁོ་མོའི་རི་མོ་ནི་ཕྱི་རོལ་བས་བོད་ལ་ལྟ་བའི་སྒེའུ་ཁུང་ཆུང་ཆུང་དེ་ཡིན་ལ་ཁོ་མོའི་རི་མོ་ནི་ངེད་ཅག་གཞོན་སྐྱེས་དག་གིས་ཕྱིར་མིག་ལྟ་སའི་ཕ་ཡུལ་གྱི་མེ་ལོང་དེ་ཡང་ལོས་ཡིན། །