ཚེར་མའི་མེ་ཏོག་བཞད་པའི་འཇིག་རྟེན་ན།།
སེར་བའི་ཁ་དོག་འཛུམ་པའི་ལོ་ཟླ་ཞིག།
རྣམ་ཤེས་རི་ལ་བྲོས་པའི་རྨི་ལམ་ནང་།།
ཁྲག་གི་མིག་ཆུ་ཞིག་གི་གཏམ་རྒྱུད་འཁྱིལ།།
དབྱངས་ཀྱི་ཕོ་བྲང་གས་པའི་ལམ་སྣེ་ན།།
ཚིག་གི་ང་རོ་ཆག་པའི་ཟླ་འོད་ཅིག།
ནམ་མཁའི་དབྱིངས་ནས་གྲུག་པའི་ཕོ་བྲང་དེའི།།
ཀ་གདུང་རེ་ལ་དབྱངས་གསལ་སོ་བཞི་འཐོར།།
དུ་སྤྲིན་འཇའ་ལ་འཐིམ་པའི་བར་སྣང་ན།།
ཚེ་རབས་ལས་ཀྱི་ཤི་བའི་འོད་ཟེར་ཞིག།
གླེགས་བམ་ཁུར་བའི་གྱི་ལིང་རྟ་མཆོག་དེའི།།
རྨིག་རྗེས་རེ་ན་གསང་བའི་རྣམ་ཐར་རེ།།
ལོ་རྒྱུས་རླུང་གིས་སྤུར་བའི་ཁང་ཐེད་ནང་།།
འོ་མའི་ཁྲུས་ལ་རོལ་བའི་ལྷ་མོ་ཞིག།
ཙི་གུས་ཟོས་པའི་ཀོ་ལྷམ་རྙིང་ཧྲུལ་འགྲམ།།
བརྗོད་བྱ་མེད་པའི་གསེར་བྲིས་གླེགས་བམ་ཞིག།
འདབ་ལོའི་ཁ་དོག་བོར་བའི་རི་ངོགས་སུ།།
འཇའ་ཚོན་སྣ་ལྔ་འཚོལ་བའི་རི་བོང་ཞིག།
གངས་རི་དཀར་པོ་དེ་ཡི་ཕ་རོལ་ན།།
སྲོག་གི་ཞགས་པ་འཛིན་པའི་སེང་འབག་ཅིག།
རྒྱ་སེ་ཚིག་པའི་དུ་བའི་ཨ་ལོང་ནང་།།
གཤོག་ཐོག་ཅང་ཤེས་ཁྱུ་ཡིས་འཕུར་ལྡིང་མཛད།།
མེ་སྤྲིན་དམར་ནག་འཁྲུགས་པའི་ཐབ་ཁུང་ནས།།
ཤ་ཚིལ་བཙོས་མའི་རླངས་ཞགས་ཐུ་ལུ་ལུ།།
མུན་པའི་འཕྱོར་ལྭ་དེ་ཡི་བར་གསེང་ན།།
འོད་ཀྱི་འཛུམ་མདངས་ངོམ་པའི་ཀོ་གྲུ་ཞིག།
སྒྲོན་མེའི་སྣེ་ལ་བཟུང་བའི་ལོང་བ་དེ།།
འོད་ཀྱི་ཞིང་དུ་སླེབས་སམ་བྱེ་ཐང་ལགས།།
