མི་འགའ་ཞིག་སྐྱེས་མ་ཐག་ནས་རྒས་སོང་།
རྒ་བའི་གོ་རིམ་ནི་མེ་ཏོག་ཅིག་སད་ཀྱིས་བཅོམ་པ་ལས་ཀྱང་མགྱོགས་པོ་འདུག
ང་ཡང་རྒ་བར་འཇིགས་པའི་མི་ཞིག་ཡིན་པས།
རྒ་བའི་ཕྱོགས་སུ་མནོ་བསམ་ཡང་ཡང་བཏང་མྱོང་།
སྤྱི་ཚོགས་ཞེས་པའི་འཐབ་ར་འཇིགས་པོ་འདི་ནས།
མ་འོངས་པར་སྨོན་པའི་གླུ་དབྱངས་ཤིག་ལེན་ན་འདོད་ཀྱང་།
ཆོམ་སྒྲ་དང་ཟང་ཟིང་གིས་ང་ཡི་ཡིད་ཁམས་རབ་ཏུ་དཀྲུགས།
ནམ་མཁའ་བཞིན་འབྱམས་ཀླས་པའི་དྲན་པ་འདིའི་ནང་དུ།
མཛེས་སྡུག་མཚོན་བྱེད་ཀྱི་མེ་ཏོག་རྐང་གཅིག་ཀྱང་ཤོང་ཐབས་མེད་པས།
ང་ལ་མཚར་སྡུག་གི་རྨི་ལམ་ཞིག་རྨི་བའི་སྐལ་བ་ཞིག་ཡོད་སྲིད་དམ།
བགྲེས་པོ་ཞིག་གིས་རང་ཉིད་ཀྱི་ལོ་རྒྱུས་བརྗེད་པ་ལྟར།
ནམ་ཞིག་ལ་ངས་ཀྱང་རང་ཉིད་འབོར་ངེས་རེད།
དེ་དུས་ངས་ཁྱོད་ཀྱི་ཚབ་ཏུ་མི་གཞན་གྱི་རྐང་རྗེས་བསུབ་ངེས་ལ།
ཁྱོད་ཀྱི་ཚབ་ཏུ་གཞན་གྱི་བོའུ་མཆུ་རང་ལ་གཏད་ནའང་སྲིད།
འོན་ཀྱང་ཁྱོད་ལ་འགྱོད་གདུང་གི་མིག་ཆུ་མེད་པར་ཤོག
ཁྱོད་ལ་སྡུག་བསྔལ་གྱི་ན་ཟུག་མེད་པར་ཤོག
ང་ཡིས་ག་དུས་ཀྱང་ཁྱོད་ལ་དགའ་བའི་བདེན་པ་བསྲུང་ངེས།
ང་ནི་མུན་པ་དང་འགྲོགས་པའི་ལམ་པ་ཞིག་ཡིན་པས།
ང་ལ་སྐྱེ་བ་དགུ་ལ་སེལ་མི་ཐུབ་པའི་ཉེས་པ་ཡོད།
ངས་མི་ཞིག་ལ་བལྟས་བལྟས་རྗེས་རང་ཉིད་འཚོལ་དགོས་པའང་བརྗེད་འགྲོ་བས།
ང་ལ་མིག་ཆུ་ཡོད།
ངའི་མིག་ཆུའི་ཁ་དོག་ནག་པོ་ཡིན།
ངས་རང་ཉིད་ལ་ནག་པོ་ཞེས་པའི་མིང་ཞིག་ཀྱང་བཏགས་ཡོད།
མཚམས་ལན་རེར་ངར་ང་དང་ཁྱོད་ཅེས་པའི་དབྱེ་བའང་འབྱེད་རྒྱུ་མེད།
སེམས་པ་བློང་བློང་དུ་གཏོང་བའི་རོལ་དབྱངས་ནག་པོ།
གར་མའི་གདོང་ན་མངོན་པའི་མེ་ཏོག་གི་འཇོ་སྒེག
ཡི་གེ་དང་ཨང་གི་སོགས་ཅི་ཡང་མེད་པའི་སྤྲོ་སྐྱིད་ཀྱི་རྒྱལ་ཁམས།
ལོ་བརྒྱར་སོང་ཡང་བསླེབ་དཀའ་བའི་རྨི་ལམ་གྱི་གྲོང་ཚོ་ན།
དུས་ཚིགས་རིས་མེད་དུ་ཡིད་སེམས་ཀྱི་ཀློང་དུ་ཤེད་ཀྱིས་མངོན་ཞིང་སླར་ཡང་མེད་པར་གྱུར་པ་ག་རེ་རེད།
བདག་ཏུ་འཛིན་འདོད་ཀྱི་མཛེས་སྡུག་མཐའ་དག་བསླུ་བྲིད་ཀྱི་གསོར་འབིག་རེ་རེར་གྱུར་ཏེ་སེམས་ཀྱི་རི་མོ་
ལ་རྨ་ཁ་ཙམ་ཕབ་ཡོད་པ་སུ་ཡིས་རྟོགས།
ཞོགས་ནས་ས་སྲོད་དང་སྐྱེས་པ་ན་འཆི་རག་བར་དུ།
སོང་སོང་བའི་མཐའ་མར་རྐང་རྗེས་ནག་པོ་རེད།
ལག་དམར་ཞིག་དང་འདྲ་བར་རེ་དོགས་དང་སྔངས་འཚབ་ཀྱིས་ཉི་མ་གཅིག་སྐྱེལ་བ་ནི་མི་ལོ་གཅིག་ཉུང་དུ་
ཕྱིན་པ་ལས་ཀྱང་སྐྱོ་བོ་འདུག་ཨང་།
འདས་ཟིན་པ་ཇི་སྙེད་ལོ་རྒྱུས་ཀྱི་དུར་དུ་སྦས་རྗེས།
ང་རང་ཕ་ཡུལ་དུ་ལོག་སྟེ།
སུ་ལའང་ཁ་ཡ་མི་བྱེད་པར།
ཁྱོད་དང་མཉམ་ཏུ་ཚེ་ཚེ་རབས་རབས་སུ་འབྲུ་རིགས་གདབ་ན་བསམ།
