མེ་ལྕེ་ཡོད་ཚད་ཞི་ཚར་རྗེས་ཀྱི་ཐལ་རྡུལ་སྤར་མོ་གང་བོ་དེ།
ཁྱེད་ཀྱིས་སུ་ཞིག་ལ་བསྐྱུར་པའི་མཐའ་མཇུག་གི་ལེགས་སྐྱེས་དམར་པོ་ཡིན།
ཆུ་མོ་ཡོད་ཚད་བསྐམས་ཚར་ཤུལ་གྱི་རྡོ་བ་མཁྲེགས་པོ་དེ་དག
ཁྱེད་ཀྱིས་སུ་ཞིག་ལ་བསྐྱུར་པའི་མཐའ་མཇུག་གི་མིག་ཆུ་རྡོག་པོ་རེ་རེ་ཡིན།
ཆར་བ་འབབ་ཐེངས་རེར། ངས།
མཁའ་དབྱིངས་ནས་ལྷུང་འོངས་པའི་ཆར་གྱི་ཐིགས་པ་རེ་རེ།
ཁྱེད་ཀྱིས། དག་པའི་ཞིང་ནས།
ངའི་སླད་དུ་བཞུར་བཞིན་པའི་མིག་ཆུ་ཐིགས་པ་རེ་རེ་རེད་ཨང་སྙམ་བྱུང་།
ཁ་བ་འབབ་ཐེངས་རེ་རེར། ངས།
མཁའ་དབྱིངས་ནས་ལྷུང་འོངས་པའི་ཁ་བའི་འདབ་མ་རེ་རེ།
ཁྱེད་ཀྱིས། སུམ་ཅུ་རྩ་གསུམ་པའི་གནས་ནས།
ང་ལ་བསྐུར་འོངས་པའི་འཕྲིན་ཐུང་རེ་རེ་རེད་ཨང་སྙམ་བྱུང་།
གནའ་སྔ་མོ་སྔ་མོ་ཞིག་ལ། རི་ཡི་རྩེ་མོ་ཞིག་ནས།
ཁྱེད་ཀྱི་མཆུ་སྒྲོས་ཀྱིས་རྒྱང་རིང་སྟོན་བཞིན།
འུ་གཉིས་ཀྱི་བདེ་སྐྱིད་དེ་རྒྱང་རིང་ན་ཡོད་ཟེར།
ཁྱེད་ཀྱིས། མཆུ་སྒྲོས་ཤིག་ཤིག་འདར་བཞིན།
འུ་གཉིས་ཀྱི་རྨི་ལམ་དེ་སྨུག་སྤྲིན་ཡལ་རྗེས་ཀྱི་ནམ་མཁའ་ན་ཡོད་ཟེར།
ཟླ་དྲུག་པའི་རྩྭ་ལྗང་ཡོད་ཚད་ཀྱི་རྣམ་ཤེས་རེ་རེ།
ཟླ་དྲུག་པའི་མེ་ཏོག་ཡོད་ཚད་ཀྱི་འཛུམ་མདངས་རེ་རེ།
ངའི་བྱིས་སྒྲུང་ནང་གི་གསང་བ་ཡིན་པ་བཞིན།
ཁྱེད་གང་ནས་འོངས་ཤིང་།
ཁྱེད་གང་དུ་ཆས་སོང་བ། ང་ལ་མཚོན་ན།
གབ་ལན་མེད་པའི་གབ་ཚིག་ཅིག་ཡིན་ནའང་།
ངའི་དབུགས་ཀྱི་རྒྱུ་བ་མ་འགགས་བར་དུ།
ཁྱེད་ཁོ་ན། ངའི་བགྲོད་ལམ་གྱི་སྣེ་རུ།
ང་ལ་ལག་པས་གཡབ་མོ་ཡང་ཡང་གཏོང་བཞིན་པའི།
ཁེར་རྐྱང་གི་སྲས་མོ་དེ་ཡིན་ཞིང་།
ཁྱེད་ཁོ་ན། ངའི་ཚེ་གང་གི་ནམ་མཁའ་ཡིན།
གཤོག་པ་ཡིན། མེ་ལྕེ་ཡིན།
མདོར་ན། ཁྱེད་ཁོ་ན།
ངའི་སྐྱེ་བ་ཡོད་ཚད་ཀྱི་གདམ་གསེས་ཡིན།
ཁྱེད་ཀྱིས་ང་སྦར་མྱོང་།
ང་ནི་འཆི་བདག་གི་ལག་མཐིལ་ན།
ཁུ་སིམ་མེར་ལུས་ཡོད་པའི་བུད་ཤིང་སྐམ་པོ་དེའོ།།
ང་ནི། མུན་ནག་གི་ཁོང་གསེང་ན།
གྲགས་མེད་འགུལ་མེད་དུ་ལུས་ཡོད་པའི་སོལ་བ་ནག་པོ་དེའོ།།
ལོ་ཟླ་མང་བོ་ཞིག་གི་སྔ་རོལ་ཏུ། ཁྱེད་ཀྱི་ལག་ཟུང་གིས།
ང་མེ་ལ་སྦར་སོང་།
འཆི་བདག་གི་སེམས་པ་དེ་རྡོ་ལས་མཁྲེགས་ནའང་།
མུན་ནག་གི་ངོ་གདོང་དེ་འཇིགས་སུ་རུང་ནའང་།
འོད་སྣང་གི་ཀློང་ནས། ངས་ཁྱེད་རྙེད་ཅིང་།
ཁྱེད་ཀྱིས་ང་ལ་དྲོད་ཁོལ་གྲངས་མེད་ཅིག་བྱིན་སོང་།
ཤིན་ཏུ་འཁྱགས་པའི་ལོ་ཟླ་རེ་རེའི་ནང་།
ཤིན་ཏུ་སྐྱོ་བའི་ཉིན་མཚན་རེ་རེའི་ནང་།
ཤིན་ཏུ་བཟོད་ཐབས་བྲལ་པའི་སྐར་ཆ་རེ་རེའི་ནང་།
ཁྱེད་ཀྱི་གཏམ་རྒྱུད་དང་འཛུམ་མདངས་ཀྱིས།
ང་མེ་ལ་སྦར་མྱོང་བའི་དབང་གིས།
ངས། འཆི་བདག་གི་ལག་མཐིལ་ནས།
སྔངས་སྐྲག་གི་དྲི་མ་ཡེ་ནས་ཚོར་མ་མྱོང་ཞིང་།
ངས། མུན་ནག་གི་ཁོང་གསེང་ནས།
འཁྱག་གྲང་གི་བྲོ་བ་ཡེ་ནས་མྱངས་མ་མྱོང་།
བཀའ་དྲིན་ཆེ། ང་མེ་ལ་སྦར་མཁན་ལགས།
ཐུགས་རྗེ་ཆེ། ང་མེ་ལ་ངོ་སྤྲོད་གནང་མཁན་ལགས།
ཁྱེད་ཀྱིས་ང་བརླན་མྱོང་།
གོམ་སྒྲ་དེ། གཏན་ནས་ཐོས་ཐབས་མེད་ནའང་།
ཆར་རླུང་གི་ཁྲོད་དུ། ངས་སྔར་ལྟར།
གཏིང་ཟབ་པའི་རྐང་རྗེས་དཀར་པོ་དེ་འཚོལ་བཞིན་ཡོད།
གླུ་སྒྲ་ཡོད་ཚད་འཇགས་ཚར་རྗེས། སྒྲོན་མེ་ཡོད་ཚད་གཟིམས་ཚར་རྗེས།
སྐམ་རིད་ཀྱི་ལག་པ་མཁྲེགས་པོ་ཞིག་གིས།
ཉིན་དང་མཚན་ལ།
ངའི་གདོང་དུ་རྨ་ཁ་ཡང་ཡང་རྐོ་བཞིན་འདུག་ནའང་།
མི་ཡུལ་ནས། ངས་སྔར་ལྟར།
དུས་ཚོད་ཀྱི་ཁྲག་ཐིགས་རེ་རེ་བསགས་ནས།
སྙན་ངག་པ་བཞིན། ཕ་བོང་དམར་པོ་ཞིག་གི་བྲང་གཞུང་ལ།
སྙན་ངག་རྐོ་བཞིན་ཡོད།
ཆུ་ཐིགས་དྭངས་མོ་ཞིག་གིས། མཚན་མོ་ཞིག་ལ།
ང་ལ་ཁྱེད་ཀྱི་གཏམ་རྒྱུད་ཡོད་ཚད་བརྗོད་ཚར་རྗེས།
གློ་བུར། ང་།
མཐའ་དབུས་མེད་པའི།
རྒྱ་མཚོ་ཆེན་པོ་ཞིག་གི་ནང་དུ་ལྷུང་ཚར་ཞིང་།
ལོ་ཟླ་མང་བོ་ཞིག་གི་རིང་ལ། ངས།
རང་ཉིད་ཀྱི་རྨི་ལམ་ནང་གི་སྐམ་ས་དེ་གཏན་ནས་རྙེད་མ་སོང་།
ངས་ལག་ཟུང་གིས་རང་ཉིད་ཁྱེད་ལ་བཏེགས་ནས།
མགྲིན་པ་རྣོང་བཞིན་གླུ་གཞས་གཏོང་ཐེངས་རེར།
ཁྱེད་ཀྱིས་ངའི་གངས་རིའི་རྩེ་ན་ཁ་བ་མི་འདུག་མ་ཟེར།
ཁྱེད་ཀྱིས་ངའི་མིག་ཀོང་ནང་ན་མིག་ཆུ་མི་འདུག་མ་ཟེར།
དམ་བཅའ།
ཁ་བ་བབས་ནས་ང་ཡི་བགྲོད་ལམ་ཡོད་ཚད་བཀག་ཚར་འདུག
སྨུག་སྤྲིན་འཐིབས་ནས་ང་ཡི་མིག་ལམ་མོག་པོར་བསྒྱུར་ཚར་འདུག
བགྲོད་ལམ་གྱི་དཀྱིལ་དང་སྒེའུ་ཁུང་གི་འགྲམ་ནས།
ངས་ཇི་ལྟར་བཙལ་ནའང་ཁྱེད་ཉིད་ཁོ་ན་མཐོང་ཐབས་མི་འདུག
མགོ་བོ་ཌ་རུ་ལྟར་གཡུགས་ནས་གང་དུ་བལྟས་ཀྱང་།
ཁྱེད་ཉིད་ཁོ་ན་མིག་གིས་མཐོང་ཐབས་མི་འདུག
མེ་ལོང་གི་ནང་ཁྲོལ་བསློགས་ནས་ཁྱེད་ཀྱི་མིང་ནས་ཇི་ལྟར་བོས་ཀྱང་།
ང་ལ་ཨ་ལན་མི་འདུག
ཁང་མིག་གི་མིག་འབྲས་གཡར་ནས་ས་ཕྱོགས་གང་དུ་བལྟས་ཀྱང་།
ཁྱེད་ཀྱི་རྐང་རྗེས་མི་འདུག
དེ་ལྟ་ནའང་། ངས།
འཇིག་རྟེན་དཀར་ངོགས་འདི་རུ།
གནམ་འོག་གི་འདབ་ཆགས་ཡོད་ཚད་ལ་ཁྱེད་རྩད་གཅོད་བྱེད་དུ་འཇུག་ངེས།
ངས། མཁའ་དབྱིངས་ཀྱི་སྤྲིན་པ་ཡོད་ཚད་ཁྱེད་འཚོལ་བར་མངག་ངེས།
ངའི་སྙིང་གི་དབུས་དང་སེམས་ཀྱི་གཏིང་ན།
ཚེས་རིས་ལྟར་འཛུམ་པའི་ངའི་ཁེར་རྐྱང་གི་མི་ཨ།
ཉི་ཟླ་གཉིས་ཀ་ས་ལ་ལྷུང་ནས།
ས་གཞི་ཆེན་པོ་སྔངས་འདར་བརྒྱབ་སྟེ།
འུ་གཉིས་ཀའི་རྨི་ལམ་ཚལ་བ་གྲངས་མེད་དུ་འགྱུར་ཡང་རུང་།
ངས། ཁྱེད་ཀྱི་ཞལ་རས་དང་སྙིང་གཏམ་མ་ལུས།
གནམ་སྔོན་པོའི་བྲང་གཞུང་ལ་བརྐོས་ནས།
ཁྱེད་ཉིད་འཚོལ་ངེས།
ངའི་ཚེ་སྲོག་གི་བྲག་རི་མ་ཉིལ་བར་དུ།
ངའི་གཏམ་རྒྱུད་ཀྱི་བྱུང་རིམ་ཐམས་ཅད་མཇུག་མ་རྫོགས་བར་དུ།
ངས། ཁྱེད་ཀྱིས་ང་ལ་གནང་བའི་གསེར་མདོག་གི་སྒྲོན་མེ་དེ་བཟུང་ནས།
ཁྱེད་ཉིད་འཚོལ་ངེས།
མ་འོངས་ལུང་བསྟན།
ད་ལྟ། ངས།
རང་ཉིད་ཀྱི་ཁུར་བོ་ཡོད་ཚད་ཐང་ལ་བཞག་སྟེ།
ས་ཆེན་གྱི་པང་ནས། ཁེར་རྐྱང་གི་མཇལ་པ་བཞིན།
ངལ་ཞིག་གསོ་འོས།
ད་ལྟ། ངས།
ས་འོག་ནས་འབུར་འོངས་པའི།
དྭངས་བསིལ་བསིལ་གྱི་ཆུ་མིག་ལ་བཀའ་དྲིན་ཞུ་འོས།
རྔུལ་ཆུ་ཡོད་ཚད་གཙང་མར་ཕྱིས་རྗེས། ངས།
ས་ཆེན་གྱི་པང་ནས།
མི་ཡུལ་གྱི་རི་ཆུ་དང་ལྷ་ཚོགས་ཀྱི་འགྲམ་པར།
འོ་ཞིག་བྱ་འོས།
ཕུག་རོན་དཀར་པོ་ཞིག བར་སྣང་ནས་ལྡིང་སྐོར་ཐེངས་མང་བརྒྱབ་རྗེས།
ཕ་བོང་ཞིག་གི་སྟེང་ནས་ངལ་ཞིག་གསོས་ཤིང་།
ཇ་ཡུན་ཙམ་གྱི་རྗེས་སུ། ངའི་སྙིང་དབུས་ནས།
སླར་ཡང་རྒྱང་རིང་ལ་འཕུར་སོང་།
སྐྱ་རེངས་ཨ། མི་འགྱང་བར།
སྐར་ཁུང་ཆུང་ཆུང་ཞིག་ལས། ཁྱེད་ཀྱི་མིག་ཟུང་གིས།
ཁྲག་གིས་བརླན་པའི་སྙན་ངག་ཚན་པ་ཞིག་མཐོང་སྲིད་ཅིང་།
སྙན་ངག་ཚན་པ་དེས་གཤོག་ཟུང་བརྐྱངས་ཏེ།
བར་སྣང་ནས་ལྡིང་སྐོར་ཐེངས་མང་བརྒྱབ་རྗེས།
ངའི་སྙན་ངག་བཞིན། རྒྱང་རིང་ལ་འཕུར་འགྲོ་བ།
ཁྱེད་ཀྱི་མིག་ཟུང་གིས་གསལ་བོར་མཐོང་སྲིད།
ཉི་མ་ཨང་། མི་ལོ་མང་བོའི་རྗེས་སུ།
ཁྱེད་ཀྱིས། ངའི་མདུན་ཕྱོགས་ན།
སྤྲིན་དཀར་དང་སྙེ་མའི་ཚོགས་ཀྱིས་མགོ་ལྕོག་ལྡེམ་བཞིན།
དགའ་ལྷང་ལྷང་གིས་བྲོ་གར་འཁྲབ་བཞིན་ཡོད་ནའང་།
ངའི་རྒྱབ་ཕྱོགས་སུ། ཁ་བ་ནག་པོས།
ངའི་ཡོད་ཚད་སྔ་མོ་ནས་དུར་དུ་སྦས་ཡོད་པ་གསལ་བོར་མཐོང་སྲིད།
ཕ་ཡུལ་ཨ། མི་འགྱང་བར།
རྒོད་པོ་ཚོ་ལྷ་ཡུལ་ལ་ལོག་སྲིད།
རྒོད་པོ་ཚོས། ངའི་སྙན་ངག་དང་རུས་རྐང་ཁྱེར་ནས།
རྒོད་པོ་ཚོས། ངའི་མཐའ་མཇུག་གི་ཀླད་ཞོ་དང་ཁ་ཆེམས་ཁྱེར་ནས།
ལྷ་ཡུལ་ལ་ལོག་སྲིད་ཅིང་།
ཉིན་མཚན་གང་མང་རྗེས་ཀྱི་སྟོང་ལྷང་ལྷང་གི་ཞོགས་པ་ཞིག་ལ།
རྒོད་པོ་ཚོའི་ཁྱིམ་མཚེས་ཏེ།
དམྱལ་བའི་ཁམས་ནས། ཁྱེད་ཚོས།
ངའི་ལུས་ངག་ཡིད་གསུམ་གྱི་གསང་གྲངས་མ་ལུས་གསལ་བོར་མཐོང་ངེས།
མཆོད་མེ།
རི་ཚོགས་ཀྱི་ཡང་རྩེ་ནས། ངས།
རང་གིས་རང་ལ་མཆོད་མེ་རྐང་གཅིག་སྦར་ཡོད།
མིའི་རིགས་སམ། ཕ་ཡུལ་གྱི་ཡུལ་མི་ཚོས།
ས་སྲོད་ཀྱི་མཚམས་སྤྲིན་འོག་ན།
སྔར་ལྟར་ཁ་བ་དང་ལོ་ཏོག་གི་ལས་དབང་གླེང་བཞིན།
བྱིས་པ་དང་གྲིབ་མ་རྗེས་སུ་ཁྲིད་ནས།
ཡུལ་ལ་ལྡོག་བཞིན་འདུག
མཆོད་མེ་རྐང་གཅིག ཅི་ཞིག་ཡིན་ནམ།
མཆོད་མེ་རྐང་གཅིག སེམས་ཀྱིས་སྦར་མྱོང་།
དུས་ཚོད་ཀྱི་གོམ་འགྲོས་འཁྱོར་བའི་ལོ་ཟླ་རེ་རེའི་ནང་།
ངས། ཁྱེད་ཀྱིས་བསྐུར་འོངས་པའི་མིག་ཆུའི་ཐིགས་པ་རེ་རེ།
མེ་ལ་བསྲེགས་ནའང་། མཐའ་མར།
ང་ཁོ་ན། དྲག་རླུང་གིས་བསམ་དབང་དྲན་དབང་མེད་པར།
མུན་ནག་གི་ནང་ལ་བཙན་གྱིས་འཁྱེར་འགྲོ།
གནམ་སྔོན་པོའི་འོག་ནས། ངས།
ང་ནི་དབུལ་ཞིང་ཕོངས་པའི་སྤྲང་པོ་སྤྲང་རྒན་ཞིག་ཡིན་ཞེས།
སུ་ལའང་བརྗོད་མི་སྲིད་དེ།
ངའི་ཡ་ཆུང་ཁོག་ན་ཕྱི་སྣོད་ཀྱི་འཇིག་རྟེན་ཡོད།
ངའི་མ་ཆུང་ཁོག་ན་ནང་བཅུད་ཀྱི་སེམས་ཅན་ཡོད།
ཡང་ན། མགོ་བརྩམས་པ་ནས་བཟུང་།
ངས། རི་ཚོགས་ཀྱི་ཡང་རྩེ་ནས།
རང་གིས་རང་ལ་འོད་སྟོང་འབར་བའི་མཆོད་མེ་རྐང་གཅིག
སེམས་ཀྱིས་སྦར་འོས།
