ལ་བཙས་ནི་མི་ཕར་འགྲོ་ཚུར་འོང་བྱེད་སའི་ལ་རྩེར་ལྷ་གསོལ་བྱེད་དུ་བཞེངས་པའི་རྡོ་སྤུངས་དར་ལྕོག་དང་ལྡན་པ་ཞིག་ལ་བྱ། དེ་ཡང་བོད་ཀྱི་མཁས་པ་རྣམས་ཀྱི་གསུང་ལྟར་ན། ལ་ཞེས་པ་རི་དང་བཙས་ཞེས་པ་ནི་གནས་རི་ཞབས་ཀྱིས་བཅགས་པའི་ཁྲལ་ལ་གོ་བར་གྲགས། ལ་བཙས་གསོལ་སྲོལ་དེ་ཡང་འགྲིམ་འགྲུལ་དང་འབྲེལ་བ་ངེས་གཏན་ཞིག་ཡོད། གང་ལགས་ཤེ་ན། བོད་མི་གནས་སྡོད་བྱ་ཡུལ་གྱི་ས་ཁུལ་མང་ཆེ་བ་ནི་ས་མཐོ་ཞིང་རི་བོ་མང་བའི་ཁར། གནའ་བོའི་དུས་སུ་འགྲིམ་འགྲུལ་གྱི་ཆ་རྐྱེན་གཙོ་བོ་ནི་རྟ་དྲེལ་དང་མཛོ་གཡག་ཁོ་ནར་བརྟེན་དགོས་ཤིང་། མི་མང་ཆེ་བ་ནི་རྐང་ཐང་ཁོ་ནར་འགྲོ་དགོས་ཀྱི་ཡོད་སྟབས། ལ་རྒྱག་རྒྱུ་ནི་ཧ་ཅང་དཀའ་ཚེགས་ཆེ་བའི་བྱ་བ་ཞིག་རེད། དེར་བརྟེན་ལ་རེ་བརྒལ་ཚར་དུས་ལམ་སྐྱོད་ཀྱི་དཀའ་བ་གཅིག་བཅད་ཚར་བར་བརྩིས་ནས། ལ་ཡི་རྩེ་ལ་ཁྲལ་མཚོན་ཚུལ་དུ་རྡོ་གསར་རེ་བསྒྲུགས་ནས་དེའི་སྟེང་རང་གི་བཟའ་ཆས་གཙང་མ་ཕྲན་བུ་སྤུངས་ཏེ་འཇོག་སྲོལ་ཡོད། དེ་ལྟར་བྱེད་དགོས་དོན་ནི་གཅིག་ནས་ལ་མོ་བདེ་གྲོལ་ངང་བརྒྱབ་ཐུབ་པར་རྟེན་འབྲེལ་དང་། གཉིས་ནས་ཟས་ཀྱིས་དབེན་པའི་རྒྱང་གི་འགྲུལ་པ་རྣམས་ལ་སྨན་པའི་དགེ་སེམས་བླ་ན་མེད་པ་ཞིག་ཡིན་རུང་། ཕྱིས་སུ་དེར་འཕོ་འགྱུར་བྱུང་ནས་ལྷ་སྲུང་ལ་མཆོད་པ་ཕུལ་བ་ལྟ་བུ་ཞིག་ཆགས་པར་མ་ཟད། ཕར་འགྲོ་ཚུར་འོང་བྱེད་མཁན་འགྲུལ་པ་ཚང་མས་ལ་དེ་རྒྱག་རིང་བཞིན་རྡོ་གསར་རེ་བསྒྲུགས་ཏེ་སྤུངས་སྟབས།རིམ་པས་རྡོ་ཕུང་ཆེན་པོ་ཆགས་ནས་དེའི་ཐོག་དར་ལྕོག་བཙུགས་ཏེ་ལྷ་གསོལ་བའི་སྲོལ་ཞིག་ཆགས་པ་རེད།
        གཞན་ཡང་ལ་བཙས་ནི་ཐོག་མར་ཡུལ་སྡེ་སོ་སོའི་ས་མཚམས་ཀྱི་རྟགས་ཡིན་པས། ཕྱོགས་མི་དེ་ནས་འགྲོ་དགོས་ན། ངེས་པར་དུ་ཁྲལ་གྱི་ཚབ་ཏུ་རྔན་པ་ཕྲན་བུ་འཇོག་སྲོལ་ཡོད་པ་དེ་རིམ་པས་ད་ལྟའི་ལྷ་གསོལ་གྱི་རྣམ་པ་ལྟ་བུར་འཕོ་འགྱུར་བྱུང་བའི་ངོས་འཛིན་གནང་མཁན་ཡང་ཡོད།
（རྩོམ་འདི་བོད་ཡིག་ཁྲིམས་ལུགས་ཞེས་པའི་འཕྲིན་སྟེགས་ལས་བཤུས།）