མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་རེབ་གོང་ཐང་གའི་ཡོན་ཀྲང་། ཀྲུང་གོའི་སྒྱུ་རྩལ་དང་མཛེས་རྩལ་མཁན་པོ་སྙིང་འབུམ་གྱིས་ཚེས་21བཤད་རྒྱུར། ཐང་གའི་མཁན་པོ་བརྒྱ་ལྷག་ཉེ་བ་ཞིག་གིས་གཅིག་བསྡུས་ཀྱིས་རིང་ཚད་ལ་སྨི་1300ཅན་གྱི་འཛམ་གླིང་ན་ཆེས་རིང་བའི་ཐང་ག་ཞིག་གསར་རྩོམ་བྱ་རྒྱུ་ཡིན་ཟེར།
　　ཐང་ག་འདིའི་མང་ལ་གནས་སྐབས་སུ་ཐང་གའི་རིག་གནས་ཀུན་འཏུས་ཆེན་མོ་ཞེས་བཏགས་ཡོད་ལ། མཐོ་ཚད་ལ་སྨི་1.3དང་།རིང་ཚད་ལ་སྔོན་དཔག་ལྟར་ན་སྨི་1300ཡས་མས་ཞིག་ཡོད་པ་ཟད། མཐའ་སྐོར་དུ་འཚེམ་དྲུབ་ཀྱིས་རྒྱན་ཡོད་པ་རེད།སྙིང་འབུམ་གྱིས་གསར་འགོད་པར་བཤད་རྒྱུར། ཐང་ག་འདི་ནི་གསར་རྩོམ་བྱེད་བཞིན་པའི་སྒང་ཡིན་ལ། སྔོན་དཔག་ལྟར་ན་2019ལོའི་ལོ་མཇུག་ལ་ཡོངས་འགྲུབ་བྱེད་ངེས་པ་དང་། ང་ཚོས་འཛམ་གླིང་སྟེང་ངོ་མཚར་བའི་རྩེ་གྲས་ཐང་ག་ཞིག་གསར་རྩོམ་བྱེད་འདོད་ཟེར།
　　སྙིང་འབུམ་ནི་རྒན་ཤ་བོ་ཚེ་རིང་མཆོག་གི་དངོས་སློབ་ཡིན་ཞིང་། སྔ་གཞུག་ཏུ་ལྷ་སའི་གཙུག་ལག་ཁང་དང་། བཀྲ་ཤིས་ལྷུན་པོ། ཁྲ་འབྲུག་དགོན་པ་སོགས་ཀྱི་ལྡེབས་རིས་དང་ཐང་ག་འབྲི་བཞེངས་མཛད་མྱོང་། ཕྱིར་ཕ་ཡུལ་མཚོ་སྔོན་རེབ་གོང་ལ་ལོག་རྗེས། རེབ་གོང་གི་སྲོལ་རྒྱུན་ཐང་ག་འབྲི་བཞེངས་ཀྱི་ཁྱད་ཆོས་ལ་གསར་གཏོད་བྱེད་པར་རྩེ་གཅིག་ཏུ་གཞོལ་ནས་རིམ་གྱིས་རང་ཉིད་ཀྱི་སྒྱུ་རྩལ་ཁྱད་ཆོས་གྲུབ། སྙིང་འབུམ་གྱིས་གསར་འགོད་པས་བཅར་འདྲི་ལ་དང་ལེན་བྱེད་སྐབས་འདི་སྐད། ང་ལ་མཚོན་ན་ཐང་ག་འབྲི་བཞེངས་ནི་ངའི་འཚོ་བའི་ཁྲོད་ཀྱི་ལག་རྩལ་ཞིག་ཡིན་པ་མ་ཟད། བློ་སྦྱོང་གི་གོ་རིམ་ཞིག་ཀྱང་ཡིན་ཟེར།
　　རེབ་གོང་ལྷ་རིས་སྒྱུ་རྩལ་ནི་དུས་རབས་བདུན་པའི་ནང་བོད་རྒྱལ་སྲོང་བཙན་སྒམ་པོས་བོད་ཁམས་གཅིག་གྱུར་བྱས་ཏེ། རྒྱ་གར་དང་བལ་ཡུལ། སྟག་གཟིག་དང་ཨོ་རྒྱན། བྷང་ག་ལ། མི་ཉག་ཐོ་ཀེར། ཟ་ཧོར། རྒྱ་ནག་སོགས་ལ་སྲིད་འབྱོར་རིག་གསུམ་གྱི་སྒོ་ནས་འབྲེལ་འདྲིས་བྱུང་བར་བརྟེན། བོད་ཀྱི་བཟོ་རིག་སྒྱུ་རྩལ་གྱི་རྣམ་པ་ཕུན་སུམ་ཚོགས་པར་སོང་བ་དང་དུས་མཚུངས་སུ་རེབ་གོང་ཡུལ་དུ་ལྷ་རིས་སྒྱུ་རྩལ་དར་ཁྱབ་བྱུང་བར་བཤད། རེབ་གོང་ལྷ་རིས་སྒྱུ་རྩལ་ནི་རི་མོ་གང་རུང་རང་སྣང་གང་དྲན་གྱིས་བྲིས་མི་ཆོག་པར། ཁྱད་པར་དུ་ནང་བསྟན་ཆོས་ལུགས་ཀྱི་ལྷ་སྐུ་བཞེངས་སྐབས་ལྷ་རང་རང་གི་ཐིག་རྩ་གཞིར་བཞག་གི་སྟེང་ནས་བཞེངས་དགོས་པ་མ་ཟད། བླ་མའི་མདུན་ནས་བཞེང་རྒྱུའི་ལྷ་དེ་ལ་བསྟེན་པའི་དབང་ལུང་ཐོབ་དགོས་པ་དང་། དེ་ནས་ལྷ་རིས་པ་རང་ཉིད་ཀྱིས་ལྷ་དེའི་བསྙེན་པ་གཏོང་དགོས། དེ་གྲུབ་རྗེས་ཚོན་དང་པིར། རས་གཞི་སོགས་ལ་བྱིན་རླབས་གནང་ནས་ད་གཟོད་ལྷ་སྐུ་བཞེངས་དགོས། སྒྱུ་རྩལ་གྱི་བཀོད་པ་ལ་སྲོག་ལྡན་གྱི་རི་མོ་དང་སྲོག་མེད་ཀྱི་རི་མོ་གཉིས་ཡོད། རེབ་གོང་ལྷ་རིས་སྒྱུ་རྩལ་གྱི་རྣམ་གྲངས་གཙོ་བོ་བྲིས་བཟོ་ཡིན་ལ། དེར་བརྟེན་ནས་འབུར་བཟོ་བྱུང་ཞིང་། དེ་གཉིས་ཀ་འབྲེལ་བའི་སྒོ་ནས་ཚེམས་བཟོ་དང་དྲས་དྲུབས། དྲས་བཟོ། བརྐོས་བཟོ། བླུགས་བཟོ་སོགས་མང་པོ་བྱུང་ཡོད། ཁྱད་པར་དུ་རས་བྲིས་དང་། ལྡེབས་རིས། འབག་སྐུ། གོས་དྲུབས། གཙགས་དྲུབས། ཤིང་བརྐོས། རྡོ་བརྐོས། གསེར་མགར། ཤིང་ཚོན་སོགས་ཡོད།
　　དེ་ཡང་སྤྱི་ལོའི་དུས་རབས་བདུན་པའི་ནང་བོད་རྒྱལ་སྲོང་བཙན་སྒམ་པོས་བོད་ཁམས་གཅིག་གྱུར་བྱས་ཏེ། རྒྱ་གར་དང་བལ་ཡུལ། སྟག་གཟིག་དང་ཨོ་རྒྱན། བྷང་ག་ལ། མི་ཉག་ཐོ་ཀེར། ཟ་ཧོར། རྒྱ་ནག་སོགས་ལ་སྲིད་འབྱོར་རིག་གསུམ་གྱི་སྒོ་ནས་འབྲེལ་འདྲིས་བྱུང་བར་བརྟེན། བོད་ཀྱི་བཟོ་རིག་སྒྱུ་རྩལ་གྱི་རྣམ་པ་ཕུན་སུམ་ཚོགས་པར་སོང་བ་དང་དུས་མཚུངས་སུ་རེབ་གོང་ཡུལ་དུ་ལྷ་རིས་སྒྱུ་རྩལ་དར་ཁྱབ་བྱུང་བར་བཤད། 
　　རེབ་གོང་ལྷ་རིས་སྒྱུ་རྩལ་གྱི་ཁྱད་ཆོས་ནི། རི་མོ་གང་ཡིན་རུང་བདེན་དོན་དངོས་བཟུང་སྟེ་འབྲི་བ་ལས་རང་སྣང་གང་དྲན་གྱིས་བྲིས་མི་ཆོག ཁྱད་པར་དུ་ནང་བསྟན་ཆོས་ལུགས་ཀྱི་ལྷ་སྐུ་བཞེངས་སྐབས་ལྷ་རང་རང་གི་ཐིག་རྩ་གཞིར་བཞག་གི་སྟེང་ནས་བཞེངས་དགོས་པ་མ་ཟད། ཐོག་མར་མཚན་ཉིད་ལྡན་པའི་བླ་མ་གང་རུང་ཞིག་གི་མདུན་ནས་བཞེང་རྒྱུའི་ལྷ་དེ་ལ་བསྟེན་པའི་དབང་ལུང་ཐོབ་དགོས་པ་དང་། དེ་ནས་ལྷ་རིས་པ་རང་ཉིད་ཀྱིས་ལྷ་དེའི་བསྙེན་པ་གཏོང་དགོས། དེ་གྲུབ་རྗེས་ཚོན་དང་པིར། རས་གཞི་སོགས་ལ་བྱིན་རླབས་གནང་ནས་ད་གཟོད་ལྷ་སྐུ་བཞེངས་དགོས་པར་བཤད། སྒྱུ་རྩལ་གྱི་བཀོད་པ་ལ་སྲོག་ལྡན་གྱི་རི་མོ་དང་སྲོག་མེད་ཀྱི་རི་མོ་གཉིས་ཡོད།
　　དང་པོ་ལ་སངས་རྒྱས་བྱང་སེམས་དང་། དཔའ་བོ་མཁའ་འགྲོ། ཡི་དམ་ཆོས་སྐྱོང་སོགས་ཞི་བ་དང་། ཁྲོ་བོ། ཞི་མ་ཁྲོ་སྟེ་ཉམས་མི་འདྲ་བ་གསུམ་དང་། རྒྱན་བཅས་དང་རྒྱན་མེད། སྐྱེས་པ་དང་བུད་མེད། འཇིག་རྟེན་དང་འཇིག་རྟེན་ལས་འདས་པའི་རིགས་གཉིས་ཡོད།
　　གཉིས་པ་ལ་གངས་རི་དང་རྫ་རི། སྤང་རི། བྲག་རི། རྒྱ་མཚོ། གཙང་བོ། རྫ་ཆུ། ས་གཞི། མེ་ཏོག སྐྱེད་ཚལ། གཞལ་མེད་ཁང་། ཕོ་བྲང་། གཙུག་ལག་ཁང་། ལྷ་ཁང་སོགས་མང་པོ་ཡོད། དཔེར་ན་སྒྲོལ་མའི་ཞིང་བཀོད་ལྟ་བུ་ཞིག་བཞེངས་སྐབས་ཞིང་བཀོད་དེའི་སྟེང་ཡོད་པའི་ལོངས་སྐུ་དང་སྤྲུལ་སྐུ་གཉིས་ཐིག་རྩ་གཞིར་བཞག་ལྟར་བཞེངས་དགོས་པ་དང་། བླ་སྐུ་རྣམས་མི་རིགས་དེ་དང་དེའི་གྱོན་ཆས་གོམས་སྲོལ་ལྟར་བཞེངས་པ། རི་ཆུ་སོགས་ཀྱི་རྒྱབ་ལྗོངས་དང་། ཁང་བཟང་རྣམས་དག་ཞིང་གི་མཛེས་ལྗོངས་དང་། ལྷའི་གཞལ་ཡས་ཁང་ལྟར་བཞེངས་དགོས་པ་སོགས་ལོ་རྒྱུས་ཀྱི་རྒྱབ་ལྗོངས་དང་། དོན་དངོས་ཀྱི་མཚོན་དོན་སོགས་ལ་གཞིགས་ཏེ་བཞེངས་དགོས་པ་མ་གཏོགས། མིག་ལ་གང་མཛེས་དང་། ཡིད་ལ་གང་བདེ་ལྟར་བཞེངས་མི་ཆོག ལྷ་སྐུ་ཞི་བ་དང་ཁྲོ་བོ། ཞི་མ་ཁྲོ་གང་ཡིན་རུང་གོང་གསལ་ལྟར་བཞེངས་ཚེ་བོད་ཀྱི་ལྷ་རིས་སྒྱུ་རྩལ་སྤྱི་དང་། བྱེ་བྲག་ཏུ་རེབ་གོང་ལྷ་རིས་སྒྱུ་རྩལ་གྱི་ཁྱད་ཆོས་མངོན་གསལ་ལྡན་པར་བཤད།

　　རེབ་གོང་ཡུལ་དུ་ལྷ་རིས་སྒྱུ་རྩལ་དར་ཁྱབ་ཆེ་བའི་ཡུལ་སྡེ་ནི། སེང་གེ་གཤོང་སྡེ་གཉིས་དང་གཉན་ཐོག སྒོ་དམར། རྐ་སར་རྣམས་ཡིན། སེང་གེ་གཤོང་སྡེ་གཉིས་ཀའི་ནང་སྐྱེས་པའི་ལྷ་རིས་པས་བརྒྱ་ཆའི་དྲུག་ཅུ་ལྷག(སྐྱ་སེར་གཉིས་ཀ་ཡོད)ཟིན་པ་དང་། བུད་མེད་ཀྱི་ལྷ་རིས་པའང་ཡོད། སྡེ་གཉིས་ཀྱིས་གཙོ་བོ་བྲིས་ཐང་དང་འབག་སྐུ་བཞེངས་པ་དང་། དེའི་ཁྱད་ཆོས་གཙོ་བོ་ནི། ཀརྨ་སྒར་ལུགས་ཀྱི་ཕྱག་རྒྱུན་ལྟར་ཚོན་མདོག་གི་ལམ་ནས་བྲིས་ཐང་ཆེ་ཆུང་དང་། ཤིང་རིས་སོགས་འབྲི་བ། རྒྱུ་རིན་པོ་ཆེ་དང་སྨན་འདམ་གང་རུང་ལས་འབག་སྐུ་ཆེ་ཆུང་བཞེངས་པ། ཚོན་མདོག་གི་ཆ་ནས་སྔོ་ཤས་དང་དམར་ཤས་ཆེ་བ། རི་མོ་འབུར་དུ་ཐོན་པ། སྤྱན་འབྱེད་པ་དང་། སྐྱ་ཐིག་རྒྱག་པ་ལ་ལྷ་རིས་པ་གཞན་ལ་མེད་པའི་གསང་རྒྱའི་སྒྱུ་རྩལ་ཡོད་པར་བཤད།
　　གཉན་ཐོག་སྡེ་བའི་མིའི་གྲངས་འབོར་གྱི་བརྒྱ་ཆའི་བཞི་བཅུ་ལྷ་རིས་པ་ཡིན་པ་དང་། དེའི་ནང་སྐྱེས་པའི(སྐྱ་སེར་གཉིས་ཀ་ཡོད)ལྷ་རིས་པས་བརྒྱ་ཆའི་སུམ་ཅུ་ཟིན་པ་དང་། བུད་མེད་ཀྱི་ལྷ་རིས་པས་བརྒྱ་ཆའི་བཅུ་ཟིན་ཡོད་པར་བཤད། སྐྱེས་པའི་ལྷ་རིས་པས་གཙོ་བོ་བྲིས་ཐང་དང་གོས་སྐུ། གོས་དྲུབས། འབག་སྐུ། མུ་ཏིག་གི་ཐང་ག་སོགས་བཞེངས་པ་ཤས་ཆེ། བུད་མེད་ལྷ་རིས་པས་གཙོ་བོ་གོས་དྲུབས་དང་མུ་ཏིག་གི་ཐང་ག་བཞེངས་པ་ཤས་ཆེ། གཉན་ཐོག་ལྷ་རིས་པའི་ཐུན་མོང་མ་ཡིན་པའི་ཁྱད་ཆོས་གཙོ་བོ་ནི། སྨན་ཐང་ལུགས་ཀྱི་ཕྱག་རྒྱུན་ལྟར་རྣམ་པ་མི་འདྲ་བའི་གོས་སྐུ་ཆེ་ཆུང་དང་། གོས་དྲུབས་སྣ་ཚོགས། མཆོད་རྫས། སྐྱེ་དངོས་ཡུལ་ལྗོངས། ཡིག་རིགས་སྣ་ཚོགས་སོགས་གོས་དྲུབས་བཟོ་རྩལ་ལ་བརྟེན་ནས་བྱུང་བའི་འདྲ་ཐང་དང་། ཚོན་ཐང་ཆེ་ཆུང་མང་པོ། ཁ་དོག་སྣ་ཚོགས་ཡོད་པའི་མུ་ཏིག་གི་ཐང་ག་ཆེ་ཆུང་མང་པོ་བཞེངས་པ། ཚོན་མདོག་ལྗང་ཤས་དང་ལྗང་ནག་ཤས་ཆེ་བ་དང་། ལྷ་སྐུ་དང་བླ་སྐུ་གང་བཞེངས་རུང་གསོན་ཉམས་ཀྱི་རྣམ་པ་ཅི་ཐོན་བྱས་ནས་བཞེངས་དགོས་པར་བཤད།
　　སྒོ་དམར་དང་རྐ་སར་སྡེ་བ་གཉིས་ཀྱི་སྐྱེས་པའི་བརྒྱ་ཆའི་ལྔ་བཅུ་ལྷ་རིས་པ་ཡིན་པ་དང་། དེའི་ནང་གྲྭ་བའི་ལྷ་རིས་པའང་ཡོད། ཁོ་ཚོས་གཙོ་བོ་བྲིས་ཐང་དང་གོས་ཐང་། པར་བརྐོ། འབག་སྐུ་བཞེངས་པ་དང་། དེའི་ཁྱད་ཆོས་གཙོ་བོ་ནི་དབུས་བྲིས་འཇམ་ཁ་ཅན་གྱི་ཕྱག་རྒྱུན་ལྟར་ཚོན་ཐང་ཆེ་ཆུང་དང་གོས་ཐང་། འབག་སྐུ་ཆེ་ཆུང་བཞེངས་པ། ཚོན་མདོག་གི་ཆ་ནས་སྐྱ་ཤས་དང་། ལྗང་ཤས་ཆེ། ཚོན་མདོག་མང་ཤོས་བཙག་མདངས་དང་བཤལ་མདངས་ཡིན་པ། བཅད་རིས་ཀྱི་དཀྱིལ་སྦོམ་ཞིང་སྣེ་གཉིས་ཕྲ་བ། གསེར་བྲིས་འཐེན་སྟངས་ཞིབ་ཅིང་ལྷོད་ཉམས་ཆེ་བ། ན་བཟའི་སྟེང་གི་རི་མོ་ཞིབ་ཚགས་ལྡན་པ་བཅས་ཀྱི་ཁྱད་ཆོས་མང་པོ་ཡོད་པར་བཤད། གཞན་ཆུ་མ་སྡེ་བའི་ཤིང་རིས་པ་དང་། བྲག་དཀར་འགྲོན་ལུང་སྡེ་བའི་པར་བརྐོ། ལྕང་སྐྱ་སྡེ་བའི་ལྷམ་བཟོ། བཙན་མོ་དང་ཁ་སོག་སྡེ་བའི་སྒ་བཟོ་སོགས་ཀྱིས་མཚོན་པའི་བཟོ་རྩལ་ལ་མཁས་པའི་ལག་རྩལ་པ་མང་པོ་ཡོད་པ་རེད།