བོད་གཞུག་སྐྱིད།
—3.8དུས་ཆེན་ཉིན་བུ་མོ་ཚེ་རིང་དཔལ་སྒྲོན་ལ་ཕུལ་བ།
ཁྱོད་ངའི་འཇིག་རྟེན་དུ་སླེབས་ནས་བཟུང་།
ང་ལ་འགྱུར་བ་རབ་དང་རིམ་པ་བྱུང་ཡོད།
ངས་ཚེ་སྲོག་གི་མྱུ་གུ་འབུས་ཚུལ་ལུས་དང་སེམས་ཀྱིས་མྱངས་མྱོང་།
རྟེན་གྱི་རང་བཞིན་ལ་བཤད་ཡམས་ཀྱི་མྱི་ཁ་ད་དུང་རྒོད་ཀྱང་།
ཁྱོད་ནི་ངའི་སེམས་ནས་བཞུས་ཨེ་འགྲོ་སྙམ་པའི་མར་ལོ་རྡོག་རྡོག་དེ་ཡིན།
ཁྱོད་ནི་ཉིན་རེ་ཟླ་རེ་ལོ་རེར་འཚར་ལོངས་བྱུང་དུས།
ངས་ཀྱང་སྡར་སེམས་དང་རྩུབ་གཤིས་དང་རང་སྣང་མ་ལུས་ག་ལེར་ག་ལེར་བསྐྱུར་ཡོད།
ཁྱོད་ནི་ང་ཡི་རང་གཤིས་ལ་འགྲན་སློང་ཐུབ་པའི་ཚེ་སྲོག་བརྟན་མོ་དེ་རེད།
ཁྱོད་ནི་ང་ཡི་བཟོད་བསྲན་ལ་རྒྱལ་ཁ་སྟེར་བའི་སེམས་དཔའ་ཆུང་ངུ་དེ་རེད།
ཁྱོད་ནི་ང་ཡི་བརྩོན་འགྲུས་ལ་ལྕག་གིས་སྐུལ་བའི་རྟ་ལྕག་སྙི་མོ་དེ་རེད།
ཁྱོད་ནི་ང་ཡི་བརྩེ་བ་ལ་ཁ་ལོ་བསྒྱུར་མཁན་གྱི་རླུང་བུ་འཇམ་པོ་དེ་རེད།
སེམས་ཀྱི་མར་ལོ།
ཁྱོད་ཀྱི་ཕྱིར་དུ་ང་རང་ཁ་ལོ་བར་གྱུར་འདུག
ཁྱོད་ཀྱི་ཆེད་དུ་ང་རང་མ་བྱན་དཔེ་མེད་ཅིག་ཀྱང་རེད་འདུག
དེ་མིན་ད་རུང་གླུ་མ་སྒྲུང་བ་གར་མ་ཅི་རིགས་ཤིག་ཀྱང་རེད་འདུག
དེ་བས་ངའི་ཚེ་སྲོག་ལ་འཁེན་པའི་ཚེ་སྲོག་སྙིང་སྡུག་ཁྱོད་ནི།
ངས་འཇིག་རྟེན་ནས་མོ་ལུས་བླངས་པའི་དོན་སྒོ་ཆེན་པོ་དེ་ཡིན།
སེམས་ཀྱི་མར་ལོ།
ད་ནི་ནངས་དགོང་ལ་འུ་གཉིས་མཉམ་དུ་ལམ་ལ་ཆས་བཞིན་ཡོད།
ངས་ཁྱོད་རང་སྐད་རིགས་མི་གཅིག་པའི་ཁྱུ་ཚོགས་ཤིག་ཏུ་བཅུག་ཡོད།
ངས་ཁྱོད་ལ་ཕ་སྐད་བཤད་དགོས་པའི་སྒྲིག་ལམ་ཞིག་ཀྱང་བཙུགས་ཡོད།
ངས་ཁྱོད་རང་ལོ་ཆུང་ཆུང་ཞིག་ལ་ཁལ་ལྕི་མོ་ཞིག་ཀྱང་བཀལ་ཡོད།
སེམས་ཀྱི་མར་ལོ།
དགོངས་པ་མ་ཚོམ།
ཁྱོད་ཀྱི་སྐྱིད་སྡུག་ང་ཡིས་ཅི་ལ་མི་ཤེས།
ཁྱོད་ཀྱི་བྱིས་དུས་ང་ཡི་མིག་གིས་འཚོས་ཡོད།
ཤེས་རབ་ཟབ་མོ་དང་བརྩེ་བ་དྲོན་མོ།
རང་གཤིས་ལྷད་མེད་དང་གོམས་སྲོལ་བཟང་པོ།
ད་དུང་འགལ་འབྲེལ་གྱི་ལམ་སྣེ་དུ་མས།
ངས་ཁྱོད་རང་འདི་ལྟར་ལམ་ལ་བཅུག་ཡོད།
སེམས་ཀྱི་མར་ལོ།
ཟླ་གསུམ་པ་ནི་སྐྱེ་སྟོབས་འབར་བའི་དུས་ཚིགས་ཤིག་ཡིན།
ཁྱོད་ཀྱང་ལྗོན་ཤིང་གི་འདབ་ལོ་ཇི་བཞིན་རྒྱས་པར་ཤོག
ངའང་ལྗོན་ཤིང་གི་རྩ་བ་ནང་བཞིན་བརྟན་པར་ཤོག
སེམས་ཀྱི་མར་ལོ།
གཞན་གྱི་སར་ནས་མགོ་བོ་དང་ཁར་མ་སྨད།
རང་གི་སར་ནས་རྐང་ལག་ཐང་ཆུར་མ་འབྱར།
ངས་ཁྱོད་ལ་བདེ་སྐྱིད་ཀྱི་བྱིས་དུས་ཤིག་སྟེར་ཐུབ་པར་ཡིད་ཆེས་ཡོད་པ་བཞིན་དུ།
ཁྱོད་ཀྱང་རང་ཉིད་ལས་རྒྱལ་ཐུབ་པའི་ཡིད་ཆེས་ཅིས་ཀྱང་ཡོད་དགོས།
སེམས་ཀྱི་མར་ལོ།
དྲང་མོར་བཤད་ན་ཁ་སང་དེ་རིང་།
ཁྱོད་ལ་བདེ་ཐང་གི་བྱིས་དུས་ཤིག་བསྐྲུན་པའི་འཆར་གཞི་མ་ལུས།
ང་ཡི་ཕུགས་བསམ་དང་རྨི་ལམ་གྱི་ཁ་དོག་རེད་འདུག
（མཚོ་སྔོན་བོད་ཡིག་ཁྲིམས་ལུགས་ཚགས་པར་གྱི་འཕྲིན་སྟེགས་ལས་བཤུས།）
