ཉེ་ལམ། གསར་འགོད་པས་ཞིང་ཆེན་འཕྲོད་བསྟེན་དང་འཆར་ལྡན་བུ་བཙའི་ཨུ་ལྷན་ནས་རྒྱུས་ལོན་བྱང་བ་ལྟར་ན། འཕྲོད་བསྟེན་དང་འཆར་ལྡན་བུ་བཙའི་ཨུ་ལྷན་གྱིས་ཞིང་ཆེན་དམངས་སྲིད་ཐིང་དང་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་སོགས་ཀྱི་སྡེ་ཁག་དང་མཉམ་འབྲེལ་བྱས་ཏེ《སི་ཁྲིན་ཞིང་ཆེན་གྱི་དབུལ་ཕོངས་ནད་པས་རྫོང་ནང་ཁུལ་དུ་ཞག་སྡོད་སྨན་བཅོས་བྱས་ཚེ་ཐོག་མར་སྨན་བཅོས་དང་རྗེས་ནས་སྨན་རིན་སྤྲོད་པའི་ལག་བསྟར་འཆར་འགོད།》པར་འགྲེམ་བྱས། འཆར་འགོད་ལས་གོམ་གང་མདུན་སྤོས་སྒོས་ཞིང་སྡེའི་དབུལ་ཕོངས་ནད་པ་དང་། ཡུལ་ཤོག་དང་གྲོང་རྡལ་གྱི་དམིག་བསལ་དབུལ་ཕོངས་མི་སྣ། དམའ་སྲུང་དུད་ཚང་བཅས་ཀྱི་ནད་པས་རྫོང་ནང་ཁུལ་དུ་ཞག་སྡོད་སྨན་བཅོས་བྱས་ན་ཐོག་མར་སྨན་བཅོས་དང་རྗེས་ནས་སྨན་རིན་སྤྲོད་པའི་ལམ་ལུགས་འཐུས་ཚང་དུ་གཏང་དགོས་པ་དང་། དབུལ་ཕོངས་ནད་པས་ཞག་སྡོད་སྨན་བཅོས་བྱེད་སྐབས་གཏའ་དངུལ་སྤྲོད་མི་དགོས་པར་མ་ཟད། སྨན་བཅོས་བྱས་ཚར་རྗེས་སྨན་བཅོས་སྡེ་ཁག་དང་རིགས་སོ་སོའི་འགྲོ་སོང་འགན་སྲུང་སྡེ་ཁག་གིས་ཐད་ཀར་རྩིས་སྤྲོད་བྱས་ནས་ནད་པའི་དཔལ་འབྱོར་གྱི་གནོན་ཤུགས་ཇེ་ཡང་དུ་གཏང་དགོས་ཞེས་བསྟན།
        འཆར་འགོད་ལས་གསལ་བོར་བསྟན་དོན། ལག་བསྟར་བྱ་ཡུལ་ནི་བྱང་བུ་དང་ཡིག་ཚགས་བཟོས་པའི་དབུལ་ཕོངས་མི་སྣ་དང་གྲོང་རྡལ་དང་ཡུལ་ཤོག་གི་གཞི་རྩའི་དམའ་སྲུང་ལ་ཞུགས་པའི་ཡུལ་ཤོག་དང་གྲོང་རྡལ་གྱི་དམིགས་བསལ་དབུལ་ཕོངས་མི་སྣ། གྲོང་རྡལ་དང་ཡུལ་ཤོག་གི་དམའ་སྲུང་བྱ་ཡུལ་བཅས་ཡིན་ལ། ལག་བསྟར་བྱེད་པའི་ཁྱབ་ཁོངས་ནི་རྫོང་ནང་ཁུལ་གྱི་གཞུང་བཙུགས་སྨན་བཅོས་སྡེ་ཁག་ཡིན་པ་རེད།།