ཉིན་འགའི་སྔོན་དུ། ཞིང་ཆེན་སྲིད་གཞུང་གིས《སི་ཁྲོན་ཞིང་ཆེན་གྱི་གྲོང་ཁྱེར་དང་གྲོང་གསེབ་ཀྱི་ལོ་གསུམ་ལ་གད་སྙིགས་ཐག་གཅོད་བྱེད་པའི་སྒྲིག་ཆས་འཛུགས་སྐྲུན་བྱེད་པར་སྐུལ་འདེད་གཏོང་བའི་འཆར་འགོད།》པར་སྐྲུན་འགྲེམ་སྤེལ་བྱས།《འཆར་འགོད།》ལས་2019ལོའི་ལོ་སྨད་དུ། རང་རེའི་ཞིང་ཆེན་དུ་ཉིན་རེར་འཚོ་བའི་གད་སྙིགས་སྦགས་མེད་ཐག་གཅོད་བྱེད་ཚད་དེ་ཏུན་ཁྲི7.05ལྷག་ལ་སླེབས་རྒྱུ་ཡིན་པ་དང་། འཚོ་བའི་གད་སྙིགས་ཐག་གཅོད་བྱེད་པའི་སྒྲིག་ཆས་འཛུགས་སྐྲུན་གྱི་ཐད་དུ་མ་དངུལ་སྒོར་དུང་ཕྱུར་361གཏོང་འཇོག་བྱེད་པར་བརྩོན་ལེན་བྱས་ནས། འཚོ་བའི་གད་སྙིགས་རིགས་བགར་ལམ་ལུགས་ཡོངས་སུ་ཚུགས་ཏེ། འཚོ་བའི་གད་སྙིགས་ཐག་གཅོད་བྱེད་པར་ཆ་འཕྲིན་ཅན་གྱི་ལྟ་སྐུལ་དོ་དམ་མ་ལག་ཆགས་སུ་འཇུག་རྒྱུ་བསྟན་ཡོད།
           《འཆར་འགོད།》ལས་མི་འབོར་མང་ཉུང་གི་ཚད་དང་རང་བྱུང་ས་ཁམས་ཀྱི་ཆ་རྐྱེན། དཔལ་འབྱོར་འཕེལ་རྒྱས་ཀྱི་ཆུ་ཚད་སོགས་ཀྱི་གནས་ཚུལ་ལ་གཅིག་གྱུར་འཆར་འགོད་དང་གད་སྙིགས་ཐག་གཅོད་བྱེད་པའི་སྒྲིག་ཆས་འཛུགས་སྐྲུན་བྱེད་པར་བཀོད་སྒྲིག་བྱས་པ་གཞིར་བཟུང་ཐོག་གད་སྙིགས་ཐག་གཅོད་བྱེད་པའི་སྒྲིག་ཆས་འཛུགས་སྐྲུན་གྱི་མི་འདང་ས་ཁ་གསབ་བྱས་ནས། 2019ལོའི་ལོ་སྨད་དུ། འཚོ་བའི་གད་སྙིགས་སྦགས་མེད་ཐག་གཅོད་བྱེད་པའི་སྒྲིག་ཆས་76གསར་སྐྲུན་བྱས་ནས། སྦགས་མེད་ཐག་གཅོད་བྱེད་པའི་སྒྲིག་ཆས་43དང་གསོག་འཇོག་བྱས་པའི་གད་སྙིགས་བཅོས་སྐྱོང་བྱེད་པའི་རྣམ་གྲངས་62ལེགས་འགྲུབ་ཡོང་བར་བྱ་དགོས་ཅེས་བཏོན་ཡོད། གད་སྙིགས་ཐག་གཅོད་བྱེད་པའི་སྒྲིག་ཆས་ཀྱི་ཁེབས་ཚད་གཞིར་བཟུང་ཐོག་གད་སྙིགས་བསྡུ་ལེན་ས་ཚིགས་བཀོད་སྒྲིག་དང་འཛུགས་སྐྲུན་བྱེད་པ་ཚད་ལྡན་དང་འཐུས་ཚང་དུ་བཏང་ནས། རྫོང་མཁར་གྱི་གད་སྙིགས་ཐག་གཅོད་བྱེད་སའི་ས་ཚིགས་རྙིང་བ་ཁག་བསྒྱུར་བཅོས་དང་གྲོང་རྡལ་དང་གྲོང་གསེབ་ཀྱི་གད་སྙིགས་སྒྲིག་ཆས་འཛུགས་སྐྲུན་བྱེད་པར་ཤུགས་སྣོན་བྱ་དགོས་པ་དང་། བཟའ་བཏུང་ལས་རིགས་དང་ལས་ཁུངས་གི་ཟས་ལྷག་སོགས་རིགས་བགར་དོ་དམ་དང་། གད་སྙིགས་ཕྱིར་གཏོང་བྱེད་པར་ཐོ་འགོད་བྱེད་པའི་ལམ་ལུགས་ཆགས་སུ་འཇུག་དགོས་ཞེས་བསྟན།།