གཙོད་ནི་འཛམ་གླིང་ཡང་རྩེ་རུ་གདོད་མ་ནས་འཚོ་བའི་རི་དྭགས་ཤིག་ཡིན། རང་རྒྱལ་གྱི་བོད་ལྗོངས་དང་མཚོ་སྔོན། ཞིན་ཅང་། དེ་མིན་རྒྱ་གར་དང་ཕཱ་ཁི་སི་ཐན། ལ་དྭགས་དང་ཁ་ཞི་མེའར་ས་ཁུལ་སོགས་སུ་ཁྱབ་ཡོད།

   ལོ་རབས་བདུན་ཅུ་པ་ནས་འགོ་ཚུགས་ཏེ་གཙོད་ཀྱི་བལ་དེ་རྒྱལ་སྤྱིའི་ཚོང་རར་སྤྱོད་སྒོ་ཧ་ཅང་ཆེན་པོར་གྱུར། གཙོད་བལ་དེ་དྲོད་ཅིང་འཇམ་པས་བལ་གྱི་རྒྱལ་པོ་ཞེས་པའི་མཚན་སྙན་ཐོབ། ཧྲག་ཐུའུ་ཧྲེ་(Shahtoosh)ཞེས་གཙོད་བལ་གྱིས་བཟོས་པའི་སྟོད་དཀྲིས་དེ་རིན་གོང་ཧ་ཅང་མཐོ་བ་དང་རྒྱ་གར་དང་ཕཱ་ཁི་སི་ཐན་སོགས་སུ་གཉེན་སྒྲིག་བྱེད་སྐབས་ཀྱི་བླ་ན་མེད་པའི་ལེགས་སྐྱེས་ཤིག་ཏུ་ངོས་འཛིན་སྲོལ་ཆགས་ཡོད། ཁྱིམ་ཚང་རེ་འགས་ལོ་མང་པོར་བསགས་པའི་དངུལ་སྒོས་གཙོད་བལ་སྟོད་དཀྲིས་ཉོས་ཏེ་བུ་མོ་ལ་བག་རྫོངས་སྦྱིན་སྲོལ་འདུག སྟོད་དཀྲིས་གཅིག་ལ་གཙོད་གསུམ་གྱི་ཚེ་སྲོག་འཕྲོག་དགོས། གཙོད་རྒྱབ་ནས་བལ་ལེན་སྐབས་གསོད་དགོས་པའི་ངེས་པ་མེད་མོད། འོན་ཀྱང་ཁྲིམས་འགལ་གྱིས་གསོད་པས་1970ལོར་ཕལ་ཆེར་གཙོད་ཁྲི་105ཡོད་པ་ལས་1992ལོར་ཁྲི་7.5མ་གཏོགས་མེད་པར་གྱུར། དེ་སྔོན་གཙོད་ཁྲི་1.5ཡས་མན་ཁྱུ་སྐོར་བྱས་པའི་རྣམ་པ་མཐོང་རྒྱུ་ཡོད་འདུག་ཀྱང་རྗེས་སུ་གྲངས་ཀ་མངོན་གསལ་གྱི་ཇེ་ཉུང་དུ་སོང་། 2012ལོར་སླར་ཡང་མང་དུ་ཕྱིན་ཏེ་ཁྲི་22ཙམ་ཡོད།
   1988ལོར། གཙོད་ནི་རིགས་རྒྱུད་ཆད་ལ་ཉེ་བའི་རྒྱལ་ཁབ་རིམ་པའི་སྲོག་ཆགས་སྲུང་སྐྱོབ་བྱ་ཡུལ་གྱི་གྲས་སུ་བཞག་པ་དང་། ཉེ་བའི་ལོ་འགའི་རིང་ལ། ཨ་ཆེན་གངས་རྒྱབ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ས་ཁུལ་དང་བྱང་ཐང་རྒྱལ་ཁབ་རིམ་པའི་རང་བྱུང་སྲུང་སྐྱོབ་ས་ཁུལ་སོགས་སུ་རི་དྭགས་རྔོན་པར་བཀག་འགོག་བྱས་པར་བརྟེན། ད་ལྟ་ཁྱུ་དང་ཁྱུ་བྱས་པའི་གཙོད་རྣམས་གཟན་རྩྭ་ལ་རོལ་བ་དང་རྒྱུག་རྩལ་འགྲན་པ། རྩེད་མོར་གཡེང་བཞིན་ལྷིང་འཇགས་དང་བདེ་སྐྱིད་ཀྱི་ཞིང་ཁམས་ཤིག་ཏུ་འཚོ་ཞིང་གནས་ཡོད།
   གཙོད་ཀྱི་ཕྲག་སྟེང་ནས་ཚད་པའི་མཐོ་ཚད་ལ་ལི་སྨི80ཙམ་ཡོད་པ་དང་མདོག་སྐྱ་བོ་ནས་དམར་སྨུག་ཙམ་དུ་སྣང་བ་དང་འོག་དཀར་པོ་ཡིན་པ་རེད།
   གཙོད་ཕོ་ལ་ལི་སྨི་50ཙམ་གྱི་རྭ་ཅོ་ཡོད། གཙོད་ནི་གདོད་མ་ནས་རིགས་རྒྱུད་གཅིག་ཏུ་དབྱེ་བ་དང་གཟུགས་དབྱིབས་རིག་པ་དང་སྐྱེ་དངོས་ཀྱི་རིགས་ནས་དབྱེ་ན་དེ་ནི་རྭ་གཙོད་ཞེས་པའི་ཁོངས་སུ་ཡང་གཏོགས་པ་ཡིན། གཙོད་རྣམས་ཁྱུ་སྐོར་བྱས་ནས་འདུག་པ་དང་མཚམས་རེར་བརྒྱ་ཕྲག་ཙམ་རེ་ཁྱུ་སྐོར་བྱས་ནས་འདུག་པའང་ཡོད། གཙོད་མོ་དེ་སྤྱི་ལེ300ཡས་མས་སུ་གཟན་འཚོལ་བར་གནས་སྤོར་བྱེད། དབྱར་དུས་སུ་གཙོད་ཕྲུག་བཙས་པ་དང་ཕོ་དང་མཉམ་དུ་དགུན་དུས་རོལ།

   གཙོད་རྒྱུག་པ་དང་འཕག་མཆོང་བྱེད་པར་ཧ་ཅང་གི་མྱུར་མོ་ཡིན་ལ་ད་སྔོན་འཛམ་གླིང་ཐོག་ཆེས་མགྱོགས་པའི་སྲོག་ཆགས་ཀྱི་གྲས་ཡིན། ཆ་སྙོམས་ཀྱི་ཆུ་ཚོད་རེར་སྤྱི་ལེ་90འགྲོ་ཐུབ། ཨ་ཆེན་གངས་རྒྱབ་ཐང་སྟོང་སོགས་སུ་འཚོ་ཞིང་དེར་རི་རྩྭ་དང་འདམ་རྩྭ་སོགས་གཟན་དུ་བཟའ་བཞིན་ཡོད་ལ་ཚེ་ཐག་ནི་ལོ་བརྒྱད་ནས་བཅུ་གསུམ་བར་ཡིན་པ་རེད།