གྲོང་ཡུལ་སྡོད་དམངས་ཀྱི་རྒན་གསོའི་ཉེན་འགོག་འགན་སྲུང་ལམ་ལུགས་ནི་རྒྱལ་ཁབ་ཀྱིས་སྨན་བཅོས་འགན་སྲུང་ལམ་ལུགས་ལག་བསྟར་བྱས་རྗེས་ཡང་དུ་རྒྱ་ཆེ་བའི་རོང་འབྲོག་མི་སེར་རྣམས་ལ་ཐད་ཀར་ཕན་ཐོགས་ཆེན་པོ་ཡོད་པའི་དམངས་ཕན་སྲིད་ཇུས་ཤིག་རེད་ཅེས་ཞིང་འབྲོག་དམངས་ཚོགས་ཀྱིས་ངོས་འཛིན་དང་གདེང་འཇོག་ཚད་མཐོན་པོ་བྱས་བཞིན་ཡོད། རྟའུ་རྫོང་དཔལ་སྨད་གྲོང་རྡལ་ཤའུ་གཤིས་ཡུལ་ཚོའི་མི་རྒན་བཀྲ་ལོས་བཤད་རྒྱུར། ང་དང་བཟའ་ཟླ་ཨ་པད་གཉིས་ན་མཉམ་ཡིན་ཞིང་ད་སྐབས་ལོ་66ལ་སོན་ཞིང་རྒན་གསོའི་ཉེན་འགོག་འགན་སྲུང་ལམ་ལུགས་ལག་བསྟར་བྱས་པ་ནས་བཟུང་ངེད་གཉིས་ཀྱིས་རྒན་གསོའི་དངུལ་ལོངས་སུ་སྤྱོད་ཐུབ་ཡོད། ཟླ་རེར་སྒོར་55ཡོད་པ་དང་ལོ་གཅིག་ལ་བསྡོམས་པས་སྒོར་660ཡོད། རྒན་གསོའི་དངུལ་བླངས་ནས་ལོ་བཞི་ཡི་རིང་། ངེད་བཟའ་ཚང་གང་བོའི་རྒྱུན་པར་འཚོ་བའི་འགྲོ་སོང་ཙག་ཙིག་རྣམས་ཐག་གཅོད་བྱེད་ཐུབ། རྒྱལ་ཁབ་སྟོབས་འབྱོར་ཅན་དུ་སོང་བ་དང་བསྟུན་སྲིད་ཇུས་ཀྱང་ཇེ་བཟང་རེད། ལོ་རྒས་ཀྱང་འཚོ་བའི་ཐད་ལ་དཀའ་ངལ་ཅི་ཡང་མེད། ང་རང་གི་རྒན་གསོའི་དངུལ་གྱི་ལེགས་ཆ་རྣམས་ཤེས་པས། རང་གི་བུ་རྒྱུད་རྣམས་དང་མག་པ་བཅས་ཀྱང་རྒན་གསོའི་ཉེན་འགོག་འགན་སྲུང་ནང་ཞུགས་སུ་བཅུག་ཡོད། དེ་ནི་ཁོ་ཚོའང་འབྱུང་འགྱུར་ལོ་རྒས་པའི་སྐབས་སུ་འཚོ་བ་སོགས་ལ་དཀའ་ངལ་མེད་པའི་ཆེད་དུ་ཡིན། སྲིས་ཇུས་འདི་ནི་ཧ་ཅང་ལེགས་པོ་འདུག རྒན་རབས་པ་རྣམས་ཀྱི་དཀའ་ངལ་མང་པོ་དངོས་སུ་ཐག་གཅོད་བྱས་པ་མ་ཟད། ལྷག་པར་དུ་བསྟེན་ས་མེད་པའི་མི་རྒན་རྣམས་ལ་དེ་ལས་ཀྱང་ཡག་པོ་འདུག ང་ཚོའི་གྲོང་ནང་དུ་སྒྲོན་དཔལ་ཟེར་བའི་རྒན་པོ་ཁེར་རྐྱང་ཞིག་ཡོད་པ་ལ། རྒན་གསོའི་སྲིད་ཇུས་ཡིས་ཁོ་རང་གི་སྔོན་གྱི་དཀའ་ངལ་ཆེ་བའི་འཚོ་བའི་གནས་བབ་ལ་འགྱུར་བ་བྱུང་ཡོད། མིག་སྔར་ང་ཚོའི་སྡེ་བའི་ནང་དུ་རྒན་རྒོན་ལོ་60ལ་སོན་ཟིན་པའི་མི་136ཡི་ཉེན་འགོག་རྒན་གསོའི་དངུལ་ལོང་སུ་སྤྱོད་བཞིན་ཡོད་ལ། ད་སྐབས་ང་ཚོ་རྒས་ན་འཚོ་བའི་རྟེན་སོ་ཡོད་པ་དང་ཁག་ཐེག་ཡོད་པས་ངས་འདི་ནས་རྒྱལ་ཁབ་ཀྱིས་རྒན་གསོའི་ཉེན་འགོག་འགན་སྲུང་གི་དམངས་ཕན་སྲིད་ཇུས་བཏོན་པ་ལ་བཀའ་དྲིན་ཆེ་ཞུ་རྒྱུ་ཡིན།
རྒྱུས་ལོན་བྱས་པ་ལྟར་ན། རྟའུ་རྫོང་དཔལ་སྨད་གྲོང་རྡལ་གྱི་སྡོད་དམངས་3821ཙམ་གྲོང་ཡུལ་སྡོད་དམངས་ཀྱི་རྒན་གསོའི་ཉེན་འགོག་འགན་སྲུང་ནང་དུ་ཞུགས་ཡོད།（འགན་ལེན་ལྔའི་དུད་ཚང་དང་། རིམ་པ་དང་བོ་དང་གཉིས་པའི་དབང་བོ་སྐྱོན་ཅན་བསྡོམས་པའི་མི་21ལ་སྲིད་གཞུང་གིས་མ་རྩ་བཏང་ཡོད།）2013ལོའི་ལོ་མགོར་གྲོང་རྡལ་ཡོངས་སུ་ལོ་དྲུག་ཅུ་ལོན་པའི་མི་376ཡིས་རྒན་གསོའི་དངུལ་ལོངས་སུ་སྤྱོད་བཞིན་ཡོད།།
● དཔལ་སྨད་གྲོང་རྡལ་གྱི་ལས་བྱེད་པ་བཀྲ་ལོའི་ཁྱིམ་དུ་ཡོད་པ།
