རྒྱལ་པོ་གནམ་གྱི་ཁྲི་བདུན་གྱི་དུས་རབས།
དེ་ལྟར་བོད་ཀྱི་ཡུལ་འདིར་རྒྱལ་པོ་ཐོག་མར་བྱུང་ཚུལ་ནི། ཡུལ་འདིར་རྒྱལ་ཕྲན་སིལ་མ་བཞི་བཅུས་བཟུང་ཞིང་། སྡེ་འབངས་རྣམས་ཕྱིའི་དགྲ་དང་ནང་གི་དཔོན་གྱིས་འཕྲོག་བཅོམ་དང་མནར་གཅོད་དྲག་པོའི་སྡུག་བསྔལ་མྱོང་བཞིན་པའི་སྐབས་དེར། ཤར་ཕྱོགས་སྤུ་བོའི་ཡུལ་ནས་དཔའ་རྩལ་དང་སྙིང་སྟོབས་ལྡན་པའི་ཕོ་གཞོན་མང་སྙ་ཨུ་བེ་ར་ཞེས་པ་ཞིག་བྱུང་ཞིང་། དེས་ཡུལ་དཔོན་གྱི་གདུག་རྩུབ་ལ་གྱེན་ལོག་བྱེད་ཅིང་ཡུལ་ཡར་ཀླུང་དུ་བྲོས། ཡར་ཀླུང་གི་བྲན་གཡོག་རྣམས་དང་ལྷན་ཅིག་ཏུ་ཡར་ཀླུང་སྡེ་དཔོན་གྱི་དབང་ཤུགས་ཕྲོགས། ཐོག་མར་ཨུ་བེ་རས་ཡར་ཀླུང་གི་རྒྱལ་པོ་བྱས་ཤིང་། དེ་ནས་རིམ་བཞིན་སྤུ་བོ་དང། དྭགས་པོ། ཀོང་པོ་སོགས་ཀྱི་བྲན་གཡོག་བདག་པོ་རྣམས་དབང་དུ་བསྡུས་ནས་སྤུ་རྒྱལ་བོད་ཀྱི་རྒྱལ་ཁམས་ཞེས་པ་དེ་དབུ་བརྙེས་པ་རེད།ཐེའུ་རང་མང་སྙ་ཚང་གི་བུ་སྤུན་ཚོས་ཡུལ་གྱི་འགོ་པའི་བཀའ་ལ་རྟག་པར་གྱེན་ལྡོག་དང་འཐབ་རྩོད་མུ་མཐུད་བྱས་ཀྱང༌། ཡུལ་དཔོན་ལ་དམག་མང་པོ་ཡོད་སྟབས་མཐར་མང་སྣ་ཉུང་གིས་མ་བརྟན་པར་ཨུ་བེ་ར་སྤུ་བོ་ནས་ཐོན་ཏེ་བོད་ཡུལ་ཡར་ཀླུང་ཕྱོགས་སུ་ཡུལ་བྱོལ་དུ་འགྲོ་བའི་ལམ་བར་བྱང་ལམ་གཡའ་ལེ་གོང་གི་རི་འགོར་སླེབས་སྐབས། ཡར་ཀླུང་གི་འགོ་དཔོན་གྱི་མནར་གཅོད་འོག་ནས་བྲོས་བྱོལ་ཡོང་བའི་བྲན་གཡོག་ཚོ་པ་གཅིག་དང་འཕྲད། བཞིན་གྱི་མདངས་མཛེས་ཤིང༌། ལུས་སྟོབས་རྩལ་དང་ལྡན་པའི་ཕོ་གཞོན་དེ་ཉིད་ཡར་ཀླུང་གི་བྲན་གཡོག་ཚོས་མཐོང་བ་དང་ཁོ་ཚོས་ཡིད་སྨོན་དང་བཅས་པའི་སྒོ་ནས་“ཁྱོད་སུ་ཡིན། ཡུལ་གང་ནས་འོངས། ད་གང་དུ་འགྲོ”ཞེས་དྲིས་པར། ཨུ་བེ་ར་ན་རེ། “ང་ཐེའུ་རང་མང་སྙའི་བུ་ཡིན། སྤུ་བོའི་ཡུལ་ནས་འོངས། ད་བོད་ལ་འགྲོ”བྱས། དེ་ནས་ཁོ་ཚོས། “འོ་ན་ཁྱོད་ལ་ནུས་པ་ཅི་ཡོད”དྲིས་པར། “ང་ཕོ་རྒོད་པས་ཡུལ་དཔོན་ལ་གྱེན་ལོག་བྱས་ནས་ཡུལ་བྱོལ་དུ་འོང་བ་ཡིན”ཟེར། དེ་ནས་ཡར་ཀླུང་གི་བྲན་གཡོག་ཚོས“འོ་ན་ཁྱོད་ཀྱིས་ང་ཚོའི་རྒྱལ་པོ་བྱེད་པར་ཞུ”ཟེར་ནས་གུས་བཀུར་དང་བཅས་ཏེ་གཉའ་བར་བཏེགས་ནས་ཡར་ཀླུང་གི་ཕྱོགས་སུ་ཕྱིན།
1 སྤུ་རྒྱལ་ཐོག་མ་གཉའ་ཁྲི་བཙན་པོ་ནི། བོད་ཀྱི་ལོ་རྒྱུས་ཐོག་གི་རྒྱལ་པོ་དང་པོ་ཡིན། དེ་ཡང་སྤྱི་ལོའི་སྔོན་གྱི་ལོ་417པ་ཤིང་བྱི་ལོར་སྤུ་བོའི་ཡུལ་དུ། ཡབ་ཐེའུ་རང་མང་སྙ་དང༌། ཡུམ་མི་མོ་བཙུན་གཉིས་ཀྱི་སྲས་ཐེའུ་རང་སྤུན་དགུ་སྐྱེས་པའི་ཆུང་ཤོས་ཐེའུ་རང་མང་སྙ་ཨུ་བེ་ར་བྱ་བ། ལྕེས་གདོང་གི་དཀྱིལ་འཁོར་ཁེབས་པ།② ཕྱག་སོར་དྲ་བ་འབྲེལ་བ། ནུས་མཐུ་ཤིན་ཏུ་ཆེ་བ་ཞིག་བྱུང༌། སྐུ་ནར་སོན་པ་དང་ཐུགས་རྒྱུད་གྱོང་ཞིང་སྟོབས་རྩལ་ཆེ་སྟབས་ཡུལ་དཔོན་དང་འཐབ་འཛིང་བྱས། མཐར་སྤུ་བོ་ཡུལ་ནས་བོད་དུ་ཡུལ་བྱོལ་ཕྱིན། ལམ་བར་དུ་བོད་ཀྱི་རྒྱལ་ཕྲན་གྱི་གཉའ་གནོན་འོག་ནས་བྲོས་བྱོལ་བྱས་ཏེ་མགོན་དང་དཔུང་གཉེན་འཚོལ་དུ་འགྲོ་མཁན་བོད་མི་ཁག་གཅིག་དང་འཕྲད་དེ་མཉམ་དུ་བོད་ཡུལ་དུ་ཕྱིན། ཐོག་མར་བོད་ཀྱི་རྒྱལ་ཕྲན་དེ་ཉིད་དབང་དུ་བསྡུས། སྤྱི་ལོའི་སྔོན་གྱི་360ལོར་བོད་ཀྱི་རྒྱལ་པོ་ཐོག་མར་གྱུར། སྐུ་མཁར་ཡུམ་བུ་བླ་སྒང་བརྩིགས། དེ་ནས་ཞང་ཞུང་ཕུད་པའི་བོད་ཀྱི་ཡུལ་གྲུ་ཕལ་མོ་ཆེ་དབང་དུ་བསྡུས། བོད་ཀྱི་བཙན་པོ་ཞེས་པའི་མཚན་སྙན་ཐོག་མར་བཞེས། མཆན་ཁེབ་③ཀྱི་བློན་ཆེན་ལྷོ་དང་སྙགས་གཉིས་ཀྱིས་བྱས། བོན་པོ་མཚེ་མི་སྨུ་རྒྱལ་དང༌། ཙོ་མི་ཕྱག་གར་གཉིས་སྐུ་གཤེན་དུ་བསྟེན། ཕྱིང་བ་སྟག་རྩེར་ཕེབས་ཏེ་ཁྲིམས་དང་ལས་ཀའི་སྒྲིག་གཞི་བཟོས། གནམ་མུག་མུག་གམ་མུ་ཚོ་བཟའ་ཁབ་ཏུ་བཞེས། སྲས་མུ་ཁྲི་བཙན་པོ་འཁྲུངས་སྐབས་སྐུ་ན་བགྲེས་པས་སྲས་ཀྱིས་ཆིབས་ཁ་ཐུབ་ཙམ་ན་སྤྱི་ལོའི་སྔོན་གྱི་ལོ་354པ་ཤིང་ཕག་ལོར་སྐུ་གཤེགས་སོ།
● རྒྱལ་པོ་ཐོག་མ་གཉའ་ཁྲི་བཙན་པོ།
དེ་སྲས་མུ་ཁྲི་བཙན་པོ་ནི། །
བོན་དང་རིག་གནས་ཀུན་ལ་མཁས། །2 སྤུ་རྒྱལ་གཉིས་པ་མུ་ཁྲི་བཙན་པོ་ནི། ཡབ་གཉའ་ཁྲི་བཙན་པོ་དང་ཡུམ་མུ་ཚོ་བཟའམ་གནམ་མུག་མུག་གཉིས་ཀྱི་སྲས་སུ་སྤྱི་ལོའི་སྔོན་གྱི་ལོ་355པ་མེ་སྟག་ལོར་སྐུ་འཁྲུངས། སྐུ་གཤེན་གཅོའུ་ལན་ཚས་མཛད། གསས་ཁང་ཁོ་མ་ནེའུ་ཆུང་བཞེངས། བོན་གཤེན་ནམ་མཁའ་སྣང་བ་མདོག་ཅན་ལས་ཁྲོ་བོ་དབང་ཆེན་གྱི་རྒྱུད་ཞུས། ལྷ་རི་གྱང་ཐོ་ལ་སྒྲུབ་པ་བྱས། ཞང་ཞུང་ནས་མཁས་པ་ཆེན་པོ་བརྒྱ་རྩ་བརྒྱད་གདན་དྲངས། བོད་དུ་བོན་གྱི་འདུ་གནས་ཆེན་པོ་སུམ་ཅུ་རྩ་བདུན་བཙུགས། བོད་ཀྱི་ཡིག་གཟུགས་ལ་ལེགས་བཅོས་ཐེངས་དང་པོ་བྱས། སྤྱི་ལོའི་སྔོན་གྱི་ལོ་272པ་ས་གླང་ལོར་སྐུ་གཤེགས།
● གཉིས་པ་མུ་ཁྲི་བཙན་པོ།
3 སྤུ་རྒྱལ་གསུམ་པ་དིང་ཁྲི་བཙན་པོ་ནི། ཡབ་མུ་ཁྲི་བཙན་པོ་དང་ཡུམ་ས་བཟའ་དིང་དིང་མ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་གཅེའུ་སྨིན་དཀར་གྱིས་མཛད། གསས་མཁར་ཁོ་མ་ཡང་རྩེ་བཞེངས། སོ་བཟའ་ཐམ་ཐམ་མ་ཁབ་ཏུ་བཞེས།
● གསུམ་པ་དིང་ཁྲི་བཙན་པོ།
4 སྤུ་རྒྱལ་བཞི་པ་སོ་ཁྲི་བཙན་པོ་ནི། ཡབ་དིང་ཁྲི་བཙན་པོ་དང་ཡུམ་སོ་བཟའ་ཐམ་ཐམ་མ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་གཅེའུ་འོད་དཀར་གྱིས་མཛད། གསས་མཁར་རྨུ་ར་དགུ་ཁྱུང་བཞེངས། དོག་བཟའ་མེར་མེར་མ་ཁབ་ཏུ་བཞེས།
● བཞི་པ་སོ་ཁྲི་བཙན་པོ།
5 སྤུ་རྒྱལ་ལྔ་པ་མེར་ཁྲི་བཙན་པོ་ནི། ཡབ་སོ་ཁྲི་བཙན་པོ་དང༌། ཡུམ་དོག་བཟའ་མེར་མེར་མ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་མཚེ་མི་ཟུང་སྨན་གྱིས་མཛད། གསས་མཁར་ཟོ་བོ་ཁྱུང་ལག་བཞེངས། གདགས་ལྷ་དཀར་མོ་ཁབ་ཏུ་བཞེས།
● ལྔ་པ་མེར་ཁྲི་བཙན་པོ།
6 སྤུ་རྒྱལ་དྲུག་པ་གདགས་ཁྲི་བཙན་པོ་ནི། ཡབ་མེར་ཁྲི་བཙན་པོ་དང་ཡུམ་གདགས་ལྷ་དཀར་མོ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་དག་པ་མི་ཆེན་གྱིས་མཛད། གསས་ཁང་གཡུང་དྲུང་ལྷ་རྩེ་བཞེངས། སྲིབས་ལྷ་སྔོན་མོ་ཁབ་ཏུ་བཞེས།
● དྲུག་པ་གདགས་ཁྲི་བཙན་པོ།
7 སྤུ་རྒྱལ་བདུན་པ་སྲིབས་ཁྲི་བཙན་པོ་ནི། ཡབ་གདགས་ཁྲི་བཙན་པོ་དང་ཡུམ་སྲིབས་ལྷ་སྔོན་མོ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་གཅེའུ་ཞལ་དཀར་གྱིས་མཛད། གསས་ཁང་ཁོ་མ་རུ་རིང་བཞེངས། ས་བཙན་ཀླུ་རྗེ་ཁབ་ཏུ་བཞེས། སྤྱི་ལོའི་སྔོན་གྱི་ལོ་༨༤པ་མེ་བྱ་ལོར་སྐུ་གཤེགས། འདི་ཡན་གྱི་རྒྱལ་རབས་རྣམས་སྐུ་གཤེགས་རྗེས་སྤྱི་བོའི་རྨུ་ཐག་ལ་འཇུས་ནས་གནམ་དུ་གཤེགས་པའི་ཕྱིར་ན་གནམ་གྱི་ཁྲི་བདུན་ཞེས་པའི་མཚན་བྱུང་བར་གྲགས། འདི་ཡན་སྐུ་ཕུང་ས་ལ་སྦས་པའི་སྲོལ་མེད་སྟབས་རྒྱལ་པོ་རྣམས་ལ་བང་སོ་མེད་དོ།
● བདུན་པ་སྲིབས་ཁྲི་བཙན་པོ།
རྒྱལ་པོ་གནམ་གྱི་ཁྲི་བདུན་གྱི་སྐབས་སུ་བོད་འདིར་གསང་སྔགས་ཀྱི་ཆོས་དར་བའི་སྐོར་ལ། སྤུ་རྒྱལ་གདུང་རབས་གཉིས་པ་མུ་ཁྲི་བཙན་པོས་གཤེན་ནམ་མཁའ་སྣང་བའི་མདོག་ཅན་ལ་ཁྲོ་བོ་དབང་ཆེན་གྱི་རྒྱུད་གཞུང་ཆ་ཚང་ཞུས་ནས། ལྷ་རི་གྱང་ཐོ་ལ་སྒྲུབ་པ་རྟགས་ཐོན་གནང་བ་དང༌། གཞན་ཡང་སྐབས་དེར་ཞང་ཞུང་གི་ཡུལ་ནས་མཁས་པ་ཆེན་པོ་བརྒྱ་རྩ་བརྒྱད་གདན་དྲངས་ནས་བོད་དུ་བོན་གྱི་འདུ་གནས་ཆེན་པོ་སུམ་ཅུ་རྩ་བདུན་བཙུགས་པ་དེ་དག་གང་དང་གང་དུ་ཡོད་པ་གོང་དུ་བཤད་པ་ལྟར་དང༌། འདུ་གནས་དེ་དག་སྐྱོང་བའི་གཤེན་པོ་དྲུག་ཅུ་རྩ་བདུན་བྱུང་ཡོད་པ་ནི། གྲུབ་པ་ཐོབ་པའི་གཤེན་དགུ། མཁས་པ་མི་དགུ། མཐུ་བོ་ཆེ་མི་དགུ། བོན་ཆེན་བཞི་བཅུ་རྣམས་སོ།
གྲུབ་པ་ཐོབ་པའི་གཤེན་དགུ་ནི། 1.མུ་ཁྲི་བཙན་པོ། 2.ཧ་ར་ཅི་པ། 3.སྟག་ཝེར་ལེ་ཝེར། 4.ཨ་ནུ་འཕྲག་ཐག 5.སད་ནེ་གའུ། 6.ཟིངས་པ་མཐུ་ཆེན། 7.སྤེ་བོན་ཐོག་འཕྲུལ། 8.སྤེ་བོན་ཐོག་རྩེ། 9.ཐད་མི་ཐད་ཀེ་བཅས་སོ།
རྒྱལ་པོ་སྟོད་ཀྱི་སྟེང་གཉིས་ཀྱི་དུས།
1.སྤུ་རྒྱལ་བརྒྱད་པ་གྲི་གུམ་བཙན་པོ་ནི། ཡབ་སྲིབས་ཁྲི་བཙན་པོ་དང་ཡུམ་ས་བཙུན་ཀླུ་རྗེ་གཉིས་ཀྱི་སྲས་སུ་སྐུ་འཁྲུངས། སྐུ་གཤེན་གཅེའུ་ཚེམས་དཀར་གྱིས་མཛད། གསས་མཁར་ས་ལེ་བྱེ་ཚང་བཞེངས། ཀླུ་སྲིང་མེར་ལྕམ་ཁབ་ཏུ་བཞེས། སྤྱི་ལོའི་སྔོན་གྱི་ལོ་81པ་ལྕགས་བྱི་ལོར་ལོ་ངམ་གྱིས་བཀྲོངས། པུར་ཟངས་ཀྱི་གའུའི་ནང་དུ་བཅུག་ནས་ཆུར་བསྐྱུར། ལོ་བཅུའི་རྗེས་སུ་ཕྱིར་བཏོན་ནས་ས་ལ་སྦས་སོ། སྤྱི་ལོའི་སྔོན་གྱི་ལོ་84པ་མེ་བྱི་ལོར་ཡབ་སྲིབས་ཁྲི་བཙན་པོ་སྐུ་གཤེགས་པ་དང་། གྲི་གུམ་བཙན་པོ་བོད་ཀྱི་རྒྱལ་པོར་གྱུར། ཆབ་སྲིད་དང་། རིག་གནས། ལག་རྩལ་བཅས་དར་རྒྱས་ཆེན་པོ་བྱུང་། བོད་ཀྱི་རལ་གྲི་དགུ་ཟི་ཞེས་སྐད་གྲགས་ཅན་དེ་དུས་སྐབས་དེར་བྱུང་ཞིང་། རལ་གྲི་དགུ་ཟི་རིགས་མི་འདྲ་བ་སོ་སོའི་རྣོ་རྟགས་ཀྱང་མི་འདྲ་བ་ཡོད་དེ། “དགུ་ཟི་གྱེས་པ་རྣམ་དགུ་ནི། ནམ་མཁའི་སྤུ་ཆོད། དགྲ་ལྷའི་གར་ཆོད། གོང་ཁྲ་དགུ་ཆོད། ཆུ་ནང་ཉ་ཆོད་དང༌། གལ་རྒེའི་ཇོ་ཆོད། བྱེ་ནེའི་གདོང་ཆོད། ངན་ཐོའི་སྐད་ཆོད། ཨོ་ཚའི་བསམ་ཆོད། གོང་གོའི་ཕག་ཆོད་བྱ་བ་དེ་དག་དགུའོ། དེ་རྣམས་གྱེས་པའང་གཉིས་གྱུར་ཡོད། དགུ་བདག་གྱེས་པ་རྣམ་གསུམ་ནི། ཤང་དཀར་ཤང་ནག ཟ་འུག་ཅན་དང་གསུམ། དགུ་ཟིའི་སྡེ་ཚན་དེ་ལས་མེད།” ཅེས་དགུ་ཟིའི་རིགས་དང་རྣོ་ཚད་བཅས་བཤད་ཡོད།
● བརྒྱད་པ་གྲི་གུམ་བཙན་པོ།
བོན་གྱི་རིག་གནས་དར་ཞིང་སྐུ་གཤེན་རྣམས་སྐུ་དབང་ཆེ། རྒྱལ་སྲིད་ལ་ཐེ་གཏོགས་ཆེན་པོ་བྱས་སྟབས། གྲི་གུམ་བཙན་པོས་བོན་བསྣུབས། དེ་ཡང་རྒྱལ་པོའི་ཞལ་ནས། “སྐུ་གཤེན་རྣམས་གསོན་དང༌། ང་ཡི་རྒྱལ་སྲིད་དང༌། ཁྱོད་ཀྱི་བོན་སྲིད་གཉིས་ཙམ་མངའ་རིས་འདི་རུ་མི་ཤོང་བ་འདྲ་བས། ལྷ་བོན་སྒོ་བཞི་དང༌། གེ་ཁེད་ཐིས་འཕེན་དང༌། གཅོ་གྱིམ་བུ་ལན་ཚ་རྣམས་བདག་གི་སྐུ་སྲུང་དུ་བཞག་འཚལ། ཕྱི་མ་རྣམས་བོད་རུ་བཞི་ལས་འདས་པར་གཤེགས་ཤིག” ཅེས་གསུངས། བོན་གཤེན་རྣམས་བོད་ཡུལ་རུ་བཞིར་འདུག་མི་ཆོག་པར་ཕྱིར་ཕུད། བོན་གྱི་དཔེ་ཆ་རྣམས་རི་བྲག་ཤིང་ནགས་སོགས་སུ་སྦས་བསྐུངས་བྱས་ཤིང་བོན་གཤེན་རྣམས་ཡུལ་གཞན་དུ་བྲོས། སྐུ་གསུང་ཐུགས་རྟེན་སྦས་བསྐུངས་བྱས་པ་ལ་གཏེར་དུ་སྦས་པ་ཞེས་པའི་ཐ་སྙད་ཐོག་མ་འདི་ནས་བྱུང་། དེའི་ཚེ་ཏ་ཟིག་གི་གུ་ར་ཝ་ཏ་ཞེས་པའི་ཡུལ་ནས་ཏ་ཟིག་ཡུལ་གྱི་ཆོས་ལུགས་བོད་སྐད་དུ་བསྒྱུར་ཏེ་རྒྱལ་པོའི་བླ་མཆོད་དུ་བཀུར། བར་སྐབས་ཤིག་ན་ཏ་ཟིག་དང་མ་འཆམས་པས་གྲི་གུམ་བཙན་པོས་ཁ་ཆེའི་ཡུལ་དུ་དམག་དྲངས་ནས་གཡུལ་འཁྲུག་བྱས། གཡུལ་ལས་རྒྱལ་ནས་བོད་དུ་ཕྱིར་ལོག་པའི་ལམ་བར་གཙང་གི་མྱང་ཡུལ་དུ་སླེབས་སྐབས། གཙང་གི་རྒྱལ་ཕྲན་ལོ་ངམ་གྱིས་གཡོ་ཐབས་ཀྱིས་དགའ་བསུའི་མཛད་སྒོའི་ཁྲོད་དུ་མདའ་འཕངས་ཏེ་སྤྱི་ལོའི་སྔོན་གྱི་ལོ་81པ་ལྕགས་བྱི་ལོར་རྒྱལ་པོ་བཀྲོངས། པུར་ཟངས་ཀྱི་གའུའི་ནང་དུ་བཅུག་སྟེ་མྱང་ཆུའི་ནང་དུ་བསྐྱུར། དམག་རྣམས་ཕམ་པར་བྱས་ཏེ་སྤུ་རྒྱལ་གྱི་རྒྱལ་སྲིད་ཕྲོགས། རྒྱལ་སྲས་གསུམ་དྭགས་ཀོང་གི་ཡུལ་དུ་བྲོས། སྲས་ཆེ་བ་ཤ་ཁྲིས་ཀོང་པོའི་རྗེ་བོ་བྱས། དེང་དུས་ཀོང་པོ་རྒྱ་མདའ་ཀོང་པོ་ཉིང་ཁྲི་བཅས་ཀྱི་ས་ཁུལ་འདི་དག་ཡིན། སྲས་འབྲིང་བ་བྱ་ཁྲིས་སྤུ་བོའི་རྗེ་བོ་མཛད། དེང་དུས་སྤོ་བོ་ཁྲབ་རྨོག་གི་ཡུལ་འདི་དག་ཡིན། སྲས་ཆུང་བ་ཉ་ཁྲིས་ཉང་པོའི་རྗེ་བོ་མཛད་ནས་རེ་ཞིག་བཞུགས། དེང་དུས་ཀོང་པོ་རྒྱ་མདའ་རྫོང་གི་བྱང་ཕྱོགས་ཉང་པོ་སྡེ་ཤོག་གི་ས་ཁུལ་འདི་དག་ཡིན། སྲས་མོ་བཙན་དབང་གིས་ཆུང་མར་གྱུར། བཙུན་མོ་གཡོག་ཏུ་བཀོལ། དེ་ནས་བོད་ཀྱི་རྒྱལ་སྲིད་ལོ་བཅུ་གསུམ་ཙམ་ལོ་ངམ་གྱིས་བཟུང༌། ( 5 ) མུ་མཐུད་འགོད་རྒྱུར།
① སྤུ་བོ། དེང་སྤོ་བོའི་ཡུལ་ལ་གོ
② ལྕེས་གདོང་གི་དཀྱིལ་འཁོར་ཁེབས་པ། རྒྱལ་པོ་གཉའ་ཁྲི་བཙན་པོའི་ཐུན་མིན་གྱི་ཁྱད་ཆོས་འགའ་ལས་འདི་གཅིག་ཡིན་འདུག ལྕེ་མི་གཞན་ལས་ཆེ་བས་ཕྱིར་བརྐྱངས་པའི་ཚེ་ངོ་གདོང་འགེབས་ཐུབ་པའི་དོན་ཡིན།
③ མཆན་ཁེབ། དཔུང་རོགས།
● མགར་བ་གྲི་བརྡུང་མཁན།
