རྒྱ་ཆེ་བའི་གསན་མཁན་རྣམ་པ་ལགས། ཁོ་བོས་ལོག་སྨྲའི་རྩྭ་སྐྱ་སྲེག་པའི་བསྡུས་ གྲྭའི་མེ་སྟག་ཅེས་པའི་རྩོམ་ཐུང་འདི་། འབྲི་དགོས་པའི་དམིགས་ཡུལ་གཙོ་བོ་ནི། ནང་ཆོས་ཡང་དག་པར་སྒྲུབ་པ་མིན་ལ། ཚན་རིག་ཡང་མ་ དག་པར་སྒྲུབ་པ་དེ་བས་ཀྱང་མིན། འོ་ན་དམིགས་ཡུལ་གང་ཡིན་ཞེ་ན། གཅིག་འོག་ནས་འཆད་འགྱུར་ལྟར་རང་ཉིད་དཔྱད་རྩོམ་ཡག་པོ་ཞིག་འབྲི་ཤེས་པའི་ཆེད་ དང་། གཉིས། ལོག་རྟོག་གི་སྙིང་སྟོབས་ཅེས་པའི་དེབ་འདི་ཡི་བརྗོད་བྱ་མང་ཆེ་བ། དོན་མེད་ ཀྱི་ངག་འཁྱལ་དང་། ཁུངས་མེད་ཀྱི་འཆར་གཏམ་ལས་ཚད་ཐུབ་ཀྱི་རིགས་པ་ཞིག་མེད་པར་ར་སྤྲོད་བྱས་པ་ ཡིན། དེབ་དེ་ཡི་རྗོད་བྱེད་ཚིག་གི་འགལ་འདུ་ཡང་བལྟས་པ་ཙམ་གྱིས། ང་ལྟ་བུའི་ མི་ཚེ་ཕྱུགས་རྗེས་སུ་འཛད་པའི་འབྲོག་ཕྲུག་རྣམས་ཀྱང་གད་མོ་འཆོར་ཡོང་བ་ཞིག་ འདུག་པས། རྟགས་འདི་ལ་རྟེན་ནས་ཆེད་དཀརའ་བའི་གཞུང་ལུགས་རྣམས་ལ་དཔྱད་པ་ ནི།ཁྲོམ་ནང་སྦལ་པས་རྒྱ་མཚོའི་རྣམ་ཐར་གླེང་བའི་སྤུན་ཟླར་གྱུར་ཡོད་པ་སྨོས་ མེད་རེད། དེས་ན་ནང་ཆོས་དང་ཚན་རིག་ལ་ལོ་གཅིག་གཉིས་བློ་ཁ་ཕྱོགས་མྱོང་བའི་ གང་ཟག་ཡིན་ཚེ། ལོག་རྟོག་གི་སྙིང་སྟོབས་ཞེས་པའི་རྩོམ་ཐུང་འདི་བྱ་རོག་སོ་ རས་ཀྱི་བསྟན་བཅོས་དང་ཆེད་ཉེ་བར་རྟོགས་སླ་ཡང་། སློབ་སྦྱོང་གི་གོ་སྐབས་ཅུང་ ཟད་ཀྱང་མ་ཐོབ་པའི་ཞིང་འབྲོག་པའམ། དེའི་རིགས་སུ་གནས་པ་འགའ་ཤས དེབ་འདི་ གཟིགས་པའི་ཉེར་ལེན་ལ་བརྟེན་ནས། ཆོས་འཇིག་རྟེན་གང་ཡང་མེད་པར་བྱེད་སྲིད་ པས། ཁོ་བོའི་རྩོམ་ཐུང་འདིའི་ཆེད་དུ་བྱ་བའི་གདུལ་བྱ་ཡང་དེ་དག་ལ་ཡིན་ གྱི། བློ་དང་ལྡན་པ་རྣམས་ནི་མ་ཡིན་ནོ། །འདིར་ཞུ་དགོས་པ་ཞིག་ལ། ཁོ་བོ་ ནང་ཆོས་ཀྱི་ན་ཚོད་མ་སྨིན་པའི་བསྡུས་གྲྭ་པ་ཞིག་ཡིན་པས། རྩོམ་ཐུང་འདི་དགག་ པར་སོང་རུང་མ་སོང་རུང་ནང་ཆོས་ཀྱི་ཚབ་བྱེད་མི་ཐུབ་པ་འདི་ཤེས་དགོས་སོ། །རྗེས་སུ་དགག་ལན་ཡོད་ན་མདའ་སྙུག་སྐུ་དངོས་སམ་རྗེས་འབྲང་གང་ཡིན་རུང་རང་ཉིད་ ཀྱི་ཕ་ཡུལ་དང་། ས་གནས་གྲོང་རྡལ། གྲོང་ཚོ་གཞིས་དགོན་སོགས་ཀྱི་མཚན་ དང་།རྩོམ་པ་པོའི་དངོས་མིང་སྐུ་པར་བཅས་འགོད་རོགས་གནོངས། དེ་མིན་མིང་ མེད་པའམ་སྙུག་མིང་ཙམ་མ་གཏོགས་མེད་པ་རང་རྩོམ་རང་གིས་འགན་ཁུར་མི་ཕོད་པའི་མུན་ ནག་མདའ་འཕེན་གྱི་རྩོམ་འབྲི་མཁན་རྩོམ་པ་བོའི་མཚན་ཉིད་མཚང་བས། དགག་ལན་ལ་ཁོ་ བོས་བདག་སྤྲོད་མེད་པར་དེ་ལུགས་དགོང་འཇགས་འཚལ། །
༄༅། །འཇིག་རྟེན་འདི་ན་སྟོན་པའི་མིང་མང་ཡང་། །
ཟླ་མེད་རྟེན་འབྱུང་སྟོན་པ་ཁྱེད་གཅིག་པུ། །
མ་འདྲིས་འགྲོ་བའི་མཛའ་བཤེས་ཟས་གཙང་སྲས། །
སྤྱི་གཙུག་བདེ་བ་ཆེན་པོའི་རྒྱན་དུ་མཆོད། །
དབང་གཞུ་འོད་ལྔ་འཁྲིག་པའི་གུར་ཁང་ན། །
རྒྱ་མཚོའི་སྒྲ་ལས་བྱུང་བའི་ངག་གི་ལྷ། །
བཅུ་དྲུག་ལུས་ཕྲའི་སྙེམ་འཆང་ཚངས་སྲས་མས། །
མགྲིན་པ་ལོངས་སྤྱོད་འཁོར་ལོའི་རྩ་འདབ་ཁྲོལ། །
 གང་དག་ཕྱོགས་འཛིན་མུན་པའི་ཀློང་ནས་གནས་ལུགས་ལྟ་བའི་བློ་མིག་ཉམས། །
རིགས་སྐམ་མེ་འཁྱེར་འོད་ཞེན་པས་རྟེན་འབྱུང་ཉི་མའི་ཟེར་ལ་སྐྲག། །
དམུས་ལོང་རྗེས་འབྲང་གཡང་སར་གཞོལ་རྣམས་གཏི་མུག་གཉིད་ལས་སློང་བའི་ཆེད། །
རིགས་པའི་གདོང་ལྔ་གད་རྒྱང་སྒྲོག་ལ་བདག་གི་སེམས་ནི་སྤྲོ་བ་རྒྱས། །
    དེ་ཡང་ཉེ་ཆར་ལོག་རྟོག་གི་སྙིང་སྟོབས་ཞེས་པའི་དེབ་ཆུང་ཞིག་མཐོང་ བྱུང་། དེའི་ནང་དོན་ནི་ནང་ཆོས་ལ་དགག་པ་བརྒྱབས་པ་ཞིག་འདུག་པ་དེ་ཚར་ཁ་ཤས་ བཀླགས་པ་ཡིན། སྤྱིར་རིགས་གཞུང་གང་ཡིན་ཡང་ཡིན་ཤག་ཤག་མི་བྱེད་པ་དོགས་སློང་ བྱེད་པ་ནི་དགོས་ངེས་ཡིན་ལ། དེ་ལ་བརྟེན་ནས་རིག་གཞུང་དེ་དག་ཡར་རྒྱས་ དང་། གོང་འཕེལ་འགྲོ་བ་ལ་ཕན་ཐོགས་ཆེན་པོ་ཡོད། ང་རང་ཉིད་ལྟ་བུར་ཆ་མཚོན་ན་ ཡང་། ཆེན་པོའི་ལུང་ལ་དམིགས་བསལ་སྤྲོད་ཀྱང་དང་། རང་ལུགས་ལ་དམར་འགེབ་བྱེད་པ་ ནི་། མི་རིགས་ཞིག་གི་རིག་གཞུང་མདུན་དུ་སྐྱོད་པ་ལ་བར་ཆད་ཆེ་ཤོས་ཤིག་ཏུ་ བརྩི་བཞིན་ཡོད། དེས་ན་དག་སྣང་དར་དཀར་ཡུག་གཅིག་གིས་ཁྱབ་པའི་གངས་ཅན་གྱིལྗོངསསུ། ནང་ཆོས་ ལ་དགག་པ་གནང་མཁན་བྱུང་བ་ནི། ནང་ཆོས་གཟི་བརྗིད་དང་གོང་འཔེལ་འགྲོ་བའི་ལྟས་བཟང་པོ་ཡིན། གང་ཡིན་ཟེར་ན་ རིགས་པའི་ཆོས་ཡིན་པས་ཕྱིར། མུ་མཐུད་དུ་དེ་དང་དེ་ལྟ་བུ་གང་མང་འབྱུང་བའི་ རེ་བ་ཡོད། མདའ་སྙུག་གི་རྩོམ་འདི་ཡང་དཔལ་ཆོས་ཀྱི་གྲགས་པས། སྐྱེས་བུ་མང་ དུ་སྨྲ་བ་ལ། །བདེན་པ་ཚིག་གཅིག་མེད་པ་མིན་ཞེས་གསུངས་པ་ལྟར། ང་ཚོ་གང་ཟག་སྒེར་སོ་སོས་བསམ་བློ་གཏོང་དགོས་པ་འགའ་ཤས་འདུག་སྟེ།དེབ་དེ་ཡི་ཤོག་གྲངས༥༩ལལྷག་པར་གསང་སྔགས་ལུགས་ལ་རྟོགས་པའི་གདེང་དང་ལྡན་ན་ལུང་པ་དམར་བོ་བསྒྱུར་རང་ལག་ཡིན་སོགས་ཟེར་།དེ་ནི་ཉི་མ་མ་འཁྱོལ་བའི་གཏམ་ཡིན་པར་འོག་ཏུ་བསྒྲུབ་ཀྱང་། གང་ཟག་རེ་ཟུང་གིས་བསམ་བློ་གཏོང་དགོས་ངེས་ཡིན། ཁོ་བོས་བལྟས་ན་ཡང་སྐྱོན་ཆེ་ཤོས་ཅིག་ནི་ང་ཚོས་སྤྲུལ་སྐུ་དང་བླ་མ་གཉིས་དོན་གཅིག་ཏུ་འཛིན་པའི་སྐྱོན་འདི་ཡིན། སྤྲུལ་མིང་ཐོག་ཚད་བླ་མར་འཛིན། བླ་མས་ ཅི་མཛད་ལེགས་པར་བལྟ་དགོས་ཟེར་བས་གྲྭ་གཟུགས་དང་སྤྲུལ་གཟུགས་ཉུང་ཤས་ཤིག་གིས་ལུང་པ་དམར་པོ་སྒྱུར་ ཡང་། བཏང་འཛིན་བྱེད་མཁན་མི་བྱུང་བ་འདི་ཡིན། ཤོག་གྲངས་༦༤ལབྱིས་པ་སྣབས་ལུག་ཅིག་ལ་སངས་རྒྱས་གསོན་པོ་ཞེས་པའི་མིང་སྐམ་བཏགས་ཏེ་ཞེས་པ་དེ་བདེན་ཏེ།སྤྲུལ་སྐུ་ཆེ་འབྲིང་ཆུང་གསུམ་གང་ཡིན་ཡང་ཡང་སྲིད་ཕེབས་མི་ཕེབས་སྣ་ཚོགས་ཡོད་ སྲིད་མོད། ངེས་པར་དུ་བོད་ཡུལ་མ་གཏོགས་སྐྱེ་བ་ལེན་ས་མེད་པ་ལྟར་བྱེད་པ་འདི་ ནོར་འཁྲུལ་ཆེན་པོ་ཡིན། བསམ་བཞིན་དུ་སྲིད་པ་ལེན་མཁན་ཞིག་ཡིན་ན། ནུས་པ་ ཐོན་ངེས་ཞིག་བྱེད་དེ་ཡོང་ངེས་ཡིན། དཔེར་ན་རྗེ་རིན་པོ་ཆེ་བཞིན། དེ་མིན་ བྱིས་པ་རྟ་བཀྱོན་པ་བཞིན་ཁྲི་ཐོག་བཞག་ཏེ་སྤྲུལ་སྐུའི་གོ་ས་མ་སྤྲད་པར་ནུས་པ་ མི་ཐོན་བ་ཞིག་ཡིན་ན། སོ་སྐྱེས་ཕལ་བ་ལས་གོམ་གང་ཡང་མ་འདས་པ་དེ། ཕན་ལས་ གནོད་ཆེ་བས་སྐྱུར་དགོས།ཡང་མི་འགའ་ཞིག་གིས་སྤྲུལ་སྐུ་ཆེན་པོ་རྣམས་ཡང་སྲིད་ ངོས་འཛིན་བྱེད་དགོས་པ་དང་། ཆུང་ཆུང་རྣམས་ངོས་འཛིན་བྱེད་མི་དགོས་ཟེར་བ་ནི་ དྲང་པོ་མིན་པའི་གཏམ་སྟེ། ཆེན་པོས་ཆེན་པོའི་གོ་ས་འཛིན་ཆོག་ན་ཆུང་ཆུང་དེ་ཚོ་ཡང་རང་རང་གི་ཁྲི་ཐོག་ཏུ་ སྡོད་ལོས་ཆོག ཡང་སྲིད་ངོས་འཛིན་དང་ཁྲི་འདོན་མ་བྱས་ན་བོད་ཡུལ་དུ་སྤྲུལ་ སྐུ་མི་འབྱུང་བསམ་པ་ནི་རི་བོང་གནམ་རྡིབ་ཀྱི་སྡུག་བསྔལ་ཏེ།བསམ་བཞིན་དུ་སྲིད་ པ་ལེན་མཁན་ཞིག་ཡིན་ན་འགྲོ་བའི་དོན་དུ་ཕེབས་པ་ལས་ཁྲི་ཡི་དོན་ དུ་མི་ཕེབས་པས་ཕྱིར། གནས་ཚུལ་འདི་ཡི་སྟེང་ནས་ཁོ་བོ་མདའ་སྙུག་དང་རྟ་ཁ་མཉམ་སྒྲིག་གྲི་ཁ་མཉམ་འཕྱར་ ཡིན། དེ་ཡན་ལོག་རྟོག་སྙིང་སྟོབས་ཀྱི་བརྗོད་བྱ་ལེགས་པའི་ཕྱོགས་རེད། འདི་ནི་ཞོར་ཕྲོས་ཙམ་ཡིན་ལགས། །
      ད་ནི་ཅུང་ཟད་དཔྱད་པར་བྱ་སྟེ། དེ་ཡང་དེབ་འདི་ཡི་བརྗོད་བྱ་གཙོ་བོ་ནི་གཉིས་ ཏེ། ནང་ཆོས་དང་ཚན་རིག་མི་མཐུན་པར་སྒྲུབ་པ་དང་། དེ་ལ་བརྟེན་ནས་ནང་ཆོས་ཡང་དག་པ་མ་ཡིན་པར་སྒྲུབ་པ་གཉིས་སོ།དང་པོ་ལ་དེབ་དེའི་ནང་དུ་དམིགས་འབེན་གཙོ་བོ་མཁན་ཆེན་ཚུལ་ཁྲིམས་བློ་གྲོས་ལ་བཟུང་ནས།བོད་ཀྱི་མཁས་པ་ཕལ་མོ་ཆེས་ནང་ཆོས་གནམ་རིག་དང་མི་མཐུན་བཞིན་དུ་མཐུན་ཐབས་འཚོལ་བཞིན་ཡོད་ཟེར།དེ་ནི་འཐད་པར་མི་སེམས་ཏེ། ཚུལ་ཁྲིམས་བློ་གྲོས་ཀྱིས་བརྩམས་པའི་གནའ་དེང་ རིགས་པའི་རྣམ་གཞག་གི་ཤོག་གྲངས༨༧ལ། ད་ལྟ་རང་རེས་མཇལ་དུ་ཡོད་པའི་མངོན་པ་གོང་འོག་དང་། དུས་འཁོར་ནས་གསུངས་པའི་འཇིག་རྟེན་ཁམས་ཀྱི་དབྱིབས་ནི་དེང་དུས་ཀྱི་མཐོང་བ་དང་ མི་མཐུན་པས་བཙན་སྦྱོར་བྱེད་རྒྱུ་མེད། སྦྱར་ཡང་མི་དགོས་གསུངས་འདུག་པས།གོང་གི་དགག་པ་དེ་མཁན་ཆེན་གྱི་གསུང་ལ་ལེགས་ པར་བརྟག་མ་ཐུབ་པའི་རྣམ་འགྱུར་དུ་གསལ་ལོ། མཐུན་ཕྱོགས་ཤིག་གླེང་བ་ཙམ་གྱིས་མཐུན་ཐབས་འཚོལ་བ་ཡིན་ན། ཚན་རིག་པས་ཀྱང་ནང་ཆོས་དང་མཐུན་ཐབས་འཚོལ་བཞིན་འདུག་ཏེ། མེ་གོའི་ཧྭ་ཕའོ་ སློབ་གྲྭ་ཆེན་མོ་ནས་མཐར་ཕྱིན་ཏེ། རྒྱ་ནག་ཀྲེ་ཅང་སློབ་གྲྭ་ཆེན་མོའི་དགེ་ རྒན་ཆེན་མོ་དབྱིག་ཀྲི་པེའོས་བརྩམས་པ། ཚན་རིག་པ་ཞིག་གིས་སངས་རྒྱས་ཆོས་ལ་ཞིབ་ འཇུག་བྱས་པའི་སྙན་ཞུ་ཞེས་པའི་ནང་། ངས་ཤེར་ཕྱིན་གྱི་སྐོར་དང་། དབུ་མའི་ རྣམ་བཤད་སོགས་ལ་བལྟས་པ་ཡིན། ངས་ཤེས་པའི་ཚན་རིག་ཤེས་བྱ་ཕལ་མོ་ཆེ་སངས་རྒྱས་ ཆོས་ཀྱི་ཟུར་མཆན་ལྟ་བུར་གྱུར་འདུག་པས། ཚན་རིག་ནི་སངས་རྒྱས་ཆོས་ཀྱི་བསྟན་ སྲུང་ལྟ་བུར་གྱུར་བ་རེད་ཅེས་བཀོད་འདུག་པས་སོ། །ཚན་རིག་པ་གཅིག་གིས་ཚན་རིག་ ཀྱི་ཚབ་བྱེད་མི་ཐུབ་ཟེར་ན། ནང་ཆོས་པ་ཁ་ཤས་ཀྱིས་ཀྱང་ནང་ཆོས་ཀྱི་ཚབ་བྱེད་ མི་ཐུབ་ཏེ། རིགས་པ་མཚུངས་པས་ཕྱིར། གཞན་ཡང་དུས་རབས་ཉི་ཤུ་བའི་མཇུག་ཏུ་ཨ་ རི་ལ་ཚན་རིག་དང་ཚེ་སྲོག་འཇིག་རྟེན་གྱི་མཁས་པའི་བགྲོ་གླེང་གནང་བའི་ དེབClaser to truth བདེན་དོན་ལ་ཉེ་བར་འགྲོ་བ་ཞེས་པའི་ནང་དུ། ཀླད་ཆེན་དང་ཤེས་པའི་ སྐོར་ཤར་ཕྱོགས་ལྐོག་གྱུར་རིང་ལུགས་ལ་མིག་ཟུང་ཅེར་ཡོད་པར་བལྟས་པས་ཤེས་ནུས་ སོ། །དེས་ན་ནང་ཆོས་དང་ཚན་རིག་མི་མཐུན་པར་སྒྲུབ་པ་ནི་སྒྲ་མི་རྟག་པར་ཁས་ལེན་ ཅིང་རྟོགས་པའི་ངོར། སྒྲ་མི་རྟག་པར་སྒྲུབ་པ་དང་འདྲ་བས་སྣག་སྙུག་འཕྲོ་རླག་ ཙམ་དུ་ཟད་དོ། །དེབ་དེའི་ཤོག་གྲངས་ལ་ད་ལྟའི་མིག་ཡོད་ཚད་འཁྲུལ་སོང་ན་མ་འོངས་པར་མ་འཁྲུལ་བའི་མིག་ཅིག་གང་ནས་རྙེད། བརྙེས་ཀྱང་སྐྱེ་བོ་སུ་ཞིག་ཡིད་རྟོན་བྱེད་ཅེས་བཤད་འདུག་པ་ལ།འོ་ན་འདས་པའི་མིག་ཡོད་ཚད་འཁྲུལ་སོང་ན་ད་ལྟ་བའི་མིག་མ་འཁྲུལ་བ་ཞིག་གང་ནས་ ཡོང་སུ་ཞིག་ཡིད་རྟོན་བྱེད་ཟེར་ན་ལན་ཅི་ཡོད། ཚན་རིག་པའི་རྒྱང་ཤེལ་སོགས་བསྒྲུབ་བྱ་ཡིན་པ་ལས་སྒྲུབ་བྱེད་མིན་པར་འོག་ཏུ་འཆད་པར་བྱའོ། །
     ཤོག་གྲངས་2ལམངོན་པའི་ལུགས་ཀྱི་སངས་རྒྱས་པའི་རྣམ་གཞག་་བཀོད་པའི་རྗེས་སུ་རྣམ་གཞག་དེ་ཐམས་ཅད་ཀྱང་འཇིག་རྟེན་ལས་འདས་པའི་སངས་རྒྱས་ཀྱི་སྤྱན་ཞེས་བྱ་བ་དེས་དེ་ལྟར་དུ་གཟིགས་པ་ཡིན་ཞེས་པ་ཙམ་
ལས། གཞན་དེ་ལྟར་ཡིན་ངེས་པའི་འཐད་པ་བཙལ་ཏེ་སྨྲས་པ་ནི་ཅུང་ཟད་ཀྱང་མེད་དོ་ཟེར་ནས། རྣམ་རིག་པའི་འདོད་པ་བཀོད་པའི་རྗེས་སུ། འགས་གཏོར་ཆེན་པོའི་གཞུང་ལུགས་འདིའི་ཁུངས་ནི་ཨ་རིའི་གནམ་རིག་མཁས་པ་ཧ་པོས་ཤིན་ཏུ་ལེགས་པའི་རྒྱང་ཤེལ་སྤྱད་དེ་རྟོག་ཞིབ་བྱས་པའི་་གྲུབ་འབྲས་དེ་ཡིན་ཟེར། །ཧ་པོའི་མིག་དང་རྒྱང་ཤེལ་གཉིས་་ཤིན་ཏུ་ལེགས་པའི་དཔང་པོ་སུ་ཡོད། ཤིན་ཏུ་ ལེགས་པའི་རྒྱང་ཤེལ་ཞིག་མིའི་ཤེས་པས་བསམ་བློ་གཏོང་དེ་བཟོ་ཐུབ་ན། ཤེས་པ་ཁོ་ རང་ངམ་ཁོའི་བྱེ་བྲག་ཅིག་ཤིན་ཏུ་ལེགས་པའི་ཡེ་ཤེས་ཀྱི་སྤྱན་ཞིག་བྱུང་མི་ཆོག་ པའི་རྒྱུ་མཚན་ཏིལ་ཙམ་ཡང་མེད་། གོང་གི་རྒྱང་ཤེལ་གྱིས་མཐོང་བ་དེ། འདྲ་པར་ལ་འཁོད་པས་ཕྱིར་ཟེར་ན། ཁྱོད་རང་རི་རབ་རྩེ་ལ་ལང་བ་ཞིག་འདྲ་པར་ལ་འཁོད་ཡོད་ན་ཁྱོད་རང་གིས་རི་རབ་ཡོད་ པར་ཁས་ཨེ་ལེན། ལེན་ན་ཁྱེད་རང་གི་སྐུ་པར་ཞིག་ཁོ་བོ་ལ་སྐུར་དང་། ངས་ཆུ་ཚོད་གཅིག་གི་བཟོ་ ཆོག ཡང་འཇུག་དེ་མ་ཐག་ཏུ་སྐར་ཚོགས་ཡོད་ཚད་བར་ཐག་ཇེ་རིང་དུ་འགྲོ་བཞིན་ཡོད་པ་དང་། རྒྱང་ཐག་ཇི་ཙམ་རིང་བ་དེ་ཙམ་གྱིས་གྱེས་ཤུགས་ཆེ་བར་འདུག་ཟེར་བ་དང་། མི་ལོ་ དུང་ཕྱུར་གཅིག་གི་ཡར་སྔོན་དུ་སྐར་མ་འདི་དག་ཕན་ཚུན་གྱི་བར་ཐག་ད་ལྟ་ལས་ཉེ་བ་དང་། དེ་དུས་སྐར་མ་ཕན་ཚུན་གྱེས་ཤུགས་ཀྱང་ད་ལྟ་ལས་ཆེ་བ་ཞིག་ཡིན་པར་གོང་གི་རྒྱང་ ཤེལ་དེས་མཐོང་ཚུལ་ལས་ར་སྤྲོད་བྱས་ཡོད་པ་རེད་ཟེར། གཞི་ལ་ལྟོས་ཏེ་བར་ཐག་ཉེ་རིང་གཉིས་འགལ་བ་ཡིན་པ་ཡང་མི་ཤེས་པའི་གཏམ་དེ། ཡང་ན་མདའ་སྙུག་ཞལ་རག་མཆོད་མང་བ་འམ། དེ་མིན་ཧ་པོའི་རྒྱང་ཤེལ་དེ་ཤིན་ཏུ་ ནས་རྫུན་མར་སྒྲུབ་པ་གང་རུང་ཡིན། སྔ་ཕྱི་མེ་ཆུ་ལྟར་འགལ་བའི་གཏམ་དེ་ཐུགས་ ལྷོད་ལྷོད་ངང་ནས་ཀློགས་དང་མཁྱེན་ཐུབ།ཡང་ས་གཞི་ལེབ་ལེབ་མ་ཡིན་ཏེ་རིལ་རིལ་ཡིན་པས་ཕྱིར་ཟེར་བ་དེ་མ་ངེས་པའི་རྟགས་ཡིན་ཏེ།འདི་ལ་རིགས་པའི་རོལ་རྩེད་ཅུང་ཙམ་སྤྲོ་ན། མངོན་པའི་ལུགས་ལ་ས་ལྒང་ཞེས། ལ་མགོ་ཅན་གྱི་ཐ་སྙད་ཡོད་མེད་མི་ཤེས་ཀྱང་། ས་སྒང་ལེབ་ལེབ་དང་ས་གཞི་ལེབ་ལེབ་ཅེས་པ་ནི་དོན་ལ་གནས་པ་ཡིན་ཏེ། གོ་ལ་རིལ་རིལ་ཡིན་པས་ས་གཞི་ལེབ་ལེབ་མ་ཡིན་དགོས་ན་། ཁྱེད་ཀྱི་ཁང་བའི་ནང་ གི་ས་གཞི་ལེབ་ལེབ་ཡིན་མིན་དོགས་པ་ཨེ་ཡོད། ཁྱེད་ཀྱི་ཕ་ཡུལ་གྱི་ས་གཞི་ལེབ་ལེབ་ཡིན་མིན་དོགས་པ་ཨེ་ཡོད། དེ་མེད་ན། བོད་གངས་ཅན་གྱི་ས་སྒང་རིལ་རིལ་ཨེ་ཡིན་། ཡིན་ན་ཁྱེད་ཀྱི་ནང་ས་ཡང་རིལ་རིལ་མ་ཡིན་པའི་རྒྱུ་མཚན་སྟོན་རྒྱུ་མེད་དེ། ཡིན་ཟེར་ན་དངོས་སུམ་དངའགལ། མིན་ན་ས་སྒང་རིལ་རིལ་ཡིན་པའི་ས་མཚམས་གང་ནས་ ངོས་འཛིན་གྱི་ཡིན་ནམ་། ཚན་རིག་མཁས་པ་ཚོས་གསུང་ལན་ཞིག་གནོངས་དང་། ལེབ་ལེབ་དང་ཟླུམ་པོ་འགལ་ན་གྲུ་བཞི་དང་ཟླུམ་པོ་ཨེ་འགལ། འདོད་ན་དབྱིབས་ཚང་མ་ནང་ཕན་ཚུན་འགལ་བ་ཨེ་ཡིན་། ཁྱེད་ཚོའི་ལུགས་ལ་ལེབ་ལེབ་གཞི་མ་གྲུབ་པ་ཨེ་ཡིན། ཁྱེད་ཀྱིས་ སླང་ང་ལེབ་ལེབ་ཁས་བླངས་འདུག་ཀྱང་། སླ་ང་ལེབ་ལེབ་མ་ཡིན་པ་ཐལ། གོར་གོར་ཡིན་པས་ཕྱིར་ཟེར་ན་ལན་ཅི་ཡོད། དེས་ན་ལེབ་ལེབ་ཁོ་ནའི་དབྱིབས་ཅན་ ཞིག་དུས་རབས་ཉེར་གཅིག་ཕར་གཞག དུས་རབས་ཉེར་ལྔ་བའི་ཚན་རིག་པ་ཕེབས་ཀྱང་བཟོ་མི་ཐུབ། རིལ་རིལ་དང་དབྱིབས་གཞན་རྣམས་མི་འགལ་ཡང་ལེབ་ལེབ་ཁོ་ན་དང་འགལ་དགོས་ཏེ་ཟེར་ན། ཚ་བའི་མདའ་སྙུག་གི་དགོངས་པ་ཡིན་པས་ཕྱིར་ཞེས་པ་ལས་ལན་མེད་དོ། །ནང་པས་ས་གཞི་ སླང་ང་ལྟ་བུར་ཁས་བླངས་ཏེ་ཟླུམ་པོར་ཁས་མི་ལེན་ཟེར་བ་ནི། རང་ཉིད་ཐོས་རྒྱ་ ཆུང་བའི་རང་མཚང་ཕྱི་ལ་སྟོན་པ་ཙམ་དུ་ཟད་དེ། སླ་ང་ལྟ་བུར་ཁས་བླངས་ན་ཟླུམ་ པོར་ཁས་བླངས་པ་ཡིན་ཏེ། གོར་གོར་ཁས་བླངས་པས་ཕྱིར། ཟླུམ་པོ་ནི་གོར་མོ་ འམ་ཧྲིལ་བོ་ཞེས་བསྡུས་གྲྭའི་ཁ་དོག་དཀར་དམར་ནང་དུ་གསལ་ཡོད་པར་ཁྱེད་ཀྱིས་མ་ གཟིགས་སམ། ཀྱེ་མ་དབྱིབས་དང་ཁ་དོག་གི་རྣམ་གཞག་ཙམ་ཡང་མི་ཤེས་པ་ཞིག་གིས་མདོ་ སྔགས་གཞུང་ཆེན་དག་ལ་འཐད་མི་འཐད་གླེང་བ་ནི། ཕྱོགས་སྔའི་ནམ་མ་ལང་གོང་དགག་པའི་ཉི་མ་ཤར་ཟེར་བ་དེ་ཡིན་ཏེ། ཐོས་ མཁན་ཚོ་ཡང་ངོ་ཚ་དགོས་པའི་གཏམ་མོ། །
      ཡང་ཚན་རིག་པས་མཐོང་ཚད་ཚང་མ། པར་དང་བརྙན་ཕྲིན་བརྒྱུད་ནས་འཛམ་གླིང་མི་མང་ལ་ལྟད་མོ་བསྟན་ཡོད་ཟེར།པར་དང་བརྙན་ཕྲིན་བརྒྱུད་ནས་འཛམ་གླིང་མིས་མཐོང་ཚད་ཡོད་དགོས་ན། ཁྱེད་ཀྱིས་མི་འདོད་པའི་ལྷ་འདྲེ་དང་། ཞིང་ཁམས་དམྱལ་བ་སོགས་ཀྱང་ཡོད་དགོས་ཏེ། པར་དང་བརྙན་ཕྲིན་བརྒྱུད་ནས་འཛམ་གླིང་མིས་མཐོང་བས ཕྱིར དེ་རྩིས་འཕྲུལ་གྱིས་སྒྲིག་བཟོ་བྱས་པ་ཡིན་ཟེར་ན། ཅིག་ཤོས་དེ་ཡང་རྩིས་ འཕྲུལ་གྱིས་སྒྲིག་བཟོ་མ་བྱས་པའི་དཔང་པོ་མེད་པས་ཕྱིར། སྐྱེ་བོ་བརྒྱ་ཕྲག་མང་ པོ་བཞེད་པ་གཅིག་མཐུན་གྱིས་ཁས་ལེན་པས་ཕྱིར་ཟེར་ན། ཅིག་ཤོས་དེ་ཁས་ལེན་མཁན་མི་ཁྲི་ཕྲག་མང་པོ་ཡོད་པས་ཕྱིར།
  ཤོག་གྲངས༧ལ། དེ་སྔ་བོད་དུ་བསྒྱུར་བའི་སངས་རྒྱས་ཀྱི་གསུང་རབ་ཐེག་པ་ཆེ་ཆུང་སྔགས་དང་བཅས་པའི་ ནང་དུ། ང་ཚོ་འཚོ་སྡོད་བྱེད་སའི་འཇིག་རྟེན་གྱི་དབྱིབས་ད་ལྟ་ང་ཚོས་མཐོང་དུ་ཡོད་པ་འདི་ལྟར་རམ། ཡང་ན་འདི་
ཕྱོགས་འདྲ་བ་ཙམ་ཞིག་ཏུ་གསུངས་པའི་ཡི་གེ་ན་གཅིག་ཀྱང་མེད་པར་ཤེས་དགོས་སོ་ཟེར།ངོ་མཚར་ཆེ། ཁྱེད་ཀྱིས་དེ་ཚང་མ་ཞིབ་འཇུག་ག་དུས་གནང་བ་ཡིན། གང་དུ་གནང་བ་ ཡིན་ཁོ་བོ་ལ་གསུང་དང་། གལ་སྲིད་ཁྱེད་ཀྱིས་ཐམས་ཅད་གཟིགས་མེད་ཚེ་དེ་འདྲའི་ཡི་གེ་ན་གཅིག་ཀྱང་མེད་པར་ མངོན་ཤེས་ཀྱིས་མཁྱེན་པ་ཨེ་ཡིན་ལན་གསལ་བོ་ཞིག་གསུང་རོགས།
     ཤོག་གྲངས་9ལ། ཟླ་བའི་འོད་ཟེར་ཡང་ཉི་འོད་ལྡོག་འཕྲོ་བྱས་པ་ཙམ་ལས་རང་ངོས་འོད་མེད་ཅིང་། ཟླ་འོད་ཀྱང་བསིལ་བའི་རང་བཞིན་ཅན་མིན་པར་དྲོ་བའི་རང་བཞིན་ཅན་ཡིན་ཟེར།
      ཟླ་བ་རང་ངོས་ནས་འོད་མེད་ན་དྲོ་བའི་རང་བཞིན་ཅན་གྱི་འོད་ཅིག་ཚན་རིག་པས་བཟོ་ བསྐྲུན་བྱས་པ་རེད་དམ། ལོ་ངོ་སྟོང་ཕྲག་རིང་མཁས་གྲུབ་བརྒྱ་ཕྲག་གིས་གཏན་ལ་ཕབས་པའི་རིག་གཞུང་ཞིག་རྩ་ བརླགས་གཏོང་ཐུབ་ས་ཨེ་འདུག ཡིག་ཕྲེང་འོག་མ་འབྲི་ཚེ་གོང་མའི་བརྗོད་བྱ་བརྗེད་ཚར་བ་ལ་ལྟོས་དང། ཐུགས་ཁག་མེད་དེ་བསྡུས་གྲྭའི་འགྲོ་སྟངས་མ་ཆགས་པས་ཕྱིར།
     ཤོག་གྲངས་10ལ་དཔལ་ལྡན་དུས་འཁོར་ནས་གསུངས་བའི་བཟའ་བདུན་གྱི་རྩི་སྟངས་སོགས། དེང་གི་གནམ་རིག་དང་མཐུན་པར་གསུངས་པ་ནི། རང་སེམས་གསོ་བའི་གཏམ་ཡིན་ཏེ་ཟེར་བ་དང་། དཔལ་ལྡན་དུས་འཁོར་སངས་རྒྱས་ཀྱི་གསུངས་མིན་པར་འོག་ཏུ་འཆད་ཟེར་བ་དང། དུས་འཁོར་ལུགས་ཀྱི་སྐར་རྩིས་དེ། དུས་རབས་བཅུ་བའི་གཡས་གཡོན་གྱི་རྒྱ་གར་ཤར་ ནུབ་དུ་དར་བའི་གནམ་རིག་གི་ཚབ་མཚོན་ཡིན་པས། དེང་གི་གནམ་རིག་དང་ཕྱོགས་མཐུན་གྱི་ལེགས་ཆ་ལོས་ཡོད་ཟེར་བ་དང་། མཁས་དབང་ར་སེ་ལགས་ཀྱིས་ཉི་ཟླ་ཟ་མཁན་གྱི་གཟའ་དེ་འདྲ་གསུང་རབ་ནང་དུ་གསུངས་ མེད་ཟེར་བ་ནི་དྲང་པོ་མིན་ཏེ། དུས་འཁོར་ནས་སྒྲ་ཅན་གཡོན་སྐོར་གྱིས་འགྲོ་བ་ནི་བསོད་ནམས་ཀྱིས་སྟོབས་ཡིན་ཟེར་ བས། སྲོག་ཆགས་མིན་ན་བསོད་ནམས་ཆེ་ཆུང་སྐད་ཆ་ཡོང་ས་མེད་ཟེར་ཏེ། དུས་འཁོར་ནས་བཤད་པའི་སྒྲ་ཅན་བསོད་ནམས་ཀྱི་སྟོབས་ཀྱིས་འགྲོ་ཞེས་པ་དེས། ནང་ཆོས་ཀྱི་གསུང་རབ་ནང་དུ་ཉི་ཟླ་ཟ་མཁན་གྱི་གཟའ་ཡོད་པར་གསུངས་པ་སྒྲུབ་ཁུལ་ བྱེད་པ་ནི་ནང་འགལ་རི་བོ་བརྩིགས་པ་ཡིན་ཏེ།དུས་འཁོར་སངས་རྒྱས་ཀྱི་བཀའ་མིན་ན་སྒྲ་ཆེན་བསོད་ནམས་ཡོད་ཟེར་མཁན་དེ། དུས་ རབས་བཅུ་བའི་ནུབ་དར་གནམ་རིག་པ་ཡིན་ལ། བཀའ་ཡིན་ན་གཟའ་བདུན་གྱི་རྩི་སྟངས་གནམ་རིག་དང་མཐུན་པ་དེ་སངས་རྒྱས་ཀྱི་བཀའ་ཡིན་དགོས།
    ཤོག་གྲངས་12ལ། ད་ལྟ་སྨན་རྩིས་ཁང་གི་དུས་ཚོད་གསལ་ཁ་ཅན་ཞིག་འཆད་ཐུབ་པ་ནི། རྒྱ་ནག་ནས་བླངས་པའི་མན་ངག་བཀའ་རྒྱ་མ་ཞིག་གིས་བྱེད་བཞིན་ཡོད་ཚོད་དང་། དེ་ནུབ་ཕྱོགས་ནས་ཁྱེར་ཡོང་བ་ཡིན་ཚོད་བྱས་ཏེ། དོན་ལ་ནུབ་ཕྱོགས་པའི་བཀའ་དྲིན་ཡིན་པར་ཤེས་དགོས་ཟེར།
     ཕྱིའི་མི་རིགས་ལ་ངོ་དགའ་འཆད་པའི་ཆེད་དུ། རང་མི་རིགས་ཀྱི་རིག་གཞུང་འགའ་ཤས་རྒྱུ་ མཚན་མེད་པའི་དམའ་འབེབས་དང་། ལྷག་མ་རྣམས་མི་རིགས་གཞན་ཁོ་ནས་ལག་རྗེས་སུ་ ཡིན་རྒྱུ་བྱས་པ་ནི། ཁྱེད་རང་ནུབ་ཕྱོགས་ཨ་རིའི་སྒྲོ་ལོར་དང་། དབྱིན་ཇིའི་རྒན་མོ་ལ་དགའ་ཐག་ཆོད་པས་ཅི་བཤད་འདི་བཤད་མེད་ཀྱང་། མི་བཤད་རང་དབང་མེད་པའི་གཏམ་མོ། །
  ཤོག་གྲངས་15ལ། འོ་ན་མི་ཡུལ་གྱི་ཁང་པ་དང་ཁང་པའི་ནང་གི་འཛིན་ཆས་འདི་དག་འབད་མེད་ལྷུན་གྲུབ་ཏུ་ མི་འབྱུང་བའི་རྒྱུ་མཚན་ཅི་ཡིན་ནམ་ཟེར་བ་སོགས་འདྲི་བ་འགའ་བཀོད་འདུག
  དེ་ནི་ཁྱེད་རང་མཐུན་རྐྱེན་མ་འཛོམས་པས་སྡུག་སྐད་ཙམ་དུ་ཟད་དེ། གཞན་དུ་ན་གོ་བ་གཙོ་བོར་བྱས་ཏེ་བཤད ན། གོང་དུ་དེར་སྐྱེས་དགོས་པའི་རྒྱུ་དང་རྐྱེན་ཞེས་པ་དེས་ཀྱང་། དམྱལ་བ་འབད་མེད་ལྷུན་གྲུབ་ཏུ་བྱུང་མ་བྱུང དང་། འཇིག་རྟེན་བཀོད་པ་བོ་ཡོད་མེད་ཀྱི་ཡིག་ཉོག་ཚང་མ་འཕྲོ་རླག་ཏུ་ཕྱིན་ཚར་བ་རེད། ཚིག་གི་སྟེང་ནས་བཤད་ན། ལས་བསགས་པ་སྔོན་དུ་སོང་བའི་དམྱལ་བའི་སེམས་ཅན་རྣམས།ལས་དེ་མྱོང་བཞིན་པའི་ཚེ་ ལྕགས་སྲེག་རང་གིས་འབད་མི་དགོས་ཏེ། མི་བསད་པའི་ཁྲམ་པ་བཙོན་དུ་སྡོད་བཞིན་པའི་ཚེ་བཙོན་ཁང་རང་གིས་ཉོ་མི་དགོས་པ་བཞིན་ནོ། །
  ཤོག་གྲངས་16ལ། སངས་རྒྱས་རྣམས་ཐུགས་རྗེ་དང་ནུས་པ་དེ་འདྲ་ཆེ་ན་ལས་འབྲས་མངོན་སུམ་དུ་བསྟན་ནས་མ་འོངས་སྔོན་འགོག་གནང་དགོས་པ་ལ་ཟེར།
   སངས་རྒྱས་ཀྱིས། ང་ཡིས་ཁྱོད་ལ་ཐར་བའི་ཐབས་སྟོན་གྱི། གསུངས་པས་སངས་རྒྱས་ ཀྱི་ཐུགས་རྗེ་དེ། སེམས་ཅན་ཡོངས་ལ་བུ་ལྟར་བརྩེ་བ་དང་། ནུས་པ་ནི་བདེན་བཞི་བླང་དོར་ཕྱིན་ཅི་མ་ལོག་པར་སྟོན་བ་སོགས་ཡིན་གྱི། བུམ་པ་མ་ཡིན་པའི་བུམ་པ་བཟོ་རྒྱུ་ཡོད་ཟེར་བའི། ཡེ་ཤུའི་དཀོན་མཆོག་གི་ནུས་པ་དེ་འདྲ་མིན། སངས་རྒྱས་ཀྱིས་ཡིན་པ་ལ་ཡིན་པར་བྱེད་པ་ལས། མ་ཡིན་པ་ལ་ཡིན་པར་འདོགས་མཁན་དེ་ང་ཚོ་རེད་ཅེས། ཁྱོད་ཀྱིས་ལུང་ཡང་ཡང་དྲངས་པའི་དྲན་དབང་དགེ་འདུན་ཆོས་འཕེལ་གྱིས། ཀླུ་སྒྲུབ་དགོངས་རྒྱན་དུ་གསུངས་པ་ལ་ལྟོས་དང་ཤེས། དམྱལ་བ་དང་ལྷ་ཡུལ། སྐར་འབྲུ་གཞན་གྱི་སྟེང་དུ་སྲོག་ཆགས་དང་། ལྷ་འདྲེ་གཞན་ཡོད་མེད་འོག་ཏུ་འཆད་ཀྱང་། མངོན་པའི་གཞུང་ནས་འཇིག་རྟེན་སྤྱི་ཡི་ཆགས་རིམ་བཤད་པ་དང། ཚན་རིག་པས་གོ་ལ་འདི་ཡི་ཆགས་རིམ་བཤད་པ་གཉིས་མི་མཐུན་ཟེར་ནས་ཧ་ལས་ལས་བྱེད་པ་ ནི། དེ་རིང་གི་བུམ་པ་དང་། དངོས་པོ་གཉིས་སྐྱེ་སྔ་ཕྱི་འདུག་ཟེར་ཏེ་ཧ་ལས་པ་དང་འདྲ་བས་དེ་ལྟ་བུའི་ལྐུགས་ པ་ནི་ཤེས་བྱ་ལ་སྲིད་པ་ཙམ་མོ། །
    ཤོག་གྲངས་18ལ། བོད་ མི་རིགས་རྗེས་སུ་ལུས་པ་ནི་། དགེ་བཤེས་གླང་རི་ཐང་བ་ལྟ་བུ་ཚེ་གཅིག་ལ་ངོ་ནག་སྡུག་གེར་སྡོད་པའི་སྐྱོ་སྣང་རིང་ལུགས་ཀྱི་སྐྱོན་ཡིན་ཟེར།
     མི་རིགས་ཤིག་མདུན་དུ་བསྐྱོད་པ་ལ་མི་རིགས་དེའི་མི་ཡོངས་རྫོགས་ལ་འགན་ཡོད་ པས། ལོ་ངོ་སྟོང་ཕྲག་གི་རིང་ལ། བོད་མི་མང་ཆེ་བ་ངོ་ནག་སྡུག་གེར་བསྡད་པ་ཨེ་ཡིན། དེ་མིན་མི་རེ་ཟུང་གིས་འཛུགས་སྐྲུན་མ་བྱས་པ་ཙམ་གྱིས་མི་རིགས་དེ་རྗེས་སུ་ལུས་ འགྲོ་ན། འཛམ་གླིང་འདིར་སྔོན་ཐོན་གྱི་རྒྱལ་ཁབ་མེད་པས་ཐལ་བ་དང་། གཞན་དུ་ན་མ་བྱུང་བ་ཚང་མ་ཆོས་ཀྱི་གནོད་ཡིན་ཟེར་བ་ནི་ཕྱོགས་སུ་ལྷུང་བའི་གཏམ་ ཡིན། དགེ་བཤེས་གླང་ཐང་སོགས་ངོ་ནག་སྡུག་གེར་བསྡད་པའི་གྲུབ་འབྲས། ཁོང་རྣམས་ཀྱིས་ གསུངས་པའི་ལེགས་བཤད་ཚོ། ད་ལྟ་འཛམ་གླིང་གི་མཁས་བླུན་སྟོང་ཕྲག་མང་ པོས་། སློབ་སྦྱོང་བྱེད་བཞིན་ཡོད་པ་དང། ལེགས་བཤད་དེ་རྣམས་འཛམ་གླིང་དུ་དར་རྒྱས་བྱུང་ན། དེང་དུས་ཚན་རིག་གི་གྲུབ་འབྲས་རྡུལ་ཕྲན་མདེའུ་གཅིག་གི་ཁ་ན། སྙིང་རྩ་འདར་བཞིན་པའི་འཛམ་གླིང་མི་མང་ལ་ཡུན་རིང་ཞི་བདེ་ཡོང་བའི་རེ་བ་ཆེན་ པོ་ཡོད། ཁྱེད་འདྲ་བའི་སྐྱོ་སྣང་རིང་ལུགས་ཀྱི་རྨོངས་གཉིད་འོག་ནས་ཐར་བ་ཚོས། བོད་མི་རིགས་ལ་ཕན་པའི་གསར་གཏོད་ག་ཚོད་གནང་ཡོད། ང་ཚོ་ལ་སྟོན་དང་།རྗེས་སུ་ཡི་རངས་གྲངས་མེད་ཡོད། འོན་ཀྱང་རང་ཉིད་ཀྱིས་ཁབ་གཅིག་ཀྱང་གསར་གཏོད་མི་ཐུབ་པར། མེས་པོས་དཀའ་བ་རྒྱ་ཕྲག་གིས་བསྒྲུབས་པའི་རིག་གཞུང་ལ། རྒྱུ་མཚན་མེད་པར་དམའ་ འབེབས་བྱེད་པ་ནི། མི་རིགས་ཤིག་སྔོན་དུ་བསྐྱོད་པའི་བར་ཆད་ཆེ་ཤོས་དང་། གངས་ཅན་པའི་ཞབས་འདྲེན་ངོ་མ་དེ་ཡིན་པར་འདོད་དོ། །

ཁྱོད་ཀྱི་གྲུབ་མཐའ་ང་ཡི་ཡིག་ཆ་ཞེས། །

མདུང་རྩེ་ནང་དུ་གཏོད་པའི་མཁས་མིང་ཚོ། །

བསྟན་སྲུང་བསྡུས་གྲྭའི་མེ་སྟག་འདི་མཐོང་ཚེ། །

རེ་ཞིག་བག་ཡོད་ངལ་གསོ་བྱེད་པར་རིགས། །