སྤྱི་ཟླ་6ཚེས་8ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨ་སི་ཐ་ནར་ཨུ་རུ་སུའི་སྲིད་འཛིན་ཕུ་ཅིང་དང་མཇལ་འཕྲད་གནང་། 
        ཞི་ཅིན་ཕིང་གིས་ཡུན་རིང་མ་འགོར་བའི་གོང་ང་རང་ནས་རྒྱུད་གཅིག་ལམ་གཅིག་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་སྲིད་འཛིན་ཕུ་ཅིང་དང་མཇལ་འཕྲད་བྱུང་བ་དང་། ཀྲུང་གོ་དང་ཨུ་རུ་སུའི་ཁྱོན་ཡོངས་འཐབ་ཇུས་མཉམ་ལས་འབྲེལ་བ་ཚད་གཞི་མཐོན་པོའི་སྒོ་ནས་གོང་འཕེལ་གཏང་རྒྱུ་རྒྱུན་འཁྱོངས་བྱེད་པ་དང་། རྒྱལ་ཁབ་གཉིས་ཀྱི་ཁྱོན་ཡོངས་མཉམ་ལས་བྱེད་ཤུགས་ཆེ་རུ་གཏང་རྒྱུའི་གལ་ཆེའི་ཐུན་མོང་ངོས་འཛིན་བྱུང་། མིག་སྔའི་རྙོག་འཛིང་ཆེ་བ་དང་འགྱུར་བ་མང་བའི་རྒྱལ་སྤྱིའི་དུས་བབ་འོག་ཀྲུང་གོ་དང་ཨུ་རུ་སུའི་འབྲེལ་བ་གོང་འཕེལ་ཡག་པོ་བྱུང་བ་དང་ཀྲུང་གོ་དང་ཨུ་རུ་སུ་ཁག་སོ་སོ་གོང་འཕེལ་དང་དར་རྒྱས་ཡོང་བ་བྱ་རྒྱུ་དེ་འཛམ་གླིང་གི་ཞི་བདེ་བརྟན་ལྷིང་ལ་གལ་འགངས་ཆེན་པོ་ཡིན་པས་ཕྱོགས་གཉིས་པོས་ཕན་ཚུན་གྱི་སྲོག་ཤིང་ཁེ་ཕན་དང་འབྲེལ་བ་ཡོད་པའི་གནད་དོན་ཐད་ཕན་ཚུན་རྒྱབ་སྐྱོར་བྱེད་པ་དང་རྒྱུད་གཅིག་ལམ་གཅིག་འཛུགས་སྐྲུན་བྱེད་རྒྱུ་དང་ཡོ་རོབ་དང་ཨེ་ཤ་ཡའི་དཔལ་འབྱོར་མནའ་འབྲེལ་སྦྲེལ་མཐུད་བྱ་རྒྱུར་དོན་དངོས་གྲུབ་འབྲས་སྔར་ལས་མང་བ་ཐོབ་རྒྱུར་སྐུལ་འདེད་གཏོང་བ་དང་མི་ཆོས་རིག་གནས་བརྗེ་རེས་དང་དམངས་སེམས་གཅིག་མཐུན་གཏིང་ཟབ་ཏུ་གཏོང་བ། རྒྱལ་སྤྱི་དང་ས་ཁུལ་གྱི་ལས་དོན་ཁྲོད་ཀྱི་མཐུན་སྦྱོར་དང་གཞོགས་འདེགས་གཏིང་ཟབ་དུ་གཏང་དགོས་ཞེས་གསུངས། 
        ཕུ་ཅིང་གིས་ཨུ་རུ་སུ་དང་ཀྲུང་གོས་མཐོ་རིམ་འགྲོ་འོང་དམ་ཟབ་རྒྱུན་འཁྱོངས་བྱ་རྒྱུ་གལ་ཆེན་པོ་ཡིན། མིག་སྔའི་རྙོག་འཛིང་ཆེ་བའི་རྒྱལ་སྤྱིའི་དུས་བབ་ཀྱི་མདུན་དུ་ཨུ་རུ་སུ་དང་ཀྲུང་གོས་འབྲེལ་གཏུག་དང་མཐུན་སྦྱོར་བྱེད་ཤུགས་ཆེ་རུ་བཏང་ནས་འཛམ་གླིང་དང་ས་ཁུལ་གྱི་ཞི་བདེ་དང་བརྟན་ལྷིང་། བདེ་འཇགས་བཅས་སྲུང་སྐྱོང་བྱ་དགོས་པར་མ་ཟད། ཨུ་རུ་སུ་དང་ཀྲུང་གོས་འབྲེལ་ཡོད་ཕྱོགས་ཁག་དང་མཉམ་དུ་འབད་བརྩོན་བྱས་ནས་ཧྲང་ཧེའི་མཉམ་ལས་སྒྲིག་འཛུགས་ཁོངས་གཏོགས་རྒྱལ་ཁབ་ཀྱི་མཐུན་སྒྲིལ་མཉམ་ལས་གཏིང་ཟབ་ཏུ་གཏོང་བ་དང་རྒྱལ་སྤྱིའི་ལས་དོན་ཁྲོད་སྒྲིག་འཛུགས་ཀྱི་ནུས་པ་སྔར་ལས་ཆེ་བ་འདོན་སྤེལ་བྱ་རྒྱུར་སྐུལ་འདེད་གཏང་དགོས་ཞེས་གསུངས་པར་མ་ཟད། ཕུ་ཅིང་གིས་ཀྲུང་གོས་རྒྱུད་གཅིག་ལམ་གཅིག་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་གཉེར་རྒྱུ་ལེགས་གྲུབ་བྱུང་བར་སླར་ཡང་བཀྲ་ཤིས་བདེ་ལེགས་ཞུས་པ་དང་རྒྱུད་གཅིག་ལམ་གཅིག་གྲོས་འགོར་གལ་ཆེའི་དོན་སྙིང་ལྡན་ཡོད་ལ་རྒྱལ་སྤྱིའི་སྤྱི་ཚོགས་ཀྱི་རྒྱབ་སྐྱོར་ཀྱང་ཐོབ་པ་རེད་ཅེས་གསུངས།