ནངས་སྔ་མོར་གཟན་རྩྭ་ལ་ཆུའི་གྲུབ་ཆ་ཆེས་མང་བས།  ཕག་ཕྲུག་དག་རྩྭ་དེ་བཟའ་རྒྱུར་ཆེས་དགའ་བ་རེད་ཅེས་བསོད་ནམས་ཚེ་རིང་གིས་དེ་ལྟར་བཤད། འབར་ཁམས་གྲོང་ཁྱེར་གྱི་འོད་འདུས་སྡེ་པའི་གྲོང་མི་བསོད་ནམས་ཚེ་རིང་གིས་ཉི་མ་མ་ཤར་བའི་ཡར་སྔོན་དུ་རྩྭ་བཏུས་ནས་ཕྱིར་ཁྱིམ་ལ་ལོག་པ་དང་།  ཕག་གཟན་རྗེས་མ་དེ་ཕག་གཞོང་དུ་བླུགས་ཤིང་ཁོས་ཕག་ཁང་ནང་གི་ཕག་ཕྲུག་རྒྱགས་པ་76དེ་མཐོང་དུས་སེམས་པ་རང་དབང་མེད་པར་སྤྲོ་བས་ཁེངས།  སྤྱི་ལོ་2016ལོར།  བསོད་ནམས་ཚེ་རིང་གྲོང་པའི་དབུལ་ཕོངས་ཁྱིམ་ཐོ་རུ་བཀོད་པ་དང་། སྔོན་མར་ཕྱི་ལོགས་སུ་ཞོར་ལས་བྱེད་པ་དང་སྨན་རྩྭ་རྐོ་བ་སོགས་ལ་བརྟེན་ནས་ཁྱིམ་མི་ལྔའི་འཚོ་བ་སྐྱོང་པ་དང་།  དེང་དུས་སྲིད་གཞུང་དང་དབུལ་སྐྱོར་སྡེ་ཁག་གི་རོགས་རམ་འོག  ཁོ་རང་འོད་འདུས་སྡེ་པའི་ཕག་གསོ་མཁན་པོ་རུ་གྱུར་ཡོད་པ་རེད།   སྤྱི་ལོ་2013ལོར།  བསོད་ནམས་ཚེ་རིང་གི་བཙས་མ་ཐག་པའི་བུ་ལ་ནད་གཞི་ལྕི་མོ་ཞིག་ཕོག་པ་དང་།  ཁོས་ང་ཕོ་ལོ་40སླེབས་ལ་ཉེ་དུས་བུ་འདི་ད་གཟོད་བཙས་ནའང་།   ནད་གཞི་ལྕི་མོ་ཡོད་པ་རྟོགས་རྗེས་སྐབས་དེ་དུས་ངའི་སེམས་པ་སྡུག་གིས་ཁེངས་སོང་ཟེར།  ལོ་འདི་དག་གི་རིང་།  བུའི་ནད་གཞི་བཅོས་པའི་ཆེད་དུ་ཁོས་ཁྱིམ་གྱི་རྒྱུ་ནོར་ཡོད་ཚད་བཏང་བ་དང་རང་གིས་ལས་ཀ་ལྕི་མོ་གང་ཡོད་ལས་པར་མ་ཟད།  ཧུར་བརྩོན་གྱིས་ཞོར་ལས་མང་ཙམ་བྱས་ཀྱང་། ད་དུང་གཞན་གྱི་ལག་ནས་འགྲོ་གྲོན་མི་ཉུང་བ་སྐྱི་དགོས་བྱུང་བ་དང་། ཁྱིམ་གྱི་དཀའ་ཁག་ཧ་ཅང་ལྕི་མོར་ཆགས།  
        བསོད་ནམས་ཚེ་རིང་ལ་མགྱོགས་མྱུར་ངང་དབུལ་སེལ་ཕྱུག་འགྱུར་ཡོང་བར་རོགས་རམ་ཇི་ལྟར་བྱ་དགོས་པ་ནི་འོད་འདུས་སྡེ་བའི་ཧྲུའུ་ཅི་དང་པོ་ཨ་སི་ཙུའུ་ཡིས་སེམས་ཁྲལ་བྱ་ཡུལ་དུ་གྱུར།  བརྟག་དཔྱད་དང་བཅའ་འདྲི་བྱས་པ་བརྒྱུད་ནས། བསོད་ནམས་ཚེ་རིང་ལ་ཕག་གསོས་ནས་དབུལ་སེལ་བྱེད་པའི་བསམ་ཚུལ་ཡོད་པ་རྟོགས་རྗེས།  དབུལ་སྐྱོར་ལས་ཁུངས་དང་གྲོང་སྡེའི་ལས་བྱེད་པས་ཕྱོགས་གང་ཐད་ལ་མྱུར་དུ་འབྲེལ་བ་བྱས་ནས་དབུལ་སྐྱོར་མ་དངུལ་རེ་ཞུ་བྱས།  ཇུས་འགོད་རི་མོ་འབྲི་བ་ནས་རྡོ་ཁུར་བ་དང་ལྷས་ར་བཟོ་བ་སོགས་ཀྱི་བར་དུ་གྲོང་སྡེ་ཡོངས་ཀྱི་ཏང་ཡོན་གྱི་རོགས་རམ་འོག་སྨི་གྲུ་བཞི་མ་200ཡོད་པའི་ཕག་ཁང་མྱུར་དུ་བསྐྲུན།  དང་པོ་བསོད་ནམས་ཚེ་རིང་གིས་ཕག་ཕྲུག་50ཉོས་ཀྱང་།  ས་མི་འཕྲོད་པ་དང་གསོ་སྤེལ་ལག་རྩལ་མི་ཤེས་པའི་རྐྱེན་གྱིས་མང་པོ་ཤི་སོང་བ་རེད།  བྱ་བ་ཀུན་གྱི་འགོ་མ་དཀའ་ཟེར་བའི་དཔེ་ལྟར།  གནད་འགག་གི་དུས་ལ་སླེབས་སྐབས་ཞིང་ལས་ལག་རྩལ་མི་སྣས་བསོད་ནམས་ཚེ་རིང་གི་དཀའ་ངལ་སེལ་ཐབས་བྱས། དེ་ནས་བཟུང་།  ཕག་གསོས་ན་ཞིབ་འཇུག་གི་ཐབས་སྤྱོད་པ་དང་ཚན་རིག་དང་མཐུན་པའི་གཟན་སྡེབ་པ།  འཕྲོད་བསྟེན་ལེགས་བཅོས་གཏོང་བ་དང་ཚན་རིག་དང་མཐུན་པའི་རྒྱུད་སྤེལ་བྱ་ཐབས་སྤྱོད་པ།  ནད་ཡམས་སོགས་ནན་གྱིས་སྔོན་འགོག་བྱེད་པའི་ལས་ལ་འཇུག་དགོས་པ་རེད་ཅེས་ཞིང་ལས་ལག་རྩལ་མི་སྣས་བསོད་ནམས་ཚེ་རིང་ལ་བཤད་པས་ཁོས་གདམས་པ་དེ་དག་སེམས་སུ་དམ་པོར་བཟུང་།  སྤྱི་ལོ་2017ལོར།  ཁོང་ཚང་གིས་ཕག་37ཕྱིར་བཙོང་པས་ཡོང་སྒོ་དམངས་སྒོར་77700ཐོབ་ཅིང་།  ཕྲུ་གུ་ན་ནས་བསྐྱིས་པའི་སྨན་རིན་ཚང་མ་ཕྱིར་འཇལ་ཐུབ་པར་གྱུར། ཁོས་ཏང་དང་སྲིད་གཞུང་གིས་ང་ལ་ཕག་གསོ་བར་རམ་འདེགས་བྱས་པ་མ་ཟད།  ནགས་ཚལ་སྲུང་རྒྱུའི་ལས་ཀ་ཞིག་ཀྱང་སྤྲད་པ་དང་མིག་སྔར་ཕྲུ་གུའང་ཁུལ་སྨན་ཁང་དུ་སྨན་བཅོས་བྱས་ཏེ་ནད་གཞི་ཇེ་ལེགས་ཡིན་པས་སེམས་ལ་དཀའ་ངལ་གང་ཡང་མེད་པའི་སྒོ་ནས་ངས་ཕག་གསོ་བཞིན་ཡོད་ཟེར།  ད་ལོར།  ཁོས་གསོ་སྤེལ་གྱི་མངའ་ཁོངས་རྒྱ་བསྐྱེད་པའི་བསམ་ཚུལ་བཏོན་པ་དང་།  རང་གིས་བསླབས་པའི་ལག་རྩལ་གྱིས་གྲོང་མི་གཞན་པའི་ཕག་གསོའི་ལས་ཀ་ལ་རོགས་རམ་དང་ཁོ་ལ་གྲོང་མི་ཚོའང་ཁོ་དང་མཉམ་དུ་བདེ་སྐྱིད་ཀྱི་འཚོ་བ་ལ་རོལ་བའི་རེ་བ་ཆེན་པོ་ཡོད་པ་རེད།།