སྤྱིར་མདོ་དབུས་ཁམས་གསུམ་བཅས་བོད་ལྗོངས་ས་ཁུལ་གྱི་གཉེན་སྒྲིག་སྟོན་མོའི་ལུགས་སྲོལ་ལས་ཚ་ཞང་དང་གཏམ་བཤད་སོགས་སྤྱིའི་འགྲོས་གཅིག་མཐུན་ཡིན་ཀྱང་། བྱེ་བྲག་ས་ཕྱོགས་དང་ཡུལ་ལུང་སོ་སོའི་གོམས་སྲོལ་གྱི་དབང་གིས་མི་འདྲ་བའི་ཁྱད་པར་ཡང་ཡོད་པ་རེད། དེང་སང་རྒྱལ་ཁབ་དར་ཞིང་རྒྱས་པ་དང་སྤྱི་ཚོགས་གོང་དུ་སྤེལ་བ་བཅས་ཕྱོགས་གང་ཐད་ནས་འཕེལ་རྒྱས་ཆེན་པོར་བྱུང་བ་དང་། ཕྱིར་ཡོང་རིག་གནས་ཀྱི་ཤུགས་རྐྱེན་ཡང་ཟབ་མོ་ཐེབས་པས་མི་སེར་གྱི་འཚོ་བ་སྤྱོད་སྟངས་དང་ཡུལ་སྲོལ་གོམས་གཤིས་སོགས་ཀྱི་ཐད་ནས་ཀྱང་འཕེལ་འགྱུར་ཆེན་པོ་ཡོང་བཞིན་ཡོད་པ་རེད། ཁྱད་པར་དུ་ཁམས་ཕྱོགས་ཀྱི་མི་ཉག་ས་ཁུལ་དུ་གཉེན་སྒྲིག་སྟོན་མོ་དེ་གནའ་དེང་ཟུང་འབྲེལ་དང་། སྔར་མེད་གསར་སྤེལ་གྱི་འགྱུར་བ་ཆེན་པོ་བྱུང་དང་འབྱུང་བཞིན་ཡོད་པ་རེད།  མི་ཉག་ས་ཁུལ་གྱི་གཉེན་སྒྲིག་བག་སྟོན་ལ་རིན་ཐང་བྲལ་བའི་གནའ་རབས་ཀྱི་གཉེན་སྟོན་གྱི་དམངས་སྲོལ་རིག་གནས་ཕུན་སུམ་ཚོགས་པོ་པ་དང་། གཉེན་སྟོན་གྱི་འགོ་གཞུག་བར་ཉིན་ཞག་གསུམ་ཙམ་གྱི་རིང་ལ་བག་སྟོན་གྱི་མཛད་སྒོ་གཟབ་རྒྱས་སྤེལ་སྲོལ་ཡོད་པ་སྟེ། ཐོག་མར་བག་མའམ་མག་པ་བསུ་མི་(ཚ་བོ)དེ་བག་མའང་མག་པ་གཏོང་ཡུལ་གྱི་ཁྱིམ་ཚང་དེར་འབྱོར་རྗེས། ཞང་པོ་མཇལ་བའི་མཇལ་དར་ཞེས་དར་དཀར་ཞང་པོར་ཕུལ་ཏེ་དེ་རིང་བསྐལ་བཟང་བཀྲ་ཤིས་ཀྱི་ཉིན་མོ་ལ་ཁོ་རང་འདིར་ཡོང་དོན་རྣམས་ཞུ་བ་དང་། དེ་ནས་བཞུགས་གྲལ་ཏུ་བསྒྲིགས་ཏ་ཨ་ཞང་གིས་བདེ་མོ་གཏམ་ཁ་ཕྱེ་བའི་གཏམ་དང་། ཐབ་ལྷ་མི་འཁྲུག་པ་དང་ཆོས་སྐྱོང་མི་འཁྲུག་པ་ལ་སོགས་པའི་རྟེན་རིགས་བཞིའི་གཏམ་བཤད་དང་ས་བསྟོད་དང་འབྲེལ་བའི་གཏམ་བཤད་བྱེད། དེ་བཞིན་མུ་མཐུད་དུ་བག་གོས་འཇོག་ལེན་གྱི་གཏམ་བཤད་དང་། དེ་ནས་བྲོ་གཏམ་བཤད་པ་སོགས་ཀྱིས་གླུ་གར་གྱི་མདུན་བསུས་ཏེ་ནངས་སྔ་ཉི་མ་རི་རྐེད་འཆར་བར་དུ་བཀྲ་ཤིས་པའི་འགྲོ་བྲོ་འཁྲབ། དེ་ནས་ཉིན་གཉིས་པའི་སྔ་མོར་གནས་ལ་འགྲོ་གྲབས་བྱེད་པའི་རིང་ཡུལ་ལུང་སྡེ་བའི་གཉེན་མི་མཛའ་གྲོགས་ཀུན་གྱིས་བརྫངས་ནོར་ཁ་བཏགས་དང་བཅས་པས་སྐྱེལ་མ་བྱེད་པ་དང་། དེ་ནས་ཕ་མ་རྒན་རབས་རྣམས་ཀྱིས་བཀྲ་ཤིས་སྨོན་ལམ་འདེབས་པ་དང་། གནས་ལ་འགྲོ་མི་དེས་ཐབ་ཀ་ལ་ཕྱག་གསུམ་འཚལ་ཏེ་བག་མ་གདན་ཞུའི་གཏམ་དང་གླུ་གཞས་ཀྱིས་སྒོ་ཕྱིར་བུད་དེ་རྟ་སྒ་ཆས་ཆ་ཚང་ཅན་བདུན་བརྒྱད་ཡན་བཅས་གནས་ཀྱི་ལམ་ལ་ཞུགས།  བག་མའམ་མག་པ་ལེན་ཡུལ་གྱི་ཁྱིམ་ཚབ་དེས་བསུ་མ་བྱ་ལ་རིང་བསུ་དང་ཐུང་བསུ་བཅས་ཀྱི་བསུ་ཆང་ཕུལ་རྗེས་སྒོ་ཁར་བསུ་བ་དང་། དེ་ནས་རྟ་བབས་ཁྲབ་མ་ལག་བཅུ་གསུམ་མམ་རྟ་བབས་རིན་ཆེན་བཅུ་གསུམ་གྱིས་དུས་ཡུན་ཆུ་ཚོད་འགའི་རིང་ལ་གཏམ་བཤད་བྱེད། དེ་ནས་གཡང་ལེན་བླ་མས་ཁང་སྟེང་ནས་གཡང་ལེན་དང་བག་ཁྲུས་བྱེད་ཅིང་ལྷ་བསང་མཆོད། སྒེག་ཉམས་ལྡན་པའི་བུ་མོ་འགས་རྒྱན་གོས་གཟབ་འཆོར་སྤྲས་ཏེ་འོ་ཆུ་གནམ་ལ་འཕྱར་ཞིང་གཡང་འབོད་བྱེད། དེ་ལྟར་དབང་ཐང་འབྱུང་བ་མཐུན་པའི་བསུ་མི་ཞིག་གིས་བག་མ་རྟ་ལས་བབས་པ་དང་། ཨ་ཞང་གིས་སྡེ་པ་དེ་ཚང་གི་རྒྱབ་ར་ཕྱི་མ་དང་ནང་མ། སྐས་འཛར་བཤད་པ་བཅས་ཀྱི་གཏམ་བཤད་དང་གླུ་གཞས་དང་བཅས་ཁྱིམ་ལ་བསུ། དེ་བཞིན་གཉེན་མི་མཛའ་གྲོགས་ཀུན་འདུས་ཏེ་མཚན་གུང་དེ་ནས་ཉིན་གཉིས་པའི་བར་གླུ་ལེན་གར་འཁྲབ་བྱེད་དེ་གཉེན་སྟོན་གྱི་མཛད་སྒོ་རྒྱ་ཆེར་སྤེལ་བཞིན་ཡོད།   དེང་སང་མི་ཉག་ས་ཁུལ་གྱི་གཉེན་སྟོན་གྱི་མཛད་སྒོ་སྤེལ་བ་ལ་འགྱུར་བ་ཕྲན་བུ་བྱུང་བཞིན་ཡོད་པ་སྟེ། ཞིང་འབྲོག་མང་ཚོགས་ཀྱི་འཚོ་བ་དང་དཔལ་འབྱོར་སྔར་ལས་ཇེ་ལེགས་སུ་སོང་བ་དང་། མི་རྣམས་ཀྱི་བསམ་པའི་བློ་ཕྱོགས་ཀྱང་རིམ་གྱིས་འགྱུར་བཞིན་ཡོད་པས། ཡུལ་སྲོལ་གོམས་གཤིས་དང་སྤྱོད་ལམ་རྣམ་བཞི་སོགས་ཀྱི་ཐད་ནས་ཀྱང་འགྱུར་བ་དང་འཕེལ་རྒྱས་ཆེན་པོ་ཡོང་བཞིན་འདུག
  འདི་ལོའི་ལོ་གསར་སྐབས་ང་རང་ཕ་ཡུལ་དུ་ཕྱིན་སྐབས། ཕ་ཡུལ་གྱི་ལོ་གསར་གྱི་རྣམ་པའང་ལོ་རེ་ལས་ལོ་རེར་ཇེ་ལེགས་དང་ཇེ་རྒྱས་སུ་སོང་བ་དང་། ལྷག་པར་དུ་གཉེན་སྟོན་མོའི་སྐབས་སུ་སྔར་ཡོད་ཀྱི་གོམས་སྲོལ་གཞིར་བཅས་སྟེང་བག་མ་བསུ་བ་ལ་རླངས་འཁོར་ཆུང་ཆུང་དང་སྦག་སྦག་འཁོར་ལོ་བཅུ་ཕྲག་ཁ་ཤས་ཀྱིས་ལུང་མདའ་ནས་ལུང་ཕུའི་བར་གྲལ་བསྒྲིགས་ཏེ་བསུ་བ་དང་། ཁྱིམ་དུ་བསུ་རྗེས་ཡུལ་མི་གཉེན་མཛའ་ཀུན་ལྷན་དུ་འཛོམས་ཏེ་ཤ་དང་ཚལ་སྣ་མི་འདྲ་བའི་ཟས་རིགས་མོད་པོ་གཡོས་ཤིང་ལྦུ་ཆང་ཨ་རག་སོགས་ཆང་རིགས་སྣ་ཚོགས་ཀྱིས་སྣེ་ལེན་གཟབ་རྒྱས་བྱེད་པ་དང་། མཚན་མོར་ཁང་སྟེང་ནས་ཚོན་ཁྲ་ཅན་གྱི་ཤོག་སྦག་སྤར་བ་སོགས་ཞིང་འབྲོག་ས་ཁུལ་གྱི་གཉེན་སྟོན་དེ་གནའ་དེང་ཟུང་འབྲེལ་གྱི་འཕེལ་འགྱུར་ཆེན་པོར་བྱུང་བཞིན་ཡོད་དོ།  གཞན་ཡང་། དར་མདོའི་མདོ་གྲོང་གི་གཉེན་སྟོན་ནི་རྒྱ་བོད་འདྲེས་མའི་ལུགས་སྲོལ་དར་ཤུགས་ཆེ་ཞིང་། སྐར་བཟང་དུས་བཟང་གི་ཉིན་དེ་ལ་མཛའ་མི་གཉིས་མེ་ཏོག་སྣ་ཚོགས་ཀྱིས་བརྒྱན་པའི་རླངས་འཁོར་ཆུང་ཆུང་ལ་བསྡད་དེ་མདོ་གྲོང་དུ་སྐོར་བ་བྱེད་པ་དང་། དེ་ནས་གཉེན་སྟོན་སྤེལ་སའི་མགྲོན་ཁང་ཆེན་མོ་རུ་སོང་ཏེ་གཉེན་མི་མཛའ་གྲོགས་རྣམས་འདུ་འཛོམས་བྱེད་དེ་ཤ་ཆང་སོགས་ཟས་རིགས་སྣ་ཚོགས་ལོངས་སུ་སྤྱོད་ཅིང་། བཀྲ་ཤིས་བརྗོད་པའི་བླ་སྤྲུལ་ལམ་ཡང་ན་ཤིས་བརྗོད་རྒན་པོས་མཛའ་མི་གཉིས་དང་ལྷན་རྒྱས་ལ་བཀྲ་ཤིས་པའི་སྨོན་ལམ་དང་གཡང་འབོད་བྱེད་དེ་དར་དཀར་རིང་མོ་རྐེ་ལ་བསྐོན། དེ་ནས་སྟོན་མོ་རུ་ཕེབས་པའི་མི་རྣམས་ལ་མཆོད་ཆང་ཕུལ་ཅིང་བཀྲ་ཤིས་སྨོན་འདུན་ཞུ་བ་དང་། གླུ་ལེན་གར་འཁྲབ་ཀྱིས་མཚན་གོང་བར་དུ་གཉེན་སྟོན་གྱི་དུས་བཟང་རོལ་བཞིན་ཡོད།   དེ་ལྟར་དུས་དང་རྐྱེན་གྱིས་གཉེན་སྒྲིག་གི་སྟོན་ཆེན་ལ་འཕེལ་རྒྱས་དང་འགྱུར་ལྡོག་ཆེན་པོ་བྱུང་དང་འབྱུང་བཞིན་ཡོད་པས། དེ་ནི་མི་རྣམས་ཀྱི་འཚོ་བ་དང་དཔལ་འབྱོར་ཉིན་བཞིན་གོང་དུ་འཕེལ་བ་དང་། མིའི་རིགས་ཀྱི་བསམ་བློའི་མཐོ་ཚད་ཀྱང་ཆེ་རུ་འགྲོ་བ་དང་འབྲེལ་བ་ངེས་ཅན་ཡོད་པས་ང་ཚོ་སྙིང་ཁོང་རུས་པའི་གཏིང་ནས་དགའ་སྤྲོ་སྐྱེ་འོས་པ་ཞིག་ཀྱང་རེད། ཡིན་ཡང་རིན་ཐང་བྲལ་བའི་གནའ་རབས་ཀྱི་ཡུལ་སྲོལ་རིག་གནས་འདི་དག་དེ་ལྟར་རང་སོར་ཉམས་མས་སུ་སོང་ན་བློ་ཕམ་པ་ཞིག་ཀྱང་ཡིན་པས་ཕྱོགས་གཉིས་ནས་སྐྱོབ་ཅིང་གོང་ནས་གོང་དུ་སྤེལ་ཐུབ་པ་ཞིག་ལ་སེམས་དགོས་སོ། །