ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།  རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་ཚེས་ཉེར་བརྒྱད་ཉིན་ཏ་ལེན་ནས་2017ལོའི་དབྱར་ཁའི་ཏ་ཝོ་སི་གླེང་སྟེགས་སུ་ཞུགས་པའི་རྒྱལ་སྤྱིའི་བཟོ་ཚོང་ཁེ་ལས་ལས་རིགས་ཀྱི་འཐུས་མི་དང་གྲོས་མོལ་གནང་། 
        ཕྱི་རྒྱལ་གྱི་ཁེ་ལས་ཇི་ལྟར་ཀྲུང་གོའི་དཔལ་འབྱོར་བཅོས་སྒྱུར་ཁྲོད་ཞུགས་པའི་གནད་དོན་ལ་ལན་འདེབས་སྐབས། ལི་ཁེ་ཆང་གིས་བཤད་རྒྱུར། ཉེ་བའི་ལོ་འགའི་རིང་ལ། ཀྲུང་གོས་བཅོས་སྒྱུར་ཁྱོན་ཡོངས་ནས་ཟབ་སྤེལ་བྱེད་པའི་རྒྱུད་རིམ་ཁྲོད། འདོན་སྤྲོད་ཕྱོགས་ཀྱི་སྒྲིག་གཞི་རང་བཞིན་གྱི་བཅོས་སྒྱུར་གཙོ་བོར་བཟུང་སྟེ། ཁྱབ་ཁོངས་གཙོ་བོའི་བཅོས་སྒྱུར་ལ་སྐུལ་འདེད་གཏོང་བ་དང་། ཚོང་རར་ཞུགས་པའི་ཆ་རྐྱེན་ཇེ་དམར་བཏང་སྟེ། དཔྱ་ཁྲལ་དང་འགྲོ་གྲོན་ཉུང་འཕྲི་བྱེད་པ་སོགས་བྱེད་ཐབས་སྤྱད་དེ་ཁེ་ལས་ཀྱི་ཁུར་བོ་ཇེ་ཡང་དུ་བཏང་བས། ཚོང་རའི་གཙོ་གཞི་གསར་པ་དང་ཐོན་ལས་གསར་པ། ལས་རིགས་གསར་བ་མང་པོ་བྱུང་བ་དང་། འཕེལ་རྒྱས་ཀྱི་སྒུལ་ཤུགས་གསར་པ་སྐྱེད་སྲིང་བྱས་ཏེ། ཀྲུང་གོའི་དཔལ་འབྱོར་གྱི་ཚུལ་སྒྱུར་རིམ་སྤོར་ལ་ནུས་ཡོད་སྒོས་སྐུལ་འདེད་བཏང་། ང་ཚོས་ཉོ་ཚོང་སྟབས་བདེ་ཅན་གྱི་བྱེད་ཐབས་མུ་མཐུད་དུ་ལག་བསྟར་བྱ་རྒྱུ་དང་། རྒྱལ་ཁབ་ཕྱི་ནང་གི་ཁེ་ལས་བར་ཁྱད་པར་མེད་པར། ཕྱི་དངུལ་དང་ཕྱི་རྒྱལ་གྱི་ཚོང་བ། ཕྱི་རྒྱལ་གྱི་རིག་སྟོབས་བཅས་ཀྲུང་གོའི་བཅོས་སྒྱུར་སྒོ་འབྱེད་ཀྱི་རྒྱུད་རིམ་ཁྲོད་ཞུགས་པར་དགའ་བསུ་ཞུ་བཞིན་ཡོད་ཅེས་གསུངས། 
        2025ལོའི་ཀྲུང་གོ་བཟོ་སྐྲུན་འཐབ་ཇུས་ལག་བསྟར་བྱེད་པའི་ཁྲོད་གནས་པའི་འགྲན་རྩོད་དང་དེར་ཅི་ལྟར་ཁ་གཏད་འཇལ་བའི་གནད་དོན་ལ་ལན་འདེབས་སྐབས། ལི་ཁེ་ཆང་གིས་བཤད་རྒྱུར། 2025ལོའི་ཀྲུང་གོ་བཟོ་སྐྲུན་གྱི་དམིགས་ཡུལ་ནི་ཀྲུང་གོའི་ཐོན་རྫས་ཀྱི་རྒྱུ་སྤུས་དང་སྒྲིག་ཆས་ཆུ་ཚད་མཐོར་འདེགས་སུ་གཏང་རྒྱུ་དེ་ཡིན་པས། ཕྱི་རྒྱལ་གྱི་སྒྲིག་ཆས་དང་ལག་རྩལ་སྔོན་ཐོན་སྔར་ལས་མང་པོ་ཀྲུང་གོའི་ཚོང་རར་ཞུགས་པར་དགའ་བསུ་ཞུས་པར་མ་ཟད། རྒྱལ་ཁབ་ཕྱི་ནང་གི་ཁེ་ལས་ལ་འཕེལ་རྒྱས་དང་ཚོང་རའི་གོ་སྐབས་སྔར་ལས་མང་པོ་བསྐྲུན་ཐུབ་པར་ཡིད་ཆེས་ཡོད་ཅེས་གསུངས།།