ཚེས་23ཉིན། གཞིས་ཀ་རྩེ་གྲོང་ཁྱེར་ནས་གཞིས་རྩེའི་ལོ་རྒྱུས་དང་རིག་གནས་ཀྱི་གྲོང་ཁྱེར་གྲགས་ཅན་བརྗོད་དོན་བྱས་པའི་ཡུལ་སྐོར་གློག་བརྙན་ཐུང་གྲས《 ཇོ་མོ་གླང་མའི་རེ་འབོད》 ཅེས་པའི་ཕབ་ལེན་འགོ་འཛུགས་མཛད་སྒོ་བདེ་བླག་ངང་སྤེལ་ཅིང་། གློག་བརྙན་འདི་ནི་གཞིས་རྩེ་ཡུལ་སྐོར་འཕེལ་རྒྱས་ཨུ་ལྷན་དང་པེ་ཅིང་ཆིན་ཧོ་ཡོན་རིག་གནས་དར་སྤེལ་ཚད་ཡོད་ཀུང་སི་གཉིས་ཀྱིས་མཉམ་འབྲེལ་ཐོག་པར་ལེན་བཟོ་སྐྲུན་བྱས་པ་རེད། འདི་ནི་བོད་ཀྱི་ལྗོངས་ཁུལ་ཡུལ་སྐོར་གཏན་བཟོའི་གློག་བརྙན་ཐུང་གྲས་ཐོག་མ་ཡིན་ཞིང་། དེ་ཇོ་མོ་གླང་མའི་རིག་གནས་ཡུལ་སྐོར་དུས་ཆེན་གྱི་སྐབས་དང་བསྟུན་ནས་རྒྱ་ཆེའི་ལྟད་མོ་བར་ཐོག་མར་བསྟན་པ་རེད། 
        རྒྱལ་ཕྱི་ནང་ཀུན་གྱི་བྱ་དགའ་མང་པོ་ཐོབ་པའི་གློག་བརྙན་འདིའི་འཁྲབ་ཁྲིད་པ་ཀྲའོ་ཡེས་ཡུལ་སྐོར་ཐུང་གྲས་དེའི་སྐོར་གླེང་སྐབས“དེ་ནི་རི་བོ་ཇོ་མོ་གླང་མའི་རི་འཛེགས་མཁན་དང་དེ་བཞིན་ཁོ་ཚོའི་ཕྱི་རབས་པ་རྣམས་བརྗོད་པའི་གཏམ་རྒྱུད་ཅིག་ཡིན”ཞེས་དང་། ཁོས་སྤྱིར་བཏང་མིའི་ལུས་སྟེང་དུ་བྱུང་བའི་གཏམ་རྒྱུད་རེ་རེ་ནི་གཞིས་རྩེ་འདིའི་གནའ་བོའི་ཉམས་འགྱུར་མངོན་ཞིང་དེང་རབས་གྲོང་ཁྱེར་གྱི་ཡུལ་སྐོར་བྱེད་པའི་ཡིད་དབང་འཕྲོག་ཤུགས་འཚོལ་ཞིབ་བྱེད་པ་ཡིན་ཞེས་མཚམས་སྦྱོར་བྱས།  

        ཐེངས་འདིའི་གློག་བརྙན་ནི་ཆེད་དུ་གཞིས་རྩེ་དེ་རྒྱལ་ཁབ་ཀྱི་ལོ་རྒྱུས་དང་རིག་གནས་ཀྱི་གྲོང་ཁྱེར་གྲགས་ཅན་གྱི་ཡུལ་སྐོར་མཛེས་ལྗོངས་ཁུལ་དུ་གཏན་བཟོ་བྱ་བར་བཟོས་ཤིང་། བོད་ལྗོངས་གཞིས་རྩེ་ས་ཁུལ་ཡུལ་སྐོར་འཕེལ་རྒྱས་ཨུ་ལྷན་གྱི་ཏང་ཙུའི་ཧྲུའུ་ཅི་ཕུར་བུ་བཀྲ་ཤིས་ཀྱིས“འདས་ཟིན་པར་ཡུལ་སྐོར་ཐོན་ཁུངས་དྲིལ་བསྒྲགས་བྱེད་སྟངས་རྣམ་པ་སྣ་ཚོགས་བེད་སྤྱོད་བྱས་པ་དང་། ད་ལྟར་གློག་བརྙན་ཐུང་གྲས་བརྒྱུད་དེ་གཏམ་རྒྱུད་བཤད་པའི་རྣམ་པ་ནི་ཐེངས་དང་པོ་ཡིན། ”ཞེས་གསུངས། གློག་བརྙན་ཐུང་གྲས་ཁྱབ་སྤེལ་གཏོང་བའི་རྣམ་པས་ཡུལ་སྐོར་བ་དང་མཛེས་ལྗོངས་ཁུལ་གྱི་བར་ཐག་ཉེ་རུ་བཏང་སྟེ་རྒྱལ་ཕྱི་ནང་ཀུན་གྱི་ཡུལ་སྐོར་པ་མང་པོར་གཞིས་རྩེ་ཡུལ་སྐོར་གྱི་ཉིང་བཅུད་རོལ་མྱོང་བྱེད་དུ་འཇུག་དགོས།

        གཞིས་རྩེ་ནི་གནའ་ནས་ད་ལྟའི་བར་གྱི་བོད་ཀྱི་གྲོང་རྡལ་གལ་ཆེན་ཞིག་ཡིན་ཏེ། གཞིས་ཀ་རྩེ་ནི་ས་ཞིང་གཤིན་པོའི་གཞིས་ཀ་ཞེས་པའི་དོན་ཡིན།  གྲོང་ཁྱེར་ནང་གི་བཀྲ་ཤིས་ལྷུན་པོ་དགོན་ནི་རྒྱལ་ཁབ་ཀྱི་Aབཞི་རིམ་པའི་མཛེས་ལྗོངས་ཁུལ་དང་། རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོབ་སྡེ་ཚན་ཡིན་ཞིང་། དེ་ནི་བོད་ཀྱི་དགེ་ལུགས་པའི་དགོན་ཆེན་བཞིའི་ཡ་གྱལ་དང་། པཎ་ཆེན་སྐུ་ཕྲེང་རིམ་བྱོན་གྱི་གདན་ས་ཡིན། གཞན་རྫོང་རིའི་རྟེན་རྫས་བཤམས་མཛོད་ཁང་དང་། ལོ་རྒྱུས་ཁྲོམ་སྲང་ལྕང་ལོ་ཁང་གསར་ཚང་མ་ཡུལ་སྐོར་བ་མང་པོས་ལྟ་སྐོར་བྱེད་འདོད་པའི་མཛེས་ལྗོངས་ཁུལ་གྱི་གྲས་ཡིན། པར་ལེན་རུ་ཁག་གིས་ངོ་སྤྲོད་བྱས་པར་གཞིགས་ན། ད་ཐེངས་ཀྱི་ལྗོངས་ཁུལ་སོ་སོའི་པར་བླངས་ཡོད་ཟེར། 

        གཞིས་རྩེ་གྲོང་ཨུད་ཀྱི་ཧྲུའུ་ཅི་གཞོན་པ་དང་། རྒྱུན་ལས་ཧྲི་ཀྲང་གཞོན་པ་ཧྥེང་ཅི་ཁང་གིས་ཡུལ་སྐོར་གློག་བརྙན་ཐུང་གྲས《ཇོ་མོ་གླང་མའི་རེ་འབོད》 ཀྱི་པར་ལེན་འགོ་འཛུགས་གནང་བ་དེས་འཛམ་གླིང་ལ“ ངོ་མཚར་ཆེ་བའི་ཇོ་རི་དང་། མཛེས་སྡུག་ལྡན་པའི་གཞིས་ཀ། བཀྲ་ཤིས་པའི་གཞིས་རྩེར” རྒྱུས་ལོན་བྱེད་པའི་དཀར་ཁུང་ཞིག་ཕྱེས་ཤིང་། གཞིས་རྩེའི་ཡུལ་སྐོར་གྱི་སྙན་གྲགས་ཚད་དང་ཤུགས་རྐྱེན་གྱི་ནུས་པ་སྔར་ལས་མཐོར་འདེགས་སུ་གཏོང་ཆེད་རིག་གནས་དང་ཡུལ་སྐོར་མཉམ་འདྲེས་ཀྱིས་འཕེལ་རྒྱས་ཡོང་བར་གསར་གཏོད་ཀྱི་བྱེད་ཐབས་ཤིག་བསྐྲུན་པ་རེད།  
        གཞིས་རྩེ་ཡུལ་སྐོར་ཐོན་ཁུངས་སྣ་མང་ཕུན་སུམ་ཚོགས་ཆགས་པ་དེས་ཇོ་རི་གཙོ་བྱས་པའི་ཇོ་རིའི་ཡུལ་སྐོར་དང་། ཡར་ཀླུང་གཙང་པོའི་ཆུ་འགོའི་ཡུལ་སྐོར། རོང་ས་དམར་པོའི་ཡུལ་སྐོར་དང་ཧི་མ་ལ་ཡའི་རོང་ལྔའི་ཡུལ་སྐོར་ལམ་ཐིག་ཆགས་ཡོད། བསྡོམས་རྩིས་བྱས་པ་ལྟར་ན། 2016ལོར་གཞིས་རྩེ་གྲོང་ཁྱེར་ཡོངས་ཀྱིས་ཁྱོན་བསྡོམས་པས་ཡུལ་སྐོར་བ་མི་གྲངས་ཁྲི་425ལྷག་སྣེ་ལེན་བྱས་པ་དང་། ཡུལ་སྐོར་གྱི་སྤྱིའི་ཡོང་འབབ་སྒོར་དུང་ཕྱུར་34ཟིན་པ་རེད།།