རྩ་ཁྲིམས་ཀྱི་དོན་ཚན་བཞི་པ་རུ། “མི་རིགས་ཁག་ཚང་མར་རང་ཉིད་ཀྱི་སྐད་དང་ཡི་གེ་སྤྱོད་པ་དང་གོང་དུ་སྤེལ་བའི་རང་དབང་ཡོད་པ”གཏན་ཁེལ་བྱས་ཡོད་ལ། མི་རིགས་ས་ཁོངས་རང་སྐྱོང་བཅའ་ཁྲིམས་ཀྱི་དོན་ཚན་བཅུ་པ་རུ། “མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ཀྱིས་ས་གནས་དེ་གའི་མི་རིགས་ཁག་ཚང་མར་རང་ཉིད་ཀྱི་སྐད་དང་ཡི་གེ་བེད་སྤྱོད་དང་དར་རྒྱས་སུ་གཏོང་བའི་རང་དབང་ཡོད་པ་འགན་སྲུང་བྱ་དགོས”པའང་གཏན་ཁེལ་བྱས་ཡོད། གཞན་ཡང་། མི་རིགས་ས་ཁོངས་རང་སྐྱོང་བྱེད་པའི་ས་གནས་ཀྱི་རང་སྐྱོང་སྲོལ་ཡིག་དག་གི་ཁྲོད་དུའང་གྲངས་ཉུང་མི་རིགས་ཀྱིས་མི་རིགས་རང་གི་སྐད་དང་ཡི་གེ་བཀོལ་སྤྱོད་བྱེད་པའི་ཐད་ལ་གོང་གསལ་རྩ་ཁྲིམས་དང་མི་རིགས་ས་ཁོངས་རང་སྐྱོང་བཅའ་ཁྲིམས་ཀྱི་གཏན་ཁེལ་གྱི་ནང་དོན་བསྐྱར་ཟློས་བྱས་ཡོད། དཔེར་ན། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གྱི་རང་སྐྱོང་སྲོལ་ཡིག་ལས། “མི་རིགས་ཁག་གིས་རང་གི་སྐད་དང་ཡི་གེ་བེད་སྤྱོད་དང་འཕེལ་རྒྱས་སུ་གཏོང་བའི་རང་དབང་ཡོད”ཅེས་པ་དང་། སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་རང་སྐྱོང་སྲོལ་ཡིག་ལས། “རང་སྐྱོང་ཁུལ་ནང་ཁུལ་གྱི་མི་རིགས་ཁག་གིས་རང་གི་སྐད་དང་ཡི་གེ་བེད་སྤྱོད་དང་འཕེལ་རྒྱས་སུ་གཏོང་བའི་རང་དབང་ཡོད”ཅེས་པ། ད་དུང་། མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་གྱི་རང་སྐྱོང་སྲོལ་ཡིག་ལས། “རང་སྐྱོང་ཁུལ་གྱི་རང་སྐྱོང་ལས་ཁུངས་ཀྱིས་ས་གནས་རང་གི་མི་རིགས་ཁག་གིས་རང་གི་སྐད་དང་ཡི་གེ་བེད་སྤྱོད་དང་འཕེལ་རྒྱས་སུ་གཏོང་བའི་རང་དབང་འགན་སྲུང་བྱ་དགོས”ཞེས་གཏན་ཁེལ་བྱས་ཡོད་པ་ལྟ་བུ་རེད། དེ་བས། གྲངས་ཉུང་མི་རིགས་ཀྱིས་མི་རིགས་རང་གི་སྐད་དང་ཡི་གེ་བེད་སྤྱོད་དང་རྒྱུད་འཛིན། འཕེལ་རྒྱས་སུ་གཏོང་བ་ནི་མི་རིགས་དེའི་ཁེ་དབང་ཡིན་པར་མ་ཟད། མི་རིགས་རང་སྐྱོང་ས་གནས་ཀྱི་རང་སྐྱོང་ལས་ཁུངས་ལའང་མི་རིགས་ཁག་གི་སྐད་དང་ཡི་གེ་བེད་སྤྱོད་དང་འཕེལ་རྒྱས་སུ་གཏོང་བ་འགན་སྲུང་བྱ་རྒྱུའི་འོས་འགན་ནམ་འགན་འཁྲི་ཡོད་པ་རེད།
（མཚོ་སྔོན་བོད་ཡིག་ཁྲིམས་ལུགས་ཚགས་པར་ལས་བཤུས།）
