ཨོ་རྒྱན་རྡོ་རྗེ་ནི་མགར་བ་རྣམས་ཀྱི་སྣེ་ཁྲིད་པ་ཡིན་ལ་བཞག་ལྡོམ་གྲོང་རྡལ་གྱི་མགར་བའི་ཁྲོད་ལོ་ཆེས་ཆེ་བའི་མགར་བའང་ཡིན། རང་ལོ་ཉི་ཤུ་ལྷག་ཡིན་དུས་ནས་བཟུང་མགར་རྡུང་གི་ལས་ལ་འབད་ཅིང་ད་ལྟ་ལོ་བཞི་བཅུ་ལྷག་ཡིན།
ལྟ་བས་ཆོག་མི་ཤེས་པའི་དངུལ་རྒྱན་ནི་དངུལ་མགར་བའི་རྔུལ་ཁྲག་གིས་རྡུང་བ་ཤ་སྟག་ཡིན་པ་དང་། དངུལ་རྒྱན་ཆུང་ཆུང་ཞིག་ཡིན་རུང་མགར་བ་རྣམས་ཀྱིས་བསྲེགས་བཅད་བརྡར་གསུམ་བྱེད་པ་རྐྱང་རྐྱང་ཡིན། དངུལ་མགར་ནི་ལག་ཤེས་བཟོ་ལས་ཤིག་ཡིན་ཀྱང་བསམ་བློ་ཞིབ་མོ་སྔོན་དུ་འགྲོ་རྒྱུ་གཙིག་ཆེར་འཛིན་དགོས།
སྔོན་ཆད། བཞག་ལྡོམ་དུ་དངུལ་མགར་གྱི་ལས་ཀ་གཉེར་བའི་ཁྱིམ་ཚང་ཉི་ཤུ་ལྷག་ཡོད་མོད། འོན་ཀྱང་། ད་ལྟའི་དུས་འདིར། དངུལ་མགར་གྱི་ལས་ཀ་གཉེར་བའི་ཁྱིམ་ཚང་དགུ་ལས་ལྷག་མེད་པས་ཕ་མེས་ཡང་མེས་ནས་རྡོ་ལག་རྒྱུད་ཀྱིས་བརྒྱུད་པའི་དངུལ་མགར་གྱི་ལག་རྩལ་ད་ལྟ་སྣུམ་ཟད་ཁྲོད་ཀྱི་མར་མེ་ལྟར་གྱུར་དང་འགྱུར་གྱིན་ཡོད། མགར་བ་ཨོ་རྒྱན་རྡོ་རྗེས་གནས་བབ་དེ་འདྲ་ཞིག་ལ་གདོང་གཏད་ནས་ཕ་མེས་ཡང་མེས་ནས་བརྒྱུད་པའི་ལག་རྩལ་རྒྱུན་འཛིན་གང་ཐུབ་བྱས། སྟབས་ལེགས་པ་ཞིག་ལ། ལོ་འདི་དག་རིང་། མཛོད་དགེ་རྫོང་གི་ལྗོངས་སྐོར་ལས་རིགས་དབྱར་མཚོ་ལྟར་རྒྱས་ཤིང་། ས་གནས་རང་གི་ཐུན་མིན་གྱི་དམངས་སྲོལ་རིག་གནས་ལ་རྒྱལ་ཕྱི་ནང་གི་ལྗོངས་རྒྱུ་བས་དགའ་བསུ་ཆེན་པོ་ཐོབ།
མགར་བས་བཟོས་པའི་དངུལ་རྒྱན་གྱིས་སྲོལ་རྒྱུན་གྱི་ཡོ་བྱད་དང་ལག་རྩལ་རྒྱུན་འཛིན་བྱས་ཡོད་ལ། ས་གནས་རང་གི་ཐུན་མིན་གྱི་ཡུལ་སྲོལ་གོམས་གཤིས་དང་མཛེས་དཔྱོད་ལྟ་བ་དངུལ་རྒྱན་ཁྲོད་སིམ་པར་བྱས་ཡོད་པས། དེ་ལ་རྒྱུན་འཛིན་དང་གསར་གཏོད་ཀྱི་ཆ་གཉིས་ཀ་ལྡན་པའི་ལས་རིགས་ཤིག་ཡིན། ཡང་གཅིག་བཤད་ན་དེ་ལྟ་བུའི་རིག་གནས་ང་ཚོའི་རིག་གནས་ཀྱི་རྐང་ཡིན། རྒྱལ་ཕྱི་ནང་གི་ལྗོངས་རྒྱུ་བས་ས་གནས་ཐུན་མིན་གྱི་རིག་གནས་ལ་དགའ་བསུ་ཆེན་པོ་ཐོབ་པས་དངུལ་མགར་བའི་རེ་བའི་མེ་ལྕེ་ཡང་བསྐྱར་མགར་ལས་ཁྲོད་ན་ལྷབ་ལྷུབ་ཏུ་འབར་བཞིན་མཆིས། མགར་བ་རྣམས་ཀྱིས་ལྗོངས་རྒྱུའི་གོ་སྐབས་དམ་དུ་བཟུང་ནས་བོད་རང་གི་ཐུན་མིན་གྱི་དངུལ་མགར་ལག་རྩལ་རྒྱུན་འཛིན་དང་དར་སྤེལ་བཏང་དང་གཏོང་གིན་ཡོད་དོ།།
