གངས་ལྗོངས་ཉི་གཞོན་དྲ་བའི་འཕྲིན། སྤྱི་ཟླ་8པའི་ཚེས་8ཉིན་གྱི་ཆུ་ཚོད་21དང་སྐར་མ་19སྟེང་སི་ཁྲིན་ཞིང་ཆེན་རྔ་བ་ཁུལ་གཟི་ཚ་སྡེ་དགུ་རྫོང(བྱང་འཕྲེད་ཚད་ཏུའུ་33.20དང་ཤར་གཞུང་ཚད་ཏུའུ་103.82)ལ་ཚད་རིམ་7.0ཅན་གྱི་ས་འགུལ་བྱུང་ཞིང་འགུལ་ཁུངས་ཀྱི་ཟབ་ཚད་ལ་སྤྱི་ལེ་20ཡོད་པ་རེད། སྤྱི་ཟླ་8པའི་ཚེས་9ཉིན་གྱི་ཆུ་ཚོད་9དང་སྐར་མ་25བར་ས་འགུལ་ཁྲོད་མི་13རྐྱེན་ལམ་དུ་ཤོར་བ་དང་མི་175ལྷག་ལ་རྨས་ཕོག
        ས་འགུལ་བྱུང་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཚད་མཐོན་པོས་མཐོང་ཆེན་གནང་ནས་འཕྲལ་མྱུར་ངང་མཛུབ་སྟོན་གལ་ཆེན་གནང་དོན། མགྱོགས་མྱུར་ངང་གཟི་ཚ་སྡེ་དགུའི་ཚད་རིམ་7.0ཅན་གྱི་ས་འགུལ་གནོད་འཚེའི་གནས་ཚུལ་ལ་རྒྱུས་ལོན་དང་རྟོག་ཞིབ་བྱ་དགོས་པ་དང་། མགྱོགས་མྱུར་སྒོས་སྟོབས་ཤུགས་རྩ་འཛུགས་བྱས་ཏེ་རྒུད་སྐྱོབ་བྱ་དགོས། ཤུགས་ཆེན་པོས་རྨས་མ་མྱུར་སྐྱོབ་དང་། ཡུལ་སྐོར་བ་དང་གནོད་འཚེ་ཐེབས་པའི་མང་ཚོགས་ཁ་བཀྲམ་དང་བདེ་འགོད་བྱས་ནས་མི་སྣའི་ཤི་རྨས་ཉུང་དུ་གཏང་དགོས། མིག་སྔར་ནི་ཆུ་བྲུབ་དུས་སྐབས་ཡིན་པར་མ་ཟད་ཡུལ་སྐོར་བ་ཆེས་མང་བའི་དུས་སྐབས་ཀྱང་ཡིན་པས་གོམ་གང་མདུས་སྤོས་སྒོས་གནམ་གཤིས་སྔོན་བརྡ་དང་ས་གཤིས་ཚད་འཇལ་ལ་ཤུགས་སྣོན་བྱས་ཏེ་རིགས་མི་འདྲ་བའི་གནོད་འཚེ་ལ་སྔོན་འགོག་དང་དོན་དངོས་དང་མཐུན་པར་གནོད་འགོག་གེགས་སེལ་ལས་ཀ་ལེགས་པོར་བསྒྲུབ་ནས་འབད་པ་ཆེན་པོས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་འགན་སྲུང་བྱ་དགོས་ཞེས་བསྟན། 
        ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་མཆན་བཀོད་མཛུབ་སྟོན་གནང་དོན། མགྱོགས་མྱུར་སྒོས་གནོད་འཚེའི་གནས་ཚུལ་ལ་རྒྱུས་ལོན་དང་རྟོག་ཞིབ་བྱས་ནས་ཤུགས་ཆེན་པོས་མྱུར་སྐྱོབ་རོགས་འདེགས་བྱས་ནས་མི་སྣའི་ཤི་རྨས་ཇེ་ཉུང་དུ་གཏང་སྟེ་འོས་མཐུན་གྱིས་གནོད་འཚེ་ཐེབས་པའི་མང་ཚོགས་གནས་སྤོ་བདེ་འགོད་བྱ་དགོས་པར་མ་ཟད། ས་འགུལ་གནས་ཚུལ་གྱི་ཚད་ལེན་ལ་ཤུགས་སྣོན་དང་གནོད་འཚེ་ཡང་བསྐྱར་འབྱུང་བར་སྔོན་འགོག་བྱ་དགོས་ཞེས་བསྟན།

        ཞི་ཅིན་ཕིང་གི་སློབ་སྟོན་དང་ལི་ཁེ་ཆང་གི་མཛུབ་སྟོན་ལ་གཞིགས་ནས། རྒྱལ་སྲིད་སྤྱི་ཁྱབ་ཁང་གིས་རྒྱལ་ཁབ་གནོད་སེལ་ཨུ་ལྷན་དང་། རྒྱལ་སྲིད་སྤྱི་ཁྱབ་ཁང་གི་ཡོམ་འགོག་གནོད་སེལ་བཀོད་འདོམས་པུའུ་ལས་གྲུབ་པའི་ལས་དོན་ཚན་ཆུང་ཡུལ་དངོས་སུ་ཡོམ་འགོག་གནོད་སེལ་བཀོད་འདོམས་བྱེད་པར་མངགས་པ་རེད། སི་ཁྲོན་ཞིང་ཆེན་ཨུ་ལྷན་དང་། སི་ཁྲོན་ཞིང་ཆེན་སྲིད་གཞུང་གི་འགན་ཁུར་བློ་མཐུན་མྱུར་སྐྱོབ་ལས་དོན་སྤེལ་ཡུལ་དུ་བསྐྱོད་པ་རེད། སི་ཁྲོན་ཞིང་ཆེན་དང་རྔ་པ་ཁུལ་གྱིསIརིམ་པའི་ས་ཡོམ་འཕྲལ་སྡོམ་བྱེད་ཐབས་སྤྱོད་འགོ་ཚུགས། མིག་སྔར།  ས་འགུལ་གནོད་སེལ་གྱི་ལས་ཀ་ཁག་མགྱོགས་མྱུར་ངང་གོ་རིམ་ལྡན་པར་སྤེལ་བཞིན་ཡོད་པ་རེད། །