ངས་བལྟས་ན་འདོད་པ་ནི།
དཀར་ནག་འདྲེས་མའི་རི་མོ་ཁོ་ན་མ་ཡིན་ལ།
དཀར་པོས་ནག་པོ་མཚོན་མི་ཐུབ་ལ།
ནག་པོས་དཀར་པོ་ཡང་མཚོན་མི་ཐུབ།
དཀར་པོ་དང་ནག་པོ་གཉིས།
ནམ་ཡང་ངོ་བོ་གཅིག་ལ་ལྡོག་པ་ཐ་དད་པ་ཁོ་ནར་གནས།
ཡིན་ནའང་།དཀར་ནག་སྐྱ་འཐབ་པ་ལ།
ཡུན་རིང་བལྟས་མཐར།
ངས་ང་ལའང་དྲི་བ་ཞིག་འདོན་དགོས་བྱུང་།
ཁྱོད་དཀར་པོ་ཡིན་ནམ།
ནག་པོ་ཡིན།
ཡང་ན་དཀར་ནག་འདྲེས་མ་ཡིན།
ང་ཚོར་མཚོན་ན་རྫོགས་བྱང་གི་ས་ཆར་ད་དུང་ཧ་ཅང་རྒྱང་ཐག་རིང་ལ།
འོན་ཀྱང་། དེ་ཚུར་བསྡུས་ན།
ཁ་དོག་ཅིག་ཁོ་ན་ཡིན་ལ།
ནག་པོ་མེད་པའི་དཀར་པོ་རྐྱང་རྐྱང་ཡིན།
དེ་ནི། ཁྱོད་དང་ང་ཚོ་བགྲོད་སའི་བཞུད་ལམ་ཉག་ཅིག་ཡིན་ཨང་།
འདི་ནི་གོ་རིམ་ཞིག་སྟེ།
ང་ཚོས་སྒུག་ནས་ཡོང་རྒྱུ་ཅི་ཡང་མེད།
འདོད་ཆགས་དམར་བོས་མཚོན་ལ།
ཞེ་སྡང་སྔོན་པོས་མཚོན།
ད་དུང་གཏི་མུག་དཀར་པོ་གཅིག་པུས་མཚོན་པས།
ང་ཚོས་བཀྲུ་དགོས།
ང་ཚོས་རང་རང་གི་ཁ་དོག་བཀྲུ་དགོས་ཨང་།
འཛམ་གླིང་འདི་ལྟར་འགྱུར་བཞིན་ཡོད།
ཡིན་ནའང་། ང་ཚོས་སྔ་ནུབ་གང་ཡང་འགྱུར་བ་མེད།
དཀར་ནག་འདྲེས་མའི་སྙན་ངག
དཀར་ནག་འདྲེས་མའི་སྐད་ཆ།
ད་དུང་ཨ་ཕའི་ལྭ་བ་དང་ང་ཡི་མགོ་དཀྲིས་ཁྲ་ཁྲ།
རྟ་དཀར་བོ་གང་ཟག་ཡིན་ལ།
རྟ་དཀར་པོའི་ཁ་དོག་ནམ་ཡང་དཀར་པོ་ཡིན།
ང་ཚོ་གང་ན་ཡོད། ད་ལྟ་ང་ཚོ་གང་ན་ཡོད།
ང་ཚོས་ངེས་པར་དུ་རྒྱང་མཐོང་སྤྱད་ནས་རང་ལ་བལྟ་དགོས་ཨང་།
