ནམ་རྒྱུན་དང་འདྲ་བའི་མཚན་མོ་གྲངས་མེད་ཅིག་ལ།
རླུང་བུའི་འུར་སྒྲ་དང་ལྷན་དུ་ཕྱོགས་སོ་སོ་ནས་འཁྲུངས་པའི།
འུག་པ་ཁྱུ་ཅིག་གིས་ངའི་མིད་པར་འཐམས་ནས།
འོད་སྣང་མེད་པའི་གཡང་སར་ཁྲིད་རྩིས་བྱེད།
གྲོག་གཡང་དེ་གཏིང་ཧ་ཅང་ཟབ་པས།
མི་རེ་འགའ་གཡང་ལ་གཡུག་ཀྱང་རོ་ཡང་མཐོང་དཀའ་བར་སྣང་།
རླུང་ནག་འཚུབ་མའི་འགྲོས་ཚུལ་མ་ལེགས་པས།
ངའི་མིད་པ་ནས་བཟུང་སྟེ།
ངའི་བུ་རབས་ཚ་རྒྱུད་ཚང་མ་གཡང་ལ་འཕེན་རྩིས་ཡོད།
མགོན་མེད་གཅེར་བུ་ཡིན་པས་དགྲ་ལ་རྒོལ་བའི་དཔུང་རོགས་མེད།
རྐང་བ་དང་མིག་ཟུང་ཡོད་ཀྱང་མུན་པ་འདི་མུན་པ་ཙམ་མ་ཡིན་པར།
འཇབ་བུ་བཞིན་འཇབ་སྟབས་ཀྱིས་མཐོང་ལམ་མི་འདོད་བཞིན་བཙན་གྱིས་བསྒྲུབ་འགྲོ།
རྐང་ལག་གིས་འཕག་འཚག་གྲངས་མེད་བརྒྱབ་ནའང་།
ཐར་ས་ཞིག་ཡེ་ནས་མེད།
ཉི་འོད་ལ་རེ་བའི་རྒྱང་བསྐྱོད་པ་དག་གིས་ཕྱི་མིག་གི་ཁྲོད་ནས།
དངན་པ་རེ་འཐེན་གྱིན་རི་བོ་ཞིག་གི་སྒལ་ལམ་སྙེག
གོ་ཐོས་ལ་དེ་དག་ནི་མཚམས་གཅོད་པ་ཏག་ཏག་རེད་ལ།
ནམ་ཞིག་ལ་ཕྱིར་ཐོན་ངེས་ཟེར།
རེ་བ་དང་བཅས་མུན་པའི་གསེང་ན་མིག་ཧྲིག་གེར་བལྟས་འདུག
ཨ་ཕོས་མཐོང་པ་ནི་མུན་པའི་དཔུང་ཁག་ཅིག
གཡས་རི་དང་གཡོན་རི་བརྒྱུད་ནས།
ཕར་ཁའི་ཉག་ག་དང་རི་བོའི་རྐེད་ལམ་བཅད་ནས་འགྲོ་བ་ལས།
དྲང་བདེན་གྱི་ལམ་བུ་བརྒྱུད་ནས་འགྲོ་མཁན་ཞིག་མ་མཐོང་།
ཉི་མ་ཞིག་སྐྱ་རེངས་དང་འགྲོགས་ནས་འཆར་རྒྱུ་མེད་ན།
མུན་པ་འདིའི་རང་གཤིས་མུན་པར་སུས་ར་སྤྲོད་བྱ།
མིག་ཆུ་དག་ཆར་བ་དང་ལྷན་དུ་མུན་པའི་གཡང་ལ་ལྷུང་།
ཆར་བ་ཡང་མུན་པའི་ཆར་བར་གྱུར་འདུག
མིག་ཆུ་འདི་མུན་པའི་ཁྲོད་འཛག་ནས་ལོ་ངོ་ག་ཚོད་འདས་ཡོད།
མུན་ཁྲོད་ན་ཧྰ་པ་ཞིག་གིས་རང་གི་བདག་པོ་བཙལ་ནས།
ལུས་པོ་རྔུ་ཆུས་བང་འདུག
ཅིས་ཀྱང་མུན་པ་དགུ་བརྩེགས་འདི་རྩ་ནས་གཏོར་དགོས།
ཡ་ཐོད་ནས་ཤར་མྱོང་བའི་འོད་སྣང་དེར་ཕྱོགས་ཏེ།
གཏད་སོ་གཅིག་ལ་ཁ་ཕྱོགས་ན།
གླེང་ཕྱོགས་ཅི་འདྲ་འགྱུར་ཡང་།
གཙོ་བོ་དང་ཕལ་བའི་ཁྱད་པར་ཤེས་ཡོད།
དེ་བས་བློ་ཅུང་ཙམ་བདེ་ལ་བབས་བྱུང་།
མུན་པ་སྔར་བཞིན།
མི་ཚོགས་སྔར་བཞིན།
མཚན་མོ་འདིའི་མུན་པ་གང་སར་ཁྱབ་འདུག
(སྙན་ངག་བསྐུར་སའི་ཡིག་སྒྲོམ། 1171021424@qq.com)