དེ་རིང་ནི་གཟའ་མཇུག་ཡིན་ལ་ཏག་ཏག་སྟོན་གཞུང་ལའང་འཁེལ་འདུག་པས། གནང་བའི་དུས་སྐབས་འདིར་ཕ་ཡུལ་དུ་ཐེངས་ཤིག་འགྲོ་དགོས་པར་སེམས་སུ་སྨྲ་མི་ཤེས་པའི་དགའ་ཚོར་ཞིག་སྐྱེས་ཤིང་། ཆུང་དུས་ཕ་ཡུལ་དུ་སྟོན་ལས་བྱས་པའི་རྣམ་པ་མང་པོ་ཞིག་ཀྱང་ཡིད་ལ་ཅིག་ཅར་ཏུ་དྲན་འོངས།

   ངའི་ཕ་ཡུལ་ནི་རི་ཁུལ་དུ་ཆགས་ཡོད་པའི་རོང་སྡེ་ཞིག་སྟེ། འགྲིམ་འགྲིལ་སྟབས་མི་བདེ་ལ་དཔལ་འབྱོར་རྗེས་ལུས་ཡིན་པའི་རི་གྲོང་ཆུང་ཆུང་ཞིག་ཡིན་ཞིང་། འཕྲུལ་ཆས་སོགས་ཀྱི་དེང་རབས་ཞིང་ལས་ཡོ་བྱད་མེད་པའི་ཁར་ཁྱིམ་ཚང་རེར་ས་ཞིང་གི་མུའུ་གྲངས་ཀྱང་ཅུང་མང་པས་སྟོན་བསྡུ་མགོ་བརྩམས་པ་ནས་མཇུག་བསྡུ་རག་བར་དུ་ཧ་ལམ་ཟླ་གཅིག་ཙམ་དགོས། ནམ་རྒྱུན་གཡུལ་བཅགས་ཚར་རྗེས་གཡུལ་ཁ་རུ་ནས་མ་རི་ལྟར་སྤུངས་ཡོད་ཅིང་། དེ་དག་ཡོད་ཚད་རླུང་བུ་ལ་བརྟེན་ནས་འབྲུ་དང་ཕུབ་མ་སོ་སོར་དགར་ཏེ་གཙང་སེལ་བྱེད་དགོས་པས། རླུང་བུ་ལྡང་ཤེད་ཆེ་སྟེ་རྒྱུན་མ་ཆད་ན་ལས་ཀ་དེ་སྔ་མོ་ནས་ཡོངས་འགྲུབ་བྱེད་ཐུབ་པ་སྨོས་མ་དགོས་པ་ཞིག་ཡིན།
   ཐེངས་ཤིག་ལ་ངེད་ཚང་གིས་གཡུལ་བཅགས་ཚར་རྗེས། ཨ་མས་ང་ལ་རླུང་གཡུགས་ཀྱིན་ཡོད་མེད་ལ་བལྟ་རུ་བཅུག་པ་མ་ཟད་ཤར་རླུང་ཡིན་ན་མོ་འབོད་དགོས་པ་དང་། གལ་ཏེ་རླུང་ཡོད་མེད་དང་རླུང་གང་སར་གཡུགས་ཀྱིན་པའི་ཁ་ཕྱོགས་མི་ཤེས་ན་གྱང་ཐུང་ཁའི་རྩྭ་དེར་ལྟོས་དང་ཤེས་ངེས་ཟེར་བཞིན་མོ་རང་གཡུལ་ཁའི་ནང་གི་ལས་ཀ་གཞན་པ་ལས་སུ་སོང་། སྐབས་དེར་ངའི་སེམས་སུ་དེ་ནི་ལས་སླ་མོ་འདུག་སྙམ་པ་དང་ཐབས་བཀོད་འདི་ནི་ཤིན་ཏུ་ཡག་པ་མ་ཟད། གྱང་ཁའི་རྩྭ་འདི་ནི་ཤིན་ཏུ་གོ་ཆོད་ཅིག་སྟེ། ང་རང་ལོ་ན་ཆུང་ཡང་འདི་ལ་བརྟེན་ནས་ཨ་མར་གང་ནུས་ཀྱིས་རོགས་རམ་བྱེད་ཆོག་སྙམ་བཞིན་བློ་སེམས་བརྩེ་གཅིག་གིས་གྱང་ཁའི་རྩྭ་ལ་བལྟས་ཏེ་བསྡད་པ་ཡིན། ཡིན་ཡང་ངས་བལྟས་ཀྱིན་བལྟས་ཀྱིན་འདི་ནི་ཤིན་ཏུ་དཀའ་བར་སྣང་སྟེ། གྱང་ཁའི་རྩྭ་ཕྲན་དེར་བསེར་བུ་ཙམ་གཡུགས་ནའང་དེའི་རྒྱུ་ཕྱོགས་དང་བསྟུན་ནས་ཕར་གཡོ་ཚུར་གཡོ་བྱེད་ལ། ཤར་རླུང་ཡངས་པོར་ལྡང་བ་དང་བསྟུན་ནས་ཁོའི་རྒྱུ་བའང་མཐའ་གཅིག་ཏུ་ཕྱོགས་དེར་གཡོས་འགྲོ་བ་མ་ཟད། འཕྲལ་དུ་ནུབ་རླུང་ཞིག་གཡུགས་ནའང་དེའི་རྒྱུ་ཕྱོགས་དང་བསྟུན་ནས་དེ་གར་གཡོས་འགྲོ་བས། ངས་དེ་དག་རེ་རེར་ཨ་མ་བོས་པ་ན་མོ་སྡུག་ཐུག་སྟེ་ང་ལ་རླུང་གི་ཁ་ཕྱོགས་གང་དུ་ལྡང་གྱིན་པ་ཡང་ཤེས་ཀྱིན་མི་འདུག ལྟོས་དང་ངས་ནས་མ་འཕེན་དུས་ཕུབ་མ་གང་དུ་འདུག་ཅེས་ཟེར་བཞིན་ངའི་ལས་ཀ་ལ་ཡིད་མི་ཚིམས་པའི་རྣམ་འགྱུར་སྟོན་བཞིན་ལས་ཀ་གཞན་པ་ལས་སུ་སོང་། སྐབས་དེར་ངའི་སེམས་སུ་ཁ་ཕྱོགས་འདི་ཁྱོད་ཀྱི་བཀོད་པ་ལྟར་གྱང་ཁའི་རྩྭ་ཡི་གཡོ་ཕྱོགས་ལ་བརྟེན་ནས་བཤད་པ་མིན་ནམ་སྙམ་བཞིན་ཨ་མས་ནས་མ་འཕངས་སར་སོང་སྟེ་དོན་ངོ་མ་མཁོ་བའི་རླུང་གི་ཁ་ཕྱོགས་ལ་བལྟས་པ་ཡིན། རེད་དེ། ང་རང་སློབ་གྲྭ་ཆེ་འབྲིང་ཆུང་གསུམ་བརྒྱུད་དེ་བྱ་བའི་ལས་རྐང་དུ་ཞུགས་པའི་དེ་རིང་གི་བར་དུ་ཕ་ཡུལ་དུ་གྲངས་མེད་སོང་ཡང་། སྟོན་གྱི་དུས་སྐབས་དང་འཁེལ་མེད་པའམ་ཡང་ན་ཕྱིར་དྲན་གྱི་ཀློང་དུ་ཤར་མ་མྱོང་བའི་དབང་གིས་ངས་གྱང་ཁའི་རྩྭ་དེར་ཡེ་ནས་མཉམ་བཞག་མ་མྱོང་ལ། རྩྭ་དེས་བྱིས་པ་ཚོར་ནས་མ་འཕེན་དུས་རླུང་ལྡང་གིན་ཡོད་མེད་ལ་ཟུར་བལྟའི་ནུས་པ་ཐོན་གྱིན་ཡོད་མེད་སྐོར་དེ་བས་ཀྱང་ཤེས་མེད་པས། སེམས་སུ་བྲེལ་སྣང་ཞིག་ལངས་བཞིན་ཕ་ཡུལ་དུ་མྱུར་བར་ཐོན་འདོད་སྐྱེས་བྱུང་།
   ང་བསྡད་ཡོད་པའི་རླངས་འཁོར་དེ་གནག་སྣུམ་གྱི་གཞུང་ལམ་བརྒྱུད་དེ་དུས་ཚོད་གཉིས་རིང་སོང་མཐར་གཞི་ནས་ཕ་ཡུལ་དུ་ཐོན་བྱུང་ལ། ཏག་ཏག་ཉེ་མི་ཚོས་གཡུལ་ཁར་གཡུལ་གཅོགས་བཞིན་འདུག་པས། ང་ཐད་ཀར་དུ་དེར་སོང་སྟེ་ཁོ་ཚོར་རོགས་རམ་བྱས་པ་དང་ཞོར་དུ་ཆུང་དུས་བལྟས་མྱོང་པའི་གྱང་ཁ་དེར་ཞིབ་ཏུ་བལྟས་པ་ཡིན་མོད། ངའི་མིག་ལམ་དུ་སྔར་གྱི་གཡུལ་ཁའི་གྱང་ཐུང་ཁར་རྫ་གཡམ་གྱིས་ཤན་ཞིང་གྱང་ངོས་སུ་དཀར་རག་བྱུགས་ཏེ་ཡོངས་སུ་ཡག་པོར་སྣང་འདུག གཡུལ་བཅགས་ཚར་རྗེས་ངས་ཨ་མར་གྱང་ཐུང་ཁར་འདི་དག་ནམ་ལས་པ་ཡིན་ཞེས་དྲིས་པ་ན། ཨ་མས་དེ་ཁྱོད་ཀྱིས་མཉམ་མ་བཞག་པ་མ་གཏོགས་སྔ་མོ་ནས་ལས་ཡོད། གྱང་ཐུང་ཁར་རྫ་གཡམ་བྱུགས་པ་ནས་བཟུང་རྩྭ་དེ་དག་སྐྱེས་རྒྱུ་མེད་པས་ཧ་ཅང་བཟང་འདུག དེ་མ་གཏོགས་རྩྭ་དེ་དག་སྐྱེས་ཚད་མགྱོགས་པ་མ་ཟད་འབྲུ་གུ་ཡང་རླུང་གི་རྒྱུ་ཕྱོགས་དང་བསྟུན་ནས་གང་སར་ཐོར་འགྲོ་བས་གཡུལ་ཁའི་ཕྱི་ནང་ཀུན་ཏུ་རྩྭ་ལྡུམ་དེས་ཁེངས་འགྲོ་ཟེར།

   ཨ་མའི་སྐད་ཆ་དེས་ཆུང་དུས་གྱང་ཁའི་རྩྭ་ཡིས་ང་ལ་བཞག་པའི་ཤུགས་རྐྱེན་དག་ཡང་བསྐྱར་དྲན་དུ་བཅུག་ལ། ཕྱིར་དྲན་དེ་ངའི་ད་ལམ་མིག་གི་མཐོང་ལམ་དུ་གྱུར་བའི་གྱང་ཁ་དང་གཞི་གཅིག་ཏུ་འདྲེས་ཏེ་ཁ་ནས་གལ་ཏེ་ཁྱོད་གསོམ་སྡོང་བཞིན་བརྟན་ཞིང་བརླིང་བ་ཞིག་ཡིན་ན་ཁྱོད་སྔར་བཞིན་གྱང་ཁ་འདིར་གཟི་བརྗིད་ཀྱིས་མུ་མཐུད་དུ་བྱིས་པ་ཚོར་རླུང་གི་ཁ་ཕྱོགས་བསྟན་ཆོག་ངེས་ཞེས་བཞེངས་ཏེ་ཤོར་སོང།

།