ཟླ8པའི་ཚེས12ཉིན། 2017ལོའི་རྒྱལ་ཡོངས་གུར་ཕུབ་འདུ་ཚོགས་དང་མི་རིགས་ལ་གཞས་འགྲན་སྡུར་དེ་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདོ་ལ་རྫོང་གི་ཨ་མྱེས་སྟོང་སོའི་འདབས་རོལ་ནས་བསྡུས་པ་རེད།ཁ་དོག་རྣམ་པར་བཀྲ་བའི་རས་གུར་གྱིས་མདོ་ལའི་རྩྭ་ཐང་ལ་གསོན་ཤུགས་གསར་བ་བསྣན་ཡོད།
མདོ་ལ་རི་བོའི་འདབས་ཀྱི་རང་བྱུང་མཛེས་ལྗོངས་ལྟ་ན་སྡུག་ཅིང་། ཕྱོགས་བཞིའི་མགྲོན་པོའི་ཡིད་དབང་བཀུག གུར་ཕུབ་འདུ་ཚོགས་སྟེང་ཁྱོན་སྡོམ་རྐང་ཐང་བྱེས་བགྲོད་འགྲན་སློང་འགྲན་སྡུར་དང་། ཐག་ལྡིང་འགྲན་སྡུར་སོགས་ཀྱི་ལུས་རྩལ་འགྲན་སྡུར་དུ་མ་དང་། རྩྭ་ཐང་གི་གླུ་ལེན་དགོང་ཚོགས་སོགས་བྱེད་སྒོ་སྣ་མང་འདུ། རྐང་ཐང་དུ་འགྲོ་བའི་རུ་ཁག་གིས་དགའ་སྤྲོ་འཆམ་མཐུན་ངང་མདོ་ལའི་ངོ་མཚར་ཡིད་འོང་གི་རང་བྱུང་མཛེས་ལྗོངས་ལ་རོལ་མྱོང་བྱས་ཏེ། བརྗེད་པར་དཀའ་བའི་བག་ཆགས་ཟབ་མོ་བཞག
ཐེངས་འདིའི་གུར་ཕུབ་འདུ་ཚོགས་ནི་རྒྱལ་ཁབ་ལུས་རྩལ་སྤྱི་ཁྱབ་ཚོགས་པའི་རི་འཛེག་ལུས་རྩལ་དོ་དམ་ལྟེ་གནས། མཚོ་སྔོན་ཞིང་ཆེན་ལུས་རྩལ་ཅུའུ། མཚོ་བྱང་ཁུལ་མི་དམངས་སྲིད་གཞུང་བཅས་ཀྱིས་གཙོ་སྒྲུབ་གནང་ཞིང་། ཀྲུང་གུང་མདོ་ལ་རྫོང་ཏང་ཨུ་དང་མདོ་ལ་རྫོང་མི་དམངས་སྲིད་གཞུང་། མཚོ་བྱང་ཁུལ་རིག་གནས་རྒྱང་སྒྲོག་བརྙན་འཕྲིན་ཅུའུ། མཚོ་སྔོན་ཞིང་ཆེན་རི་འཛེག་ལུས་རྩལ་དོ་དམ་ལྟེ་གནས་བཅས་ཀྱིས་སྒྲུབ་འགན་གནང་བ་རེད།
