དེང་སང་གི་སྤྱི་ཚོགས་འཕེལ་འགྱུར་གྱི་ནང་དུ། མི་དང་མིའི་བར་དང་། མི་དང་སྲོག་ཆགས་དུད་འགྲོ་བར་ལ་འདྲ་མཉམ་གྱི་རྨང་གཞིའི་སྟེང་ཕན་ཚུན་བརྩི་འཇོག་དང་མཐུན་སྒྲིལ། རོགས་རེས་བྱེད་དགོས་པ་ནི་དུས་རབས་འཕེལ་འགྱུར་ལ་མེད་དུ་མི་རུང་བའི་བསམ་སྤྱོད་ཅིག་ཡིན། འོན་ཀྱང་དེང་སང་ཚོང་རའི་དཔལ་འབྱོར་ཉིན་ལྟར་འཕྱུར་བའི་དུས་སུ། མི་རྣམས་ཀྱི་ཕྱིའི་རྒྱུ་ནོར་བསོག་པ་ཙམ་ལ་སེམས་འཁོར་བ་ལས་མིའི་ནང་རྒྱུད་ཀྱི་བསམ་སྤྱོད་སྤྱི་དང། ཡ་རབས། གཞན་ཕན་ལ་བསམ་བློ་གཏོང་བའི་མི་ནི་ཉིན་རེ་ལས་ཉིན་རེ་ཇེ་ཉུང་དུ་འགྱུར་བཞིན་ཡོད། འོ་ན་འབྱུང་འགྱུར་མིའི་རིགས་ཀྱི་བསམ་སྤྱོད་ཀྱི་ཉེན་ཁ་དེ་སེལ་ཐབས་ཤིག་ཨེ་ཡོད་བསམ་ན། སྤྱིར་འཛམ་གླིང་གི་རིག་གནས་སྤྱི་དང་བྱེ་བྲག་མི་རིགས་སོ་སོའི་རིག་གནས་དང་ལྟ་བ། གོམས་གཤིས་སོགས་ཀྱི་ནང་ན་ཐུན་མོང་མ་ཡིན་པའི་སྤྱི་དང་གཞན་ལ་ཕན་པའི་ཡ་རབས་ཀྱི་ཕྱོགས་ལ་བློ་ཁ་བསྒྱུར་ཐུབ་པའི་བསམ་པ་དང་སྤྱོད་པའི་སློབ་གསོ་བྱེད་ཐབས་དང་ནང་དོན་ཡོད་པ་སྨོས་མ་དགོས། དཔེར་ན་སངས་རྒྱས་ཆོས་ལུགས་ལ་མཚོན་ནས་བཤད་ན། སངས་རྒྱས་ཀྱི་བསྟན་པ་སྙིང་རྗེས་རབ་ཏུ་ཕྱེ་བ་ཡིན་ཞེས་གསུངས་པ་ལྟར། སྙིང་རྗེ་ཞེས་པ་ནི་སངས་རྒྱས་ཆོས་ལུགས་ཀྱི་རྩ་བ་ཡིན་ལ། དེ་ནི་སེམས་ཅན་ཉམ་ཐག་པ་དང་སྡུག་བསྔལ་བ་ཐམས་ཅད་ལ་བདེ་ཞིང་སྐྱིད་པར་བྱེད་པའི་སྨན་མཆོག་ལྟ་བུ་ཞིག་ཏུ་བརྩི་བཞིན་ཡོད། དེས་ན་དེང་གི་སྤྱི་ཚོགས་ཀྱི་འཕེལ་འགྱུར་དང་བསྟུན་ནས་སངས་རྒྱས་ཀྱི་གཞུང་ལས་བཤད་པའི་སྙིང་རྗེ་ཞེས་པའི་བསམ་སྤྱོད་ཀྱི་ལྟ་བ་སངས་རྒྱས་ཀྱི་མདོ་ལས་བསྟན་པའི་ཁུངས་དང་། རྒྱ་བོད་མཁས་པའི་སྙིང་རྗེ་ནི་ཆོས་ཀྱི་རྩ་བར་གསུངས་པ་དང་། དེའི་ངོ་བོ་དང་དབྱེ་བ། བྱེད་ལས་སོགས་ཤེས་ན་འགྲོ་བ་མིའི་རིགས་ཀྱི་བསམ་པ་དང་སྤྱོད་པ་ཇེ་བཟང་དུ་གཏོང་བ་ལ་ཕན་ཐོགས་འབྱུང་སྲིད་དོ།
མདོར་ན་དུས་རབས་ཉེར་གཅིག་པར་ཕྱོགས་པའི་སྐབས་འདིར། འགྲོ་བ་སེམས་ཅན་ཐམས་ཅད་དང་སྒོས་ཁྱད་པར་མིའི་རིགས་ཀྱི་འདྲ་མཉམ་དང། མཐུན་སྒྲིལ། འཕེལ་རྒྱས་སོགས་ལ་ཕན་པའི་བསམ་པ་དང་སྤྱོད་པ་ནི་འཛམ་གླིང་ཤར་ནུབ་དང་། རྒྱལ་ཁབ་ཕྱི་ནང་། མི་རིགས་འདྲ་མིན། མི་གྲངས་མང་ཉུང་། ཤ་མདོག་དཀར་ནག དཔལ་འབྱོར་དང་དམག་སྟོབས་ཆེ་ཆུང་། ཆོས་ལུགས་དང་རིག་གནས་འདྲ་མིན་ལ་མི་བལྟ་བར་གང་བཟང་པོ་དང་གང་ལེགས་པོ། གང་འགྲིག་པ། གང་ཡང་དག་པ། གང་སྤྱི་ལ་ཕན་པ། གང་གཞན་ལ་ཕན་པའི་བསམ་སྤྱོད་ཀྱི་ལེགས་ཉེས་ལ་བླང་དོར་བྱེད་པ་ནི་ཧ་ཅང་གལ་ཆེ་བར་སྣང་ངོ་།།
