རྩྭ་ཐང་གི་མེ་ཏོག་ཁ་རོག་གེར་བཞད་ཀྱང་དལ་བུར་རྙིད་སོང་། ལྗོན་ཤིང་གི་ལོ་འདབ་རེ་རེ་སྔོ་ལྗང་གིས་བརྒྱན་རུང་། སླར་ཡང་སེར་ཐིགས་ལྷུང་སོང་། ལྷ་བྱ་ཁྲུང་ཁྲུང་དཀར་པོ་ལྷོ་ནས་ཐོན་རུང་སླར་ཡང་བུད་སོང་། རེས་འཁོར་གྱི་དུས་ཚིགས་འགྲོ་འོང་ཁྲོད། རང་བྱུང་མཛེས་ལྗོངས་དེ་དཔྱིད་ཀར་ཐོན་རུང་སྟོན་ཁར་ཡལ་འགྲོ། ལོ་ཟླ་ཝུ་བ་བཞིན་རླབས་རིས་ཀྱི་བཞུར་རྒྱུན་ཁྲོད་རེས་གསལ་རེས་རུབ་ཀྱིས་བུད་འགྲོ་བས། བརྗེད་དཀའ་ལ་སེམས་ན་བའི་ཕྱིར་དྲན་མང་པོ་ཞིག་བསྐྱུར་ཡོད་ཨང་། ཕྱི་མིག་འཐེན་ཐེངས་རེར། འདས་པའི་དྲན་ཤིང་རེ་རེས་དར་ལ་བབས་པའི་ལང་ཚོ་ལ་འགྲེལ་བཤད་རེ་ཅིས་ཀྱང་བྱེད་དཀའ། འདི་ལྟར་ལོ་ཟླ་ཟིལ་ཐིགས་བཞིན་མཛུབ་བར་ནས་འཐོར་སོང་།
ཟླ་དྲུག་པའི་བསིལ་རླུང་དལ་བུར་རྒྱུ་དུས། ལྗོན་ཤིང་དང་ནགས་ཚལ་གྱི་མགོ་ལྕོག་ཤིག་ཤིག་གཡོ་ཞིང་། རྩྭ་ལྗང་དག་ཀྱང་ལྡེམ་ལྡེམ་བསྐྱོད་དེ། ཉི་འོད་འོག་གླུ་ལེན་གར་རྩེད་བྱེད་པ་འདྲ། རྒྱང་རིང་གི་མཁའ་མཐའ་རུ། ལོག་ཡུལ་ངེས་གཏན་མེད་པའི་སྤྲིན་དཀར་ལང་ལོང་གཡོ་བའི་ཚུགས་ཀ་འདིར། ཁེར་རྐྱང་དང་སུན་སྣང་ཞིག་འཐིམས་ཡོད། ཉེ་འགྲམ་གྱི་ལྗོན་རྩེར། བྱ་དང་བྱེའུ་ཡིས་ཀུ་ཅོ་སྒྲོག་བཞིན་ཁྱུ་དང་ཁྱུ་བྱས་ནས་འཕུར། སྒོ་འགྲམ་ན་ཡོད་པའི་ཆུ་ཕྲན་ཡང་ཁེངས་དྲེགས་རང་རློམ་ངང་བདག་གི་མདུན་ས་ནས་བཞུར་སོང་།
སྣང་ཚུལ་འདི་དག་གིས་བདག་སེམས་ལ་འཕྲལ་མར་དྲན་སྣང་སྣ་ཚོགས་བསླངས་ཡོད་དེ། བཞུར་སོང་བའི་ཆུ་ཕྲན་གྱིས་རྒྱ་མཚོ་ཆེན་མོའི་རུམ་ཁ་འཚོལ་སྙེག་བྱེད་པ་ཡིན་ལ། ལང་ལོང་འཁྱམ་པའི་སྤྲིན་དཀར་དེ་ལའང་། བསིལ་རླུང་གིས་སྐྱེལ་མ་བྱས་ཏེ། མཐར་སྔོ་ཞིང་དྭངས་པའི་མཁའ་དབྱིངས་ནས་གར་སོང་ཆ་མེད་དུ་གྱུར་ཏེ། རྗེས་ཤུལ་སྤུ་ཉག་ཙམ་ཡང་བཞག་མི་སྲིད། འོ་ན། དུས་ཚོད་ཡ། ཁྱོད་ཀྱིས་ང་ཡི་ཆེད་དུ། ཅི་ཞིག་སྟེར་ཆོག་ཨང་། བདག་གིས་བསམ་ན། ཉིན་རེ་བཞིན་རྒས་བཞིན་པའི་ལོ་ཚོད་དམ། ཡང་ན་ལོ་ཟླས་ང་ལ་བསྩལ་བའི་འགྱུར་བ་རེ་རེ་ལས་གཞན་ཅི་ཡང་མེད།
ཁེར་རྐྱང་དུ། རྒྱུས་ཆེ་བའི་ཡུལ་འདི་རུ་འཁྱམ་ཉུལ་བྱེད་དུས། བསིལ་རླུང་ཁྲོད་ལྗོན་ཤིང་གིས་མགོ་བོ་དུད་ནས་ངེས་མེད་དུ་ལྡེམ་བཞིན་འདུག་ལ། མི་ཚོགས་འགྲོ་འོང་གི་གོམ་སྟབས་བྲེལ་བྲེལ་འཚུབ་འཚུབ་ཅིག འདི་ལྟར་མི་ཚོགས་ཀྱི་རྒྱུགས་འདུར་ཁྲོད་དུས་ཚོད་ཀྱང་སྐད་ཅིག་སྐད་ཅིག་ཏུ་ཡལ་བཞིན་ཡོད། ཡང་ཞིག་བཤད་ན། འཚོ་བ་ནི་འདི་འདྲ་ཞིག་ཡིན་པས་མི་སེམས་དང་མཐུན་དཀའ་ཨང་། ང་ཚོའི་འཚོ་བའི་ཁྲོད་དུས་ཚོད་ནི་མིག་རྡེབ་ཙམ་དུ་ཡང་སྡོད་མི་སྲིད་པས། ཡུན་རིང་ངམ་ཡང་ན་དུས་ཡུན་ཐུང་ཐུང་ནང་། ཤུགས་རིང་ནར་ནར་འཐེན་པ་ཙམ་ལས་ཅི་ཡང་མེད་པ་འདྲ།
ལོ་ཟླ་ཟིལ་ཐིགས་བཞིན་མ་བསམ་མ་དྲན་ས་ནས་འཐོར་ཏེ། ལང་ཚོ་ཡི་གཟི་དཔལ་ཇི་འདྲའི་མང་པོ་ཞིག སད་ཐབས་བྲལ་བའི་ཕྱིར་དྲན་ཁྲོད་སིམ་འགྲོ་བས། ཀུན་ལ་དངངས་སྐྲག་བརྒྱ་འགྱུར་ཞིག་དང་འགྱོད་གདུང་ཚད་མེད་ཅིག་སྟེར་བར་མ་ཟད། ཐོད་པའི་གཉེར་རིས་ཀྱང་ཉིན་རེ་བཞིན་ཇེ་མང་ནས་ཇེ་མང་། ཀྱེ་མ་ཀྱེ་ཧུད། ལོ་ཟླ་ཡི་འགྲུལ་བཞུད་དང་འགྲོས་ནས། ལུས་ཟུངས་ཟད་ཅིང་བློ་རིག་ཀྱང་ཉམས་པས། སེམས་ཀྱི་སྡུག་བསྔལ་རེ་རེ་གྱང་རི་བརྩིགས་པ་བཞིན་སྲ་ཞིང་བརྟན། དེར་བརྟེན། ཅི་བྱ་གཏོལ་མེད་ཀྱི་སེམས་ཁམས་སུ། ལོ་ཟླ་ཡི་རྗེས་ཤུལ་རེ་རེ་རྨ་ཁ་ཞིག་ཀྱང་རེད།
ཚེ་སྲོག་ནི་འགྲུལ་སྐྱེལ་གནམ་གྲུ་བཞིན། ཕྱིར་ལོག་པའི་འཛིན་བྱང་མེད་ལ། བརྒྱུད་མྱངས་པའི་ལམ་བུ་རེ་རེར་སླར་ཡང་ཐེངས་ཤིག་ལོག་འདོད་སྐྱེས་ཀྱང་། སྔར་གྱི་ལམ་ཕྲན་གཏན་ནས་རྙེད་མ་བྱུང་། མེ་ཤུགས་འཕུར་མདའ་ལྟར་མགྱོགས་དྲགས་པའི་ལོ་ཟླ་བསམ་ཁོམ་ཙམ་ཡང་མེད་པར་ཡལ་འགྲོ། ཐེངས་མང་པོར། འདས་ཟིན་པའི་མཛེས་ལྗོངས་རེ་རེ་སླར་ཡང་ཐེངས་ཤིག་མངོན་པར་འདོད་ལ། གྱེས་སོང་བའི་གཉེན་གྲོགས་རེ་རེར་སླར་ཡང་ཐེངས་ཤིག་འགྲོགས་ན་འདོད། ལོ་ཟླ་དེ་དག་ལྟར་བསམ་རྒྱུ་དྲན་རྒྱུ་ཅི་ཡང་མེད་པར་དགའ་སྐྱིད་ལ་སླར་ཡང་ཐེངས་ཤིག་རོལ་ན་འདོད་ཀྱང་། གཞུ་ཁ་ནས་ཤོར་བའི་མདའ་མོ་བཞིན་ཕྱིར་ལོག་ཅིག་གཏན་ནས་མི་འདུག
ན་གཞོན་གྱི་ལང་ཚོ་ཟིལ་ཐིགས་བཞིན་ལོ་ཟླ་ཡི་རྗེས་ཤུལ་དུ་སྙིང་རྗེ་མེད་པར་འཐོར་ཞིང་། ཆུ་བོའི་བཞུར་རྒྱུན་ལྟར་གོ་མེད་ཚོར་མེད་ངང་ཇེ་རྒས་ནས་ཇེ་རྒས། ཡིན་ནའང་གཏིང་ཟབ་ལ་བརྗེད་དཀའ་བའི་ཕྱིར་དྲན་རེ་རེ། རིག་ལམ་གསལ་ཞིང་གོ་རིམ་མི་འཆུག་པར་སྨྱུག་ཁ་ནས་ལྷུག་པོར་བརྡོལ་ཆོག ལོ་ཟླ་ཡིས་ང་ལ་བསྩལ་བའི་ཆགས་ཞེན་ཟབ་མོ་རེ་རེའམ་ཡང་ན་རྒས་པའི་བརྒྱུད་རིམ་གྱི་སྐྱོ་སྡུག་རེ་རེ། གང་ལྟར་ཀྱང་འཛད་མེད་ཀྱི་དྲན་སྣང་ཐམས་ཅད་བདག་གིས་ཞིབ་ཅིང་རྒྱས་པར་འབྲི་ཆོག
སྙིང་རྗེ་བྲལ་བའི་ལག་ཟུང་ཞིག་གིས། འཇིག་རྟེན་འདི་ཡི་འགྲོ་བ་སེམས་ཅན་ཐམས་ཅད་ལ་མཇུག་རྫོགས་པའི་བཞི་ཤད་ཅིག་འབྲི་རྒྱུ་ནི། དུས་ཚོད་རྒན་པོའི་གོམས་གཤིས་ཤིག་ཡིན་པས། གང་ལྟར་མཇུག་འབྲས་ནི་ཡིད་ཚིམས་ཤིག་གམ་ཡང་ན་འགྱོད་གདུང་གང་ཡིན་རུང་བཞི་ཤད་ཅིག་འབྲི་ཁོ་ཐག་ཡིན། ཆེས་མཐའ་མའི་ཁྱེད་ལ། དགའ་སྐྱོ་ཆགས་སྡང་གང་ཡོད་རུང་ཁ་ཆེམས་རེ་རེ་འཇོག་ཞོར་གྱེས་ཕྱག་འབུལ་དགོས་པས། བརྒྱུད་མྱངས་བའི་ལོ་ཟླ་རེ་རེ་དང་། འཕྲད་མྱངས་པའི་བྱ་གཞག་རེ་རེ། ཐ་ན་འཚོ་བའི་བྱ་བ་རྩག་རྩིག་རེ་རེ། ཡོད་ཚད་ནས་ཡོད་ཚད་ཤོག་དཀར་ངོས་སུ་རི་མོར་ཕབ་ན་ཇི་འདྲའི་འགྲིག་པོ་ཞིག་རེད་ཨང་།
ཁེར་རྐྱང་གི་འགྲུལ་བཞུད་ལ་གོམས་པའི་མི་དེ་དག སྤྱིར་བཏང་དང་མཚར་ཞེན་མེད་པས། ད་གཟོད་ལྗིད་ཏིག་ཏིག་གི་སུན་སྣང་རེ་ཡོད་ངེས། བྱ་དངོས་ཐམས་ཅད་དུས་ཚོད་དང་འགྲོས་ནས་ཡོད་པས། ང་ཚོ་ཚང་མ་ལོ་ཟླ་ཡི་མགྲོན་པོ་ཡིན། མིག་ཟུང་གིས་མཛེས་ལྗོངས་ལ་ཞིབ་མོར་བལྟ་བ་དང་། བསམ་པ་རྣམ་དག་གིས་འཚོ་བ་ཡི་དྲི་ངད་མྱོང་དགོས། བཞུད་ཟིན་པའི་ལམ་ལ་ཐེངས་ཤིག་བལྟས་ན། བརྗེད་ཐབས་བྲལ་བའི་བདག་སེམས་ཀྱི་བརྩེ་ཞེན་ཇི་ལྟར་བརྗོད་ཐུབ་ཨང་།
འཇིག་རྟེན་ཆགས་འཇིག འཚོ་བ་མི་རྟག བགྲང་ལས་འདས་པའི་འདུ་འབྲལ་རེ་རེ། ལོ་ཟླ་ཡི་བཞུར་རྒྱུན་ཀློང་དུ་འཐིམ་སོང་། ཆགས་ཞེན་རྣམ་དག་གི་སྨྱུག་ཁ་ནས་ཐོན་པའི་བརྩེ་འདང་རེ་རེ། ད་དུང་འགྲོ་འོང་གི་མི་དང་བྱ་གཞག་དེ་དག འདི་ནི་ཕལ་ཆེར་འཚོལ་སྙེག་ཅིག་ཡིན་ཤས་ཆེ། ལོ་ཟླ་དང་འགྲོགས་ནས་མི་དང་བྱ་གཞག་འཚོལ་ཞིང་སྙེག མི་དང་བྱ་གཞག་ལ་ཐུག་འབྲེལ་ཁྲོད་ཡིན་མིན་བདེན་རྫུན་གསལ་པོར་རྟོགས་བྱུང་། དཔག་དཀའ་བའི་དངོས་པོའི་འཚོ་བའི་འགྱུར་ལྡོག་ཁྲོད། དལ་བུར་དལ་བུར་རྟོགས་ཡོང་ལ། ཡོངས་ནས་ཡོངས་སུ་བརྗེད་ཀྱང་འགྲོ། ད་དུང་བློ་འཁྱམ་སེམས་གཡེང་ངང་བལྟ་ཡང་སྲིད།
འདས་པའི་ལང་ཚོ། ད་ལྟ་ཡི་རྒས་རིམ། ཚང་མ་ང་ཚོས་བརྒྱུད་ནས་ཐོན་པ་ཡིན། ཟིལ་ཐིགས་བཞིན་འཐོར་བའི་ལོ་ཟླ་ཡི་བརྒྱུད་རིམ་ཁྲོད། ལང་ཚོ་ཡི་གཟི་དཔལ་རྒྱས་མྱངས་ལ། རྒས་པའི་གཉེར་རིས་ཀྱང་ཇེ་མང་རེད། ན་གཞོན་དར་ལ་བབས་མྱངས་ལ། དུས་ཚིགས་བཞི་པོ་ཡང་བརྒྱུད་མྱངས། ཡིན་ནའང་ལོ་ཟླ་འདི་ད་དུང་བརྒྱུད་མ་ཚར། ཉིན་རེ་བཞིན་ཇེ་རྒས་ནས་ཇེ་རྒས། ཕྱིར་ལོག་མེད་པའི་ལོ་ཟླ་དེ་དག འདས་ཟིན་པའི་ཕྱིར་དྲན་ཁྲོད་སྦས་ནས་ཡོད། ལོ་ཟླ་དེ་དག་ཁྲོད་ཀྱི་འགྱུར་ལྡོག་རེ་རེ། འགྲུབ་མི་ཐུབ་པའི་རེ་སྒུག་ཅིག་དང་འདྲ་ཨང་། །
