སྔ་འགྱུར་བསྟན་པའི་གདན་ས་ཆེན་མོ་ཤར་རྒྱལ་བ་ཀཿ་ཐོག་རྡོ་རྗེ་གདན་ནི་དཀར་མཛེས་བོད་རིགས་རང་སྐྱོང་ཁུལ་དཔལ་ཡུལ་རྫོང་ཧོ་པོ་ཆུས་པད་ལུང་ཕུ་ན་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན་སོགས་བཀྲ་ཤིས་པའི་རེ་ཁས་མཚོན་པའི་གནས་མཆོག་ལོ་ཆེན་བེེ་རོ་ཙ་ནའི་སྒྲུབ་གནས་སུ་རབ་བྱུང་གསུམ་པའི་ས་ཡོས་ལོ་སྟེ་སྤྱི་ལོ་1159ལོར་ཀཿདམ་པ་བདེ་གཤེགས་ཀྱིས་གཙུག་ལག་ཁང་ཁམས་གསུམ་ཟིལ་གནོན་ཐུབ་བསྟན་བཀྲ་ཤིས་དཔལ་འབར་རྟེན་དང་བརྟེན་པ་བཅས་པའི་གདན་ས་བཏབས། དེ་ནས་བཟུང་བླ་རྒྱུད་དང་མཁན་སྤྲུལ་རིམ་བྱོན་རྣམས་ཀྱིས་མཛད་རྗེས་བླ་ན་མེད་པ་བཞག་སྟེ་ཕྱི་གཙུག་ལག་ཁང་དང་ནང་དགེ་འདུན་སོགས་དར་རྒྱས་དང་ཕུན་སུམ་ཇེ་ཚོགས་སུ་ཕྱིན། ཁྱད་པར་དུ་དམ་པ་རིམ་བྱོན་རྣམས་ཀྱིས་དགོངས་བཞེད་གཅིག་ཏུ་གྲུབ་པའི་མཐུ་ལས་གདན་ས་ཆེན་པོ་འདིའི་ཕྱི་ནང་གསང་གསུམ་གྱི་རྟེན་དང་བརྟེན་པ་བཅས་པའི་བཞེངས་པ་རྣམས་མདོ་རྒྱུད་དང་མཐུན་པའི་ཕྱག་བཞེས་མ་ཉམས་པར་མཛད་པའི་གནས་མཆོག་ཟངས་མདོག་དཔལ་རིའི་ཕོ་བྲང་པདྨ་འོད་ཀྱི་གཞལ་ཡས་ཁང་གསེར་ཟངས་ལས་གྲུབ་ཅིང་རིན་ཐང་གཞལ་དུ་མེད་པའི་རིན་པོ་ཆེའི་ཕྲ་ཚོམ་གྱིས་རྒྱན་གྱིས་སྤུད་པ། གཞན་ཡང་བཤད་སྒྲུབ་ནོར་བུའི་གླིང་གི་གཙུག་ལག་ཁང་ཕྱི་ནང་གསང་གསུམ་གྱི་རྟེན་དང་བརྟེན་པ་བཅས་ལེགས་པར་གྲུབ་སྟེ་བསྟན་པའི་མིག་རྒྱན་དུ་གྲུབ། གཞན་སྒྱུ་འཕྲུལ་གསང་བའི་སྙིང་པོའི་བློས་བསླངས་ཐོག་རྩེགས་རིམ་པ་ལྔ་ལས་འོག་རིམ་གཉིས་རྒྱུན་ལྡན་གྱི་གཙུག་ལག་ཁང་དང་སྟེང་གི་ཁང་བཟང་ཐོག་བརྩེགས་གསུམ་གསེར་ཟངས་ལས་གྲུབ་ཅིང་རིམ་པ་བཞིན་སྟེང་གི་གཞལ་ཡས་ཁང་གྲུ་བཞི་སྒོ་བཞི་ལས་རྟ་བབ་བང་རིམ་བཞི་དང་ལྡན་ཞིང་རྩེ་མོ་པདྨ་ལ་གནས་པའི་ཆོས་ཀྱི་འཁོར་ལོ་དང་གདུགས་དང་གཡས་གཡོན་དུ་རི་དྭགས་ཕོ་མོ་དང་བསྣམ་བུ་སོ་སོར་ལ་གསེར་གྱི་རྒྱལ་མཚན་དང་འཕེན་ལ་སོགས་པའི་རྒྱན་དུ་མས་རྒྱན་པའི་སྟེང་དུ་མདའ་ཡབ་དང་པུ་ཤུས་མཛེས་པར་སྤྲས་ཤིང་ཕྱོགས་བཞིར་ཆུ་སྲིན་གྱི་ཁ་ནས་བྱུང་བའི་རིན་པོ་ཆེའི་དྲ་བ་དང་དྲ་ཕྱེད་ཀྱིས་རྒྱན་གྱིས་རྒྱན་ཞིང་དྲིལ་བུ་ལ་ཟླ་བ་རླུང་གིས་བསྐྱོད་པ་དང་རྔ་ཡབ་ཀྱིས་མཛེས་པར་བྱས་པ། དེའི་སྟེང་དུ་ཆོས་འཁོར་རིམ་པ་བཅུ་གསུམ་ལ་ཐོག་ཁེབ་ཟ་ར་ཚགས་དང་རིགས་ལྔའི་དབུ་རྒྱན་དང་རྡོ་རྗེའི་མཚན་པ། དེའི་འོག་གསེར་ཟངས་ལས་གྲུབ་པའི་དབུས་ཀྱི་གཞལ་ཡས་ཁང་མཆོད་རྟེན་བུམ་པའི་དབྱིབས་ལྟར་ཟླུམ་ཞིང་ཕྱོགས་བཞིར་སྒོ་བཞིའི་མཛེས་པའི་སྟེང་དུ་གསེར་དང་རིན་པོ་ཆེའི་གདུགས་དང་རྒྱལ་མཚན་དང་བ་དན་སོགས་མཆོད་པའི་ཡོ་བྱད་བསམ་གྱིས་མི་ཁྱབ་པས་བསྐོར་བ། འོག་གིས་གཞལ་ཡས་ཁང་ཐོག་བརྩེགས་རིམ་པ་གཉིས་ཀྱི་དབྱིབས་གྲུ་བཞིར་ཕ་གུ་དང་གདུང་སྣམ་སོགས་ལས་མིག་མངས་རིས་ཀྱི་མཛེས་པར་བྱས་ཤིང་དྲ་བ་དང་དྲ་ཕྱེད་དཔྱངས་ཏེེ་རིན་པོ་ཆེའི་དྲ་མིག་སེང་པའི་པུ་ཤུས་བསྐོར་བ་བཅས་ནི་སྒྱུ་འཕྲུལ་གསང་བའི་སྙིང་པོའི་གཞལ་ཡས་ཁང་ཕྱིའི་རྟེན་ཡིན། ད་རུང་གསར་དུ་བཞེངས་པའི་གཙུག་ལག་ཁམས་གསུམ་ཟིལ་གནོན་དང་། ཐུབ་ཆེན་ཁང་དང་། ཇོ་ཁང་། གུ་རུའི་ལྷ་ཁང་། མ་མོ་ཁང་སོགས་ཀྱི་ནང་ཐང་ག་དང་ལྡེབས་རིས། གཞན་ཡང་བྱིན་རླབས་ཀྱི་ཚན་ཁ་འབར་བའི་སྐུ་བརྙན་དང་མཆོད་རྟེན་བགྲང་ལས་འདས་ཤིང་། རྡོ་ལས་ཀ་དང་ཨ་སོགས་རང་བྱོན་གྱི་ཡི་གེ། ཕྱག་རྗེས་དང་ཞབས་རྗེས་སོགས་ངོ་མཚར་ཅན་དུ་མ་མཇལ་རྒྱུ་ཡོད། རྒྱུན་གྲྭ་དང་བྱེས་གྲྭ་རྣམས་ཀྱིས་འབུད་བརྡུང་དབྱངས་རོལ་གར་འཆམ་སོགས་ལ་རྟག་ཏུ་འབད་པ་རོལ། ཁྱད་པར་དུ་དུས་མཆོད་དང་འབྲེལ་བའི་རྡུལ་ཚོན་གྱི་དཀྱིལ་འཁོར་ལ་རྒྱ་གཞུང་དང་འབྲེལ་བའི་ཐིག་རིས་ལ་ཁ་དོག་རྣམ་པར་བཀྲ་བ་དང། ཚོན་མདངས་གསལ་བའི་སྒྲུབ་དཀྱིལ་ངོ་མཚར་རྨད་དུ་བྱུང་བའི་མཛེས་སྡུག་མིག་གི་བདུད་རྩིར་གཏམས་པའི་ལས་ལ་འཇུག་པ་དང་བཅས་ནི་སྔ་འགྱུར་རྙིང་མའི་ཆོས་སྡེ་ཆེན་པོ་ཤར་རྒྱལ་བ་ཀཿ་ཐོག་པའི་བརྗོད་པ་ཕྱོགས་མཚོན་ཙམ་མོ། །