2014ལོའི་སེམས་ཀྱི་ཉི་ཟླའི་ལྔ་པའི་རྟ་རྒྱུག་དུས་ཆེན་དེ་སེམས་ཀྱི་ཉི་ཟླ་རྫོང་གི་རྒྱལ་ཐང་གྲོང་རྡལ་ཉི་ཤར་གྲོང་ཚོའི་རྩྭ་ཐང་ནས་གཟབ་རྒྱས་ངང་འགོ་བརྩམས། ཐེངས་འདིར་རང་བྱུང་དང་། འཆམ་མཐུན། འཕེལ་རྒྱས་བཅས་བརྗོད་བྱ་གཙོ་བོར་བྱས་ཡོད་ཅིང་། རྟ་རྒྱུག་ནི་སེམས་ཀྱི་ཉི་ཟླའི་མི་རིགས་ཀྱི་སྲོལ་རྒྱུན་དུས་ཆེན་ཞིག་ཡིན་པ་དང་། ལོ་རེར་ཐེངས་རེ་འཚོགས་བཞིན་པ་འདིས་མཐོ་སྒང་རྟའི་རིག་གནས་དར་སྤེལ་དང་རྒྱུན་འཛིན་བྱེད་བཞིན་པ་མཚོན་ཡོད། སེམས་ཀྱི་ཉི་ཟླའི་རྟ་རྒྱུག་ནི་ཡུན་ནན་ཞིང་ཆེན་གྱི་ཐེངས་གསུམ་པའི་དངོས་མིན་ཤུལ་བཞག་རིག་གནས་ཀྱི་རྣམ་གྲངས་མིང་ཐོའི་ནང་དུ་ཚུད་ཡོད། ཐེངས་འདིའི་རྟ་རྒྱུག་འགོ་རྩོམ་པའི་མཛད་སྒོའི་ཐོག་རྒྱལ་ཐང་གྲོང་རྡལ་གྱི་སྐོར་བྲོ་དང་། འབའ་ལུང་ཐུང་ལི་གྲོང་ཚོའི་ཨ་ཁྲི་མུའུ་ཀཱ་འཁྲབ་སྟོན་བྱས་ཡོད་ཅིང་། དེར་མ་ཟད། བོད་ཀྱི་གླུ་པའམ་འཁྲབ་སྟོན་པ་གྲགས་ཅན་ཕུར་པ་སྐྱབས། སེམས་ཀྱི་ཉི་ཟླའི་ཚན་སྡེབ། གངས་རིའི་བུ་ཕྲུག་ཚན་སྡེབ་སོགས་ཀྱིས་འཁྲབ་སྟོན་ཕུན་སུམ་ཚོགས་པ་ཕུལ་བས་རྒྱ་ཆེའི་ལྟད་མོ་བས་དགའ་བསུ་ཆེན་པོ་ཐོབ། དུས་ཡུན་ཉིན་གསུམ་རིང་གི་རྟ་རྒྱུག་དུས་ཆེན་ཁྲོད་དུ། སེམས་ཀྱི་ཉི་ཟླ་རྫོང་གི་རྒྱལ་ཐང་དང་། ལུའོ་ཅི། སྐད་ཚག་སོགས་ཡུལ་ཤོག་དང་གྲོང་རྡལ། ས་དམ་ནས་འོང་བའི་རྟ་པ་དང་རྟ་མཆོག་108ཡིས་སེམས་ཀྱི་ཉི་ཟླའི་རིགས་སོ་སོའི་མང་ཚོགས་དང་ཡུལ་སྐོར་བ་རྣམས་ལ་ཕུན་སུམ་ཚོགས་པའི་རྟ་རྩལ་འཁྲབ་སྟོན་དང་། ཁ་བཏགས་འཐུ་བ། རྟའི་ཐོག་མདའ་རྩེད། འགྲོས་གཏོང་བ་སོགས་སྲོལ་རྒྱུན་གྱི་མི་རིགས་ལུས་རྩལ་འགྲན་བསྡུར་བྱས། །