སྐྱི་སྔོན་བཟོ་ཐབས།
སྐྱི་སྔོན་ནི་ར་ལུག་གི་པགས་པ་སྲབ་མོ་ལ་སྔོ་མདངས་བཏང་བ་ལ་ཟེར། འདི་ནི་མང་ཆེ་བ་གསང་སྔགས་ཀྱིི་རྒྱན་དང་རོལ་མོ་ལས་རྔེའུ་ཆུང་དང་ཌ་མ་རུའི་གཡོག་ལ་བེད་སྤྱོད་བཞིན་ཡོད་པ་རེད། ས་ཆ་ལ་ལར་ཌ་མ་རུ་སོགས་རོལ་མོ་ཆུང་ངུའི་རིགས་ཐད་ཀར་གཡོག་ནས་དེའི་ཐོག་ཏུ་ཚོན་གཏོང་གི་ཡོད་མཁན་འདུག་ཀྱང་འདིས་ནི་རོལ་མོའི་སྒྲའི་དྭངས་ཆ་ལ་གནོད། སྐྱི་སྔོན་ཡིན་ན་རོལ་མོའི་སྒྲ་ལེགས་པ་དང་དྭངས་ཆ་ཡོད་པ་མ་ཟད་རླན་གྱིས་མི་གནོད་པ་སོགས་ཀྱི་དགེ་མཚན་ལྡན།
སྐྱི་ལྤགས་ལ་སྔོ་མདངས་གཏང་ཐབས་ནི་དང་པོ་ར་ལུག་གི་པགས་པ་སྲབ་འཐུག་རན་པོ་ཞིག་ཆུ་གྲང་མོའི་ནང་ཞག་གཅིག་ལ་འཇོག ཕྱིར་ཉིན་བསྒྱང་ཤིང་གི་ངོར་ཁོད་སྙོམ་པོར་འཐེན། དེ་ནས་རླན་ཆེ་སར་ས་དོང་བསྒྱང་ཤིང་དང་ཆེ་ཆུང་མཉམ་པ་གཏང་ཟབ་ལ་ཁྲུ་གང་ལྷག་ཡོད་པ་ཞིག་བསྐོས་ནས་བསྒྱང་ཤིང་དོང་གི་སྐེད་པ་ལས་མན་མི་ལྷུང་བ་བྱེད་དགོས། དེ་ནས་ཚྭ་ཆུས་རློན་པ་བྱས་ནས་ཐོག་གི་ཆུ་གཟར་བ་དང་དོང་ནང་དུ་བཞག་ནས་ཟངས་རག་གི་ཕྱེ་མ་སྐམ་པོ་ཁོད་མཉམ་པོ་གཏོར་ནས་རླུང་དང་ཉི་འོད་མི་ཕོག་པ་བྱས་ནས་གནོན། ཉིན་གཅིག་གཉིས་ཙམ་ནས་ཆོག་མིན་ལྟ། ཚོན་ཁྲ་རེད་ན་སླར་སྔོ་མདངས་མེད་སར་ཟངས་རག་གི་ཕྱེ་མ་གཏོར་ནས་ཆོག་མིན་བལྟས་ནས་ལེན་དགོས། དབྱར་ཁ་ལས་དགུན་ཁ་ལས་ཐབས་མེད། དབྱར་ཁའང་འཇོག་ཡུན་ཚོད་མ་ཟིན་ན་རུལ་འགྲོ་བས་གཟབ་དགོས།
ལོ་སྐྱུར་སྙོལ་ཐབས།
ལོ་སྐྱུར་ནི་བོད་རོང་ཕྱོགས་ནས་ཐོན་པའི་སྤགས་ཟས་ཤིག་ཡིན། འདི་བོད་ལ་དར་ནས་དུས་ཡུན་ཧ་ཅང་རིང་པོ་ཡིན་པ་མ་ཟད་ཟས་ཀྱི་ཡི་ག་འབྱེད་པའི་ནུས་པ་ཡོད་པ་རེད། འདི་ལ་དུས་ཚོད་ཡུན་རིང་ལ་ཉར་ཐུབ་པའི་སྐམ་པོ་དང་རྩམ་པ་སོགས་ལ་ཐད་ཀར་སྤགས་ཆོག་པའི་རློན་པའི་རིགས་གཉིས་ཡོད། སྤགས་གཡོས་ཐབས་ལ་ཇ་ཕོར་ནང་དུ་བཏུང་ཇ་དང་མར། ཚྭ། ལོ་སྐྱུར་སྐམ་པོའི་ཕྱེ་མ། རྩམ་པ་བཅས་ཀྱིས་གཡོས་པའི་ཇན་གཡོས་དང་སླ་ང་སོགས་སྣོད་ཀྱི་ནང་དུ་ཆུ། ཤ་གཏུབ་མ། གཡེར་ཕྱེ། ལོ་སྐྱུར། ཚྭ། ཚིལ་གཏུབ་མ་བཅས་ཀྱིས་གཡོས་པའི་སླང་གཡོས་བཅས་གཉིས་ཡོད།
ལོ་སྐྱུར་སྙོལ་ཐབས་ནི་དང་པོ་ཡུང་མའི་ལོ་མ་ཡུ་བ་སྣག་མོའི་རིགས་རྣམས་ཆུ་ལ་གཙང་མ་བཀྲུས་ནས་སླ་ང་ཆེན་པོ་ཞིག་གི་ནང་དུ་བཙོ་དགོས། བཙོས་ཚར་བ་ན་ཟོ་བ་ཞིག་གི་ནང་དུ་སྐྱུར་རྩི་དང་བཅས་དྲོད་དང་ལྡན་པའི་སར་དབྱར་ཁ་ཡིན་ན་ཉིན་གཉིས་ཙམ་ལ་སྙོལ་དགོས། ལེན་རན་མིན་མི་རང་རང་གི་ཚོད་བཟུང་ནས་ལྟ་དགོས། དྲོད་ཞན་ས་དང་སྐྱུར་རྩིས་མ་ནོན་ན་ཞག་གསུམ་ཙམ་ལ་འཇོག་དགོས། སྐྱུར་མིན་ཟོས་ནས་ལྟ། དབྱར་ཁ་འཇོག་ཡུན་རིང་ན་རུལ་འགྲོ་བས་གཟོབ། དེ་ནས་རློན་པ་ནི་རྩམ་པ་སོགས་ཟས་རིགས་ལ་ཐད་ཀར་སྤགས་ནའང་ཆོག ཡང་ན་སི་པན་དམར་པོ་དང་མཉམ་དུ་བརྔོས་ནས་སྤགས་ནའང་ཆོག འགའ་རེས་འདི་ལ་ལྡུམ་པའི་རིགས་གཞན་པ་དང་མཉམ་དུ་བསྲེས་ནས་ཕོ་ལོག་བཟོ་མཁན་ཡང་འདུག འཁྱག་སྒམ་སོགས་མེད་ནས་དུས་ཚོད་ཡུན་རིང་ལ་ཉར་དགོས་ཚེ་ངེས་པར་དུ་སྐམ་དུ་བཅུག་དགོས། སྐམ་ཐབས་ཡང་ལོ་སྐྱུར་ལག་པས་ཅུང་ཙམ་གཅུར་ནས་གཤེར་ཁུ་མེད་པ་ཙམ་གྱིས་ཆོག དེའང་ལོ་གོར་བྱ་བ་དབྱིབས་གོར་གོར་བཟོས་ནས་ཕྱར་བ་དང་ཤིང་ལེབ་གཙང་མའི་ཐོག་བཞག་ནས་སྐམ། དེའང་ཕྱི་སྐམ་ནས་རང་སྐྱ་ཐུབ་སྐབས་སྐུད་པ་ལ་བརྒྱུས་ནས་ཉི་མ་མི་ཕོག་སར་བསིལ་སྐམ་བྱ་དགོས། ལོ་ཕྱེ་བྱ་བ་ཐག་གདང་དང་ཕྱར་བའི་ཐོག་ཉི་མ་ཅུང་ཙམ་ལས་མི་ཤར་བ་བྱས་ནས་སྐམ་དགོས། སྐམ་ཚར་རྗེས་སྣོད་ཀྱི་ནང་དུ་བླུགས་ནས་ལག་པས་ཕྱི་ནས་མནན་ཅིང་གྲུག་པ་དང་ཉར་ཚགས་བྱས་པས་ཆོག
གོང་གི་སྐྱུར་རྩི་ནི་རོང་པ་རྣམས་ཀྱིས་སྔ་ལོ་བསྙལ་བའི་སྐྱུར་ཁུ་དམ་བེ་ནང་བཞག་ནས་ཁ་དམ་པོ་བསྡམ་ན་རུལ་མི་སྲིད། གཞན་ལོ་སྐྱུར་སྐམ་པོ་ཆུ་ཁོལ་མའི་ནང་གདུས་ནས་དེའི་ཁུ་བས་སྐྱུར་རྩི་བྱེད་པའང་ཡོད། འབྲོག་ཕྱོགས་ནས་ཞོའི་སྔོ་ཁུ་བཟོ་བའང་འདུག །
