ཡོན་ཏན་ཚེ་རིང་།
ཀརྨ་སྒར་བྲིས་ཀྱི་རི་མོ་ལ་ཞིབ་འཇུག་གནང་བཞིན་པ།
སྨན་སྒང་པ་ཡོན་ཏན་ཚེ་རིང་ནི། སྤྱི་ལོ་1954ལོར་ཁམས་སྡེ་དགེའི་ཟིལ་ཆུ་ཡར་སྟོ་ལུང་རྣམ་ཕུ་སྨན་དིས་སྒང་དུ་སྐུ་འཁྲུངས། ཆུང་དུས་ནས་རི་མོ་སོགས་རིག་གནས་ལ་དགའ་ཞེན་ཆེ་ཞིང་ཐང་ལྷ་ཚེ་དབང་མདུན་ནས་བཟོ་རིག་པའི་རིག་གཞུང་དང་བྲིས་འབུར་རྐོས་གསུམ་སོགས་བསླབ་པས་ཁོང་གི་སློབ་མ་ཕུལ་བྱུང་བ་ཡིན་པར་ཞལ་གྱིས་བཞེས་ནས། སི་ཁྲོན་ཞིང་ཆེན་བོད་ཡིག་སློབ་གྲྭའི་རི་མོའི་དགེ་རྒན་དུ་གདན་ཞུས་བྱས། ད་བར་མི་ལོ་སུམ་ཅུ་ལྷག་གི་རིང་རི་མོ་དང་འདག་བཟོ་ཡིག་གཟུགས་སོགས་གཙོ་བོ་སློབ་ཁྲིད་དང་བར་སྐབས་སུ་རྩོམ་རིག་དང་ལོ་རྒྱུས་ནང་དོན་རིག་པ་སོགས་ཀྱང་སློབ་ཁྲིད་བྱས་མྱངས། ལོ་རབས་བརྒྱད་ཅུ་པའི་ནང་སློབ་དེབ་རྩོམ་སྒྲིག་དང་ཁྱད་པར་རི་མོའི་སློབ་དེབ་སྔ་ཕྱིར་《བཟོ་མཆོག་ལྟད་མོ་ཀུན་མཐོང་།》 དང་《བོད་ཀྱི་ཐང་གའི་རི་མོའི་རྨང་གཞིའི་རྩ་གནད་མཁོ་འདོན།》ཞེས་པ་སོགས་སློབ་དེབ་རྩོམ་བསྒྲིགས་བྱས། ཀྲུང་གོ་བཀའ་བསྟན་དཔེ་བསྡུར་ཁང་གི་བཀའ་བསྟན་གྱི་བར་བཅུག་རི་མོ་སོགས་བྲིས་མྱངས་ལ། རྒྱལ་ཁབ་དང་ཞིང་ཆེན་ཁུལ་སོགས་ཀྱི་གཟེངས་རྟགས་ཀྱང་མང་པོ་ཐོབ་མྱངས། ད་ལྟ་དཀར་མཛེས་བོད་རིགས་རང་སྐྱོང་ཁུལ་མཛེས་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་དང་སི་ཁྲོན་ཞིང་ཆེན་མཛེས་རྩལ་མཐུན་ཚོགས་ཀྱི་ཨུ་ཡོན། རྒྱལ་ཁབ་རིམ་པའི་ཀརྨ་སྒར་རིས་བྲིས་རྒྱུན་ཤུལ་བཞག་དང་རྒྱུན་འཛིན་བྱེད་མཁན་སློབ་དཔོན་ཆེན་མོའི་གོ་མིང་བཞེས་ཡོད་དོ། །
དཔལ་ཕྱག་ན་རྡོ་རྗེ་འབྱུང་པོ་འདུལ་བྱེད།
སྟོན་པ་གཙོ་འཁོར་གསུམ།
སྤྱན་རས་གཟིགས་སེམས་ཉིད་ངལ་གསོ།
