མི་ཚོས་རང་གི་ཁ་ངོ་བཀྲུ་བ་ལས་ལྷག་པའི་ཟློས་གར་དཔེ་མེད་ཅིག་མེད་པའི་སྣང་བ་སྐྱེས་ཀྱིན་འདུག དེ་ནི་དྲང་གནས་ཀྱི་སྤྱི་འགྲོས་ཤིག་རེད།ནང་སེམས་ཀྱི་འཚོལ་སྙེག་ཅིག་རེད།གལ་སྲིད་རང་གི་འོས་ཐོབ་དེའང་རྒྱ་ཡན་དུ་དོར་བའི་རྐྱལ་སྟོང་ཞིག་ཡིན་ན།དུས་རབས་ཀྱི་གཤེད་མར་འགྱུར་བ་རྒན་རབས་པས་ཤ་ཐོན་རུས་ཐོན་དུ་བཤད་མྱོང་།
——ཐོག་མའི་ལབ་གླེང་།
ཀ
དྲག་ཆར་འདི་འབབ་པ་ཤུགས་དྲགས་པས།བྱིའུ་ཚང་དུའང་དེ་ཚོད་ཀྱི་འཁྲབ་གཞུང་ཞིག་ཡོད་སོང་།གོམ་ཆུང་གི་སྤོ་མཚམས་མཚམས་མི་ཆད་པའི་གནས་སྐབས་སུ།ཉེ་ས་ཉེ་ས་ཞིག་ནས་ཐོབ་འོས་ཀྱི་བརྡ་རྟགས་ཁོར་ཡུག་ཏུ་ཆགས།
ཁ
རི་རྒྱུད་མཐོན་པོའི་ཐོར་ཅོག་རྩེ་ནས།བསམ་གཞིག་དང་དྲན་གདུང་གིས་བླངས་པའི་རྐང་རྗེས་རེ་རེར།ཆར་རྗེས་ཀྱི་རྨུ་ཐག་ཏུ་འཕྱང་བའི་སྲོད་ཀྱི་འཇའ་རིས་བཞིན།སུ་ཞིག་གི་བཏབ་པའི་འཁྲེན་སེམས་ཀྱི་ཤ་མིག་ཡིན།
ག
སྐབས་འདིར།ཏག་ཏག་སྐབས་འདི་ཙམ་ལ།ཤ་མིག་གི་འགུལ་ཉེས་ཡིན་ནམ།ཡ་ཆུང་གི་འཕག་ཚུལ་ཡིན།འཚོ་བ་ལ་བཞི་ཤད་མ་བྲིས་པའི་སྔ་རོལ་དུ་རང་ཉིད་རང་ལ་གཏོགས་པ་ལས་སུ་ལའང་མི་གཏོགས་རུང་།འཚོ་གནས་ཀྱི་སྙིང་བོ་གཞན་ཞིག་གིས་ལེན་འགྲོ།
ང
འཁོར་མདའ་དེར་སྙིང་རྗེ་མེད་པས།ཚེ་སྲོག་དག་ཚེ་སྲོག་གི་གྲུ་ལོགས་སུ་བཙན་འདེད་བྱས་སོང་། ད་ལྟ།སྒེའུ་ཁུང་ནང་གི་ལག་བརྡ་དེར་བདེན་ཁ་བྱིན་དཀའ་ཡང་།གོམས་གཤིས་ཀྱི་དབང་གིས་རང་ཉིད་རང་གི་དོ་བདག་ཙམ་བྱས་ཡོད།
ཅ
མཐོང་སྣང་ཞིག་ལ།ཏག་ཏག་ང་གཅིག་པུའི་མཐོང་སྣང་ཞིག་ལ།མཁའ་མཐར་རྒྱུ་བའི་སྐར་མའི་ཚོགས་ཀྱིས་ངུ་ཤུབ་བྱེད་ཀྱིན་འདུག ང་ཁོ་ན་ལ་བལྟས་ནས་ངུ་ཤུབ་བྱེད་ཀྱིན་འདུག གལ་སྲིད་མི་ཚོགས་སྐར་མའི་གྲངས་ཀྱིས་ཟིན་ན།
ཆ
ཡལ་ཟིན་པའི་དུས་ཚིགས་ཀྱི་ཁ་དོག གཡུ་སྦྲང་གི་རྩེད་ར་ནས་མེ་ཏོག་གི་འདབ་མ་ལྟར་རྙིད་སོང་།རིག་སོང་ངམ། རྒས་སླ་བའི་སྙིང་ཉེ། དྲང་མོར་བཤད་ན།འུ་ཚོས་ཡུན་རིང་ཞིག་ཏུ་རང་འཐད་སའི་ལམ་ཁ་ཞིག་ནས་བཤད་འདོད་པའི་སྐད་ཆ་དེ་བཤད་དགོས་རུང་།ནམ་ཟླ་དགུན་ལ་སླེབས་པས་ངག་སྒོ་ཙམ་ཡང་མ་ཁྲོལ།
ཇ
དཀོན་མཆོག་ཡ།བག་ཆགས་ཤིག་གི་སྔ་ཕྱི་ལས་རང་ལ་དབང་བའི་སེམས་ཀྱི་ཁང་བཟང་ཞིག་བཟོས་ཡོད།དགུང་ཉི་མ་ཡར་ཤར་དང་དུང་ཟླ་བ་མར་འགྲིབ།སྐབས་འདིར་ཐུག་དུས།གླུ་དབྱངས་ཤིག་ཇི་ལྟར་འགུག་དགོས་པའང་རྩ་བ་ནས་བརྗེད་སོང་བས།ངས་ཁུ་སིམ་གྱི་རས་གཞི་གཞན་ཞིག་ལས་ཁྱོད་ཀྱི་འཇིག་རྟེན་དུ་སོ་ལྟ་དང་གཟབ་ཉན་ཡང་ཡང་བྱེད་འགོ་བརྩམས།
ཉ
ཁྱོད་ཀྱིས་གླུ་ཞིག་ལོངས་དང་།དྲན་པ་མ་བོར་བའི་སྔ་རྟིང་དུ།འདུ་ཤེས་མ་ཡལ་བའི་གོང་རོལ་དུ།ལོ་ཟླ་ཚད་ཡོད་ཅིག་ལ།རེ་སྒུག་དང་དྲན་གདུང་གིས་སྐྱོམས་པའི་འཁྲེན་སེམས་ཀྱི་ཤ་མིག་རེ་རེར།བྱ་དང་སྒོ་ངའི་སྔ་ཕྱི་དང་སེམས་དང་བསམ་པའི་འཚོལ་སྙེག་ཏུ་འགོད་འོས།
ཏ
ངའི་ཚེ་སྲོག་གི་ཚེ་སྲོག་འཇིག་རྟེན་ཞིག་བཙལ་རྒྱུ་དེ་ཡིན།འགྲོ་འདུག་གོམ་པའི་བར་ནས་ཁོར་ཡུག་གི་རྩིག་ངོས་སུ་དོད་པའི་རས་གཞི།ཡལ་མེད་འགུལ་ཉམས་སུ་བཞེང་རྒྱུ་དེ་ཡིན། དུས་ད་ཚོད་ལ།མི་ཚོགས་ཀྱི་སྔུན་ནས་ཁྱོད་དང་ཆ་ཡོད་འདྲིས་ཡོད་དུ་གྱུར་བ་ནས་བཟུང་།ད་གཟོད་སེམས་པའི་ཟབ་ས་ཞིག་ནས་ངའི་ཕྱེད་ཀར་གྱུར་སོང་ལ།ངའི་བརྩམས་ཆོས་ཡོད་ཚད་ལས་བརྩམས་ཆོས་ཡག་ཤོས་དེའང་འུ་གཉིས་ཀྱིས་མཉམ་དུ་བརྩམས་པའི<མི་ཚེ>ཟེར་བའི་ལོ་ཟླའི་རྩིས་ཐོ་དེ་ཡིན།
ཐ
གཞན་དབང་གི་བྱེའུ་གཟེབ་ནང་དུ་འཕག་འཚག་རྒྱག རང་སྣང་གི་བྱེའུ་ནགས་གསེབ་ཏུ་གྲགས་འགུལ་མང་།ཁ་མདོག་གཉིས་ཀྱི་སྣ་སྣེར་སེམས་རིས་འདྲ་མིན་ཞིག་འབུས་དུས།ཁ་བ་འབབ་ཚུལ་དང་རླུང་བུ་རྒྱུ་ཕྱོགས་སུ།ཁ་སང་ནས་དེ་རིང་དང་།དེ་རིང་ནས་སང་ཉིན་ལ་ཐུག་བར།མི་སེམས་ཀྱི་ནག་ཐིག་གོམ་ཆུང་གི་ཕྱི་ནུར་དུ་ལུས།
ད
ནམ་ཞིག་གི་ཚེ་ན།ང་རང་སུ་ཞིག་གི་ཆེད་དུ་གང་ཞིག་ཏུ་ཁེར་རྐྱང་དང་དྲན་གདུང་གི་སྡུག་ཡུས་མྱོང་སོང་ན།རང་གི་ཐོབ་འོས་པ་དེ་ཤོར་སོང་བའི་དཀའ་སྡུག་གི་མི་ཚེ་ཡིན།མི་ལོ་མང་བོ་ཞིག་ལ།སེམས་སུ་བཏབ་ཅིང་མིག་གིས་བྲིས་པའི་སྙན་ཚིག་ཁྲ་མོ།ཡང་ནས་བསྐྱར་དུ་རང་ཉིད་བཙལ་བའི་དབྱར་དགུན་སྟོན་དཔྱིད་ཀྱི་བརྗེ་རེས་དང་ཁ་བའི་མེ་ཏོག་གི་འདེད་རེས་ཁྲོད།ཆ་ཡོད་རུང་རྒྱུས་མེད་པའིི་སློབ་གྲོགས་ཚོའི་ངོ་གདོང་ལས་གཞན་ཅི་ཡང་མིན།
ན
ཉི་ཤར་གྱི་རྩེ་མོ་དང་ནམ་ལངས་ཀྱི་འགོ་མར།གངས་རི་འགྱིང་བའི་ཡུལ་ནས།གཙང་གསུམ་བཞུར་བའི་མདོ་ནས།འགྲོ་འདུག་གོམ་པའི་བར་ནས་དལ་མོ་ནས་མྱུར་མོ་དང་ཡང་མོ་ནས་ལྗིད་པོར་གྱུར།ཤ་རུས་པའི་ཁོང་གསེང་དུ་སྐུང་བའི་མིག་ཁྲ་ཆུང་འགུལ་ཉམས་བྱེད་ཚུལ།སྤྲིན་པའི་རབ་ཁ་བརྒལ་ཏེ་མུན་པའི་སྨག་པ་སེལ་ཚུལ་ཞིག
པ
དྲང་མོར་བཤད་ན།དེ་ནི་ཚོར་བའི་སྔ་རྗེས་སུ་ཤར་བའི་ལུས་ཀྱི་རྣམ་འགྱུར་ཞིག་ཡིན་ན།དེ་ནི་སུ་ཞིག་གི་ཤོར་བའི་ཕྱི་མིག་ཐེངས་ཤིག་ཡིན།རིང་རིང་དུ་བསྐོར་ནས་ཉེ་ཉེར་ཐོན་དུས།སྒེའུ་ཁུང་ནང་གི་ལག་བརྡ་དེར་སུ་ཞིག་དད་འདུན་གྱི་སྤུ་ལོང་ཡང་ཡང་རྒྱས།
ཕ
མཁའ་དབུགས་འདི་འབྱིན་རྔུབ་བྱས་པས།རྩ་རྒྱུས་སུ་ཁྲག་གཤེར་རྒྱུ་ཚུལ་མི་འདྲ་བའི་ངེས་ཤེས་ཤིག་གཏིང་ནས་སྐྱེས་ཤིང་རྨང་ནས་སྨིན།སྤྱི་འགྲོས་དེ་འདྲའིི་འོག་ནས།གོམ་ཆུང་གི་རྡོག་སྒྲ་རེ་རེ་དུས་རབས་ཀྱིས་བཏོན་པའི་དྲི་གཞི་རེ་རེ་རེད་འདུག
བ
དྲན་པ་ལ་ཡང་སོས་བྱུང་ཞིང་།བསམ་གཞིག་གིས་རང་ཉིད་རྙེད་དུས།མི་ཚོགས་སྔར་ནས་ཆས་ཤིང་།མཁའ་མཐའི་རྒྱུ་སྐར་ཁྲ་མོའང་སྨག་རུམ་གྱི་ཕག་ཏུ་ཡིབས་ཟིན།འདས་སོང་གི་སང་ཉིན་ཞིག་ལ།ཡང་ན་དེ་རིང་ཞིག་ལ།དུས་ཀྱི་གཤིན་སར་ལས་ཀྱི་བསྐོས་པ་འདེབས་ཆོག
མ
འབྱུང་འགྱུར་གྱི་མེ་ཏོག་འཐུ་བ་མང་དྲགས་པས།བསམ་གཞིག་གི་འཚོ་ཚུལ་གཞན་ཞིག་ཏུ་གཞའ་འགྲོ།མི་ཡུལ་འདིར།ཨ་མའི་ཞེན་ཆགས་ཀྱི་མི་ཡུལ་འདིར།ཉི་མ་འཆར་ནུབ་རེ་ལ་ཉིན་སྲིབ་རྒས་ཚུལ་ཞིག་ཡོད་རེད།
ཙ
མིག་སྔུན་གྱི་མང་བོ་ཞིག་ཤོར་དུས།སེམས་སོང་གི་ཁ་མདོག་ཤོར་གྱིན་འདུག ཁ་སེམས་བསམ་པའི་གཏིང་ནས།ལུས་སེམས་གྲིབ་མ་གཙང་མས།གྱེས་ཁ་མའི་མིག་ཟུང་དང་མཐའ་མཇུག་གི་ལག་འཇུ་དེའང་མདང་སུམ་རྨི་ལམ་གྱི་ཁུགས་ནས།དོ་དགོང་དྲན་ཤིང་གི་ཁྱོད་ཡིན།
ཚ
དུས་དེ་ནས།ཏག་ཏག་དུས་དེ་ཙམ་ནས། མིག་མདུན་གྱི་སྐྱ་རིས།སུ་ཞིག་གིས་གང་ཞིག་ཏུ་དེད་པ་ཁ་གསལ་གཏིང་དཔག་ཅིག་མ་ཤེས་རུང་།དུས་ཀྱི་རབ་ཁ་ནས་འོད་གྱི་ཉི་ཟླ་དཔང་དུ་བཞག་ཡོད།
ཛ
རྣ་བའི་ཉན་ཕྱོགས་དང་བསམ་པའི་འཁྱེར་སོ་ཞིག་གིས།ཤ་མིག་མང་བོ་ཞིག་བགྲད་ཡོང་སྐབས།རང་གི་ཆེད་དུ།གཞན་གྱི་དོད་དུ།མི་ཡི་སླད་དུ་དགའ་སྡང་སྐྱོ་འཇིགས་ཀྱི་སྣ་སྣེར་དགོས་དབང་དུ་ལངས་དགོས།
ཝ
ཞིག་རལ་དུ་གྱུར་བའི་མཁར་ཤུལ་དེ་དག ཁྲ་ཆུང་མིག་གིས་ལྟ་ས་དང་།ཡ་ཆུང་སེམས་ཀྱིས་ཉན་ས་ཡིན།ཡལ་ཟིན་པའི་དུས་ཀར་འཕྲེང་སེམས་མ་སྤུར།ཆུ་འཛིན་གྱིས་རུས་པའི་འདབ་ལྡན་གཏོར་འགྲོ།འདབ་ལྡན་གྱི་མགོ་ལྕོག་ལྡེམ་ལྡེམ་མེད་ན།རྩྭ་ཐང་གི་མཛེས་པ་ཉམས་པ་མིན་ནམ།
ཞ
བལྟས་ཀྱིན་བལྟས་ཀྱིན་རྒྱུ་སྐར་ཁྲོད་ཀྱི་ཟླ་བ་ཆུང་དྲགས།ཉན་གྱིན་ཉན་གྱིན་དམར་བོ་གློག་གི་ལྡིར་སྒྲ་ལོབས་ཟིན།སོང་གིན་སོང་གིན་རྨི་ལམ་ཐང་གི་རང་ཉིད་རྙེད་ཆོག་པས།དཀར་ནག་གི་འཚོ་བའི་ཁ་ངོ་རིག་འོང་དུས།འདི་ནི་མངར་ལ་སྐྱུར་བའི་འཚོ་བ་ཡིན།
ཟ
ཨ་ཕའི་ཁ་ཆེམས་ལ་རང་ཉིད་མི་བུ་ཞིག་ཏུ་འགྱུར་དགོས་ཟེར།ཨ་མའི་རེ་བ་ལ་ཕུགས་བསམ་གྱི་མེ་ཏོག་འཐུ་དགོས་གསུང་། རང་གི་འཚོལ་སྙེག་ལ་བདེ་སྡུག་འདི་སྨྱུག་རྩེར་འགོད་ཐུབ་ན།མི་ཚེ་འདིའི་སྙིང་བོ་ལོན་ཟིན་ལ།ཕ་མའི་རེ་བའང་འགྲུབ་ཡོད་དོ་དྲན།
འ
སྔ་ཕྱི་རུ་རང་ཉིད་བཙལ་བས།དགའ་སྡང་གི་མཐའ་ན་ཡོད་ལ།ཡིན་མིན་གྱི་བར་ན་རྩེན།ད་རུང་།རྡོ་ཐོག་གི་སྤྲང་བོའི་ཉམས་སྣང་ལས་འོང་ཞིང་།སྟན་ཐོག་གི་དཔོན་པོའི་བཅོས་འཛུམ་ལས་རྙེད།ཆགས་སྲེད་ཀྱི་རྒད་པོའི་གློ་ཁུག་ལས་འབུད་ཅིང་།སྒོར་འཐམ་གྱི་གླ་མའི་ཚེ་སྲོག་ལས་ཤེས།ཟློས་གར་འགོ་རྩོམ་མ་ཐག་ཡིན་པས།གངས་དཀར་གྱི་ན་བུན་རྟ་བདུན་དུ་འདྲུད་ནའང་ཐོངས།
ཡ
རྩ་རྒྱུས་སུ་བཞུར་བའི་ཁྲག་རྒྱུན་ཆད་མེད་ལ།རུས་གསེང་དུ་ཟུག་པའི་ཤ་ཁྲག་སྐམ་མེད་ན།གནས་སྐབས་ན་རང་ཉིད་ཡོད་ལ།རང་ཉིད་ནི་སྔ་ཕྱི་ན་ཡོད་པས།ས་གང་ཞིག་ནས་གནས་གང་ལ་ཐོན་ཡང་།དམར་སྨུག་གི་ངོ་གདོང་རེ་རེར།འཇའ་ཚོན་གྱི་འཕྱང་ལ་སྒྲོན་ཞིང་།མེ་ཏོག་གི་ཟེ་བར་ཆགས་འདུག
ར
འདི་དག་ནི་ས་ཆ་ཡོད་ཅིག་ཏུ་མི་རྒྱུས་མེད་ཅིག་གིས་ཡང་ཡང་བཤད་བྱུང་།སྐད་ཆ་ལ་བདེན་ཁ་བྱིན་ཏེ་བར་སྣང་གི་ཕོ་བྲང་བཞེང་དུས།རི་བོང་གི་རྭ་རྩེ་རྣོན་པོས་རུས་བལ་གྱི་སྤུ་ཉག་བཏོག་འདུག
ལ
སྤྱི་འགྲོས་སུ།མིག་ཟུང་མང་བོ་ཞིག་འགུལ་ཉམས་བྱེད་ཡོང་། རྒྱུས་མེད་དེ་ཚོའང་ཆ་ཡོད་དུ་གྱུར་ཟིན།ད་ཚོད་ཅིག་ལ།གནམ་སྔོན་པོར་གསེར་མདོག་གི་ཉི་མ་ཤར་བའི་ས་སྒང་དུ།བཀོད་ཟིན་པའི་དེབ་ཐེར་རྒྱ་མཚོར་བོར་ཟིན་པའི་ལྟོ་དཀར་ཉ་མོ་བཙལ་ཆོག་ཆོག་ཡིན།
ཤ
སྒེའུ་ཁུང་ཡངས་བར་ཕྱེས་ཏེ།མུན་པའི་དྲ་བར་འཛུལ་དུས།ཕྱི་རོལ་དུ་དྲག་ཆར་ཤག་ཤག་འབབ་ཀྱིན་འདུག སུ་ཞིག་སྒྲེན་པོར་བུད་ནས་འགྲོ་རྐྱང་བྱེད།ནམ་ཡང་སྐྱོ་གར་གསེང་གི་བདེ་བ་ཐུང་ཐུང་དེར་ཤི་འཐམ་རོ་འཐམ་བྱས་ནས།རང་ཉིད་འགེབས་སྲུང་གི་ཆར་གདུགས་ཤིག་ལས་གཞན་ཅི་ཞིག་འཚོལ་གྱིན་འདུག
ས
འཚོལ་གྱིན་པའི་ཁ་ཡིག་རང་ཉིད་ཡིན་པ་བསྙོན་མེད་མི་ཚོགས་ཀྱིས་བཤད་ཡོང་།ཤོར་ཟིན་པ་བསྐྱར་གསོན་དཀའ་བ་ཤ་ཐོན་རུས་ཐོན་ཞིག་གོ་སོང་།མུན་པའི་སྟུག་ཚད་དང་ཁྲ་ཆུང་ཅེར་ཕྱོགས་སུ་སྙིང་ཆུང་གི་འཕག་འཚག་ཤེས་ཚོད་ཅིག་རྒྱབ་སོང་།
ཧ
ཁ་སེམས་ཀྱི་བར་ནས།ཞེ་བསམ་པའི་གཏིང་ན་ཟུག་པའི་ཐ་སྙད་སྨུག་པོ།ཡིན་མིན་དཀར་ནག་གི་ཁུགས་སོར་ལུས་པའི་སྐད་ཆ་དྲང་བཤད་ཡིན།ཁ་བའི་འབབ་སྟངས་དང་རླུང་བུ་གཡུག་ཚུལ་དུས་ཀྱི་ལོ་ཐོར་བཀོད་འདུག་པས། བརྩེ་བ་དྭངས་གཙང་དང་།དུང་བ་གཞུང་དྲང་གི་འཚོ་བ་གསོན་པོར་ནག་ཐིག་བཟོ་དབང་སུ་ལའང་མེད།
ཨ
ཐ་སྙད་མང་བོ་ཞིག་མི་སེམས་ཀྱིས་ཤོར་སོང་།དྲན་པ་མང་བོ་ཞིག་ཤ་མིག་ཏུ་སྟར་ཡོད།སྐས་ཐེམ་རེ་རེ་བཞིན་ཕུགས་བསམ་གྱིས་སྤོས་དུས།དམར་རོ་ཁྲག་གི་རྒྱུ་ཕྱོགས་དང་ཡ་ཆུང་སེམས་ཀྱི་འཁྱེར་སོའང་གྱུར་ཟིན།སྐབས་འདིར་ཐུག་དུས།བསམ་བློ་ཡང་གཏོང་དང་སྐ་རགས་ཡང་བཅིང་ཞིག་བྱ་དགོས་བྱུང་།
