གསར་འགོད་པས་ཁུལ་ཡིག་བསྐུར་ངོ་གཏུག་ཅུས་ནས་རྒྱུས་ལོན་པ་ལྟར་ན། ཟླ8པའི་ཚེས15ཉིན་གྱི་བར་དུ། ཀྲུང་དབྱང་ཁོར་ཡུག་སྲུང་སྐྱོང་ལྟ་ཞིབ་ཚོ་ཆུང་ལྔ་བས་བརྒྱུད་སྤྲོད་བྱས་པའི་སི་ཁྲོན་ཞིང་ཆེན་གྱི་མང་ཚོགས་ཀྱིས་ཡིག་བསྐུར་དང་ཁ་པར་ལམ་ནས་ཐེར་འདོན་བྱས་པའི་གྱོད་དོན་ནང་རྔ་བ་ཁུལ་དང་འབྲེལ་བ་ཡོད་པའི་གྱོད་དོན་ལྔ་ཡོད་དེ། ལྟ་ཞིབ་བྱེད་ཞོར་ལེགས་བཅོས་བྱ་བའི་བླང་བྱ་ལྟར། རང་ཁུལ་གྱིས་མྱུར་དུ་ཡིག་བསྐུར་ངོ་གཏུག་གི་གྱོད་དོན་སྒྲུབ་པའི་གོ་རིམ་སྤེལ་མགོ་ཚུགས་ཏེ། འཕྲལ་དུ་བརྟག་དཔྱད་དང་ཐག་གཅོད་ལས་ཀ་སྤེལ།
        རྒྱུས་ལོན་པ་ལྟར་ན། མིག་སྔར་གྱོད་དོན་གཉིས་ཡོད་པའི་ནང་། གྱོད་དོན་གཅིག་ནི་ཝུན་འབར་མྱུར་བགྲོད་གཞུང་ལམ་གྱི་སུས་འཇོན་དེ་འགུག་ལམ་མཚམས་བཅུ་གཅིག་པ་རུ་ཐལ་རྡུལ་འཚུབ་པའི་གནད་དོན་ཡིན། ལམ་མཚམས་འདིའི་ཁོར་ཡུག་གི་ཁྲིམས་འགལ་བྱ་སྤྱོད་ལ་ཁྲིམས་ལྟར་གྱོད་གཞི་བཙུགས་ནས་འབྲེལ་ཡོད་བཅའ་ཁྲིམས་དང་ཁྲིམས་ལུགས་ལྟར་ཉེས་ཆད་བཅད། ལམ་མཚམས་འདིར་ཟླ་8པའི་ཚེས་12ཉིན་གྱི་སྔོན་དུ་ཕྱོགས་ཡོངས་ནས་གནས་སྐབས་ཀྱི་ཐལ་རྡུལ་འཚུབ་པར་འགོག་པའི་བྱེད་ཐབས་དང་བླངས་བྱེད་རྒྱུ་རེད། གྱོད་དོན་གཞན་ཞིག་ནི་རྔ་བའི་ཧ་ཡང་བཟོ་གྲྭས་མཐའ་འཁོར་གྱི་ཁོར་ཡུག་ལ་བཙོག་པ་བཟོས་པའི་གནད་དོན་ཡིན། བརྟག་དཔྱད་ཚོ་ཆུང་གིས་ཡུལ་དངོས་སུ་བརྟག་དཔྱད་བྱས་པ་དང་ལྟ་ཞིབ་ཚད་ལེན་བྱས་ཏེ་མ་དཔེ་ཟུར་ལེན་བྱས་པ་བརྒྱུད། ཐེར་འདོན་བྱས་པ་དེ་དོན་དངོས་དང་མི་མཐུན་པ་རེད།
        སྒྲུབ་ཟིན་པའི་གྱོད་དོན་གསུམ་ནང་། གཅིག་ནི་མཛོད་དགེའི་རྩྭ་ཐང་དུ་ལྗོངས་སྐོར་གསར་བཏོད་ཚད་ལས་བརྒལ་བ་དང་བཀོད་པ་ཁྲིམས་དང་འགལ་བ། ལྐོག་རྔོན་རྒྱག་པའི་གནས་ཚུལ་ཚབས་ཆེ་བ་སོགས་ཀྱི་གནད་དོན་ཡིན། གཉིས་ནི་ཧུང་ཡོན་རྫོང་ལྷ་རྒྱལ་གླིང་གྲོང་རྡལ་སན་ཅ་ཀྲའེ་གྲོང་སྡེའི་ཀྲི་པུའུ་ཧྲུའུ་ཅིས་ས་བརྐོས་ནས་རྡོ་ཧྲུག་བཙོང་བས་སྐྱེ་ཁམས་ཁོར་ཡུག་གཏོར་བརླག་བཟོས་པ་རེད། གསུམ་ནི་མཛོད་དགེའི་རྒྱལ་ཁབ་སྲུང་སྐྱོང་ས་ཁུལ་གྱི་འགྲིམ་འགྲུལ་གཞུང་ལམ་དང་ལྗོངས་སྐོར་གྱི་གདུང་འདེགས་འཕྲང་ལམ། ཁང་བ་སོགས་སྲུང་སྐྱོང་ས་ཁུལ་གྱི་ལྟེ་གནས་སུ་བསྐྲུན་པ་ཡོད་པ་དང་། ཁྲིམས་ལུགས་དྲིལ་སྒྲོག་སློབ་གསོ་བྱེད་ཤུགས་ཞན་པས་ལྐོག་རྔོན་རྒྱག་པའི་གནས་ཚུལ་ཚབས་ཆེ་བ། ཕྱུགས་འཚོ་དྲགས་པས་རྩྭ་ཐང་བྱེ་འགྱུར་གྱི་གནས་ཚུལ་ཚབས་ཆེ་བ་སོགས་རེད།།