རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཚེས་ལྔའི་ཉིན་ཞ་མིན་རྒྱལ་སྤྱིའི་གྲོས་ཚོགས་ལྟེ་གནས་ནས་རྒྱལ་ཁབ་ཕྱི་ནང་གི་གསར་འགོད་པར་མཇལ་འཕྲད་གནང་བར་མ་ཟད། གསེར་གྱོམ་རྒྱལ་ཁབ་ཀྱི་མགོ་ཁྲིད་པའི་གྲོས་ཚོགས་ཐེངས་དགུ་བ་དང་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་གྲོས་མོལ་ཚོགས་འདུའི་གནས་ཚུལ་འཚམས་སྦྱོར་བྱས། ཞི་ཅིན་ཕིང་གིས་ཁ་སང་གསེར་གྱོམ་རྒྱལ་ཁབ་ཀྱི་མགོ་ཁྲིད་པའི་ཞ་མིན་གྲོས་ཚོགས་བདེ་བླག་ངང་མཇུག་སྒྲིལ་བ་རེད། གྲོས་ཚོགས་ནས་གསེར་གྱོམ་རྒྱལ་ཁབ་ཀྱི་མགོ་ཁྲིད་པའི་ཞ་མིན་བསྒྲགས་གཏམ་ལ་གྲོས་འཆམ་བྱུང་བ་དང་། སྒོ་འབྱེད་བཟོད་སྒོམ་དང་མཉམ་ལས་མཉམ་རྒྱལ་གྱི་གསེར་གྱོམ་སྙིང་སྟོབས་བསྐྱར་ཞིབ་བྱས་ཏེ། ཁྱོན་ཡོངས་ནས་གསེར་གྱོམ་མཉམ་ལས་ཀྱི་ལོ་བཅུའི་རིང་གི་རྒྱལ་ཁའི་ཉམས་མྱོང་སྤྱི་བསྡོམས་བྱས་པར་མ་ཟད། གསེར་གྱོམ་གྲོགས་པོའི་འབྲེལ་བར་ཤུགས་སྣོན་པ་དང་ཁྱབ་ཁོངས་སོ་སོའི་དངོས་གཉེར་མཉམ་ལས་གཏིང་ཟབ་ཏུ་སྤེལ་བར་འཆར་འགོད་གསར་བ་འཐེན། རྒྱལ་ཁབ་ལྔའི་མགོ་ཁྲིད་པས་བལྟས་ན། གསེར་གྱོམ་རྒྱལ་ཁབ་ཀྱིས་གནད་དོན་གལ་ཆེན་གྱི་སྟེང་ནས་ཕན་ཚུན་ལ་མཐུན་སྦྱོར་དང་གཞོགས་འདེགས་བྱེད་ཤུགས་སྔར་ལས་གཏིང་ཟབ་ཏུ་གཏོང་བ་དང་རྒྱལ་སྤྱིའི་འབྲེལ་བའི་གཞི་རྩའི་རྩ་དོན་བརྩི་སྲུང་བྱས་ཏེ། མཉམ་ལས་ཀྱིས་འཛམ་གླིང་རང་བཞིན་གྱི་འགྲན་རྩོད་སྣ་ཚོགས་ལ་ཁ་གཏད་འཇལ་ནས། འཛམ་གླིང་གི་དཔལ་འབྱོར་ལེགས་བཅོས་དང་བཅོས་བསྒྱུར་བྱེད་པའི་གོམ་སྟབས་ཇེ་མགྱོགས་སུ་གཏོང་བ་དང་། ཆེ་ཕྱོགས་སྲིད་ཇུས་མཐུན་སྦྱོར་ལ་ཤུགས་སྣོན་པ། འཕེལ་རྒྱས་འཐབ་ཇུས་སྦྲེལ་མཐུད་བྱེད་པ་དང་ཆབ་སྲིད་བདེ་འཇགས་མཉམ་ལས་གཏིང་ཟབ་ཏུ་གཏོང་བ། འཐབ་ཇུས་ཡིད་ཆེས་ལ་སྐུལ་འདེད་གཏོང་བ། མི་གཞུང་བརྗེ་རེས་བྱ་འགུལ་རྒྱུན་ལྡན་ཅན་དང་ནང་རྐྱེན་ཅན་དུ་བཏང་ནས་རྒྱལ་ཁབ་ལྔའི་མི་དམངས་བར་གྱི་རྒྱུས་ལོན་དང་མཛའ་བརྩེ་གཏིང་ཟབ་ཏུ་གཏོང་བ། དུས་བསྟུན་མདུན་བསྐྱོད་དང་གསེར་གྱོམ་ནང་རྐྱེན་འཛུགས་སྐྲུན་ལ་ཤུགས་བསྣན་ཏེ། ཁྱབ་ཁོངས་སོ་སོའི་མཉམ་ལས་གཏིང་ཇེ་ཟབ་དང་དོན་ཇེ་ཡོད་དུ་འགྱུར་བར་ཁག་ཐེག་གལ་ཆེན་འདོན་སྤྲོད་བྱེད་དགོས། རྒྱལ་ཁབ་སོ་སོའི་མགོ་ཁྲིད་པས་ཞ་མིན་གྲོས་མོལ་མགོ་ཚུགས་ས་གསར་བར་འཛིན་པའི་ཆོད་སེམས་བཅངས་ཏེ། སྔར་ལས་དམ་ཟབ་དང་ཁྱབ་རྒྱ་ཆེ་བ། ཁྱོན་ཡོངས་བཅས་ཀྱི་འཐབ་ཇུས་མཉམ་ལས་འབྲེལ་བ་འཛུགས་སྐྲུན་བྱས་ཏེ། གསེར་གྱོམ་མཉམ་ལས་ཀྱི་ཐེངས་གཉིས་པའི་གསེར་མདོག་གི་ལོ་བཅུ་གསར་སྐྲུན་བྱེད་དགོས་ཞེས་བསྟན། 
        ཞི་ཅིན་ཕིང་གིས་གྲོས་མོལ་གྱི་སྐབས་སུ་ཀྲུང་གོ་ཕྱོགས་ཀྱིས་གསར་དར་ཁྲོམ་རའི་རྒྱལ་ཁབ་དང་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་གྲོས་མོལ་ཚོགས་འདུ་བསྡུས་ནས། གསེར་གྱོམ་རྒྱལ་ཁབ་དང་ཨེ་ཅེབ། མའོ་སི་ཁོ། ཐེ་གོ ཐ་ཅི་ཁི་སི་ཐན། ཅི་ནེ་ཡ་བཅས་ཀྱི་མགོ་ཁྲིད་པས་མཉམ་དུ་རྒྱལ་སྤྱིའི་འཕེལ་རྒྱས་མཉམ་ལས་ཀྱི་ཇུས་ཆེན་ལ་གྲོས་བསྡུར་བྱས་པ་དང་། ཁྱབ་རྒྱ་ཆེ་བའི་འཕེལ་རྒྱས་ཀྱི་གྲོགས་པོའི་འབྲེལ་བ་འཛུགས་པར་འཐད་པ་བྱུང་བར་མ་ཟད། ཉིས་སྟོང་སུམ་ཅུ་ལོའི་རྒྱུན་མཐུད་འཕེལ་རྒྱས་གྲོས་རིམ་མྱུར་དུ་ལག་བསྟར་དངོས་འབེབ་བྱེད་པ་དང་། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་དང་འཛམ་གླིང་གི་འཕེལ་རྒྱས་མཉམ་ལས་གཏིང་ཟབ་ཏུ་གཏོང་བའི་ཐད་ལ་གསལ་བརྡ་གལ་ཆེན་བཏང་ཡོད། རྒྱལ་ཁབ་སོ་སོའི་མགོ་ཁྲིད་པས་གསེར་གྱོམ་དང་མཉམ་ལས་ཀྱི་རྣམ་པ་གཉིས་གསར་སྐྲུན་བྱས་ཏེ། མཉམ་དུ་གསར་སྐྲུན་དང་མཐུན་སྦྱོར། ལྷད་མེད། སྒོ་འབྱེད། མཉམ་སྤྱོད་བཅས་ཀྱི་རྒྱུན་མཐུད་འཕེལ་རྒྱས་ཀྱི་བགྲོད་ལམ་དུ་བསྐྱོད་དེ། འཛམ་གླིང་དཔལ་འབྱོར་འཕར་སྣོན་དང་རྒྱལ་ཁབ་སོ་སོའི་ཐུན་མོང་གི་འཕེལ་རྒྱས་མངོན་འགྱུར་བྱེད་པར་སྟོབས་ཤུགས་སྔར་ལས་མང་པོ་འདོན་དགོས་པར་འདོད་ཡོད་ཅེས་བསྟན།