ཉེ་ཆར། ལི་ཐང་རྫོང་གིས་གེ་སར་ཐང་ཆེན་དུ་མི་ཚང་མས་བེད་སྤྱོད་གཏོང་ཆོག་པའི་རྐང་འཁོར་ཁྲོམ་འཇོག་བྱེད་པའི་མཛད་སྒོ་སྤེལ་བ་རེད། དེའི་ཐོག་ནས་རྫོང་དེ་འབྱུང་འཕྲོད་རིག་ནུས་ཅན་གྱི་ཡུལ་སྐོར་གྲོང་ཁྱེར་གྱི་ཕྱོགས་སུ་གོམ་ཁ་བསྒྱུར་ཐུབ་པར་མཚོན་ཡོད།
     ཤེས་རྟོགས་བྱུང་བར་གཞིགས་ན། མི་ཚང་མས་བེད་སྤྱོད་གཏོང་ཆོག་པའི་རྐང་འཁོར་ནི་ལི་ཐང་རྫོང་གིས་མང་ཚོགས་ལ་སྟབས་བདེར་སྤྲོད་པའི་ཆེད་དུ་ཉོས་པ་རེད། ཐེངས་འདིར་མི་ཚང་མས་བེད་སྤྱོད་གཏོང་ཆོག་པའི་རྐང་འཁོར་300ཁྲོམ་འཇོག་བྱས་ཡོད་པ་དང་། རྫོང་གྲོང་དུ་རྐང་འཁོར་འཇོག་ས27བཙུགས་ནས་རྫོང་གྲོང་དང་མཐའ་སྐོར་གྱི་ཤང་དང་གྲོང་རྡལ་ལ་ཁེབས་པ་རེད། རྐང་འཁོར་བཞོན་པར་དགའ་བའི་ཚེ་རིང་བསོད་ནམ་གྱིས་དགའ་སྤྲོའི་ངང་མི་ཚང་མས་སྤྱོད་ཆོག་པའི་རྐང་འཁོར་འདི་ཡོད་རྗེས་ང་ཚོ་ཕྱིར་ལས་ཀ་སྒྲུབ་ས་འགྲོ་དགོས་ན་ཧ་ཅང་སྟབས་བདེ་བ་རེད། ལུས་པོར་སྦྱོང་བརྡར་བྱེད་ཐུབ་པར་མ་ཟད་ཁོར་ཡུག་ཀྱང་སྲུང་སྐྱོང་བྱེད་ཐུབ་པ་རེད་ཅེས་བཤད། ཁྲེང་ཏུའུ་ནས་འོངས་པའི་ཡུལ་སྐོར་བ་སྐུ་ཞབས་ལིའུ་ལགས་ཀྱིས་ཧ་ལས་པའི་ངང་རྒྱང་རིང་མཐོ་སྒང་གི་གྲོང་ཆུང་དུའང་མི་ཚང་མས་སྤྱོད་ཆོག་པའི་རྐང་འཁོར་འདི་ཡོད་པ་ནི་བསམ་ཡུལ་ལ་འདས་པ་ཞིག་རེད། ང་ཚོ་ཡུལ་སྐོར་བར་ཆ་བཞག་ན་ཧ་ཅང་སྟབས་བདེ་མོ་ཞིག་རེད། རྐང་འཁོར་བཞོན་ནས་སྣང་བ་སྐྱིད་པོའི་ངང་གྲོང་ཁྱེར་དང་མཐའ་སྐོར་གྱི་མཛེས་ལྗོངས་ལྟ་སར་འགྲོ་ཆོག་པ་དང་བོད་ཁུལ་གྱི་ཡུལ་སྲོལ་གོམས་འདྲིས་ལའང་མྱོང་ཚོར་བྱེད་ཆོག་པ་རེད་ཅེས་བཤད།།