---མཛོད་དགེ་རྫོང་སྟག་ཚ་དགོན་གྲོང་རྡལ་གྱིས་སྐྱེ་ཁམས་དཔལ་ཡོན་འཛུགས་སྐྱོང་གི་ལས་དོན་སྤེལ་བ།
ཉེ་བའི་ལོ་ཤས་རིང་ལ། ཕྱོགས་ཡོངས་ནས་ཞིང་ཆེན་དང་ཁུལ་ཁོར་ཡུག་སྲུང་སྐྱོང་གི་ལས་དོན་གལ་ཆེན་མཛུབ་སྟོན་ལག་བསྟར་དོན་འཁྱོལ་བྱ་ཆེད་དང་། ཁོར་ཡུག་སྲུང་སྐྱོང་གི་ལས་དོན་ཆེན་པོར་སྐུལ་འདེད་གཏང་བ། སྟག་ཚ་དགོན་གྲོང་རྡལ་གྱིས་གྲོང་རྡལ་དང་གྲོང་ཚོའི་ལས་བྱེད་པ་སྒྲིག་འཛུགས་ཐེངས་མང་བོ་བྱས་ནས་ཁོར་ཡུག་སྲུང་སྐྱོང་ལས་དོན་གྱི་ཆེད་དོན་ཚོགས་འདུ་འཚོགས་ཏེ། སྐྱེ་ཁམས་དཔལ་ཡོན་འཛུགས་སྐྱོང་ལས་འགན་དོན་འཁྱོལ་ཡོང་བར་བྱས། གྲོང་རྡལ་དང་གྲོང་ཚོའི་ལས་བྱེད་པ་ཡིན་པས་ཁོར་ཡུག་སྲུང་སྐྱོང་གི་འདུ་ཤེས་བརྟན་པོར་ཆགས་དགོས་པ་དང་། སྐྱེ་ཁམས་དཔལ་ཡོན་འཛུགས་སྐྱོང་གི་གལ་ཆེའི་འགན་འཁྲི་ཕྲག་ཏུ་བླངས་སྟེ། མཐའ་གཅིག་ཏུ་དམ་པོར་འཛིན་པ་དང་ཞིབ་ཚགས་ཀྱིས་བསྒྲུབ་དགོས་ཞེས་ཧྲུའུ་ཅ་ལེང་གིས་དེ་ལྟར་བཤད།
སྟག་ཚ་དགོན་གྲོང་རྡལ་ལ་བཅོས་སྐྱོང་བྱེད་པའི་ཁྲོད། ཁོར་ཡུག་སྲུང་སྐྱོང་ལ་ནན་པོར་གཞིགས་ནས་ཏང་སྲིད་ཀྱི་འགན་མཉམ་འཁུར་དང་ལས་གནས་གཅིག་ལ་འགན་འཁྲི་གཉིས་བཅས་ཀྱི་བླང་བྱ་ལྟར། རྩ་འཛུགས་ཀྱི་འགོ་ཁྲིད་ལ་ཤུགས་བསྣན་པ་དང་། ལས་འགན་དོན་འཁྱོལ་ཡོང་པར་དམ་པོར་འཛིན་པ། བཅོས་སྒྲིག་གི་ལས་དོན་ལ་ཕན་འབྲས་ཐོབ་པ། ཕུགས་ཕན་གྱི་སྲུང་སྐྱོང་དང་བཅོས་སྐྱོང་གི་ལམ་སྲོལ་འཛུགས་དགོས། དེ་དང་དུས་མཚུངས་སུ་གྲོང་རྡལ་དེས་ཁོར་ཡུག་སྲུང་སྐྱོང་གི་འགོག་བཅོས་ཕྱོགས་བསྡུས་བཅོས་སྐྱོང་གི་དྲིལ་བསྒྲགས་བྱེད་ཤུགས་ཆེ་རུ་བཏང་བ་དང་། གླེང་ཕྱོགས་ཀྱི་རྣམ་པ་བཟང་པོ་བསྐྲུན་ཏེ། གྲོང་རྡལ་ཡོངས་ཀྱི་ལས་བྱེད་མང་ཚོགས་ལ་རང་རྟོགས་ངང་ཁོར་ཡུག་སྲུང་སྐྱོང་ནང་ཞུགས་པའི་འདུ་ཤེས་ཆེ་རུ་བཏང་ཡོད།
ད་སྐབས། སྟག་ཚ་དགོན་གྲོང་རྡལ་ཡོངས་ལ་ཁོར་ཡུག་སྲུང་སྐྱོང་གི་བཅོས་སྒྲིག་ས་ཚུགས་49ཡོད་ལ། མིག་སྔའི་བར། རྡོ་འདོན་ས་34ཡི་ས་ལ་བཅོས་སྒྲིག་བྱས་པ་དང་། སྔོ་ཁེབས་ས་གནས་15ལ་བསྐྱར་གསོ་བྱས་ལ། སོ་ཕག་བཟོ་གྲྭ་1དང་བྱེ་འདོན་ས་ལ་མཚམས་འཇོག་བྱས། སྔོ་ཁེབས་སླར་གསོ་ལ་ཤུགས་བསྣན་རྒྱག་པ། འབྲོག་པའི་ཐོན་སྐྱེད་དང་འཚོ་བའི་གནས་སྐབས་ཀྱི་མཚོན་རྟགས་བྱང་བུ་དང་ལམ་འགོག ཞིབ་བཤེར་ས་ཚིགས་བཙུགས་པ་དང་ཆེད་བསྐོས་མི་སྣས་དོ་དམ་བྱས་ཡོད། བཅོས་སྐྱོང་བྱེད་དགོས་པའི་ལམ་ཐོག་4ལ་བཅོས་སྒྲིག་བྱས་ཟིན་པ་དང་གཡས་གཡོན་གྱི་སྔོ་ཁེབས་ཀྱང་སླར་གསོ་བྱས་ཡོད། གད་སྙིགས་གཙང་སེལ་ས་ཚིགས་2ལ་བཅོས་སྒྲིག་བྱས་པ་དང་བེད་སྤྱོད་བྱེད་མཚམས་བཞག་ཡོད་པ་དང་། གཏོང་ཟབ་པའི་ཁྲོན་ཆུ་1སྙོམས་སྒྲིག་ཁ་གསབ་བྱས་ཡོད་ལ། འབྲོག་ཁྱིམ་སྤྲོ་སྐྱིད་གླིང1བཅོས་སྒྲིག་བྱས།
