ཟླ་10པའི་ཚེས་30ཉིན། རྔ་བ་ཁུལ་སློབ་གསོ་ཚན་རིག་ཞིབ་འཇུག་ཁང་ནས་རྒྱུས་ལོན་པ་ལྟར་ན། རྔ་བ་རྫོང་གིས་ལྟ་འཁྲིད་སྦྱོང་གསུམ་གྱི་སློབ་ཁྲིད་ཐབས་ལམ་ཁྱབ་བརྡལ་དུ་བཏང་བའི་ལོ་གཉིས་ཀྱི་རིང་། རྫོང་ཡོངས་ཀྱི་དགེ་རྒན་རྣམས་ཀྱིས་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཀྱི་རྨང་གཞིའི་ནུས་པ་དང་ཕྱོགས་བསྡུས་ནུས་པ་ཇེ་ལེགས་སུ་ཕྱིན་ཏེ་གྲུབ་འབྲས་ལེགས་པོ་བླངས། གྲུབ་འབྲས་སྲ་བརྟན་དང་ལྟ་འཁྲིད་སྦྱོང་གསུམ་གྱི་ཁྲིད་ཐབས་སྔར་ལས་ལྷག་པར་ཚད་ལྡན་དུ་གཏོང་བ། རྫོང་ཡོངས་ཀྱི་སློབ་གྲྭ་སོ་སོའི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཀྱི་སློབ་ཁང་སློབ་འཁྲིད་གྱི་རྩལ་ནུས་དང་སློབ་འཁྲིད་ཀྱི་ཕན་ནུས་བཅས་གོང་མཐོར་གཏོང་ཆེད། རྔ་བ་རྫོང་སློབ་གསོ་ཅུས་ཀྱིས་ཞིབ་འཇུག་བྱས་པ་བརྒྱུད། 2017ལོའི་ཟླ10པའི་ཚེས16ཉིན་ནས་ཚེས27ཉིན་བར་རྫོང་ཡོངས་ཀྱི་རིགས་དང་པོའི་སློབ་ཆུང་གི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་བྱ་འགུལ་སྤེལ།   

དགེ་རྒན་སྐལ་བཟང་ཕུན་ཚོགས་དང་ཚེ་དབང་ལྷ་མོ། སྐད་ཡིག 

      བྱ་འགུལ་བདེ་ལེགས་ངང་འགྲུབ་ཆེད་རྫོང་འདི་གའི་སློབ་གསོ་ཅུས་ཀྱིས་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་བྱ་འགུལ་གྱི་འགོ་ཁྲིད་ཚན་ཆུང་རྩ་འཛུགས་བྱས་ཤིང་། སློབ་གསོ་ཅུས་ཏང་ཨུའི་ཧྲུའུ་ཅི་དང་ཅུས་ཀྲང་ཀྲུང་ཀུན་གྱིས་ཚན་གཙོའི་འགན་ཁུར་པ་དང་སློབ་གསོ་ཅུས་སྒྲིག་ཨུའི་ཧྲུའུ་ཅི་ལེ་ཞའོ་ཞ་དང་ཅུས་ཀྲང་གཞོན་པ་དབྱང་ཧུང་པིང་དང་ཀྲའོ་ཞ། ཞུས་ཞུན་ཀང་། སློབ་གསོ་ཅུས་འགོ་ཁྲིད་ཚན་ཆུང་གི་ཁོང་མི་རྣམས་ཀྱིས་ཚན་གཙོ་གཞོན་པའི་འགན་ཁུར་ཏེ། འགོ་ཁྲིད་ཚན་ཆུང་དེ་རྒྱབ་ཕྱོགས་མཁོ་སྒྲུབ་ཚན་ཆུང་དང་མཐུན་སྦྱོར་ཚན་ཆུང་། དཔྱད་འདེམས་ཚན་ཆུང་བཅས་ཚན་ཆུང་གསུམ་དུ་དགར།
      རྔ་བ་ཁུལ་སློབ་གསོ་ཚན་རིག་ཞིབ་འཇུག་ཁང་གིས་ལྟ་འཁྲིད་སྦྱོང་གསུམ་གྱི་ཁྲིད་ཐབས་སྐོར་རྔ་བ་རྫོང་དུ་ཁྱབ་བརྡལ་གཏོང་བའི་དོན་དངོས་དང་བསྟུན་ཏེ། རྔ་བ་རྫོང་གི་ཐེངས་འདིའི་རིགས་དང་པོའི་སློབ་ཆུང་གི་ལྟ་འཁྲིད་སྦྱོང་གསུམ་གྱི་ཁྲིད་ཐབས་དངོས་དཔྱད་བྱ་འགུལ་དེ་བོད་སྐད་ཡིག་སློབ་འཁྲིད་དངོས་དཔྱད་ཚན་ཆུང་དང་རྒྱའི་སྐད་ཡིག་དངོས་དཔྱད་ཚན་ཆུང་། རྩིས་རིག་དངོས་དཔྱད་ཚན་ཆུང་བཅས་སུ་དགར་བ་དང་། རྫོང་ཡོངས་སུ་སློབ་གྲྭ་ཆུང་འབྲིང་གི་ཕུལ་བྱུང་དགེ་རྒན་15དཔྱད་འདེམས་པར་གདན་འདྲེན་ཞུས། 

དགེ་རྒན་ལྷུན་པོ་དང་ཀུན་དགའ་དང་སྐལ་ཁོ་མ། གྲངས་རིག

      ཐེངས་འདིའི་བྱ་འགུལ་སྤེལ་ཡུན་ནི་ཟླ་10པའི་ཚེས་16ནས་འགོ་བརྩམས་ཤིང་ཟླ10པའི་ཚེས27ཉིན་ཡིན་ལ། ཟླ་10པའི་ཚེས27ཉིན་མཇུག་བསྡུས་པ་དང་ཁྱོན་ཉིན་12རིང་ལ་རྫོང་ཡོངས་ནས་དགེ་རྒན200ལྷག་བྱ་འགུལ་དུ་ཞུགས་ནས་ལྟ་སྦྱོང་བྱས། དགེ་རྒན63རིགས་དང་པོའི་སློབ་ཆུང་གི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་དུ་ཞུགས་པ་མ་ཟད། མཁར་གྲོང་སློབ་ཆུང་གཉིས་པ་དང་རྫོང་མི་རིགས་བཅའ་སྡོད་སློབ་ཆུང་གཉིས་ཀྱི་ལོ་རིམ་གསུམ་པ་ནས་ལོ་རིམ་དྲུག་པའི་བར་གྱི་སློབ་མ་2520ལྷགས་དང་འཛིན་གྲྭ63ཐེངས་འདིའི་རིགས་དང་པོའི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་བྱ་འགུལ་དུ་ཞུགས། 

དགེ་རྒན་དབྱང་ཅན་དང་དགེ་འདུན་འཚོ། རྒྱ་ཡིག་དགེ་རྒན།

       བྱ་འགུལ་སྤེལ་རིང་དགེ་རྒན་རྣམས་ཀྱིས་ལྟ་འཁྲིད་སྦྱོང་གསུམ་གྱི་ཁྲིད་ཐབས་གྱི་འགྲོ་རིམ་བརྩི་སྲུང་བྱས་ནས་ནན་ཏན་གྱིས་སློབ་ཁྲིད་འཆར་འགོད་བྱེད་པ་དང་བློ་ཞིབ་མོས་སློབ་ཆས་བཟོ་བ། རྒྱུ་ཆ་ཀློག་པ། ཕན་ཚུན་སློབ་སྦྱོང་། ཕན་ཚུན་གོང་སྤེལ་བྱས་པས། རྫོང་འདི་གའི་རྒྱ་ཆེའི་དགེ་རྒན་རྣམས་ཐེངས་འདིའི་རིགས་དང་པོའི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་བྱ་འགུལ་ལས་ཐོབ་པའི་ལག་ཡོང་བཟང་པ་དང་ཕན་ནུས་ཆེ་བ། འཕེལ་རྒྱས་མགྱོགས་པའི་གྲུབ་འབྲས་ཐོབ་ཡོད། ཐེངས་འདིའི་བྱ་འགུལ་དེ་ཚོ་ཆུང་གསུམ་དུ་དགར་བ་ལྟར་ཚད་ལོང་དངོས་ཡོད་དངོས་དཔྱད་དང་སློབ་ཁྲིད་འཆར་འགོད་གཞིར་བཟུང་ནས་བྱ་དགའ་ཨང་དང་པོ་གཉིས་དང་ཨང་གཉིས་པ་ལྔ། ཨང་གསུམ་པ་བརྒྱད་དང་ཕུལ་བྱུང་བྱ་དགའ་བཅས་བྱ་དགའི་རིམ་པ་བཀོད་སྒྲིག་བྱས་ཡོད་ལ། བྱ་འགུལ་ནང་ཞུགས་པའི་དགེ་རྒན་ཡོངས་ལ་རྔ་བ་རྫོང་སློབ་གསོ་ཅུས་ཞིབ་འཇུག་ཁང་གིས་ཚད་ལྡན་ལྟར་ཟབ་སྦྱོང་གི་སློབ་སྐར50རེ་བྱིན་པ་དང་ལྟ་སྦྱོང་ལ་ཞུགས་པའི་དགེ་རྒན་རྣམས་ལ་དོན་དངོས་ལྟ་སྦྱོང་དུས་ཀྱི་ཚད་གཞི་ལྟར་སློབ་སྐར་བྱིན།  

སློབ་ཁྲིད་ཡུལ་དངོས།

      2017ལོའི་རྔ་བ་རྫོང་གི་རིགས་དང་པོའི་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཚད་ལོང་དངོས་དཔྱད་བྱ་འགུལ་སྤེལ་བ་ཡིས། རྫོང་འདིའི་ལྟ་འཁྲིད་སྦྱོང་གསུམ་གྱི་ཁྲིད་ཐབས་བཅོས་བསྒྱུར་ལེགས་བསྒྱུར་བྱས་པ་དང་ལྟ་འཁྲིད་སྦྱོང་གསུམ་གྱི་ཁྲིད་ཐབས་ཀྱིས་རྫོང་འདི་གའི་སློབ་ཁང་སློབ་ཁྲིད་ཀྱི་ཕན་ནུས་གོང་མཐོར་བཏང་པ་དང་ཕན་ཡོད་ཉམས་མྱོང་གསོག་འཇོག་བྱས་པ། རྫོང་འདི་གའི་དོན་དངོས་སྟེང་ཕན་ཡོད་ཀྱི་འཚོལ་ཞིབ་བྱེད་པ་དང་ཟུང་དུ་སྦྲེལ་ཏེ། ལྟ་འཁྲིད་སྦྱོང་གསུམ་གྱི་ཁྲིད་ཐབས་གཏིང་ཟབ་འཕེལ་རྒྱས་ཀྱི་ཕྱོགས་སུ་བསྐྱོད་པར་རྨང་གཞི་ལེགས་པོ་བཏང་ངོ་།།   

དཔྱད་འདེམས་དགེ་རྒན་གྱིས་དཔྱད་འཇོག་བྱེད་ཀྱིན་པ།

བྱ་འགུལ་ལ་ཞུགས་པའི་དགེ་རྒན་ཡོངས།