རྩྭ་དང་མེ་ཏོག་ཆུང་ཆུང་ཡིན་ཡང་དེ་ཁོར་ཡུག་དང་།འོ་ལས།རྒྱལ་ཡོངས་མི་དམངས་ཀྱི་བདེ་སྐྱིད་བཅས་དང་འབྲེལ་བ་ཡོད་པ་ཞིག་རེད།དེ་ནི་ཉེ་ཆར་ཧུའུ་ཧེ་ཧོ་ཐེར་སྐོང་འཚོགས་བྱས་པའི་སྐབས་གསུམ་པའི་ཀྲུང་གོའི་རྩྭ་ལས་ཚོགས་ཆེན་གྱི་ཚ་ཚ་འུར་འུར་གྱི་གླེང་གཞི་ཆེན་པོ་ཞིག་ཡིན་པ་རེད།ཐེངས་འདིའི་གྲོས་ཚོགས་ཀྱིས་ལོ་རྒྱུས་ཀྱི་གོ་སྐབས་དང་།སྐྱེ་ཁམས་ཤེས་དཔལ།ཟས་རིགས་བདེ་འཇགས་བཅས་བརྗོད་བྱ་གཙོ་བོ་བྱས་པ་དང་།ཀྲུང་གོའི་རྩྭ་ལས་རིགས་གཅིག་མཁས་པ་དང་།གྲགས་ཅན་ཁེ་ལས།དེ་བཞིན་ཚན་ཞིབ་ལས་ཁུངས་དང་སློབ་གྲྭ་ཆེ་ཁག་སོགས་འབྲེལ་ཡོད་སྒྲིག་འཛུགས་དང་ཚོགས་པའི་མི་500ལྷག་ཙམ་གྲོས་ཚོགས་ལ་ཞུགས་ཡོད་པ་རེད།
ཀྲུང་གོའི་རྩྭ་ལས་གླེང་སྟེགས་ཐོག་ཀྲུང་གོའི་རྩྭའི་ཐོན་ལས་གོང་འཕེལ་གྱི་སྙན་ཞུ་སྤེལ་ཡོད་པ་རེད།སྙན་ཞུའི་ནང་།མིག་སྔར་ཀྲུང་གོའི་མི་ཐབས་རྩྭ་འདེབས་ཀྱི་རྒྱ་ཁྱོན་མུའུ་དུང་ཕྱུར་གཉིས་དང་བྱེ་བ་བརྒྱད་ཟིན་ཞིང་།ལོ་རེར་རྩྭ་ཏུན་བྱེ་བ་བཞི་དང་ས་ཡ་ལྔ་ཐོན་སྐྱེད་བྱེད་ཐུབ་ཀྱི་ཡོད་པ་དང་།རང་ཐོན་རང་སྤྱོད་རང་བཞིན་དང་།སྐྱེ་ཁམས་ནུས་པའི་རང་བཞིན།ཚོང་ཟོག་ཐོན་སྐྱེད་རང་བཞིན་བཅས་གཟན་རྩྭའི་འདེབས་འཛུགས་ལས་རིགས་གསུམ་ཆགས་པ།རྒྱལ་ཡོངས་སུ་ཐོ་འགོད་བྱས་པའི་རྩྭའི་ཐོན་རྫས་ལས་སྣོན་ཁེ་ལས་300ལྷག་ཙམ་ཡོད་པ་དང་།དེ་ཞིང་ལྗོངས་21ལ་ཁྱབ་ཡོད་ཅིང་།གཙོ་བོ་བྱང་ཕྱོགས་ཀྱི་ཀན་སུའུ་དང་། ནང་སོག ཧེ་ལུང་ཅང་།ཅི་ལིན།ཉིང་ཤ།ཧོ་ནན།ཧོ་པེ་སོགས་ས་གནས་སུ་གཅིག་སྡུད་བྱས་ཡོད་པ་བཅས་མངོན་ཡོད་པ་རེད།
