ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི། ཀྲུང་དབྱང་གི་སྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བའི་འགོ་ཁྲིད་ཚོགས་ཆུང་གི་ཙུའུ་ཀྲང་ཞི་ཅིན་ཕིང་གིས་སྤྱི་ཚེས་20ཉིན་གྱི་ཕྱི་དྲོ་སྐབས་བཅུ་དགུ་པའི་ཀྲུང་དབྱང་གི་སྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་བའི་འགོ་ཁྲིད་ཚོགས་ཆུང་གྲོས་ཚོགས་ཐེངས་དང་པོ་གཙོ་སྐྱོང་གནང་བ་མ་ཟད་གསུང་བཤད་གལ་ཆེན་གནང་ཡོད། ལི་ཁེ་ཆང་དང་། ཀྲང་ཀའོ་ལི། ཝང་ཡང་། ཝང་ཧུ་ཉིང་གྲོས་ཚོགས་ལ་ཞུགས་ཡོད་པ་རེད། 
        གྲོས་ཚོགས་ཐོག་རྒྱལ་སྲིད་སྤྱི་ཁྱབ་ཁང་གིས་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ལ་གཞུང་ཁོངས་རྒྱུ་ནོར་དོ་དམ་གནས་ཚུལ་སྙན་ཞུ་བྱ་རྒྱུའི་ལམ་ལུགས་འཛུགས་རྒྱུའི་སྐོར་གྱི་བསམ་འཆར་ལ་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། ཚོགས་འདུའི་ཐོག་མི་དམངས་འཐུས་ཚོགས་ནས་ཁྲིམས་ལྟར་ལྟ་སྐུལ་དབང་ཆ་སྤྱོད་རྒྱུར་རྒྱབ་སྐྱོར་དང་འགན་ལེན་བྱེད་པ་དང་། སྙན་ཞུ་བྱ་ཐབས་དང་གྲོས་ཞིབ་ཀྱི་བརྒྱུད་རིམ་དང་དེའི་གཙོ་གནད་ཚད་ལྡན་བཟོ་བ། གཞུང་ཁོངས་རྒྱུ་ནོར་དོ་དམ་ཡོངས་བསྒྲགས་དང་ཁ་གསལ་ཡོང་རྒྱུར་སྐུལ་འདེད་གཏོང་དགོས་ཞེས་བསྟན་ཡོད། 
        གྲོས་ཚོགས་ཐོག་དབུལ་ཕོངས་གྲོང་ཚོའི་གྲོང་ཚོར་བཅའ་སྡོད་ལས་དོན་རུ་ཁག་འདེམས་གཏོང་གི་དོ་དམ་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་མཛུབ་ཁྲིད་བསམ་འཆར་ལ་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་དབུལ་ཕོངས་གྲོང་ཚོའི་གྲོང་ཚོར་བཅའ་སྡོད་ལས་དོན་རུ་ཁག་འདེམས་གཏོང་གི་དོ་དམ་ལས་དོན་ལ་ཤུགས་སྣོན་བརྒྱབ་སྟེ། ཆེས་དབུལ་ཕོངས་ས་ཁུལ་གྱི་དབུལ་ཕོངས་གྲོང་ཚོ་དང་དབུལ་སྒྲོལ་ཐུབ་དཀའ་བའི་དབུལ་ཕོངས་གྲོང་ཚོ་དེ་ཉིད་གལ་འགངས་ཆེན་པོར་བརྩི་བ་དང་། གྲོང་ཚོར་བཅའ་སྡོད་རོགས་རམ་ཁྲོད་མི་ཡག་པོ་མི་བདམས་པ་དང་། དོ་དམ་ནན་པོ་མ་བྱུང་བ། སྤྱོད་ཚུལ་ཚགས་ཚུད་པོ་མ་བྱུང་བ། འགན་སྲུང་ནུས་ལྡན་མི་ཐུབ་པ་སོགས་ཀྱི་གནད་དོན་ཐག་གཅོད་བྱ་རྒྱུར་ཤུགས་སྣོན་རྒྱག་དགོས་པའི་ནན་བཏོན་གནང་ཡོད། 
        གྲོས་ཚོགས་ཐོག་གྲོང་གསེབ་ཀྱི་ཡུལ་མི་གནས་སྡོད་ཁོར་ཡུག་བཅོས་སྒྲིག་ལོ་གསུམ་བྱ་རྒྱུའི་བྱ་སྤྱོད་ཇུས་གཞི་ཞེས་པར་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་མཛེས་སྡུག་ལྡན་ལ་གནས་སྡོད་ལ་འཚམས་པའི་གྲོང་ཚོ་འཛུགས་སྐྲུན་བྱ་རྒྱུས་སྟོན་ཕྱོགས་བྱེད་པ་དང་། གྲོང་གསེབ་ཀྱི་གད་སྙིགས་དང་བཙོག་ཆུ་བཅོས་སྐྱོང་། གྲོང་ཚོའི་རྣམ་པ་ལེགས་སུ་གཏོང་རྒྱུ་ཁ་ཕྱོགས་གཙོ་བོར་འཛིན་སྟེ་གྲོང་གསེབ་ཀྱི་ཡུལ་མི་གནས་སྡོད་ཁོར་ཡུག་གི་མངོན་གསལ་དོད་པའི་ཞན་ཆ་གང་མགྱོགས་གསབ་དགོས། ཡུལ་བབ་དང་བསྟུན་རྒྱུར་སྣང་ཆེན་གྱིས་གྲོང་གསེབ་ཀྱི་རྣམ་པ་སྲུང་སྐྱོང་དང་སོར་བཞག་བྱེད་དགོས་ཞེས་བསྟན་ཡོད། 
        གྲོས་ཚོགས་ཐོག་མཚེའུར་མཚེའུ་དཔོན་ལམ་ལུགས་ལག་བསྟར་བྱ་རྒྱུའི་སྐོར་གྱི་མཛུབ་ཁྲིད་བསམ་འཆར་ལ་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་ཆུ་དཔོན་ལམ་ལུགས་ལ་ཁྱོན་ཡོངས་ནས་སྐུལ་འདེད་བཏང་བའི་རྨང་གཞིའི་སྟེང་མཚེའུར་མཚེའུ་དཔོན་ལམ་ལུགས་ལག་བསྟར་བྱེད་པ་དང་། མཚེའུའི་སྐྱེ་ཁམས་བཅོས་སྐྱོང་དང་ཉམས་གསོ། མཚེའུའི་ཁྲིམས་འཛིན་ལྟ་སྐུལ་དོ་དམ་སྒྲིག་གཞི་འཐུས་སྒོ་ཚང་དུ་གཏོང་དགོས་པའི་ནན་བཏོན་གནང་ཡོད། 
        གྲོས་ཚོགས་ཐོག་དུས་རབས་གསར་པའི་དགེ་རྒན་དཔུང་ཁག་འཛུགས་སྐྱོང་ལ་སྒྱུར་བཅོས་ཁྱོན་ཡོངས་ནས་གཏིང་ཟབ་ཏུ་གཏོང་རྒྱུའི་སྐོར་གྱི་བསམ་འཆར་ཞེས་པར་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་སྤྱི་ཚོགས་རིང་ལུགས་ཀྱི་སློབ་གཉེར་ཁ་ཕྱོགས་རྒྱུན་འཁྱོངས་བྱེད་དགོས་པ་དང་། དགེ་རྒན་གྱི་བྱང་ཚད་ནུས་པ་ཁྱོན་ཡོངས་ནས་མཐོ་རུ་གཏོང་བ། དགེ་རྒན་ལ་དོ་དམ་བྱེད་པའི་ལམ་ལུགས་དང་སྒྲིག་གཞི་སྒྱུར་བཅོས་ལ་སྐུལ་འདེད་གཏིང་ཟབ་གཏོང་བ། གྲོང་གསེབ་ཀྱི་དགེ་རྒན་དཔུང་ཁག་འཛུགས་སྐྱོང་ཡག་པོ་དང་འཛུགས་སྐྱོང་ཤུགས་ཆེན་བྱ་རྒྱུར་མཐོང་ཆེན་བྱེད་དགོས་ཞེས་བསྟན་ཡོད། 
        གྲོས་ཚོགས་ཐོག་གྲོང་གསེབ་ཀྱི་ཁང་སའི་ལམ་ལུགས་ཀྱི་སྒྱུར་བཅོས་ཚོད་ལྟ་རྒྱ་སྐྱེད་གཏོང་རྒྱུའི་སྐོར་གྱི་ཞུ་ཡིག་ལ་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་ས་ཆ་སྤྱི་ལ་དབང་བའི་ལམ་ལུགས་ཀྱི་ངོ་བོར་འགྱུར་བ་མི་གཏོང་བ་དང་། རྨོ་ཞིང་གི་ཐིག་དམར་འགག་གཏོར་མི་བྱེད་པ། ཞིང་པའི་ཁེ་ཕན་ལ་གནོད་འཚེ་མི་ཕོག་པ་བཅས་ཀྱི་མ་མཐའི་ཚད་གཞི་ནན་པོ་སྲུང་སྟེ། རྒྱལ་ཁབ་དང་། མཉམ་སྡེབ། མི་སྒེར་བཅས་ཀྱི་ཁེ་ཕན་དོ་སྙོམ་ཡག་པོ་བྱེད་དགོས། ཁང་ས་ཉོ་ཚོང་བྱ་རྒྱུས་འགོ་འཛུགས་ས་མི་བྱེད་པ་དང་། ཁང་ས་བཀོལ་སྤྱོད་བྱེད་དབང་ནས་ཕྱིར་འཐེན་བྱ་རྒྱུ་དེ་ཞིང་པ་གྲོང་ཁྱེར་དུ་ཐེམ་ཐོ་སྤོ་བའི་ཆ་རྐྱེན་ལ་བརྩི་མི་རུང་བའི་ནན་བཏོན་གནང་ཡོད། 
        གྲོས་ཚོགས་ཐོག་ནད་ཚང་མ་བལྟ་ཤེས་པའི་སྨན་པ་གསོ་སྐྱོང་དང་བཀོལ་སྤྱོད་ཀྱི་སྐུལ་ལྕག་སྒྲིག་གཞིར་སྒྱུར་བཅོས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་བསམ་འཆར་ཞེས་པར་གྲོས་ཞིབ་བྱས་པ་བརྒྱུད་གྲོས་འཆམ་བྱུང་ཡོད། གྲོས་ཚོགས་ཐོག་སྲིད་གཞུང་གིས་གཙོ་ཁྲིད་བྱ་རྒྱུ་རྒྱུན་འཁྱོངས་དང་། ཁྲོམ་རའི་སྒྲིག་གཞིའི་ནུས་པ་འདོན་སྤེལ། ལས་རིགས་ཀྱི་ཁྱད་ཆོས་དང་འཚམས་པའི་ནད་ཚང་མ་བལྟ་ཤེས་པའི་སྨན་པ་གསོ་སྐྱོང་བྱེད་པའི་ལམ་ལུགས་འཐུས་སྒོ་ཚང་དུ་གཏོང་བ། ནད་ཚང་མ་བལྟ་ཤེས་པའི་སྨན་པ་བཀོལ་སྤྱོད་ཀྱི་སྐུལ་ལྕག་སྒྲིག་གཞི་གསར་གཏོད་བྱེད་པ། དབུལ་ཕོངས་ས་ཁུལ་གྱི་ནད་ཚང་མ་བལྟ་ཤེས་པའི་སྨན་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་དགོས་ཞེས་བསྟན་ཡོད་པ་རེད། 
        གྲོས་ཚོགས་ཐོག་ཀྲུང་དབྱང་སྡེ་ཚོགས་སློབ་གྲྭའི་སྒྱུར་བཅོས་ཇུས་གཞིར་གྲོས་ཞིབ་བྱས་ནས་གྲོས་འཆམ་བྱུང་ཡོད་པ་དང་། སྒྱུར་བཅོས་ཀྱིས་ཏང་གིས་གཞོན་ནུའི་ལས་དོན་ཁྱབ་ཁོངས་ནང་ཁྱད་ཆོས་མངོན་གསལ་དོད་པའི་ཆབ་སྲིད་སློབ་གྲྭ་འཛུགས་པའི་རྩ་བའི་གནས་བབས་ལ་དམ་འཛིན་བྱེད་པ་དང་། སྡེ་ཚོགས་ཀྱི་ལས་བྱེད་སློབ་གསོའི་འགན་འཁྲི་གཙོ་བོ་དང་ལས་སྒོ་གཙོ་བོ་གཅིག་བསྡུས་དང་། སློབ་གནས་སློབ་གསོ་ལོག་སུ་དབྱེ་བ། སློབ་གཉེར་བྱ་ཐབས་གསར་གཏོད། ཆབ་སྲིད་སྦྱོང་བརྡར་འབུར་དུ་ཐོན་པ་བཅས་བྱེད་དགོས་པའི་ནན་བཤད་གནང་ཡོད། 
        གྲོས་ཚོགས་ཐོག་ཁྲིམས་འཛུགས་ཁྲོད་འབྲེལ་བ་ཡོད་པའི་གལ་ཆེའི་ཁེ་ཕན་ལེགས་སྒྲིག་ཀྱི་རིག་པས་ཁུངས་སྐྱེལ་དང་བློ་འདྲིའི་སྐོར་གྱི་ལས་དོན་ཚད་ལྡན་ཞེས་པ་དང་། རྩོད་གཞི་ཅུང་ཆེ་བའི་གལ་ཆེའི་ཁྲིམས་འཛུགས་བྱ་དོན་ཕྱོགས་གསུམ་པའི་དཔྱད་དཔོགས་ནང་འཇུག་པའི་སྐོར་གྱི་ལས་དོན་ཚད་ལྡན་ཞེས་པར་གྲོས་ཞིབ་བྱས་ནས་གྲོས་འཆམ་བྱུང་ཡོད་་ཅིང་། ཁྲིམས་འཛུགས་སྤུས་ཚད་མཐོ་རུ་གཏོང་བའི་འགག་རྩར་དམ་པོར་གཞིགས་ནས། ལས་དོན་སྒྲིག་གཞི་འཐུས་ཚང་དུ་གཏོང་བ་དང་། ཁྲིམས་འཛུགས་ལས་ཁུངས་ཀྱིས་སྤྱི་ཚོགས་ཀྱི་ཁེ་ཕན་བརྗོད་པ་དང་། དོ་སྙོམས་། ལེགས་སྒྲིག་བཅས་བྱེད་པའི་ཐད་གལ་ཆེའི་ནུས་པ་ཐོན་པ་བྱས་ཏེ། འབད་བརྩོན་ཆེན་པོས་ཁྲིམས་འཛུགས་བྱ་དོན་ཡོངས་རྩ་ཁྲིམས་ཀྱི་དགོངས་པ་དང་མཐུན་པ་དང་། མི་དམངས་ཀྱི་འདུན་པ་མངོན་པ། མི་དམངས་ཀྱི་བརྩི་བཀུར་ཐོབ་པ་བཅས་བྱེད་དགོས་ཞེས་བསྟན་ཡོད་པ་རེད། 
        གྲོས་ཚོགས་ཐོག་ཤེས་བྱའི་ཐོན་དབང་འདྲི་གཅོད་ཁྱབ་ཁོངས་ཀྱི་སྒྱུར་བཅོས་གསར་གཏོད་ལ་ཤུགས་སྣོན་རྒྱག་པའི་གནད་དོན་འགའ་རེའི་སྐོར་གྱི་བསམ་འཆར་ཞེས་པར་གྲོས་ཞིབ་བྱས་ནས་གྲོས་འཆམ་བྱུང་ཡོད་པ་དང་། ཤེས་བྱའི་ཐོན་དབང་ལ་ཁྲིམས་འཛིན་སྲུང་སྐྱོབ་བྱེད་པའི་གཙོ་ཁྲིད་ནུས་པ་འདོན་སྤེལ་གང་ལེགས་བྱེད་པ་དང་། ཤེས་བྱའི་ཐོན་དབང་གི་ཞུ་གཏུག་ལམ་ལུགས་འཐུས་ཚང་དུ་གཏོང་བ། ཤེས་བྱའི་ཐོན་དབང་གི་ཁྲིམས་ཁང་མ་ལག་འཛུགས་སྐྱོང་ལ་ཤུགས་སྣོན་རྒྱག་པ། ཤེས་བྱའི་ཐོན་དབང་གི་འདྲི་གཅོད་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་པ་བཅས་བྱེད་དགོས་པའི་ནན་བཤད་གནང་ཡོད་པ་རེད། 
        གྲོས་ཚོགས་ཐོག་ད་དུང་ཏང་གི་ཚོགས་ཆེན་བཅུ་དགུ་པའི་དགོངས་དོན་ལག་བསྟར་དོན་འཁྱོལ་བྱས་ནས་བློ་བརྟན་འགྱུར་མེད་ངང་སྒྱུར་བཅོས་གཏིང་ཟབ་ཏུ་གཏོང་རྒྱུར་སྐུལ་འདེད་གཏོང་བའི་སྐོར་གྱི་ལས་དོན་བསམ་འཆར་ཞེས་པ་དང་། ཀྲུང་དབྱང་གི་ཁྱོན་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་བའི་འགོ་ཁྲིད་ཚོགས་ཆུང་གི་ལས་དོན་ཕྱོགས་བསྡོམས་། ཀྲུང་དབྱང་གི་ཁྱོན་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་བའི་འགོ་ཁྲིད་ཚོགས་ཆུང་གི་ལས་དོན་སྒྲིག་སྲོལ་གྱི་བཟོ་བཅོས་འཆར་ཟིན། ཀྲུང་དབྱང་གི་ཁྱོན་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་བའི་འགོ་ཁྲིད་ཚོགས་ཆུང་ཆེད་དོན་ཚོགས་ཆུངགི་ལས་དོན་སྒྲིལ་སྲོལ་གྱི་བཟོ་བཅོས་འཆར་ཟིན། ཀྲུང་དབྱང་གི་ཁྱོན་ཡོངས་ནས་སྒྱུར་བཅོས་གཏིང་ཟབུ་གཏོང་བའི་འགོ་ཁྲིད་ཚོགས་ཆུང་གཞུང་ལས་ཁང་ལས་དོན་གྱི་ཞིབ་ཕྲའི་སྒྲིག་སྲོལ་གྱི་བཟོ་བཅོས་འཆར་ཟིན་བཅས་ལ་གྲོས་ཞིབ་བྱས་ནས་གྲོས་འཆམ་བྱུང་ཡོད་པ་དང་། གྲོས་ཚོགས་ཐོག་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་བཏང་ནས་སྒྱུར་བཅོས་དོན་འཁྱོལ་ལ་དམ་འཛིན་ནན་པོ་བྱེད་པའི་གནས་ཚུལ་སྐོར་གྱི་སྙན་ཞུར་གྲོས་ཞིབ་བྱས་ཡོད་པ་རེད། 
        གྲོས་ཚོགས་ཐོག ཏང་གི་ཚོགས་ཆེན་བཅོ་བརྒྱད་པ་ཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཤུགས་ཆེའི་འགོ་ཁྲིད་འོག ང་ཚོས་དཀའ་གནད་ཐག་གཅོད་བྱེད་ཕོད་པ་དང་། ཉེན་ཁར་མི་འཛེམས་པའི་འགན་འཁྲི་དང་བློ་སྟོབས་ཀྱི་ཐོག་ནས། ཕྱོགས་ཁག་གི་སྒྲིག་གཞིའི་ཞན་ཆ་མཐའ་གཅིག་ཏུ་མེད་པ་བཟོ་བ་དང་། སྒྱུར་བཅོས་རིག་གཞུང་གྲུབ་འབྲས་དང་ལམ་ལུགས་གྲུབ་འབྲས། ལག་ལེན་གྲུབ་འབྲས་བཅས་འབོར་ཆེན་ཆགས་པ་བྱས་པ་དང་། ཁྱབ་ཁོངས་གཙོ་བོའི་སྒྱུར་བཅོས་ཀྱི་གཙོ་གཟུགས་སྒྲོམ་གཞི་གཞི་རྩའི་ཆ་ནས་གཏན་འཁེལ་བྱས་ཡོད། དེ་ནི་མུ་མཐུད་ནས་སྒྱུར་བཅོས་གཏིང་ཟབ་ཏུ་གཏོང་བའི་རྨང་གཞི་བརྟན་པོ་དང་ནུས་ཡོད་ཆ་རྐྱེན་ཡིན། ཐོན་ས་དེ་བས་མཐོ་བའི་ཐོག་ལངས་ནས་སྒྱུར་བཅོས་ལ་འཆར་འགོད་བྱེད་པ་དང་སྐུལ་འདེད་གཏོང་བར། ངེས་པར་དུ་ཏང་གི་ཚོགས་ཆེན་བཅུ་དགུ་པའི་དགོངས་དོན་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། སྒྱུུར་བཅོས་ཁ་ཕྱོགས་བརྟན་པོ་འཛུགས་པ། མུ་མཐུད་ནས་ཁྱབ་ཁོངས་ཁག་དང་ཕྱོགས་ཁག་གི་སྒྱུར་བཅོས་ལ་གཅིག་སྒྱུར་འཆར་འགོད་བྱེད་པ་དང་སྐུལ་འདེད་གཏོང་དགོས། ཆེས་འགག་རྩ་ནི་སྒྱུར་བཅོས་ག་རེ་བྱེད་པ་དང་། སྒྱུར་བཅོས་གོམ་སྟབས་གང་འདྲ་ཞིག་ལ་སླེབས་རུང་། ཏང་གིས་སྒྱུར་བཅོས་ལ་གཅིག་བསྡུས་གཅིག་སྒྱུར་གྱི་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་པར་འགྱུར་བ་གཏོང་མི་རུང་བ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་འཐུས་ཚང་དང་གོང་འཕེལ་གཏོང་བ་དང་། རྒྱལ་ཁབ་ཀྱི་བཅོས་སྒྲིག་མ་ལག་དང་བཅོས་སྒྲིག་ནུས་པའི་དེང་རབས་ཅན་ལ་སྐུལ་འདེད་གཏོང་བའི་སྤྱིའི་དམིགས་འབེན་ལ་འགྱུར་བ་གཏོང་མི་རུང་ལ། མི་དམངས་ཀྱི་ལྟེ་བ་བྱ་རྒྱུ་རྒྱུན་འཁྱོངས་བྱེད་པའི་སྒྱུར་བཅོས་ཀྱི་རིན་ཐང་ལྟ་བར་འགྱུར་བ་གཏོང་མི་རུང་ཞེས་བསྟན་ཡོད་པ་དང་། 
        གྲོས་ཚོགས་ཐོག ས་གནས་ཁག་དང་ཚན་པ་ཁག་གིས་འདུ་ཤེས་བཞིར་ཤུགས་སྣོན་རྒྱག་པ་དང་། འགན་འཁྲི་དོན་འཁྱོལ་ལ་ཤུགས་སྣོན་རྒྱག་པ། རང་ངོས་ཀྱི་དོན་དངོས་དང་ཟུང་འབྲེལ་བྱེད་པ། ཏང་ཀྲུང་དབྱང་གིས་བཏོན་པའི་འཐབ་ཇུས་བཀོད་སྒྲིག་དེ་རང་ས་གནས་དང་རང་ཚན་པའི་ལས་དོན་ལས་འགན་ལ་འགྱུར་བ་བཅས་བྱེད་དགོས། ཏང་གི་ཚོགས་ཆེན་བཅོ་བརྒྱད་པ་ཚོགས་ཚུན་བཏོན་ཟིན་པའི་སྒྱུར་བཅོས་ཇུས་གཞི་དོན་འཁྱོལ་བྱ་རྒྱུར་དམ་འཛིན་བྱེད་པ་དང་། ད་དུང་ལེགས་གྲུབ་ཟིན་མེད་པའི་སྒྱུར་བཅོས་ལས་འགན་གང་མགྱོགས་ལེགས་གྲུབ་བྱེད་པ། ཇུས་གཞི་དོན་འཁྱོལ་བྱས་པར་ད་དུང་སྒྱུར་བཅོས་གྲུབ་འབྲས་སྲ་བརྟན་དུ་གཏོང་དགོས། འགོ་ཁྲིད་གཙོ་བོས་སྒྱུར་བཅོས་ལ་དམ་འཛིན་བྱ་རྒྱུ་རྒྱུན་འཁྱོངས་བྱེད་པ་དང་། བརྟག་དཔྱད་ཞིབ་འཇུག་ཡག་པོ་བྱ་རྒྱུར་མཐོང་ཆེན་བྱེད་པ། འགན་ཟླ་གསར་པ་དང་གནད་དོན་གསར་པ་ཞིབ་འཇུག་དང་ཐག་གཅོད་བྱེད་པ། དོན་འཁྱོལ་ལ་དམ་འཛིན་བྱེད་པའི་ཐད་སྟོབས་ཤུགས་དེ་བས་མང་བ་འདོན་པ་བཅས་བྱེད་དགོས། དུས་སང་གི་སྒྱུར་བཅོས་ལས་འགན་གང་མགྱོགས་འཆར་འགོད་བྱེད་པ་དང་། ཚད་གཞི་དེ་བས་མཐོ་བའི་ཐོག་ནས་ལས་དོན་ཁག་ལ་དམ་འཛིན་ཡག་པོ་བྱས་ཏེ། དོན་དངོས་ཀྱི་བྱ་སྤྱོད་ཐོག་ནས་སྒྱུར་བཅོས་སྒོ་དབྱེ་བྱས་ནས་ལོ་ངོ་40འཁོར་བར་བསུ་བ་ཞུ་དགོས་ཞེས་བསྟན་ཡོད་པ་རེད།།