ཉིན་རེར་ཆུ་ཕོར་པ་བརྒྱད་འཐུང་བའི་རྩ་དོན།
     གལ་ཏེ་ཆུ་བཏུངས་པ་མང་དྲགས་ཤིང་ཕྱིར་འབུད་རྒྱུ་ཉུང་སོང་ན་ལུས་པོར་ཆུ་བསགས་ནས་སྐྲང་སྲིད་པ་མ་ཟད། ཆུ་དུག་ཀྱང་ཕོག་སྲིད་པས། དེའི་ཕྱིར་ཆུ་འཐུང་བར་ཚན་རིག་དང་མཐུན་དགོས་པ་རེད།
     ཉིན་རེའི་ཆུ་ཕོར་པ་དང་པོ། ཆུ་ཚོད་8ཀྱི་ཐོག
     ཞོགས་པ་ཡར་ལངས་རྗེས་ཞོགས་ཟས་བཟའ་རྒྱུར་བྲེལ་བ་མ་བྱེད་པའི་སྔོན་ལ་ཆུ་དྲོན་མོ་ཕོར་པ་གང་བཏུངས་ནས་ཕོ་བ་དྲོ་རུ་བཅུག་ན་ལུས་ལ་ཕན་པ་ཡོད།
     ཆུ་ཕོར་པ་གཉིས་པ། ཆུ་ཚོད་9ཡི་ཐོག
     སྔ་དྲོར་ཉིན་གཅིག་གི་ལས་ཀ་འགོ་བརྩམས་དུས། ཆུ་ཕོར་པ་གང་བཏུང་རྒྱུ་མ་བརྗེད་པར་བྱེད་དགོས། དེས་ཕྱོགས་གཅིག་ནས་ཁྱེད་རང་གིས་སྙིང་སྟོབས་རྒྱས་སུ་འཇུག་པ་དང་། ཕྱོགས་གཞན་ཞིག་ནས་བློ་རིག་དྭངས་གསལ་ཡོང་བར་བྱས་ནས་ལས་ཕྱོད་ཆེ་རུ་འགྲོ་བར་ཕན་པ་ཡོད་པས། དེའི་ཕྱིར་ལས་ཀ་བྱེད་འགོ་མ་ཚུགས་པའི་གོང་ལ་ཆུ་ཕོར་པ་གང་བཏུང་རྒྱུ་བརྗེད་མི་རུང་། ཉིན་རེའི་སྔ་དྲོའི་ཆུ་ཚོད་9ནས་ཆུ་ཚོད་10ཡི་སྐབས་ནི་སྙིང་ནད་ཕོག་ཚད་ཆེས་ཆེ་བའི་དུས་ཚོད་ཡིན་ཞིང། དེའི་རྒྱུ་རྐྱེན་གཅིག་ནི་ལུས་པོའི་ནང་ཆུ་མི་འདང་བ་དང་འབྲེལ་བ་ཡོད་པ་རེད།
     ཆུ་ཕོར་པ་གསུམ་པ། ཆུ་ཚོད་11དང་སྐར་མ་30ཐོག
     ཉིན་གུང་ཟ་མ་མ་བཟས་གོང་ལ་ཆུ་ཕོར་པ་གང་བཏུང་རྒྱུ་ངེས་པར་ངེས་དགོས། དེ་ནི་དེ་དུས་ཕོ་བ་སྟོང་པ་ཡིན་པའི་རྐྱེན་གྱིས་ཟ་འཐུང་བག་མེད་མི་བྱེད་པའི་ཆེད་དུ་རེད།
     ཆུ་ཕོར་པ་བཞི་པ། ཆུ་ཚོད་13དང་སྐར་མ་30ཐོག
     ཟ་མ་ཟོས་རྗེས་སྐར་མ་20འགོར་རྗེས་ཆུ་ཕོར་པ་གང་བཏུངས་ན། ཟས་འཇུ་བར་ཕན་པ་ཡོད།
     ཆུ་ཕོར་པ་ལྔ་པ། ཆུ་ཚོད་15དང་སྐར་མ་30ཐོག
     ཕྱི་དྲོའི་ཇ་འཐུང་བའི་དུས་ཚོད་འདིར་ཁོ་ཧྥེའམ་ཆུ་ཕོར་པ་གང་བཏུང་ན་ཁམས་དྭངས་བར་ཕན་པ་ཡོད། 
     ཆུ་ཕོར་པ་དྲུག་པ། ཆུ་ཚོད་17དང་སྐར་མ་30ཐོག
     ལས་ཀ་མ་གྲོལ་གོང་དུ་ཆུ་དྲོན་མོ་ཕོར་པ་གང་བཏུངས་ན་ཉིན་གཅིག་བྱས་པའི་ལས་ཀ་ངལ་དུབ་སེལ་ཐུབ།
     ཆུ་ཕོར་པ་བདུན་པ། ཆུ་ཚོད་19དང་སྐར་མ་30ཐོག
     སྐབས་འདི་ནི་ལུས་པོའི་ནང་རྙིང་ཚབ་གསར་བརྗེ་ཆེན་པོ་བྱེད་བཞིན་པའི་སྐབས་ཡིན་པས་ཆུ་དྲོན་མོ་ཕོར་བ་གང་བཏུངས་ན་ལུས་པོའི་ནང་གི་དུག་ཕྱིར་འབུད་པ་ལ་ཕན་པ་ཡོད།
     ཆུ་ཕོར་པ་བརྒྱད་པ། ཆུ་ཚོད་20དང་སྐར་མ་15ཐོག
     མལ་དུ་མ་ཉལ་བའི་གོང་གི་ཆུ་ཚོད་གཉིས་ཀྱི་ནང་དུ་ཆུ་ཕོར་པ་གང་བཏུངས་ན་ཁྲག་ནུར་བར་སྔོན་འགོག་བྱེད་ཐུབ་པ་རེད།
     ཞོགས་པར་མལ་ནས་ལངས་རྗེས་སུ་ཆུ་རིགས་བཞི་འཐུང་མི་ཉན།
     ༡.མངར་ལྡན་གྱི་བཏུང་བྱ།
     ཞོགས་པ་མལ་ནས་ལངས་རྗེས་ཀྱི་ཆུ་ཕོར་པ་དང་པོར་ཚོང་ར་ནས་ཉོས་པའི་ཤིང་འབྲས་ཀྱི་ཁུ་བ་དང་། ཁུ་ནག རླངས་ཆུ། ཁོ་ཧྥེ། འོ་མ་སོགས་འཐུང་མི་ཉན། རྒྱུ་མཚན་ནི་དངོས་རྫས་འདི་དག་གིས་སྐབས་དེར་ལུས་པོར་མཁོ་བའི་ཆུ་འདོན་སྤྲོད་བྱེད་མི་ཐུབ་ལ། ད་དུང་ལུས་ཁམས་ལ་ཆུ་ཉུང་བའི་གནས་ཚུལ་འོག་ཕོ་རྒྱུར་ཟས་འཇུ་བ་དང་བཅུད་ལེན་བྱེད་དུ་བཅུག་པས། ལུས་ཁམས་བདེ་ཐང་ཡོང་བར་གནོད་སྲིད་པ་རེད།
     ༢.ཆུ་འཁྱག
     ཆུ་འཁྱག་བཏུངས་ན་ཕོ་བའི་འབྱར་སྐྱིའི་ཁྲག་རྩ་འཁུམ་པ་བྱུང་སླ་བས། ཟས་འཇུ་བ་དང་ཕོ་རྒྱུར་གནོད་སྲིད་པས། ཕོ་རྒྱུའི་ནུར་འགུལ་མགྱོགས་སུ་འགྲོ་བར་བྱེད་སྲིད་པ་མ་ཟད། ད་དུང་རྒྱུ་མ་རེངས་འཁུམ་བྱུང་ནས་གསུས་པ་ན་ཚ་ཕོག་སྲིད་པ་རེད། དབང་པོ་རྒྱུན་ལྡན་གྱི་མི་ཡིས་གསུས་པ་སྟོང་པའི་གནས་ཚུལ་འོག་ཆུ་འཁྱག་དང་ཁྱད་པར་དུ་མངར་ལྡན་གྱི་བཏུང་བྱ་བཏུངས་རྗེས་ཕོ་བའི་ནད་ཕོག་སླ་བ་རེད།
     ༣.ཡུན་རིང་བཞག་པའི་ཆུ་ཁོལ།
     ཆུ་ཁོལ་ཡུན་རིང་བཞག་རྗེས་དེའི་ནང་གི་ཏན་ལྡན་སྐྱེ་ལྡན་དངོས་རིགས་ཟམ་མ་ཆད་པར་དབྱེ་ཕྲལ་བྱས་ནས་ཟེ་སྐྱུར་ཚྭ་ཕལ་བར་འགྱུར་སྲིད་པ་དང་། ཁྱད་པར་དུ་ཡུན་རིང་བཞག་པའི་ཆུ་ཁོལ་ལ་དུག་སྲིན་གྱི་སྦགས་བཙོག་ཐེབས་སྲིད་པས། སྐབས་འདིར་ཏན་ལྡན་སྐྱེ་ལྡན་དངོས་རིགས་དབྱེ་ཕྲལ་ཇེ་མགྱོགས་བྱས་ནས་ཟེ་སྐྱུར་ཚྭ་ཕལ་བར་གྱུར་པའང་ཇེ་མང་དུ་འགྲོ་བ་ཡིན་པས། དེས་ཁྲག་རྒྱུན་གྱི་གསོ་རླུང་སྐྱེལ་ནུས་ལ་གནོད་པ་རེད།
     ༤.ཚྭ་ཆུ། ཚྭ་ཉུང་ཙམ་བཏབ་པའི་ཆུ་བཏུངས་ན་ལུས་ཁམས་བདེ་ཐང་ཡོང་བར་ཕན་པ་ནི་རྫུན་གཏམ་མིན་ཀྱང་། འདི་ནི་དབྱར་ཁར་རྔུལ་ཆུ་བྱུང་རྗེས་ཆུ་ཁ་གསབ་བྱེད་རྒྱུར་དགོས་ངེས་ཤིག་ཡིན་མོན། ཡིན་ནའང་ཞོགས་པ་ལངས་རྗེས་ཆུ་ཁ་གསབ་བྱེད་རྒྱུར་མཚོན་ནས་བཤད་ན་ཕན་པ་མེད་པ་མ་ཟད། དེ་ནི་ད་དུང་བདེ་ཐང་ལ་གནོད་པའི་བྱ་ཐབས་ནོར་འཁྲུལ་ཅན་ཞིག་རེད།