ཟླ་1པོའི་ཚེས་19ཉིན་གྱི་ཞོགས་པར་གསར་འགོད་པ་ཨ་སྐྱིད་ཡུལ་ཚོའི་མདོ་ཚ་གྲོང་ཚོའི་ལས་བྱེད་པ་སྒྲོལ་མ་དང་མཉམ་དུ་སྡེ་བའི་དབུལ་ཕོངས་བ་འཇིགས་བྱེད་སྐྱབས་ཚང་དུ་ཐོན་པ་ན། འཇིགས་བྱེད་སྐྱབས་ཀྱི་མེ་བུས་ཤིང་ནང་ཇ་སྐོལ་བར་བྲེལ་གྱིན་འདུག ཉིན་འགའི་སྔོན་དུ་འཇིགས་བྱེད་སྐྱབས་ཀྱི་བུ་ཆུང་ལ་ན་ཚ་བྱུང་བས་ཆུང་མས་བུ་ཆུང་ཁྲིད་དེ་རྫོང་སྨན་ཁང་དུ་ཕྱིན་པས་ཤུལ་དུ་ཁོ་རང་གཅིག་པུ་ཡིན་འདུག
       འཇིགས་བྱེད་སྐྱབས་ཚང་གི་ཁྱིམ་དུ་ཐོན་པ་ན། ཤིང་གི་ཁྱིམ་ཆས་གསར་བ་དང་ཁྱིམ་སྤྱོད་གློག་ཆས་སོགས་གཅིག་གཅིག་གཉིས་གཉིས་བཞིན་དུ་མཐོང་བྱུང་ལ། འདི་དག་ཡོད་ཚད་ནི་བོད་ཁུལ་སྡོད་ཁང་གསར་བ་འཛུགས་སྐྲུན་གྱི་གྲུབ་འབྲས་ཅི་ལ་མིན། 2016ལོར་འཇིགས་བྱེད་སྐྱབས་ཀྱིས་བོད་ཁུལ་སྡོད་གསར་བ་འཛུགས་སྐྲུན་གྱི་ཆེད་དམིགས་རོགས་དངུལ་སྒོར་ཁྲི་2ཀྱིས་སྔར་ཡོད་ཀྱི་ཁང་བའི་ཁར་ཁང་མིག་གཉིས་གསར་དུ་བསྐྲུན་འདུག ཁང་བ་བསྐྲུན་པར་ཕལ་ཆེར་སྒོར་མོ་བཏང་དགོས་མེད་པའི་ཁར། ཁང་བ་བསྐྲུན་རྗེས་དབུལ་རོགས་སྡེ་ཁག་གིས་སླར་ཡང་ངེད་ཚང་ལ་ཁྱིམ་ཆས་དང་གློག་ཆས་སོགས་བསྐྱལ་ཡོང་ལ། སྲིད་གཞུང་གི་སྲིད་ཇུས་བཟང་པོས་ང་ལ་འདི་ལྟ་བུའི་ཁང་བ་སྐྱིད་པོ་ཞིག་ཡོད་པ་རེད་ཅེས་འཇིགས་བྱེད་སྐྱབས་བཀའ་དྲིན་ཞུས་བྱུང་།
       2017ལོར་མདོ་ཚ་གྲོང་ཚོས་སྡེ་བའི་ཐུན་མོང་དཔལ་འབྱོར་དང་ཐོན་ལས་དབུལ་སྐྱོར་ལ་བརྟེན་ནས་དབུལ་ཕོངས་ཁྱིམ་ཚང་31དབུལ་ཕོངས་བསྒྲལ་བ་དང་། ལོ་སྔོན་མའི་དབུལ་ཕོངས་ལས་བསྒྲལ་བའི་ཁྱིམ་ཚང་7བཅས་མདོ་ཚ་གྲོང་ཚོ་དབུལ་ཕོངས་ལས་ཡོངས་སུ་ཐར་བ་རེད། འཇིགས་བྱེད་སྐྱབས་ན་རེ། ཉེ་འགྲམ་གྱི་དབུལ་ཕོངས་བ་ཚང་མ་གཅིག་རྗེས་གཉིས་མཐུད་དེ་དབུལ་ཕོངས་ལས་ཐར་སོང་བས། ཁོ་རང་ཡན་ལག་གཙང་མ་ཅན་གྱི་ཕོ་གསར་ཞིག་ལ་མཚོན་ན་ངོ་གནོང་དགོས་པ་ཞིག་རེད་ཅེས་བཤད།
      2009ཡར་སྔོན་དུ་འཇིགས་བྱེད་སྐྱབས་ཚང་གི་འབྱོར་བ་བཟང་པོའི་གྲས་ཡིན་མོད། ལོ་དེར་ཁོའི་ཨ་ཕར་སྐྲན་ནད་ཕོག་པ་ཤེས་རྗེས་ཁྱིམ་གྱི་སྒོར་མོ་དང་། སྒོ་ཁའི་ནོར་ལུག་དང་བཅས་པའི་རྒྱུ་ནོར་ཡོད་ཚད་ཀྱིས་སྨན་བཅོས་བྱས་ཀྱང་མ་ཕན་པར་མཇུག་མཐར་ཁོའི་ཨ་ཕ་ཚེ་ལས་འདས་སོང་།
      འབྲོག་པ་ཞིག་ལ་མཚོན་ན་སྒོ་ཕྱུག་མེད་གྱུར་ཚེ་ཡོང་སྒོ་ཅི་ཡང་མེད་པར་གྱུར་བ་ལོས་ཡིན། འཇིགས་བྱེད་སྐྱབས་ཕྱིར་སྡེ་བར་འབྱོར་རྗེས་ཁ་ལྟ་ངོ་ཤེས་ཚོའི་གམ་ནས་ལུག་བཅུ་ཕྲག་ཅིག་གཡར་བ་དང་། ལོ་འགར་འཚོས་རྗེས་ལུག་རྣམས་བཙོང་ནས་སྐྱིན་པ་སྟེར་དགོས་བསམ་ཡང་། བཀྲ་མི་ཤེས་པའི་ནད་ཡམས་ཤིག་གིས་འཇིགས་བྱེད་སྐྱབས་ཀྱིས་གཡར་བའི་ལུག་གཅིག་ཀྱང་མ་ལུས་པར་ཤི་སོང་བས། སྒོར་མོ་བསགས་མ་ཐུབ་པའི་ཁར་བུ་ལོན་མང་པོ་བྱུང་བས་ཁྱིམ་ཚང་ལ་མཚོན་ན་མིག་སྐྲང་ཐོག་ཏུ་ཁུ་ཚུར་ཅི་ལ་མིན།
      བུ་ལོན་གསབ་ཕྱིར་དུ་འཇིགས་བྱེད་སྐྱབས་ལས་གླར་ཕྱིན་ཡང་། ཁོ་ལ་ལག་རྩལ་ཞན་པས་ངལ་ལས་ལ་བརྟེན་ནས་སྒོར་མི་བཙལ་ཀ་མེད་བྱུང་། ལོ་གཅིག་གི་ཡོང་སྒོར་ཡང་སྒོར་ལྔ་སྟོང་དྲུག་སྟོང་ལས་ལོན་གྱི་མེད་པས་བུ་ལོན་འཇལ་བ་ཁོ་ནས་མི་ཆོག་པར་ད་དུང་ཁྱིམ་ཚང་གི་འཚོ་བ་སྐྱོང་དགོས་པས་འུ་ཐུག་ཐབས་ཟད་དུ་གྱུར་ཞིང་། ཁྱིམ་ཚང་གི་འཚོ་བའི་སླད་དུ་འཇིགས་བྱེད་སྐྱབས་ཀྱི་ཨ་མས་ཀྱང་ཚ་བུ་རྒྱབ་ཏུ་ཁུར་ནས་གཞན་པར་རྫི་གླར་སོང་བ་རེད།
      འཇིགས་བྱེད་སྐྱབས་ཀྱིས་ལས་ཀའི་ཞོར་དུ་གཞན་པའི་གམ་ནས་འཕྲུལ་རྟ་ཞིག་གསོའི་ལས་ཀར་སྦྱངས་ཤིང་། ཕྱིར་སྡེ་བར་སོང་རྗེས་འཕྲུལ་རྟ་ཞིག་གསོ་ཁང་ཞིག་གཉེར་དགོས་བསམ་ཡང་། ཁོས་ཞིག་གསོ་ཁང་དངོས་སུ་ཕྱེས་རྗེས་ད་གཟོད་དེ་འདྲའི་ལས་སླ་མོ་ཞིག་མིན་པ་གཞིག་རྟོགས་ཤིང་། སྡེ་བ་ཡོངས་སུ་ཁྱིམ་ཚང་200ལྷག་ཡོད་མོད། འབྲོག་ཁུལ་གྱི་སྡེ་བ་ཁ་འཐོར་ཡིན་པས་ཁོའི་ཞིག་གསོ་ཁང་དུ་ཡོང་མཁན་ཉུང་ཉུང་ཡིན་པའི་ཁར། ད་ལྟ་ཁྱིམ་ཚང་མང་ཤོས་ཀྱིས་རླངས་འཁོར་ཆུང་ངུ་ཉོས་འདུག དེ་ལྟར་ཡང་དགུན་ངོགས་ཤིག་ཤུ་རེམ་བྱས་ཀྱང་མཐའ་མར་སྒོ་གཏན་དགོས་བྱུང་། སྒྲོལ་མས་གསར་འགོད་པར་བཤད་རྒྱུར། ཁོའི་དབུལ་སྒྲོལ་གྱི་འདུན་ཤིན་ཏུ་དྲག་པོ་ཡིན་ཡང་། རྒྱུ་རྐྱེན་རབ་དང་རིམ་པས་ཁོ་རང་དབུལ་ཕོངས་ལས་ཡོངས་སུ་ཐར་མ་ཐུབ་པ་རེད་བཤད།
     ད་ལོར་སྡེ་བས་འཇིགས་བྱེད་སྐྱབས་ཀྱི་མོས་མཐུན་འོག་དབུལ་སྐྱོར་རོགས་དངུལ་སྒོར་7950གིས་ཁོང་ཚང་ལ་ཟོག་6ཉོས་པ་དང་། ཡུན་རིང་ལ་བསམ་བློ་བཏང་ནས་འབྲུ་ཏག་ཏག་ཉོས་ཡོད་ཅེས་སྒྲོལ་མས་བཤད།
      དེའི་ཞོར་དུ་རང་ཁུལ་གྱིས་ཤུགས་ཆེན་པོས་སྐྱེ་ཁམས་འཛུགས་སྐྲུན་གྱི་དབུལ་སྐྱོར་སྤེལ་ཏེ། སྐྱེ་ཁམས་དབུལ་སྐྱོར་གྱིས་དབུལ་སྐྱོར་གནད་དུ་འཁེལ་བ་ལྟར། ད་ལོར་ཁྱིམ་ཚང་རེར་སྤྱི་ཕན་རང་བཞིན་གྱི་ལས་གནས་གཅིག་བཀོད་སྒྲིག་གནང་བ་ལྟར་འཇིགས་བྱེད་སྐྱབས་ལ་བརླན་ས་སྲུང་མཁན་གྱི་ལས་གནས་བཀོད་སྒྲིག་བྱས་ཤིང་། ལོ་རེར་སྒོར་8200གླ་ཕོག་ཡོད་ཅིང་། ཕྱུགས་ཟོག་མེད་པས་འཇིགས་བྱེད་སྐྱབས་ཚང་གི་མི་རེར་ལོ་རེར་སྒོར་800རྩྭ་ཐང་སྐྱེ་ཁམས་ཁ་གསབ་རོགས་དངུལ་ལོན་གྱི་ཡོད།
     སྡེ་བ་ཡོངས་ཀྱིས་ལྗོངས་སྐོར་ཟ་མ་ཟ་ཆེད་དུ་ད་ལོར་རྡ་ཚ་གྲོང་ཚོའི་རྒྱལ་ལམ་འགྲམ་རྒྱུད་དུ་ལྗོངས་སྐོར་ཞབས་ཞུའི་ས་ཚིགས་གསུམ་གཉེར་འཆར་ཡོད་ལ། སྡེ་མི་ཚོས་ཞབས་ཞུའི་ས་ཚིགས་སུ་རྟ་སྐྱོན་པ་དང་། ས་གནས་རང་གི་ཁྱད་ལྡན་ཐོན་རྫས་འཚོང་ཆོག སྡེ་བ་ཡོངས་ཚོ་ཆུང་འགའ་རུ་བགོས་ནས་འཇགས་བགོས་ཏེ་རེས་མོས་བཞིན་དུ་དབྱར་ཁར་ཞབས་ཞུའི་ས་ཚིགས་སུ་སོང་ནས་སྒོར་མོ་འཚོལ་དགོས་ཀྱི་ཡོད་ཅེས་སྡེ་བའི་ཀྲི་པུའུ་ཧྲུའུ་ཅི་བསོད་ནམས་རྡོ་རྗེས་གསར་འགོད་པར་བཤད།
      ད་ལྟ་ཟོག་ཡོད་ལ་ལས་ཀ་ཡང་ཡོད་པ་མ་ཟད། དབྱར་ཁ་སླེབས་ཚེ་ལྗོངས་སྐོར་ལས་རིགས་གཉེར་ཆོག་པས་འཇིགས་བྱེད་སྐྱབས་ཀྱི་དབུལ་སྒྲོལ་མདུན་ལམ་རེ་བས་ཁེངས་འདུག འཇིགས་བྱེད་སྐྱབས་ན་རེ། ད་ལོ་ངས་སྔར་བཞིན་ཁོམ་སྐབས་སུ་ལས་གླར་འགྲོ་བ་དང་། སྒོར་མོ་མང་པོ་བཙལ་ནས་མྱུར་དུ་དབུལ་ཕོངས་ལས་བསྒྲལ་ཐུབ་པ་བྱ་རྒྱུ་ཡིན་ཞེས་བཤད། སྡེ་བ་ཡོངས་དང་མཉམ་དུ་དབུལ་ཕོངས་ལས་བསྒྲལ་ཏེ་འབྱོར་འབྲིང་དུ་བསྐྱོད་པར་འཇིགས་བྱེད་སྐྱབས་ཀྱིས་འབད་ལྷོད་མེད་བྱེད་ཀྱིན་ནོ།།