གཙོ་ངོས།>> པར་སྐྲུན།>>གངས་དཀར་རི་བོ།

ཀླུ་པད་བཟང་། (དཀར་མཛེས།) རྩོམ་སྒྲིག་པ།ཡོང་ཁུངས། སྤེལ་དུས། ༢༠༡༩ལོའི་ཟླ་བ་༠༡ཚེས་༠༣ཉིན།

རླུང་འཚུབ་ཁྲོད་ཀྱི་རྟ་པ།

ཁོ་ཚོ་རླུང་འཚུབ་ལས་འདྲོགས་ཏེ་འཁྲུལ་སྣང་གི་ཞིང་དུ་གཤེགས།

ནམ་མཁའི་མཐོངས་དབྱིངས་ནས་དཔྱངས་པའི་སྐར་ཚོགས་གྲངས་མེད་པ་དག

རྟ་ཕོའི་སྲབ་མདའ་ལ་བརྫུས་ཏེ་ལག་གིས་འཐེན་པར་རྩོམ།

གོམ་སྟབས་མྱུར་མོས་བགྲོད་པ་དེ་ཁོ་ཚོའི་ཆུང་མ་དག་ཡིན་ཏེ།

ཞོགས་པའི་དུས་སུ་རི་འདབས་ནས་འཁྲིགས་པའི་སྨུག་པ་ལོང་ལོང་།

ཉི་ཟེར་གྱིས་གཤོག་མ་ནུས་པ་དེ།

མཚན་ཐུན་མུན་ཁང་ནས་སྦར་བའི་སྒྲོན་མེས་གསལ་བར་བྱ།

རླུང་འཚུབ་དང་འགྲོགས་ཏེ་གནའ་བོའི་གཞུང་ལམ་བསྙེགས།

རྨི་ལམ་ནས་བླངས་མྱོང་བའི་ལྷ་སྒྲུང་ནང་གི་དམངས་གླུ་དག

ངག་ལ་གྱེར་ཞོར་ལམ་དུ་ཞུགས་ཚེ།

རྟ་ཕོས་འཚེར་སྐད་སྒྲོག་པ་ལས་ཁོ་ཚོའི་གདོང་ནི་རྔུལ་ཆུས་གང་བར་བྱེད།

སྐྱོ་སྣང་དང་ཤུགས་རིང་འབྱིན་པ་བདག་གིས་གསོལ་འདེབས་སུ་བསྒོམས་ནས།

གླེགས་བམ་གཅིག་གི་ཆོས་ཐག་བཀྲོལ་དུས།

རྗེས་རབས་པའི་གུས་ཕྱག་ནི་ཕམ་ཁ་ཡིན་པར་རྟོགས་བྱུང་ཏེ།

འོད་དུ་འབར་བའི་ཡིག་འབྲུ་དེས་བདག་ལ་ན་ཟུག་སྐྱེད་པར་བྱེད།

ཟླ་འོད་འོག་གི་གཙང་བོ་ལ་ཕྱོགས་ཏེ།

སང་ཉིན་གྱི་གནམ་གཤིས་སྙན་ངག་གིས་འབྲི་བར་བྱ།

བྱེ་ཐང་གི་ས་གཞི་རིང་མོ་ལས་མིག་ཆུ་བཏང་བ་དེས།

ཁོ་ཚོའི་རྨི་ལམ་དུ་གཙང་བོ་བཞུར་རུ་བཅུག་ཡོད་དེ།

རླུང་གིས་ཁྱེར་བའི་ས་རྡུལ་གྲངས་མེད་པ་དག་ཆུ་ཐིགས་རེ་རེར་གྱུར་ཅིང་།

ཞི་འཇགས་ཀྱིས་བལྟམས་པའི་ཕ་ཡུལ་གྱི་རྩྭ་ཐང་ནས་སྐད་སྒྲ་འབྱིན་པར་བྱེད།

ཁོ་ཚོ་རླུང་འཚུབ་ལས་འདྲོགས་ཏེ་འཁྲུལ་སྣང་གི་ཞིང་དུ་གཤེགས།

འུ་ཅག་གི་རྨི་ལམ་ལས་ཁོ་ཚོའི་རེ་སྨོན་དང་ཡིད་ཆེས་བལྟམས།

39.7K

རྩོམ་ཡིག་སྔོན་མ།
༄༅། ། ས་བོན་གྱི་དད་མོས།
རྩོམ་ཡིག་རྗེས་མ།
དཀར་ནག

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1