ཉི་འོད་ཁྱོར་བ་གང་རེ་གདོང་ལ་བྱུག་བཞིན།།
ལག་པའི་ཕྱི་ནང་ཀུན་པོར་ཤུགས་ཀྱིས་བྱིལ་ཡང་།།
སེམས་ཀྱི་ལུང་བར་འཁྲུངས་པའི་ཁ་བའི་རི་བོ།།
ལག་ཏུ་འཁྱིལ་བའི་ཉི་མས་བཞུ་བར་མ་ནུས།།
ལམ་འགྲམ་བཞད་པའི་ཡིད་འོང་ལྷ་སའི་མེ་ཏོག །
མིག་གི་ཟེར་མས་ལན་གྲངས་དུ་མར་འཐུང་ཡང་།།
མགྲིན་པའི་སྐོམ་གདུང་སེལ་བ་ཐག་རིང་ཐག་ཉེ།།
བྲང་གཞུང་མཚོ་མོའི་ཚུལ་གྱིས་འཁྱིལ་བར་མ་ནུས།།
རྟ་ཁྱུའི་རྔོག་ཆུང་གཡོ་བའི་མེ་ལོང་ནང་གི།
ཉིད་ཀྱི་ལན་བུས་སྤྲུལ་པའི་བརྩེ་བའི་མེ་ཏོག །
ང་ཡི་ཁ་རླངས་འཇམ་པོས་བསྒུལ་བར་མ་ནུས།།
ཁོག་པའི་ཉིན་སྲིབ་ཟེར་ཡ་འཁྱག་སོབ་གང་རེད།།
སེམས་ཀྱི་རི་མོ་འབུར་བའི་ཟླ་བའི་ཞལ་རས།།
ཞི་བདེའི་རྒྱ་མཚོའི་མཁའ་ནས་གཅེས་དགོད་གནང་དུས།།
གསེར་ཉར་སྤྲུལ་ཏེ་འོ་ཆུང་གྲངས་མེད་བྱིན་ཡོད།།
