ཟམ་མེ་ཟིམ་མེ།

ཆར་བ་ཁྱོད་ཀྱི་ཕྱོགས་ནས་བབས་པ་ལྟར།

ང་ཡི་དྲན་པ་ཡོངས་སུ་བརླན།

 

ནམ་མཁའ་སྤྲིན་གྱིས་བཀབ་པ།

སྤྲིན་པ་རླུང་གིས་བསེད་པ།

ཆར་བས་སེམས་པ་བརྟོལ་བ།

སུ་ལ་གསང་ཐབས་མི་འདུག་ཨང་།

 

སྣང་བ་འདིའི་ངོས་སུ་ཁྱོད་གཅིག་པུའི་ཡི་གེ་བབས།

ཆར་གྱིས་བྲན་པ་ན་ལྷག་ཏུ་གསལ་བ་ལ།

ངག་ལ་བསྐྱོན་པ་ན་གདངས་ཀྱིས་དབུལ་བ་ལ།

 

ཆར་བ་མུ་མཐུད་དུ་དབབ་པར་མཛོད་ཅིག

ཁྱོད་ནི་ནམ་མཁའ་འོ།

སྲིད་པའི་ཁང་སྟོང་འདི་ན་སྡོམ་ཐག་མང་བར་མ་སྨྲེང་དང་།

རྨི་ལམ་གྱི་སྐུད་པ་འདིས།

ཁྱོད་ལ་རྩྭ་ཐང་ཞིག་བསླེ་བར་འདོད།

              

འུ་གཉིས་ཀ

 

ཁོག་པའི་ནང་ལ་མེ་ལྕེ་ཡར་ལ་ལངས་ན།

ཁྱོད་ལ་འཚམས་འདྲིའི་ཚུལ་དུ་འོ་ཞིག་བྱ་ངེས།

ངས་ཁྱོད་རང་ག་ལ་སྲེག་ནུས།

 

ཞེ་སྡང་གི་ཐབ་མགོ་ནས་ཀྱང་།

ཆབ་རོམ་དུམ་བུ་གཉིས་ལྟར།

འུ་གཉི་ཀ  སླ་ང་གཅིག་ལ་ཞུ་འགྲོ་ཨང་།                

       

 དབུགས་ཀྱི་འབྱིན་རྔུབ།

 

 དབུགས་འབྱིན་ཐེངས་ཤིག་གི་ཆགས་སྡང་གི་ལྕགས་འཛེར།

རྔུབ་ཐེངས་ཤིག་གི་ན་ཟུག་གི་རྡོ་བར་གླན་ཐེངས་རེར།

ཁེར་རྐྱང་གི་གྱང་ངོས་ལ་བཀལ་འདུག་པ་ནི།

བརྩེ་བ་ཁུར་ཤུལ་གྱི་འགྱིག་ཁུག་སྟོང་བ་ཞིག་གོ།

དྲན་པ་རླུང་བཞོན་མ་འདི།   ཤུར་ཤུར་གཡུགས།

ཧྲག་ཧྲག་སྤྲུགས་རྗེས་ཀྱི་འགྱུག་ཁུག་འདི་ལ།

ས་དང་རྡུལ་གྱིས་གནས་བཅའ་རོགས།

ནང་སེམས་ཐེད་པོ་འདི་ཡིས།

དུས་ཚོད་ཀྱི་ཆར་ཆུ་དང་སྐྱིད་སྡུག་གི་མིག་ཆུ་ཚོགས་པ་མ་རེད།

ཅིས་ཀྱང་།     ས་དང་རྡུལ་གྱིས་འཚང་བར་གྱིས།

ངས་ནི་བྱེ་མའི་རི་བོ་བཞིན།

རླུང་གི་འཁྲབ་ཡོལ་དང་ལྷན་དུ།

གཟུགས་རིས་སྣ་ཚོགས་གར་ལ་བསྒྱུར་འདོད།